युधिष्ठिर उवाच । (१।१)

भगवञ्छ्रोतुमिच्छामि पुरा कल्पे यथास्थितम् । (१।२)

ब्रह्मणा देवमुख्येन यथावत्कथितं मुने ॥ (१।३)

कथं प्रयागगमनं नराणां तत्र कीदृशम् । (२।१)

मृतानां का गतिस्तत्र स्नातानां तत्र किं फलम् ॥ (२।२)

ये वसन्ति प्रयागे तु ब्रूहि तेषां च किं फलम् । (३।१)

एतन्मे सर्वमाख्याहि परं कौतूहलं हि मे ॥ (३।२)

मार्कण्डेय उवाच । (४।१)

कथयिष्यामि ते वत्स यच्छ्रेष्ठं तत्र यत्फलम् । (४।२)

पुरा हि सर्वविप्राणां कथ्यमानं मया श्रुतम् ॥ (४।३)

प्रयागप्रतिष्ठानाद् आ पुराद्वासुकेर्ह्रदात् । (५।१)

कम्बलाश्वतरौ नागौ नागश्च बहुमूलकः । (५।२)

एतत्प्रजापतेः क्षेत्रं त्रिषु लोकेषु विश्रुतम् ॥ (५।३)

तत्र स्नात्वा दिवं यान्ति ये मृतास्तेऽपुनर्भवाः । (६।१)

ततो ब्रह्मादयो देवा रक्षां कुर्वन्ति संगताः ॥ (६।२)

अन्ये च बहवस्तीर्थाः सर्वपापहराः शुभाः । (७।१)

न शक्याः कथितुं राजन्बहुवर्षशतैरपि । (७।२)

संक्षेपेण प्रवक्ष्यामि प्रयागस्य तु कीर्तनम् ॥ (७।३)

षष्टिर्धनुःसहस्राणि यानि रक्षन्ति जाह्नवीम् । (८।१)

यमुनां रक्षति सदा सविता सप्तवाहनः ॥ (८।२)

प्रयागं तु विशेषेण सदा रक्षति वासवः । (९।१)

मण्डलं रक्षति हरिर्दैवतैः सह संगतः ॥ (९।२)

तं वटं रक्षति सदा शूलपाणिर्महेश्वरः । (१०।१)

स्थानं रक्षन्ति वै देवाः सर्वपापहरं शुभम् ॥ (१०।२)

अधर्मेणावृतो लोको नैव गच्छति तत्पदम् । (११।१)

स्वल्पमल्पतरं पापं यदा ते स्यान्नराधिप । (११।२)

प्रयागं स्मरमाणस्य सर्वमायाति संक्षयम् ॥ (११।३)

दर्शनात्तस्य तीर्थस्य नामसंकीर्तनादपि । (१२।१)

मृत्तिकालम्भनाद्वापि नरः पापात्प्रमुच्यते ॥ (१२।२)

पञ्च कुण्डानि राजेन्द्र तेषां मध्ये तु जाह्नवी । (१३।१)

प्रयागस्य प्रवेशे तु पापं नश्यति तत्क्षणात् ॥ (१३।२)

योजनानां सहस्रेषु गङ्गायाः स्मरणान्नरः । (१४।१)

अपि दुष्कृतकर्मा तु लभते परमां गतिम् ॥ (१४।२)

कीर्तनान्मुच्यते पापाद्दृष्ट्वा भद्राणि पश्यति । (१५।१)

अवगाह्य च पीत्वा तु पुनात्यासप्तमं कुलम् ॥ (१५।२)

सत्यवादी जितक्रोधो ह्यहिंसायां व्यवस्थितः । (१६।१)

धर्मानुसारी तत्त्वज्ञो गोब्राह्मणहिते रतः ॥ (१६।२)

गङ्गायमुनयोर्मध्ये स्नातो मुच्येत किल्बिषात् । (१७।१)

मनसा चिन्तयन्कामानवाप्नोति सुपुष्कलान् ॥ (१७।२)

ततो गत्वा प्रयागं तु सर्वदेवाभिरक्षितम् । (१८।१)

ब्रह्मचारी वसेन्मासं पितॄन्देवांश्च तर्पयेत् । (१८।२)

ईप्सितांल्लभते कामान्यत्र यत्राभिजायते ॥ (१८।३)

तपनस्य सुता देवी त्रिषु लोकेषु विश्रुता । (१९।१)

समागता महाभागा यमुना तत्र निम्नगा । (१९।२)

तत्र संनिहितो नित्यं साक्षाद्देवो महेश्वरः ॥ (१९।३)

दुष्प्राप्यं मानुषैः पुण्यं प्रयागं तु युधिष्ठिर । (२०।१)

देवदानवगन्धर्वा ऋषयः सिद्धचारणाः । (२०।२)

तदुपस्पृश्य राजेन्द्र स्वर्गलोकमुपासते ॥ (२०।३)