ऋषय ऊचुः । (१।१)

जीवच्छ्राद्धविधिः प्रोक्तस्त्वया सूत महामते । (१।२)

मूर्खाणाम् अपि मोक्षार्थमस्माकं रोमहर्षण ॥ (१।३)

रुद्रादित्यवसूनां च शक्रादीनां च सुव्रत । (२।१)

प्रतिष्ठा कीदृशी शंभोर् लिङ्गमूर्तेश्च शोभना ॥ (२।२)

विष्णोः शक्रस्य देवस्य ब्रह्मणश्च महात्मनः । (३।१)

अग्नेर् यस्य निरृतेर् वरुणस्य महाद्युतेः ॥ (३।२)

वायोः सोमस्य यक्षस्य कुबेरस्यामितात्मनः । (४।१)

ईशानस्य धरायाश्च श्रीप्रतिष्ठाथ वा कथम् ॥ (४।२)

दुर्गाशिवाप्रतिष्ठा च हैमवत्याश्च शोभना । (५।१)

स्कन्दस्य गणराजस्य नन्दिनश्च विशेषतः ॥ (५।२)

तथान्येषां च देवानां गणानामपि वा पुनः । (६।१)

प्रतिष्ठालक्षणं सर्वं विस्ताराद् वक्तुमर्हसि ॥ (६।२)

भवान्सर्वार्थतत्त्वज्ञो रुद्रभक्तश्च सुव्रत । (७।१)

कृष्णद्वैपायनस्यासि साक्षात्त्वमपरा तनुः ॥ (७।२)

सुमन्तुर्जैमिनिश्चैव पैलश्च परमर्षयः । (८।१)

गुरुभक्तिं तथा कर्तुं समर्थो रोमहर्षणः ॥ (८।२)

इति व्यासस्य विपुला गाथा भागीरथीतटे । (९।१)

एकः समो वा भिन्नो वा शिष्यस्तस्य महाद्युतेः ॥ (९।२)

वैशंपायनतुल्यो ऽसि व्यासशिष्येषु भूतले । (१०।१)

तस्मादस्माकमखिलं वक्तुमर्हसि सांप्रतम् ॥ (१०।२)

एवमुक्त्वा स्थितेष्वेव तेषु सर्वेषु तत्र च । (११।१)

बभूव विस्मयो ऽतीव मुनीनां तस्य चाग्रतः ॥ (११।२)

अथान्तरिक्षे विपुला साक्षाद्देवी सरस्वती । (१२।१)

अलं मुनीनां प्रश्नो ऽयमिति वाचा बभूव ह ॥ (१२।२)

सर्वं लिङ्गमयं लोकं सर्वं लिङ्गे प्रतिष्ठितम् । (१३।१)

तस्मात्सर्वं परित्यज्य स्थापयेत्पूजयेच्च तत् ॥ (१३।२)

लिङ्गस्थापनसन्मार्गनिहितस्वायतासिना । (१४।१)

आशु ब्रह्माण्डमुद्भिद्य निर्गच्छेदविशङ्कया ॥ (१४।२)

उपेन्द्राम्भोजगर्भेन्द्रयमाम्बुधनदेश्वराः । (१५।१)

तथान्ये च शिवं स्थाप्य लिङ्गमूर्तिं महेश्वरम् ॥ (१५।२)

स्वेषु स्वेषु च पक्षेषु प्रधानास्ते यथा द्विजाः । (१६।१)

ब्रह्मा हरश्च भगवान्विष्णुर्देवी रमा धरा ॥ (१६।२)

लक्ष्मीर्धृतिः स्मृतिः प्रज्ञा धरा दुर्गा शची तथा । (१७।१)

रुद्राश्च वसवः स्कन्दो विशाखः शाख एव च ॥ (१७।२)

नैगमेशश्च भगवांल्लोकपाला ग्रहास्तथा । (१८।१)

सर्वे नन्दिपुरोगाश्च गणा गणपतिः प्रभुः ॥ (१८।२)

पितरो मुनयः सर्वे कुबेराद्याश्च सुप्रभाः । (१९।१)

आदित्या वसवः सांख्या अश्विनौ च भिषग्वरौ ॥ (१९।२)

विश्वेदेवाश्च साध्याश्च पशवः पक्षिणो मृगाः । (२०।१)

ब्रह्मादिस्थावरान्तं च सर्वं लिङ्गे प्रतिष्ठितम् ॥ (२०।२)

तस्मात्सर्वं परित्यज्य स्थापयेल्लिङ्गमव्ययम् । (२१।१)

यत्नेन स्थापितं सर्वं पूजितं पूजयेद्यदि ॥ (२१।२)

इति श्रीलिङ्गमहापुराणे उत्तरभागे षट्चत्वारिंशो ऽध्यायः ॥ (२२।१)