नन्दिकेश्वर उवाच । (१।१)

नैर्मल्यं भावशुद्धिश्च विना स्नानं न विद्यते । (१।२)

तस्मान्मनोविशुद्ध्यर्थं स्नानमादौ विधीयते ॥ (१।३)

अनुद्धृतैरुद्धृतैर्वा जलैः स्नानं समाचरेत् । (२।१)

तीर्थं च कल्पयेद्विद्वान्मूलमन्त्रेण मन्त्रवित् । (२।२)

नमो नारायणायेति मूलमन्त्र उदाहृतः ॥ (२।३)

दर्भपाणिस्तु विधिना आचान्तः प्रयतः शुचिः । (३।१)

चतुर्हस्तसमायुक्तं चतुरस्रं समन्ततः । (३।२)

प्रकल्प्यावाहयेद् गङ्गाम् एभिर्मन्त्रैर्विचक्षणः ॥ (३।३)

विष्णोः पादप्रसूतासि वैष्णवी विष्णुदेवता । (४।१)

पाहि नस् त्वेनसस् तस्माद् आजन्ममरणान्तिकात् ॥ (४।२)

तिस्रः कोट्योऽर्धकोटी च तीर्थानां वायुरब्रवीत् । (५।१)

दिवि भुव्यन्तरिक्षे च तानि ते सन्ति जाह्नवि ॥ (५।२)

नन्दिनीत्येव ते नाम देवेषु नलिनीति च । (६।१)

दक्षा पृथ्वी च विहगा विश्वकायामृता शिवा ॥ (६।२)

विद्याधरी सुप्रशान्ता तथा विश्वप्रसादिनी । (७।१)

क्षेमा च जाह्नवी चैव शान्ता शान्तिप्रदायिनी ॥ (७।२)

एतानि पुण्यनामानि स्नानकाले प्रकीर्तयेत् । (८।१)

भवेत्संनिहिता तत्र गङ्गा त्रिपथगामिनी ॥ (८।२)

सप्तवाराभिजप्तेन करसम्पुटयोजितः । (९।१)

मूर्ध्नि कुर्याज्जलं भूयस् त्रिचतुष्पञ्चसप्तकम् । (९।२)

स्नानं कुर्यान्मृदा तद्वदामन्त्र्य तु विधानतः ॥ (९।३)

अश्वक्रान्ते रथक्रान्ते विष्णुक्रान्ते वसुंधरे । (१०।१)

मृत्तिके हर मे पापं यन्मया दुष्कृतं कृतम् ॥ (१०।२)

उद्धृतासि वराहेण कृष्णेन शतबाहुना । (११।१)

मृत्तिके ब्रह्मदत्तासि काश्यपेनाभिमन्त्रिता । (११।२)

आरुह्य मम गात्राणि सर्वं पापं प्रचोदय ॥ (११।३)

मृत्तिके देहि नः पुष्टिं त्वयि सर्वं प्रतिष्ठितम् । (१२।१)

नमस्ते सर्वलोकानां प्रभवारणि सुव्रते ॥ (१२।२)

एवं स्नात्वा ततः पश्चादाचम्य च विधानतः । (१३।१)

उत्थाय वाससी शुक्ले शुद्धे तु परिधाय वै । (१३।२)

ततस्तु तर्पणं कुर्यात्त्रैलोक्याप्यायनाय वै ॥ (१३।३)

देवा यक्षास्तथा नागा गन्धर्वाप्सरसोऽसुराः । (१४।१)

क्रूराः सर्पाः सुपर्णाश्च तरवो जम्बुकाः खगाः ॥ (१४।२)

वाय्वाधारा जलाधारास् तथैवाकाशगामिनः । (१५।१)

निराधाराश्च ये जीवा ये तु धर्मरतास्तथा ॥ (१५।२)

तेषामाप्यायनायैतद्दीयते सलिलं मया । (१६।१)

कृतोपवीती देवेभ्यो निवीती च भवेत्ततः ॥ (१६।२)

मनुष्यांस्तर्पयेद्भक्त्या ब्रह्मपुत्रानृषींस्तथा । (१७।१)

सनकश्च सनन्दश्च तृतीयश्च सनातनः ॥ (१७।२)

कपिलश्चासुरिश्चैव वोढुः पञ्चशिखस्तथा । (१८।१)

सर्वे ते तृप्तिमायान्तु मद्दत्तेनाम्बुना सदा ॥ (१८।२)

मरीचिमत्र्यङ्गिरसं पुलस्त्यं पुलहं क्रतुम् । (१९।१)

प्रचेतसं वसिष्ठं च भृगुं नारदमेव च । (१९।२)

देवब्रह्मऋषीन् सर्वांस्तर्पयेद् अक्षतौदकैः ॥ (१९।३)

अपसव्यं ततः कृत्वा सव्यं जान्वाच्य भूतले । (२०।१)

अग्निष्वात्तास्तथा सौम्या हविष्मन्तस्तथोष्मपाः ॥ (२०।२)

सुकालिनो बर्हिषदस्तथान्ये वाज्यपाः पुनः । (२१।१)

संतर्प्याः पितरो भक्त्या सतिलोदकचन्दनैः ॥ (२१।२)

यमाय धर्मराजाय मृत्यवे चान्तकाय च । (२२।१)

वैवस्वताय कालाय सर्वभृतक्षयाय च ॥ (२२।२)

औदुम्बराय दध्नाय नीलाय परमेष्ठिने । (२३।१)

वृकोदराय चित्राय चित्रगुप्ताय वै नमः । (२३।२)

दर्भपाणिस्तु विधिना पितॄन्संतर्पयेद्बुधः ॥ (२३।३)

पित्रादीन्नामगोत्रेण तथा मातामहानपि । (२४।१)

संतर्प्य विधिना भक्त्या इमं मन्त्रमुदीरयेत् ॥ (२४।२)

येऽबान्धवा बान्धवा वा येऽन्यजन्मनि बान्धवाः । (२५।१)

ते तृप्तिमखिलां यान्तु यश् चास्मत्तो ऽभिवाञ्छति ॥ (२५।२)

ततश्चाचम्य विधिवदालिखेत्पद्ममग्रतः । (२६।१)

अक्षताभिः सपुष्पाभिः सजलारुणचन्दनम् । (२६।२)

अर्घ्यं दद्यात्प्रयत्नेन सूर्यनामानि कीर्तयेत् ॥ (२६।३)

नमस्ते विष्णुरूपाय नमो विष्णुमुखाय वै । (२७।१)

सहस्ररश्मये नित्यं नमस्ते सर्वतेजसे ॥ (२७।२)

नमस्ते शिव सर्वेश नमस्ते सर्ववत्सल । (२८।१)

जगत्स्वामिन्नमस्तेऽस्तु दिव्यचन्दनभूषित ॥ (२८।२)

पद्मासन नमस्तेऽस्तु कुण्डलाङ्गदभूषित । (२९।१)

नमस्ते सर्वलोकेश जगत्सर्वं विबोधसे ॥ (२९।२)

सुकृतं दुष्कृतं चैव सर्वं पश्यसि सर्वग । (३०।१)

सत्यदेव नमस्तेऽस्तु प्रसीद मम भास्कर ॥ (३०।२)

दिवाकर नमस्तेऽस्तु प्रभाकर नमोऽस्तु ते । (३१।१)

एवं सूर्यं नमस्कृत्य त्रिः कृत्वाथ प्रदक्षिणम् । (३१।२)

द्विजं गां काञ्चनं स्पृष्ट्वा ततो विष्णुगृहं व्रजेत् ॥ (३१।३)