अथातः शीतपूतनाप्रतिषेधं व्याख्यास्यामः ॥ (१।०)

यथोवाच भगवान् धन्वन्तरिः ॥ (२।०)

कपित्थं सुवहां बिम्बीं तथा बिल्वं प्रचीबलम् । (३।१)

नन्दीं भल्लातकं चापि परिषेके प्रयोजयेत् ॥ (३।२)

बस्तमूत्रं गवां मूत्रं मुस्तं च सुरदारु च । (४।१)

कुष्ठं च सर्वगन्धांश्च तैलार्थमवचारयेत् ॥ (४।२)

रोहिणीसर्जखदिरपलाशककुभत्वचः । (५।१)

निष्क्वाथ्य तस्मिन्निष्क्वाथे सक्षीरं विपचेद्घृतम् ॥ (५।२)

गृध्रोलूकपुरीषाणि बस्तगन्धामहेस्त्वचः । (६।१)

निम्बपत्राणि मधुकं धूपनार्थं प्रयोजयेत् ॥ (६।२)

धारयेद् अपि लम्बां च गुञ्जां काकादनीं तथा । (७।१)

नद्यां मुद्गकृतैश्चान्नैस्तर्पयेच्छीतपूतनाम् ॥ (७।२)

देव्यै देयश्चोपहारो वारुणी रुधिरं तथा । (८।१)

जलाशयान्ते बालस्य स्नपनं चोपदिश्यते ॥ (८।२)

मुद्गौदनाशना देवी सुराशोणितपायिनी । (९।१)

जलाशयालया देवी पातु त्वां शीतपूतना ॥ (९।२)