ईश्वर उवाच । (१।१)

अतः परं प्रवक्ष्यामि तिलशैलं विधानतः । (१।२)

यत्प्रदानान्नरो याति विष्णुलोकं सनातनम् ॥ (१।३)

उत्तमो दशभिर् द्रोणैर् मध्यमः पञ्चभिः स्मृतः । (२।१)

त्रिभिः कनिष्ठो विप्रेन्द्र तिलशैलः प्रकीर्तितः ॥ (२।२)

पूर्ववच्चापरान्सर्वान् विष्कम्भानभितो गिरीन् । (३।१)

दानमन्त्रान् प्रवक्ष्यामि यथावन्मुनिपुंगव ॥ (३।२)

यस्मान्मधुवधे विष्णोर्देहस्वेदसमुद्भवाः । (४।१)

तिलाः कुशाश्च माषाश्च तस्माच्छान्त्यै भवत्विह ॥ (४।२)

हव्ये कव्ये च यस्माच्च तिला एवाभिरक्षणम् । (५।१)

भवादुद्धर शैलेन्द्र तिलाचल नमोऽस्तु ते ॥ (५।२)

इत्यामन्त्र्य च यो दद्यात्तिलाचलमनुत्तमम् । (६।१)

स वैष्णवं पदं याति पुनरावृत्तिदुर्लभम् ॥ (६।२)

दीर्घायुष्यं समाप्नोति पुत्रपौत्रैश्च मोदते । (७।१)

पितृभिर्देवगन्धर्वैः पूज्यमानो दिवं व्रजेत् ॥ (७।२)