अथातो लेख्यरोगप्रतिषेधं व्याख्यास्यामः ॥ (१।०)

यथोवाच भगवान् धन्वन्तरिः ॥ (२।०)

नव ये ऽभिहिता लेख्याः सामान्यस्तेष्वयं विधिः । (३।१)

स्निग्धवान्तविरिक्तस्य निवातातपसद्मनि ॥ (३।२)

सुखोदकप्रतप्तेन वाससा सुसमाहितः । (४।१)

स्वेदयेद्वर्त्म निर्भुज्य वामाङ्गुष्ठाङ्गुलिस्थितम् ॥ (४।२)

अङ्गुल्यङ्गुष्ठकाभ्यां तु निर्भुग्नं वर्त्म यत्नतः । (५।१)

प्लोतान्तराभ्यां न यथा चलति स्रंसते ऽपि वा ॥ (५।२)

ततः प्रमृज्य प्लोतेन वर्त्म शस्त्रपदाङ्कितम् । (६।१)

लिखेच्छस्त्रेण पत्रैर् वा ततो रक्ते स्थिते पुनः ॥ (६।२)

स्विन्नं मनोह्वाकासीसव्योषार्द्राञ्जनसैन्धवैः । (७।१)

श्लक्ष्णपिष्टैः समाक्षीकैः प्रतिसार्योष्णवारिणा ॥ (७।२)

प्रक्षाल्य हविषा सिक्तं व्रणवत् समुपाचरेत् । (८।१)

स्वेदावपीडप्रभृतींस्त्र्यहादूर्ध्वं प्रयोजयेत् ॥ (८।२)

व्यासतस्ते समुद्दिष्टं विधानं लेख्यकर्मणि । (९।१)

असृगास्रावरहितं कण्डूशोफविवर्जितम् ॥ (९।२)

समं नखनिभं वर्त्म लिखितं सम्यगिष्यते । (१०।१)

रक्तम् अक्षि स्रवेत् स्कन्नं क्षताच्छस्त्रकृताद्ध्रुवम् ॥ (१०।२)

रागशोफपरिस्रावास्तिमिरं व्याध्यनिर्जयः । (११।१)

वर्त्म श्यावं गुरु स्तब्धं कण्डूहर्षोपदेहवत् ॥ (११।२)

नेत्रपाकमुदीर्णं वा कुर्वीताप्रतिकारिणः । (१२।१)

एतद्दुर्लिखितं ज्ञेयं स्नेहयित्वा पुनर्लिखेत् ॥ (१२।२)

व्यावर्तते यदा वर्त्म पक्ष्म चापि विमुह्यति । (१३।१)

स्यात् सरुक् स्रावबहुलं तदतिस्रावितं विदुः ॥ (१३।२)

स्नेहस्वेदादिरिष्टः स्यात् क्रमस्तत्रानिलापहः । (१४।१)

वर्त्मावबन्धं क्लिष्टं च बहलं यच्च कीर्तितम् ॥ (१४।२)

पोथकीश्चाप्यवलिखेत् प्रच्छयित्वाग्रतः शनैः । (१५।१)

समं लिखेत्तु मेधावी श्यावकर्दमवर्त्मनी ॥ (१५।२)

कुम्भीकिनीं शर्करां च तथैवोत्सङ्गिनीम् अपि । (१६।१)

कल्पयित्वा तु शस्त्रेण लिखेत् पश्चादतन्द्रितः ॥ (१६।२)

भवेयुर्वर्त्मसु च याः पिडकाः कठिना भृशम् । (१७।१)

ह्रस्वास्ताम्राश्च ताः पक्वा भिन्द्याद्भिन्ना लिखेद् अपि ॥ (१७।२)

तरुणीश्चाल्पसंरम्भा पिडका बाह्यवर्त्मजाः । (१८।१)

विदित्वैताः प्रशमयेत् स्वेदालेपनशोधनैः ॥ (१८।२)