अथातो मिश्रकमध्यायं व्याख्यास्यामः ॥ (१।१)

यथोवाच भगवान् धन्वन्तरिः ॥ (२।१)

मातुलुङ्गाग्निमन्थौ च भद्रदारु महौषधम् । (३।१)

अहिंस्रा चैव रास्ना च प्रलेपो वातशोफजित् ॥ (३।२)

दूर्वा च नलमूलं च मधुकं चन्दनं तथा । (४।१)

शीतलाश् च गणाः सर्वे प्रलेपः पित्तशोफहृत् ॥ (४।२)

आगन्तुजे रक्तजे च ह्य् एष एव विधिः स्मृतः । (५।१)

विधिर्विषघ्नो विषजे पित्तघ्नो ऽपि हितस्तथा ॥ (५।२)

अजगन्धाश्वगन्धा च काला सरलया सह । (६।१)

एकैषिकाजशृङ्गी च प्रलेपः श्लेष्मशोफहृत् ॥ (६।२)

एते वर्गास्त्रयो लोध्रं पथ्या पिण्डीतकानि च । (७।१)

अनन्ता चेति लेपो ऽयं सान्निपातिकशोफहृत् ॥ (७।२)

स्निग्धाम्ललवणो वाते कोष्णः शीतः पयोयुतः । (८।१)

पित्ते चोष्णः कफे क्षारमूत्राढ्यस्तत्प्रशान्तये ॥ (८।२)

शणमूलकशिग्रूणां फलानि तिलसर्षपाः । (९।१)

सक्तवः किण्वमतसी द्रव्याण्युष्णानि पाचनम् ॥ (९।२)

चिरबिल्वो ऽग्निको दन्ती चित्रको हयमारकः । (१०।१)

कपोतगृध्रकङ्काणां पुरीषाणि च दारणम् । (१०।२)

क्षारद्रव्याणि वा यानि क्षारो वा दारणं परम् ॥ (१०।३)

द्रव्याणां पिच्छिलानां तु त्वङ्मूलानि प्रपीडनम् । (११।१)

यवगोधूममाषाणां चूर्णानि च समासतः ॥ (११।२)

शङ्खिन्यङ्कोठसुमनःकरवीरसुवर्चलाः । (१२।१)

शोधनानि कषायाणि वर्गश्चारग्वधादिकः ॥ (१२।२)

अजगन्धाजशृङ्गी च गवाक्षी लाङ्गलाह्वया । (१३।१)

पूतीकश्चित्रकः पाठा विडङ्गैलाहरेणवः ॥ (१३।२)

कटुत्रिकं यवक्षारो लवणानि मनःशिला । (१४।१)

कासीसं त्रिवृता दन्ती हरितालं सुराष्ट्रजा ॥ (१४।२)

संशोधनीनां वर्तीनां द्रव्याण्येतानि निर्दिशेत् । (१५।१)

एतैर् एवौषधैः कुर्यात्कल्कान् अपि च शोधनान् ॥ (१५।२)

अर्कोत्तमां स्नुहीक्षीरं पिष्ट्वा क्षारोत्तमान् अपि । (१६।१)

जातीमूलं हरिद्रे द्वे कासीसं कटुरोहिणीम् ॥ (१६।२)

पूर्वोद्दिष्टानि चान्यानि कुर्यात् संशोधनं घृतम् । (१७।१)

मयूरको राजवृक्षो निम्बः कोशातकी तिलाः ॥ (१७।२)

बृहती कण्टकारी च हरितालं मनःशिला । (१८।१)

शोधनानि च योज्यानि तैले द्रव्याणि शोधने ॥ (१८।२)

कासीसे सैन्धवे किण्वे वचायां रजनीद्वये । (१९।१)

शोधनाङ्गेषु चान्येषु चूर्णं कुर्वीत शोधनम् ॥ (१९।२)

सालसारादिसारेषु पटोलत्रिफलासु च । (२०।१)

रसक्रिया विधातव्या शोधनी शोधनेषु च ॥ (२०।२)

श्रीवेष्टके सर्जरसे सरले देवदारुणि । (२१।१)

सारेष्व् अपि च कुर्वीत मतिमान् व्रणधूपनम् ॥ (२१।२)

कषायाणामनुष्णानां वृक्षाणां त्वक्षु साधितम् । (२२।१)

शृतं शीतं कषायं वा रोपणार्थेषु शस्यते ॥ (२२।२)

सोमामृताश्वगन्धासु काकोल्यादौ गणे तथा । (२३।१)

क्षीरिप्ररोहेष्व् अपि च वर्तयो रोपणाः स्मृताः ॥ (२३।२)

समङ्गा सोमसरला सोमवल्कः सचन्दनः । (२४।१)

काकोल्यादिश् च कल्कः स्यात् प्रशस्तो व्रणरोपणे ॥ (२४।२)

पृथक्पर्ण्यात्मगुप्ता च हरिद्रे मालती सिता । (२५।१)

काकोल्यादिश् च योज्यः स्याद्भिषजा रोपणे घृते ॥ (२५।२)

कालानुसार्यागुरुणी हरिद्रे देवदारु च । (२६।१)

प्रियङ्गवश् च रोध्रं च तैले योज्यानि रोपणे ॥ (२६।२)

कङ्गुका त्रिफला रोध्रं कासीसं श्रवणाह्वया । (२७।१)

धवाश्वकर्णयोस्त्वक् च रोपणं चूर्णमिष्यते ॥ (२७।२)

प्रियङ्गुका सर्जरसः पुष्पकासीसम् एव च । (२८।१)

त्वक्चूर्णं धवजं चैव रोपणार्थं प्रशस्यते ॥ (२८।२)

त्वक्षु न्यग्रोधवर्गस्य त्रिफलायास्तथैव च । (२९।१)

रसक्रियां रोपणार्थे विदधीत यथाक्रमम् ॥ (२९।२)

अपामार्गो ऽश्वगन्धा च तालपत्री सुवर्चला । (३०।१)

उत्सादने प्रशस्यन्ते काकोल्यादिश् च यो गणः ॥ (३०।२)

कासीसं सैन्धवं किण्वं कुरुविन्दो मनःशिला । (३१।१)

कुक्कुटाण्डकपालानि सुमनोमुकुलानि च ॥ (३१।२)

फले शैरीषकारञ्जे धातुचूर्णानि यानि च । (३२।१)

व्रणेषूत्सन्नमांसेषु प्रशस्तान्यवसादने ॥ (३२।२)

समस्तं वर्गमर्धं वा यथालाभमथापि वा । (३३।१)

प्रयुञ्जीत भिषक् प्राज्ञो यथोद्दिष्टेषु कर्मसु ॥ (३३।२)