ऋषय ऊचुः । (१।१)

अघोरेशस्य माहात्म्यं भवता कथितं पुरा । (१।२)

पूजां प्रतिष्ठां देवस्य भगवन्वक्तुमर्हसि ॥ (१।३)

सूत उवाच । (२।१)

अघोरेणाङ्गयुक्तेन विधिवच्च विशेषतः । (२।२)

प्रतिष्ठालिङ्गविधिना नान्यथा मुनिपुङ्गवाः ॥ (२।३)

तथाग्निपूजां वै कुर्याद्यथा पूजा तथैव च । (३।१)

सहस्रं वा तदर्धं वा शतमष्टोत्तरं तु वा ॥ (३।२)

तिलैर् होमः प्रकर्तव्यो दधिमध्वाज्यसंयुतैः । (४।१)

घृतसक्तुमधूनां च सर्वदुःखप्रमार्जनम् ॥ (४।२)

व्याधीनां नाशनं चैव तिलहोमस्तु भूतिदः । (५।१)

सहस्रेण महाभूतिः शतेन व्याधिनाशनम् ॥ (५।२)

सर्वदुःखविनिर्मुक्तो जपेन च न संशयः । (६।१)

अष्टोत्तरशतेनैव त्रिकाले च यथाविधि ॥ (६।२)

अष्टोत्तरसहस्रेण षण्मासाज्जायते ध्रुवम् । (७।१)

सिद्धयो नैव संदेहो राज्यमण्डलिनाम् अपि ॥ (७।२)

सहस्रेण ज्वरो याति क्षीरेण च जुहोति यम् । (८।१)

त्रिकालं मासमेकं तु सहस्रं जुहुयात्पयः ॥ (८।२)

मासेन सिध्यते तस्य महासौभाग्यमुत्तमम् । (९।१)

सिध्यते चाब्दहोमेन क्षौद्राज्यदधिसंयुतम् ॥ (९।२)

यवक्षीराज्यहोमेन जातितण्डुलकेन वा । (१०।१)

प्रीयेत भगवानीशो ह्यघोरः परमेश्वरः ॥ (१०।२)

दध्ना पुष्टिर्नृपाणां च क्षीरहोमेन शान्तिकम् । (११।१)

षण्मासं तु घृतं हुत्वा सर्वव्याधिविनाशनम् ॥ (११।२)

राजयक्ष्मा तिलैर् होमान्नश्यते वत्सरेण तु । (१२।१)

यवहोमेन चायुष्यं घृतेन च जयस्तदा ॥ (१२।२)

सर्वकुष्ठक्षयार्थं च मधुनाक्तैश्च तण्डुलैः । (१३।१)

जुहुयादयुतं नित्यं षण्मासान्नियतः सदा ॥ (१३।२)

आज्यं क्षीरं मधुश्चैव मधुरत्रयमुच्यते । (१४।१)

समस्तं तुष्यते तस्य नाशयेद्वै भगन्दरम् ॥ (१४।२)

केवलं घृतहोमेन सर्वरोगक्षयः स्मृतः । (१५।१)

सर्वव्याधिहरं ध्यानं स्थापनं विधिनार्चनम् ॥ (१५।२)

एवं संक्षेपतः प्रोक्तमघोरस्य महात्मनः । (१६।१)

प्रतिष्ठा यजनं सर्वं नन्दिना कथितं पुरा ॥ (१६।२)

ब्रह्मपुत्राय शिष्याय तेन व्यासाय सुव्रताः ॥ (१७।१)

इति श्रीलिङ्गमहापुराणे उत्तरभागे एकोनपञ्चाशत्तमो ऽध्यायः ॥ (१८।१)