अथातो भेद्यरोगप्रतिषेधं व्याख्यास्यामः ॥ (१।०)

यथोवाच भगवान् धन्वन्तरिः ॥ (२।०)

स्वेदयित्वा बिसग्रन्थिं छिद्राण्यस्य निराशयम् । (३।१)

पक्वं भित्त्वा तु शस्त्रेण सैन्धवेनावचूर्णयेत् ॥ (३।२)

कासीसमागधीपुष्पनेपाल्येलायुतेन तु । (४।१)

ततः क्षौद्रघृतं दत्त्वा सम्यग्बन्धमथाचरेत् ॥ (४।२)

रोचनाक्षारतुत्थानि पिप्पल्यः क्षौद्रम् एव च । (५।१)

प्रतिसारणमेकैकं भिन्ने लगण इष्यते ॥ (५।२)

महत्यपि च युञ्जीत क्षाराग्नी विधिकोविदः । (६।१)

स्विन्नां भिन्नां विनिष्पीड्य भिषगञ्जननामिकाम् ॥ (६।२)

शिलैलानतसिन्धूत्थैः सक्षौद्रैः प्रतिसारयेत् । (७।१)

रसाञ्जनमधुभ्यां तु भित्त्वा वा शस्त्रकर्मवित् ॥ (७।२)

प्रतिसार्याञ्जनैर् युञ्ज्यादुष्णैर् दीपशिखोद्भवैः । (८।१)

सम्यक्स्विन्ने कृमिग्रन्थौ भिन्ने स्यात् प्रतिसारणम् ॥ (८।२)

त्रिफलातुत्थकासीससैन्धवैश्च रसक्रिया । (९।१)

भित्त्वोपनाहं कफजं पिप्पलीमधुसैन्धवैः ॥ (९।२)

लेखयेन्मण्डलाग्रेण समन्तात् प्रच्छयेद् अपि । (१०।१)

संस्नेह्य पत्त्रभङ्गैश्च स्वेदयित्वा यथासुखम् ॥ (१०।२)

सर्वेष्वेतेषु विहितं विधानं स्नेहपूर्वकम् । (११।१)

संपक्वे प्रयतो भूत्वा कुर्वीत व्रणरोपणम् ॥ (११।२)