ऋषय ऊचुः । (१।१)

वैष्णवा इति ये प्रोक्ता वासुदेवपरायणाः । (१।२)

कानि चिह्नानि तेषां वै तन्नो ब्रूहि महामते ॥ (१।३)

तेषां वा किं करोत्येष भगवान् भूतभावनः । (२।१)

एतन्मे सर्वमाचक्ष्व सूत सर्वार्थवित्तम ॥ (२।२)

सूत उवाच । (३।१)

अंबरीषेण वै पृष्टो मार्कण्डेयः पुरा मुनिः । (३।२)

युष्माभिर् अद्य यत् प्रोक्तं तद्वदामि यथातथम् ॥ (३।३)

मार्कण्डेय उवाच । (४।१)

शृणु राजन्यथान्यायं यन्मां त्वं परिपृच्छसि । (४।२)

यत्रास्ते विष्णुभक्तस्तु तत्र नारायणः स्थितः ॥ (४।३)

विष्णुरेव हि सर्वत्र येषां वै देवता स्मृता । (५।१)

कीर्त्यमाने हरौ नित्यं रोमाञ्चो यस्य वर्तते ॥ (५।२)

कंपः स्वेदस् तथाक्षेषु दृश्यन्ते जलबिन्दवः । (६।१)

विष्णुभक्तिसमायुक्तान् श्रौतस्मार्तप्रवर्तकान् ॥ (६।२)

प्रीतो भवति यो दृष्ट्वा वैष्णवो ऽसौ प्रकीर्तितः । (७।१)

नान्यदाच्छादयेद्वस्त्रं वैष्णवो जगतो रणे ॥ (७।२)

विष्णुभक्तम् अथायान्तं यो दृष्ट्वा संमुखस्थितः । (८।१)

प्रणामादि करोत्येवं वासुदेवे यथा तथा ॥ (८।२)

स वै भक्त इति ज्ञेयः स जयी स्याज्जगत्त्रये । (९।१)

रूक्षाक्षराणि शृण्वन्वै तथा भागवतेरितः ॥ (९।२)

प्रणामपूर्वं क्षान्त्या वै यो वदेद्वैष्णवो हि सः । (१०।१)

गन्धपुष्पादि किं सर्वं शिरसा यो हि धारयेत् ॥ (१०।२)

हरेः सर्वमितीत्येवं मत्वासौ वैष्णवः स्मृतः । (११।१)

विष्णुक्षेत्रे शुभान्येव करोति स्नेहसंयुतः ॥ (११।२)

प्रतिमां च हरेर्नित्यं पूजयेत्प्रयतात्मवान् । (१२।१)

विष्णुभक्तः स विज्ञेयः कर्मणा मनसा गिरा ॥ (१२।२)

नारायणपरो नित्यं महाभागवतो हि सः । (१३।१)

भोजनाराधनं सर्वं यथाशक्त्या करोति यः ॥ (१३।२)

विष्णुभक्तस्य च सदा यथान्यायं हि कथ्यते । (१४।१)

नारायणपरो विद्वान् यस्यान्नं प्रीतमानसः ॥ (१४।२)

अश्नाति तद्धरेरास्यं गतमन्नं न संशयः । (१५।१)

स्वार्चनादपि विश्वात्मा प्रीतो भवति माधवः ॥ (१५।२)

महाभागवते तच्च दृष्ट्वासौ भक्तवत्सलः । (१६।१)

वासुदेवपरं दृष्ट्वा वैष्णवं दग्धकिल्बिषम् ॥ (१६।२)

देवापि भीतास्तं यान्ति प्रणिपत्य यथागतम् । (१७।१)

श्रूयतां हि पुरावृत्तं विष्णुभक्तस्य वैभवम् ॥ (१७।२)

दृष्ट्वा यमो ऽपि वै भक्तं वैष्णवं दग्धकिल्बिषम् । (१८।१)

उत्थाय प्राञ्जलिर्भूत्वा ननाम भृगुनन्दनम् ॥ (१८।२)

तस्मात् सम्पूजयेद् भक्त्या वैष्णवान् विष्णुवन्नरः । (१९।१)

स याति विष्णुसामीप्यं नात्र कार्या विचारणा ॥ (१९।२)

अन्यभक्तसहस्रेभ्यो विष्णुभक्तो विशिष्यते । (२०।१)

विष्णुभक्तसहस्रेभ्यो रुद्रभक्तो विशिष्यते । (२०।२)

रुद्रभक्तात्परतरो नास्ति लोके न संशयः ॥ (२०।३)

तस्मात्तु वैष्णवं चापि रुद्रभक्तमथापि वा । (२१।१)

पूजयेत्सर्वयत्नेन धर्मकामार्थमुक्तये ॥ (२१।२)

इति श्रीलिङ्गमहापुराणे उत्तरभागे विष्णुभक्तकथनं नाम चतुर्थो ऽध्यायः ॥ (२२।१)