नारद उवाच । (१।१)

किमुद्वेगाद्भुते कृत्यमलक्ष्मीः केन हन्यते । (१।२)

मृतवत्साभिषेकादिकार्येषु च किमिष्यते ॥ (१।३)

श्रीभगवानुवाच । (२।१)

पुरा कृतानि पापानि फलन्त्यस्मिंस्तपोधन । (२।२)

रोगदौर्गत्यरूपेण तथैवेष्टवधेन च ॥ (२।३)

तद्विघाताय वक्ष्यामि सदा कल्पाणकारकम् । (३।१)

सप्तमीस्नपनं नाम जनपीडाविनाशनम् ॥ (३।२)

बालानां मरणं यत्र क्षीरपाणां प्रदृश्यते । (४।१)

तद्वद्वृद्धातुराणां च यौवने चापि वर्तताम् ॥ (४।२)

शान्तये तत्र वक्ष्यामि मृतवत्साभिषेचनम् । (५।१)

एतद् एवाद्भुतोद्वेगचित्तभ्रमविनाशनम् ॥ (५।२)

भविष्यति च वाराहो यत्र कल्पस्तपोधन । (६।१)

वैवस्वतश्च तत्रापि यदा तु मनुरुत्तमः ॥ (६।२)

भविष्यति च तत्रैव पञ्चविंशतिमं यदा । (७।१)

कृतं नाम युगं तत्र हैहयान्वयवर्धनः । (७।२)

भविता नृपतिर्वीरः कृतवीर्यः प्रतापवान् ॥ (७।३)

स सप्तद्वीपमखिलं पालयिष्यति भूतलम् । (८।१)

यावद्वर्षसहस्राणि सप्तसप्तति नारद ॥ (८।२)

जातमात्रं च तस्यापि यावत्पुत्रशतं तथा । (९।१)

च्यवनस्य तु शापेन विनाशमपयास्यति ॥ (९।२)

सहस्रबाहुश्च यदा भविता तस्य वै सुतः । (१०।१)

कुरङ्गनयनः श्रीमान्सम्भूतो नृपलक्षणैः ॥ (१०।२)

कृतवीर्यस्तदाराध्य सहस्रांशुं दिवाकरम् । (११।१)

उपवासैर्व्रतैर्दिव्यैर्वेदसूक्तैश्च नारद । (११।२)

पुत्रस्य जीवनायालमेतत्स्नानमवाप्स्यति ॥ (११।३)

कृतवीर्येण वै पृष्ट इदं वक्ष्यति भास्करः । (१२।१)

अशेषदुष्टशमनं सदा कल्मषनाशनम् ॥ (१२।२)

सूर्य उवाच । (१३।१)

अलं क्लेशेन महता पुत्रस्तव नराधिप । (१३।२)

भविष्यति चिरंजीवी किंतु कल्मषनाशनम् ॥ (१३।३)

सप्तमीस्नपनं वक्ष्ये सर्वलोकहिताय वै । (१४।१)

जातस्य मृतवत्सायाः सप्तमे मासि नारद । (१४।२)

अथवा शुक्लसप्तम्यामेतत्सर्वं प्रशस्यते ॥ (१४।३)

ग्रहताराबलं लब्ध्वा कृत्वा ब्राह्मणवाचनम् । (१५।१)

बालस्य जन्मनक्षत्रं वर्जयेत्तां तिथिं बुधः । (१५।२)

तद्वद्वृद्धातुराणां च कृत्यं स्यादितरेषु च ॥ (१५।३)

गोमयेनानुलिप्तायां भूमावेकाग्निवत्तदा । (१६।१)

तण्डुलै रक्तशालीयैश्चरुं गोक्षीरसंयुतम् । (१६।२)

निर्वपेत्सूर्यरुद्राभ्यां तन्मन्त्राभ्यां विधानतः ॥ (१६।३)

कीर्तयेत्सूर्यदेवत्यं सप्तर्चं च घृताहुतीः । (१७।१)

जुहुयाद्रुद्रसूक्तेन तद्वद्रुद्राय नारद ॥ (१७।२)

