सनत्कुमार उवाच । (१।१)

पञ्च ब्रह्माणि मे नन्दिन्नाचक्ष्व गणसत्तम । (१।२)

श्रेयःकरणभूतानि पवित्राणि शरीरिणाम् ॥ (१।३)

नन्दिकेश्वर उवाच । (२।१)

शिवस्यैव स्वरूपाणि पञ्च ब्रह्माह्वयानि ते । (२।२)

कथयामि यथातत्त्वं पद्मयोनेः सुतोत्तम ॥ (२।३)

सर्वलोकैकसंहर्ता सर्वलोकैकरक्षिता । (३।१)

सर्वलोकैकनिर्माता पञ्चब्रह्मात्मकः शिवः ॥ (३।२)

सर्वेषामेव लोकानां यदुपादानकारणम् । (४।१)

निमित्तकारणं चाहुः स शिवः पञ्चधा स्मृतः ॥ (४।२)

मूर्तयः पञ्च विख्याताः पञ्च ब्रह्माह्वयाः पराः । (५।१)

सर्वलोकशरण्यस्य शिवस्य परमात्मनः ॥ (५।२)

क्षेत्रज्ञः प्रथमा मूर्तिः शिवस्य परमेष्ठिनः । (६।१)

भोक्ता प्रकृतिवर्गस्य भोग्यस्येशानसंज्ञितः ॥ (६।२)

स्थाणोस्तत्पुरुषाख्या च द्वितीया मूर्तिरुच्यते । (७।१)

प्रकृतिः सा हि विज्ञेया परमात्मगुहात्मिका ॥ (७।२)

अघोराख्या तृतीया च शंभोर्मूर्तिर्गरीयसी । (८।१)

बुद्धेः सा मूर्तिरित्युक्ता धर्माद्यष्टाङ्गसंयुता ॥ (८।२)

चतुर्थी वामदेवाख्या मूर्तिः शंभोर् गरीयसी । (९।१)

अहङ्कारात्मकत्वेन व्याप्य सर्वं व्यवस्थिता ॥ (९।२)

सद्योजाताह्वया शंभोः पञ्चमी मूर्तिरुच्यते । (१०।१)

मनस्तत्त्वात्मकत्वेन स्थिता सर्वशरीरिषु ॥ (१०।२)

ईशानः परमो देवः परमेष्ठी सनातनः । (११।१)

श्रोत्रेन्द्रियात्मकत्वेन सर्वभूतेष्ववस्थितः ॥ (११।२)

स्थितस्तत्पुरुषो देवः शरीरेषु शरीरिणाम् । (१२।१)

त्वगिन्द्रियात्मकत्वेन तत्त्वविद्भिरुदाहृतः ॥ (१२।२)

अघोरोऽपि महादेवश्चक्षुरात्मतया बुधैः । (१३।१)

कीर्तितः सर्वभूतानां शरीरेषु व्यवस्थितः ॥ (१३।२)

जिह्वेन्द्रियात्मकत्वेन वामदेवोऽपि विश्रुतः । (१४।१)

अङ्गभाजाम् अशेषाणाम् अङ्गेषु परिधिष्ठितः ॥ (१४।२)

घ्राणेन्द्रियात्मकत्वेन सद्योजातः स्मृतो बुधैः । (१५।१)

प्राणभाजां समस्तानां विग्रहेषु व्यवस्थितः ॥ (१५।२)

सर्वेष्वेव शरीरेषु प्राणभाजां प्रतिष्ठितः । (१६।१)

वागिन्द्रियात्मकत्वेन बुधैरीशान उच्यते ॥ (१६।२)

पाणीन्द्रियात्मकत्वेन स्थितस्तत्पुरुषो बुधैः । (१७।१)

उच्यते विग्रहेष्वेव सर्वविग्रहधारिणाम् ॥ (१७।२)

सर्वविग्रहिणां देहे ह्यघोरोऽपि व्यवस्थितः । (१८।१)

पादेन्द्रियात्मकत्वेन कीर्तितस् तत्त्ववेदिभिः ॥ (१८।२)

पाय्विन्द्रियात्मकत्वेन वामदेवो व्यवस्थितः । (१९।१)

सर्वभूतनिकायानां कायेषु मुनिभिः स्मृतः ॥ (१९।२)

उपस्थात्मतया देवः सद्योजातः स्थितः प्रभुः । (२०।१)

इष्यते वेदशास्त्रज्ञैर्देहेषु प्राणधारिणाम् ॥ (२०।२)

ईशानं प्राणिनां देवं शब्दतन्मात्ररूपिणम् । (२१।१)

आकाशजनकं प्राहुर्मुनिवृन्दारकप्रजाः ॥ (२१।२)

प्राहुस्तत्पुरुषं देवं स्पर्शतन्मात्रकात्मकम् । (२२।१)

समीरजनकं प्राहुर्भगवन्तं मुनीश्वराः ॥ (२२।२)

रूपतन्मात्रकं देवमघोरमपि घोरकम् । (२३।१)

प्राहुर्वेदविदो मुख्या जनकं जातवेदसः ॥ (२३।२)

रसतन्मात्ररूपत्वात् प्रथितं तत्त्ववेदिनः । (२४।१)

वामदेवम् अपां प्राहुर्जनकत्वेन संस्थितम् ॥ (२४।२)

सद्योजातं महादेवं गन्धतन्मात्ररूपिणम् । (२५।१)

भूम्यात्मानं प्रशंसन्ति सर्वतत्त्वार्थवेदिनः ॥ (२५।२)

आकाशात्मानम् ईशानम् आदिदेवं मुनीश्वराः । (२६।१)

परमेण महत्त्वेन सम्भूतं प्राहुरद्भुतम् ॥ (२६।२)

प्रभुं तत्पुरुषं देवं पवनं पवनात्मकम् । (२७।१)

समस्तलोकव्यापित्वात् प्रथितं सूरयो विदुः ॥ (२७।२)

अथार्चिततया ख्यातमघोरं दहनात्मकम् । (२८।१)

कथयन्ति महात्मानं वेदवाक्यार्थवेदिनः ॥ (२८।२)

तोयात्मकं महादेवं वामदेवं मनोरमम् । (२९।१)

जगत्संजीवनत्वेन कथितं मुनयो विदुः ॥ (२९।२)

विश्वंभरात्मकं देवं सद्योजातं जगद्गुरुम् । (३०।१)

चराचरैकभर्तारं परं कविवरा विदुः ॥ (३०।२)

पञ्चब्रह्मात्मकं सर्वं जगत्स्थावरजङ्गमम् । (३१।१)

शिवानन्दं तदित्याहुर् मुनयस् तत्त्वदर्शिनः ॥ (३१।२)

पञ्चविंशतितत्त्वात्मा प्रपञ्चे यः प्रदृश्यते । (३२।१)

पञ्चब्रह्मात्मकत्वेन स शिवो नान्यतां गतः ॥ (३२।२)

पञ्चविंशतितत्त्वात्मा पञ्चब्रह्मात्मकः शिवः । (३३।१)

श्रेयोऽर्थिभिर् अतो नित्यं चिन्तनीयः प्रयत्नतः ॥ (३३।२)

इति श्रीलिङ्गमहापुराणे उत्तरभागे पञ्चब्रह्मकथनं नाम चतुर्दशो ऽध्यायः ॥ (३४।१)