अथातो ऽन्धपूतनाप्रसिषेधं व्याख्यास्यामः ॥ (१।०)

यथोवाच भगवान् धन्वन्तरिः ॥ (२।०)

तिक्तकद्रुमपत्राणां कार्यः क्वाथो ऽवसेचने । (३।१)

सुरा सौवीरकं कुष्ठं हरितालं मनःशिला ॥ (३।२)

तथा सर्जरसश्चैव तैलार्थम् उपदिश्यते । (४।१)

पिप्पल्यः पिप्पलीमूलं वर्गो मधुरको मधु ॥ (४।२)

शालपर्णी बृहत्यौ च घृतार्थम् उपदिश्यते । (५।१)

सर्वगन्धैः प्रदेहश्च गात्रेष्व् अक्ष्णोश्च शीतलैः ॥ (५।२)

पुरीषं कौक्कुटं केशांश्चर्म सर्पत्वचं तथा । (६।१)

जीर्णां च भिक्षुसंघाटीं धूमनायोपकल्पयेत् ॥ (६।२)

कुक्कुटीं मर्कटीं शिम्बीमनन्तां चापि धारयेत् । (७।१)

मांसमामं तथा पक्वं शोणितं च चतुष्पथे ॥ (७।२)

निवेद्यमन्तश्च गृहे शिशो रक्षानिमित्ततः । (८।१)

शिशोश्च स्नपनं कुर्यात् सर्वगन्धोदकैः शुभैः ॥ (८।२)

कराला पिङ्गला मुण्डा कषायाम्बरवासिनी । (९।१)

देवी बालमिमं प्रीता संरक्षत्वन्धपूतना ॥ (९।२)