सूत उवाच । (१।१)

ततो दृष्ट्वा महात्मानं कालचक्रमिवागतम् । (१।२)

नरसिंहवपुश्छन्नं भस्मच्छन्नमिवानलम् ॥ (१।३)

हिरण्यकशिपोः पुत्रः प्रह्लादो नाम वीर्यवान् । (२।१)

दिव्येन चक्षुषा सिंहमपश्यद्देवमागतम् ॥ (२।२)

ते दृष्ट्वा रुक्मशैलाभमपूर्वां तनुमाश्रितम् । (३।१)

विस्मिता दानवाः सर्वे हिरण्यकशिपुश्च सः ॥ (३।२)

प्रह्लाद उवाच । (४।१)

महाबाहो महाराज दैत्यानामादिसंभव । (४।२)

न श्रुतं न च नो दृष्टं नारसिंहमिदं वपुः ॥ (४।३)

अव्यक्तप्रभवं दिव्यं किमिदं रूपमागतम् । (५।१)

दैत्यान्तकरणं घोरं संशतीव मनो मम ॥ (५।२)

अस्य देवाः शरीरस्थाः सागराः सरितश्च याः । (६।१)

हिमवान्पारियात्रश्च ये चान्ये कुलपर्वताः ॥ (६।२)

चन्द्रमाश्च सनक्षत्रैरादित्यैर् वसुभिः सह । (७।१)

धनदो वरुणश्चैव यमः शक्रः शचीपतिः ॥ (७।२)

मरुतो देवगन्धर्वा ऋषयश्च तपोधनाः । (८।१)

नागा यक्षाः पिशाचाश्च राक्षसा भीमविक्रमाः ॥ (८।२)

ब्रह्मा देवः पशुपतिर्ललाटस्था भ्रमन्ति वै । (९।१)

स्थावराणि च सर्वाणि जङ्गमानि तथैव च ॥ (९।२)

भवांश्च सहितोऽस्माभिः सर्वैर्दैत्यगणैर्वृतः । (१०।१)

विमानशतसंकीर्णा तथैव भवतः सभा ॥ (१०।२)

सर्वं त्रिभुवनं राजṁल् लोकधर्माश्च शाश्वताः । (११।१)

दृश्यन्ते नारसिंहेऽस्मिंस्तथेदमखिलं जगत् ॥ (११।२)

प्रजापतिश्चात्र मनुर्महात्मा ग्रहाश्च योगाश्च महीरुहाश्च । (१२।१)

उत्पातकालश्च धृतिर्मतिश्च रतिश्च सत्यं च तपो दमश्च ॥ (१२।२)

सनत्कुमारश्च महानुभावो विश्वे च देवा ऋषयश्च सर्वे । (१३।१)

क्रोधश्च कामश्च तथैव हर्षो धर्मश्च मोहः पितरश्च सर्वे ॥ (१३।२)

प्रह्लादस्य वचः श्रुत्वा हिरण्यकशिपुः प्रभुः । (१४।१)

उवाच दानवान्सर्वान्गणांश्च स गणाधिपः ॥ (१४।२)

मृगेन्द्रो गृह्यतामेष अपूर्वां तनुमास्थितः । (१५।१)

यदि वा संशयः कश्चिद्वध्यतां वनगोचरः ॥ (१५।२)

ते दानवगणा सर्वे मृगेन्द्रं भीमविक्रमम् । (१६।१)

परिक्षिपन्तो मुदितास्त्रासयामासुरोजसा ॥ (१६।२)

सिंहनादं विमुच्याथ नरसिंहो महाबलः । (१७।१)

बभञ्ज तां सभां दिव्यां व्यादितास्य इवान्तकः ॥ (१७।२)

सभायां भज्यमानायां हिरण्यकशिपुः स्वयम् । (१८।१)

चिक्षेपास्त्राणि सिंहस्य रोषाद्व्याकुललोचनः ॥ (१८।२)

सर्वास्त्राणामथ ज्येष्ठं दण्डमन्त्रं सुदारुणम् । (१९।१)

कालचक्रं तथाघोरं विष्णुचक्रं तथा परम् ॥ (१९।२)

पैतामहं तथात्युग्रं त्रैलोक्यदहनं महत् । (२०।१)

विचित्रामशनीं चैव शुष्कार्द्रं चाशनिद्वयम् ॥ (२०।२)

