शैलादिरुवाच । (१।१)

अथवा देवमीशानं लिङ्गे सम्पूजयेच्छिवम् । (१।२)

ब्राह्मणः शिवभक्तश्च शिवध्यानपरायणः ॥ (१।३)

अग्निरित्यादिना भस्म गृहीत्वा ह्यग्निहोत्रजम् । (२।१)

उद्धूलयेद्धि सर्वाङ्गमापादतलमस्तकम् ॥ (२।२)

आचामेद्ब्रह्मतीर्थेन ब्रह्मसूत्री ह्युदङ्मुखः । (३।१)

अथौं नमः शिवायेति तनुं कृत्वात्मनः पुनः ॥ (३।२)

देवं च तेन मन्त्रेण पूजयेत्प्रणवेन च । (४।१)

सर्वस्मादधिका पूजा अघोरेशस्य शूलिनः ॥ (४।२)

सामान्यं यजनं सर्वमग्निकार्यं च सुव्रत । (५।१)

मन्त्रभेदः प्रभोस्तस्य अघोरध्यानमेव च ॥ (५।२)

मन्त्रः । (६।१)

अघोरेभ्यो ऽथ घोरेभ्यो घोरघोरतरेभ्यः शर्वेभ्यः सर्वशर्वेभ्यो नमस्ते अस्तु रुद्ररूपेभ्यः ॥ (६।२)

अघोरेभ्यः प्रशान्तहृदयाय नमः । (७।१)

अथ घोरेभ्यः सर्वात्मब्रह्मशिरसे स्वाहा । (७।२)

घोरघोरतरेभ्यः ज्वालामालिनी शिखायै वषट् । (७।३)

सर्वेभ्यः सर्वशर्वेभ्यः पिङ्गलकवचाय हुम् । (७।४)

नमस्ते अस्तु रुद्ररूपेभ्यः नेत्रत्रयाय वषट् । (७।५)

सहस्राक्षाय दुर्भेदाय पाशुपतास्त्राय हुं फट् । (७।६)

स्नात्वाचाम्य तनुं कृत्वा समभ्युक्ष्याघमर्षणम् । (७।७)

तर्पणं विधिना चार्घ्यं भानवे भानुपूजनम् ॥ (७।८)

समं चाघोरपूजायां मन्त्रमात्रेण भेदितम् । (८।१)

मार्गशुद्धिस्तथा द्वारि पूजां वास्त्वधिपस्य च ॥ (८।२)

कृत्वा करं विशोध्याग्रे स शुभासनमास्थितः । (९।१)

नासाग्रकमले स्थाप्य दग्धाक्षः क्षुभिकाग्निना ॥ (९।२)

वायुना प्रेर्य तद्भस्म विशोध्य च शुभांभसा । (१०।१)

शक्त्यामृतमये ब्रह्मकलां तत्र प्रकल्पयेत् ॥ (१०।२)

अघोरं पञ्चधा कृत्वा पञ्चाङ्गसहितं पुनः । (११।१)

इत्थं ज्ञानक्रियामेवं विन्यस्य च विधानतः ॥ (११।२)

न्यासस् त्रिनेत्रसहितो हृदि ध्यात्वा वरासने । (१२।१)

नाभौ वह्निगतं स्मृत्वा भ्रूमध्ये दीपवत्प्रभुम् ॥ (१२।२)

शान्त्या बीजाङ्कुरानन्तधर्माद्यैरपि संयुते । (१३।१)

सोमसूर्याग्निसम्पन्ने मूर्तित्रयसमन्विते ॥ (१३।२)

वामादिभिश्च सहिते मनोन्मन्याप्यधिष्ठिते । (१४।१)

शिवासनेत्ममूर्तिस्थम् अक्षयाकाररूपिणम् ॥ (१४।२)

अष्टत्रिंशत्कलादेहं त्रितत्त्वसहितं शिवम् । (१५।१)

