अथातो योनिव्यापत्प्रतिषेधं व्याख्यास्यामः ॥ (१।०)

यथोवाच भगवान् धन्वन्तरिः ॥ (२।०)

प्रवृद्धलिङ्गं पुरुषं यात्यर्थम् उपसेवते । (३।१)

रूक्षदुर्बलबाला या तस्या वायुः प्रकुप्यति ॥ (३।२)

स दुष्टो योनिमासाद्य योनिरोगाय कल्पते । (४।१)

त्रयाणाम् अपि दोषाणां यथास्वं लक्षणेन तु ॥ (४।२)

विंशतिर्व्यापदो योनेर्निर्दिष्टा रोगसंग्रहे । (५।१)

मिथ्याचारेण याः स्त्रीणां प्रदुष्टेनार्तवेन च ॥ (५।२)

जायन्ते बीजदोषाच्च दैवाच्च शृणु ताः पृथक् । (६।१)

उदावर्ता तथा वन्ध्या विप्लुता च परिप्लुता ॥ (६।२)

वातला चेति वातोत्थाः पित्तोत्था रुधिरक्षरा । (७।१)

वामिनी स्रंसिनी चापि पुत्रघ्नी पित्तला च या ॥ (७।२)

अत्यानन्दा च या योनिः कर्णिनी चरणाद्वयम् । (८।१)

श्लेष्मला च कफाज्ज्ञेया षण्डाख्या फलिनी तथा ॥ (८।२)

महती सूचिवक्त्रा च सर्वजेति त्रिदोषजा । (९।१)

सफेनिलमुदावर्ता रजः कृच्छ्रेण मुञ्चति ॥ (९।२)

वन्ध्यां नष्टार्तवां विद्याद्विप्लुतां नित्यवेदनाम् । (१०।१)

परिप्लुतायां भवति ग्राम्यधर्मे रुजा भृशम् ॥ (१०।२)

वातला कर्कशा स्तब्धा शूलनिस्तोदपीडिता । (११।१)

चतसृष्वपि चाद्यासु भवन्त्यनिलवेदनाः ॥ (११।२)

सदाहं प्रक्षरत्यस्रं यस्यां सा लोहितक्षरा । (१२।१)

सवातमुद्गिरेद्बीजं वामिनी रजसा युतम् ॥ (१२।२)

प्रस्रंसिनी स्यन्दते तु क्षोभिता दुःप्रसूश्च या । (१३।१)

स्थितं स्थितं हन्ति गर्भं पुत्रघ्नी रक्तसंस्रवात् ॥ (१३।२)

अत्यर्थं पित्तला योनिर्दाहपाकज्वरान्विता । (१४।१)

चतसृष्वपि चाद्यासु पित्तलिङ्गोच्छ्रयो भवेत् ॥ (१४।२)

अत्यानन्दा न संतोषं ग्राम्यधर्मेण गच्छति । (१५।१)

कर्णिन्यां कर्णिका योनौ श्लेष्मासृग्भ्यां प्रजायते ॥ (१५।२)

मैथुने ऽचरणा पूर्वं पुरुषादतिरिच्यते । (१६।१)

बहुशश्चातिचरणादन्या बीजं न विन्दति ॥ (१६।२)

श्लेष्मला पिच्छिला योनिः कण्डूयुक्तातिशीतला । (१७।१)

चतसृष्वपि चाद्यासु श्लेष्मलिङ्गोच्छ्रितिर्भवेत् ॥ (१७।२)

अनार्तवस्तना षण्डी खरस्पर्शा च मैथुने । (१८।१)

अतिकायगृहीतायास्तरुण्याः फलिनी भवेत् ॥ (१८।२)

विवृतातिमहायोनिः सूचीवक्त्रातिसंवृता । (१९।१)

सर्वलिङ्गसमुत्थाना सर्वदोषप्रकोपजा ॥ (१९।२)

चतसृष्वपि चाद्यासु सर्वलिङ्गोच्छ्रितिर्भवेत् । (२०।१)

पञ्चासाध्या भवन्तीमा योनयः सर्वदोषजाः ॥ (२०।२)

प्रतिदोषं तु साध्यासु स्नेहादिक्रम इष्यते । (२१।१)

दद्यादुत्तरबस्तींश्च विशेषेण यथोदितान् ॥ (२१।२)

कर्कशां शीतलां स्तब्धामल्पस्पर्शां च मैथुने । (२२।१)

कुम्भीस्वेदैरुपचरेत् सानूपौदकसंयुतैः ॥ (२२।२)

मधुरौषधसंयुक्तान् वेसवारांश्च योनिषु । (२३।१)

निक्षिपेद्धारयेच्चापि पिचुतैलमतन्द्रितः ॥ (२३।२)

धावनानि च पथ्यानि कुर्वीतापूरणानि च । (२४।१)

ओषचोषान्वितासूक्तं कुर्याच्छीतं विधिं भिषक् ॥ (२४।२)

दुर्गन्धां पिच्छिलां चापि चूर्णैः पञ्चकषायजैः । (२५।१)

पूरयेद्राजवृक्षादिकषायैश्चापि धावनम् ॥ (२५।२)

योन्यां तु पूयस्राविण्यां शोधनद्रव्यसंभृतैः । (२६।१)

सगोमूत्रैः सलवणैः शोधनं हितमिष्यते ॥ (२६।२)

बृहतीफलकल्कस्य द्विहरिद्रायुतस्य च । (२७।१)

कण्डूमतीमल्पस्पर्शां पूरयेद्धूपयेत्तथा ॥ (२७।२)

वर्तिं प्रदद्यात् कर्णिन्यां शोधनद्रव्यसंभृताम् । (२८।१)

प्रस्रंसिनीं घृताभ्यक्तां क्षीरस्विन्नां प्रवेशयेत् ॥ (२८।२)

पिधाय वेसवारेण ततो बन्धं समाचरेत् । (२९।१)

प्रतिदोषं विदध्याच्च सुरारिष्टासवान् भिषक् ॥ (२९।२)

प्रातः प्रातर्निषेवेत रसोनादुद्धृतं रसम् । (३०।१)

क्षीरमांसरसप्रायम् आहारं विदधीत च ॥ (३०।२)

शुक्रार्तवादयो दोषाः स्तनरोगाश्च कीर्तिताः । (३१।१)

क्लैब्यस्थानानि मूढस्य गर्भस्य विधिरेव च ॥ (३१।२)

गर्भिणीप्रतिरोगेषु चिकित्सा चाप्युदाहृता । (३२।१)

सर्वथा तां प्रयुञ्जीत योनिव्यापत्सु बुद्धिमान् । (३२।२)

अपप्रजातारोगांश्च चिकित्सेदुत्तराद्भिषक् ॥ (३२।३)