ऋषय ऊचुः । (१।१)

कथितं नरसिंहस्य माहात्म्यं विस्तरेण च । (१।२)

पुनस्तस्यैव माहात्म्यमन्यद्विस्तरतो वद ॥ (१।३)

पद्मरूपमभूदेतत्कथं हेममयं जगत् । (२।१)

कथं च वैष्णवी सृष्टिः पद्ममध्येऽभवत्पुरा ॥ (२।२)

सूत उवाच । (३।१)

श्रुत्वा च नरसिंहस्य माहात्म्यं रविनन्दनः । (३।२)

विस्मयोत्फुल्लनयनः पुनः पप्रच्छ केशवम् ॥ (३।३)

मनुरुवाच । (४।१)

कथं पाद्मे महाकल्पे तव पद्ममयं जगत् । (४।२)

जलार्णवगतस्येह नाभौ जातं जनार्दन ॥ (४।३)

प्रभावात्पद्मनाभस्य स्वपतः सागराम्भसि । (५।१)

पुष्करे च कथं भूता देवाः सर्षिगणाः पुरा ॥ (५।२)

एतदाख्याहि निखिलं योगं योगविदां पते । (६।१)

शृण्वतस्तस्य मे कीर्तिं न तृप्तिरुपजायते ॥ (६।२)

कियता चैव कालेन शेते वै पुरुषोत्तमः । (७।१)

कियन्तं वा स्वपिति च कोऽस्य कालस्य संभवः ॥ (७।२)

कियता वाथ कालेन ह्युत्तिष्ठति महायशाः । (८।१)

कथं चोत्थाय भगवान्सृजते निखिलं जगत् ॥ (८।२)

के प्रजापतयस्तावदासन्पूर्वं महामुने । (९।१)

कथं निर्मितवांश्चैव चित्रं लोकं सनातनम् ॥ (९।२)

कथमेकार्णवे शून्ये नष्टस्थावरजङ्गमे । (१०।१)

दग्धे देवासुरनरे प्रनष्टोरगराक्षसे ॥ (१०।२)

नष्टानिलानले लोके नष्टाकाशमहीतले । (११।१)

केवलं गह्वरीभूते महाभूतविपर्यये ॥ (११।२)

विभुर्महाभूतपतिर्महातेजा महाकृतिः । (१२।१)

आस्ते सुरवरश्रेष्ठो विधिमास्थाय योगवित् ॥ (१२।२)

शृणुयां परया भक्त्या ब्रह्मन्नेतदशेषतः । (१३।१)

वक्तुमर्हसि धर्मिष्ठ यशो नारायणात्मकम् ॥ (१३।२)

श्रद्धया चोपविष्टानां भगवन्वक्तुमर्हसि ॥ (१४।०)

मत्स्य उवाच । (१५।१)

नारायणस्य यशसः श्रवणे या तव स्पृहा । (१५।२)

तद्वंश्यान्वयभूतस्य न्याय्यं रविकुलर्षभ ॥ (१५।३)

शृणुष्वादिपुराणेषु वेदेभ्यश्च यथा श्रुतम् । (१६।१)

ब्राह्मणानां च वदतां श्रुत्वा वै सुमहात्मनाम् ॥ (१६।२)

यथा च तपसा दृष्ट्वा बृहस्पतिसमद्युतिः । (१७।१)

पराशरसुतः श्रीमान्गुरुर्द्वैपायनोऽब्रवीत् ॥ (१७।२)

तत्तेऽहं कथयिष्यामि यथाशक्ति यथाश्रुति । (१८।१)

यद्विज्ञातुं मया शक्यमृषिमात्रेण सत्तमाः ॥ (१८।२)

कः समुत्सहते ज्ञातुं परं नारायणात्मकम् । (१९।१)

विश्वायनश्च यद्ब्रह्मा न वेदयति तत्त्वतः ॥ (१९।२)

तत्कर्म विश्ववेदानां तद्रहस्यं महर्षीणाम् । (२०।१)

तमीशं सर्वयज्ञानां तत्तत्त्वं सर्वदर्शिनाम् । (२०।२)

तदध्यात्मविदां चिन्त्यं नरकं च विकर्मिणाम् ॥ (२०।३)

अधिदैवं च यद्दैवमधियज्ञं सुसंज्ञितम् । (२१।१)

तद्भूतमधिभूतं च तत्परं परमर्षीणाम् ॥ (२१।२)

स यज्ञो वेदनिर्दिष्टस्तत्तपः कवयो विदुः । (२२।१)

यः कर्ता कारको बुद्धिर्मनः क्षेत्रज्ञ एव च ॥ (२२।२)

प्रणवः पुरुषः शास्ता एकश्चेति विभाव्यते । (२३।१)

प्राणः पञ्चविधश्चैव ध्रुव अक्षर एव च ॥ (२३।२)

कालः पाकश्च पक्ता च द्रष्टा स्वाध्याय एव च । (२४।१)

उच्यते विविधैर्देवैः स एवायं न तत्परम् ॥ (२४।२)

स एव भगवान्सर्वं करोति विकरोति च । (२५।१)

सोऽस्मान्कारयते सर्वान्सोऽत्येति व्याकुलीकृतान् ॥ (२५।२)

यजामहे तमेवाद्यं तमेवेच्छाम निर्वृताः । (२६।१)

यो वक्ता यच्च वक्तव्यं यच्चाहं तद्ब्रवीमि वः ॥ (२६।२)

श्रूयते यच्च वै श्राव्यं यच्चान्यत्परिजल्प्यते । (२७।१)

याः कथाश्चैव वर्तन्ते श्रुतयो वाथ तत्पराः । (२७।२)

विश्वं विश्वपतिर्यश्च स तु नारायणः स्मृतः ॥ (२७।३)

यत्सत्यं यदमृतमक्षरं परं यद्यद्भूतं परममिदं च यद्भविष्यत् । (२८।१)

यत्किंचिच् चरमचरं यदस्ति चान्यत्तत्सर्वं पुरुषवरः प्रभुः पुराणः ॥ (२८।२)