अथातः शकुनीप्रतीषेधं व्याख्यास्यामः ॥ (१।०)

यथोवाच भगवान् धन्वन्तरिः ॥ (२।०)

शकुन्यभिपरीतस्य कार्यो वैद्येन जानता । (३।१)

वेतसाम्रकपित्थानां निष्क्वाथः परिषेचने ॥ (३।२)

कषायमधुरैस्तैलं कार्यमभ्यञ्जने शिशोः । (४।१)

मधुकोशीरह्रीबेरसारिवोत्पलपद्मकैः ॥ (४।२)

रोध्रप्रियङ्गुमञ्जिष्ठागैरिकैः प्रदिहेच्छिशुम् । (५।१)

व्रणेषूक्तानि चूर्णानि पथ्यानि विविधानि च ॥ (५।२)

स्कन्दग्रहे धूपनानि तानीहापि प्रयोजयेत् । (६।१)

शतावरीमृगैर्वारुनागदन्तीनिदिग्धिकाः ॥ (६।२)

लक्ष्मणां सहदेवां च बृहतीं चापि धारयेत् । (७।१)

तिलतण्डुलकं माल्यं हरितालं मनःशिला ॥ (७।२)

बलिरेष करञ्जेषु निवेद्यो नियतात्मना । (८।१)

निष्कुटे च प्रयोक्तव्यं स्नानमस्य यथाविधि ॥ (८।२)

स्कन्दापस्मारशमनं घृतं चापीह पूजितम् । (९।१)

कुर्याच्च विविधां पूजां शकुन्याः कुसुमैः शुभैः ॥ (९।२)

अन्तरीक्षचरा देवी सर्वालंकारभूषिता । (१०।१)

अयोमुखी तीक्ष्णतुण्डा शकुनी ते प्रसीदतु ॥ (१०।२)

दुर्दर्शना महाकाया पिङ्गाक्षी भैरवस्वरा । (११।१)

लम्बोदरी शङ्कुकर्णी शकुनी ते प्रसीदतु ॥ (११।२)