अष्टादशभुजं देवं गजचर्मोत्तरीयकम् ॥ (१५।२)

सिंहाजिनांबरधरमघोरं परमेश्वरम् । (१६।१)

द्वात्रिंशाक्षररूपेण द्वात्रिंशच्छक्तिभिर्वृतम् ॥ (१६।२)

सर्वाभरणसंयुक्तं सर्वदेवनमस्कृतम् । (१७।१)

कपालमालाभरणं सर्ववृश्चिकभूषणम् ॥ (१७।२)

पूर्णेन्दुवदनं सौम्यं चन्द्रकोटिसमप्रभम् । (१८।१)

चन्द्ररेखाधरं शक्त्या सहितं नीलरूपिणम् ॥ (१८।२)

हस्ते खड्गं खेटकं पाशम् एके रत्नैश्चित्रं चाङ्कुशं नागकक्षाम् । (१९।१)

शरासनं पाशुपतं तथास्त्रं दण्डं च खट्वाङ्गमथापरे च ॥ (१९।२)

तन्त्रीं च घण्टां विपुलं च शूलं तथापरे डामरुकं च दिव्यम् । (२०।१)

वज्रं गदां टङ्कमेकं च दीप्तं समुद्गरं हस्तमथास्य शंभोः ॥ (२०।२)

वरदाभयहस्तं च वरेण्यं परमेश्वरम् । (२१।१)

भावयेत्पूजयेच्चापि वह्नौ होमं च कारयेत् ॥ (२१।२)

होमश्च पूर्ववत्सर्वो मन्त्रभेदश्च कीर्तितः । (२२।१)

अष्टपुष्पादि गन्धादि पूजास्तुतिनिवेदनम् ॥ (२२।२)

अन्तर्बलिं च कुण्डस्य वाह्नेयेन विधानतः । (२३।१)

मण्डलं विधिना कृत्वा मन्त्रैरेतैर्यथाक्रमम् ॥ (२३।२)

रुद्रेभ्यो मातृगणेभ्यो यक्षेभ्यो ऽसुरेभ्यो ग्रहेभ्यो राक्षसेभ्यो नागेभ्यो नक्षत्रेभ्यो विश्वगणेभ्यः क्षेत्रपालेभ्यः अथ वायुवरुणदिग्भागे क्षेत्रपालबलिं क्षिपेत् । (२४।१)

अर्घ्यं गन्धं च पुष्पं च धूपं दीपं च सुव्रताः । (२४।२)

नैवेद्यं मुखवासादि निवेद्यं वै यथाविधि ॥ (२४।३)

विज्ञाप्यैवं विसृज्याथ अष्टपुष्पैश्च पूजनम् । (२५।१)

सर्वसामान्यमेतद्धि पूजायां मुनिपुङ्गवाः ॥ (२५।२)

एवं संक्षेपतः प्रोक्तमघोरार्चादि सुव्रत । (२६।१)

अघोरार्चाविधानं च लिङ्गे वा स्थण्डिले ऽपि वा ॥ (२६।२)

स्थण्डिलात्कोटिगुणितं लिङ्गार्चनमनुत्तमम् । (२७।१)

लिङ्गार्चनरतो विप्रो महापातकसंभवैः ॥ (२७।२)

पापैरपि न लिप्येत पद्मपत्रमिवांभसा । (२८।१)

लिङ्गस्य दर्शनं पुण्यं दर्शनात्स्पर्शनं वरम् ॥ (२८।२)

अर्चनादधिकं नास्ति ब्रह्मपुत्र न संशयः । (२९।१)

एवं संक्षेपतः प्रोक्तमघोरार्चनमुत्तमम् ॥ (२९।२)

वर्षकोटिशतेनापि विस्तरेण न शक्यते ॥ (३०।१)

इति श्रीलिङ्गमहापुराणे उत्तरभागे षड्विंशतितमो ऽध्यायः ॥ (३१।१)