रौद्रं तथोग्रं शूलं च कङ्कालं मुसलं तथा । (२१।१)

मोहनं शोषणं चैव संतापनविलापनम् ॥ (२१।२)

वायव्यं मथनं चैव कापालमथ कैङ्करम् । (२२।१)

तथाप्रतिहतां शक्तिं क्रौञ्चमस्त्रं तथैव च ॥ (२२।२)

अस्त्रं ब्रह्मशिरश्चैव सोमास्त्रं शिशिरं तथा । (२३।१)

कम्पनं शातनं चैव त्वाष्ट्रं चैव सुभैरवम् ॥ (२३।२)

कालमुद्गरमक्षोभ्यं तपनं च महाबलम् । (२४।१)

संवर्तनं मोहनं च तथा मायाधरं परम् ॥ (२४।२)

गान्धर्वमस्त्रं दयितमसिरत्नं च नन्दकम् । (२५।१)

प्रस्वापनं प्रमथनं वारुणं चास्त्रमुत्तमम् । (२५।२)

अस्त्रं पाशुपतं चैव यस्याप्रतिहता गतिः ॥ (२५।३)

अस्त्रं हयशिरश्चैव ब्राह्ममस्त्रं तथैव च । (२६।१)

नारायणास्त्रमैन्द्रं च सार्पमस्त्रं तथाद्भुतम् ॥ (२६।२)

पैशाचमस्त्रमजितं शोषदं शामनं तथा । (२७।१)

महाबलं भावनं च प्रस्थापनविकम्पने ॥ (२७।२)

एतान्यस्त्राणि दिव्यानि हिरण्यकशिपुस्तदा । (२८।१)

असृजन्नरसिंहस्य दीप्तस्याग्नेरिवाहुतिम् ॥ (२८।२)

अस्त्रैः प्रज्वलितैः सिंहमावृणोदसुरोत्तमः । (२९।१)

विवस्वान् घर्मसमये हिमवन्तमिवांशुभिः ॥ (२९।२)

स ह्यमर्षानिलोद्भूतो दैत्यानां सैन्यसागरः । (३०।१)

क्षणेन प्लावयामास मैनाकमिव सागरः ॥ (३०।२)

प्रासैः पाशैश्च खड्गैश्च गदाभिर्मुसलैस्तथा । (३१।१)

वज्रैरशनिभिश्चैव साग्निभिश्च महाद्रुमैः ॥ (३१।२)

मुद्गरैर्भिन्दिपालैश्च शिलोलूखलपर्वतैः । (३२।१)

शतघ्नीभिश्च दीप्ताभिर्दण्डैरपि सुदारुणैः ॥ (३२।२)

ते दानवाः पाशगृहीतहस्ता महेन्द्रतुल्याशनिवज्रवेगाः । (३३।१)

समन्ततो ऽभ्युद्यतबाहुकायाः स्थितास् त्रिशीर्षा इव नागपाशाः ॥ (३३।२)

सुवर्णमालाकुलभूषिताङ्गाः पीतांशुकाभोगविभाविताङ्गाः । (३४।१)

मुक्तावलीदामसनाथकक्षा हंसा इवाभान्ति विशालपक्षाः ॥ (३४।२)

तेषां तु वायुप्रतिमौजसां वै केयूरमौलीवलयोत्कटानाम् । (३५।१)

तान्युत्तमाङ्गान्यभितो विभान्ति प्रभातसूर्यांशुसमप्रभाणि ॥ (३५।२)

क्षिपद्भिर् उग्रैर् ज्वलितैर् महाबलैर् महास्त्रपूगैः सुसमावृतो बभौ । (३६।१)

गिरिर्यथा संततवर्षिभिर् घनैः कृतान्धकारान्तरकंदरो द्रुमैः ॥ (३६।२)

तैर्हन्यमानोऽपि महास्त्रजालैर् महाबलैर् दैत्यगणैः समेतैः । (३७।१)

नाकम्पताजौ भगवान्प्रतापस्थितः प्रकृत्या हिमवानिवाचलः ॥ (३७।२)

संत्रासितास्तेन नृसिंहरूपिणा दितेः सुताः पावकतुल्यतेजसा । (३८।१)

भयाद्विचेलुः पवनोद्धुताङ्गा यथोर्मयः सागरवारिसंभवाः ॥ (३८।२)