होतव्याः समिधश्चात्र तथैवार्कपलाशयोः । (१८।१)

यवकृष्णतिलैर्होमः कर्तव्योऽष्टशतं पुनः ॥ (१८।२)

व्याहृतीभिस्तथाज्येन तथैवाष्टशतं पुनः । (१९।१)

हुत्वा स्नानं च कर्तव्यं मङ्गलं येन धीमता ॥ (१९।२)

विप्रेण वेदविदुषा विधिवद्दर्भपाणिना । (२०।१)

स्थापयित्वा तु चतुरः कुम्भान्कोणेषु शोभनान् ॥ (२०।२)

पञ्चमं च पुनर्मध्ये दध्यक्षतविभूषितम् । (२१।१)

स्थापयेदव्रणं कुम्भं सप्तर्चेनाभिमन्त्रितम् ॥ (२१।२)

सौरेण तीर्थतोयेन पूर्णं रत्नसमन्वितम् । (२२।१)

सर्वान्सर्वौषधैर्युक्तान्पञ्चगव्यसमन्वितान् । (२२।२)

पञ्चरत्नफलैः पुष्पैर्वासोभिः परिवेष्टयेत् ॥ (२२।३)

गजाश्वरथ्यावल्मीकात्संगमाद्ध्रदगोकुलात् । (२३।१)

संशुद्धां मृदमानीय सर्वेष्वेव विनिक्षिपेत् ॥ (२३।२)

चतुर्ष्वपि च कुम्भेषु रत्नगर्भेषु मध्यमम् । (२४।१)

गृहीत्वा ब्राह्मणस्तत्र सौरान्मन्त्रानुदीरयेत् ॥ (२४।२)

नारीभिः सप्तसंख्याभिरव्यङ्गाङ्गीभिरत्र च । (२५।१)

पूजिताभिर्यथाशक्त्या माल्यवस्त्रविभूषणैः । (२५।२)

सविप्राभिश्च कर्तव्यं मृतवत्साभिषेचनम् ॥ (२५।३)

एतेऽभिषेकमन्त्राः । (२६।१)

दीर्घायुरस्तु बालोऽयं जीवत्पुत्रा च भामिनी । (२६।२)

आदित्यश्चन्द्रमाः सार्धं ग्रहनक्षत्रमण्डलैः ॥ (२६।३)

सशक्रा लोकपाला वै ब्रह्मविष्णुमहेश्वराः । (२७।१)

ते ते चान्ये च देवौघाः सदा पान्तु कुमारकम् ॥ (२७।२)

मित्रः शनिर्वा हुतभुग्ये च बालग्रहाः क्वचित् । (२८।१)

पीडां कुर्वन्तु बालस्य मा मातुर्जनकस्य वै ॥ (२८।२)

ततः शुक्लाम्बरधरा कुमारपतिसंयुता । (२९।१)

सप्तकं पूजयेद्भक्त्या स्त्रीणामथ गुरुं पुनः ॥ (२९।२)

काञ्चनीं च ततः कुर्यात्ताम्रपात्रोपरिस्थिताम् । (३०।१)

प्रतिमां धर्मराजस्य गुरवे विनिवेदयेत् ॥ (३०।२)

वस्त्रकाञ्चनरत्नौघैर्भक्ष्यैः सघृतपायसैः । (३१।१)

पूजयेद्ब्राह्मणांस्तद्वद्वित्तशाठ्यविवर्जितः ॥ (३१।२)

भुक्त्वा च गुरुणा चेयम् उच्चार्या मन्त्रसंततिः । (३२।१)

दीर्घायुरस्तु बालोऽयं यावद्वर्षशतं सुखी ॥ (३२।२)

यत्किंचिदस्य दुरितं तत्क्षिप्तं वडवानले । (३३।१)

ब्रह्मा रुद्रो वसुः स्कन्दो विष्णुः शक्रो हुताशनः ॥ (३३।२)

रक्षन्तु सर्वे दुष्टेभ्यो वरदाः सन्तु सर्वदा । (३४।१)

एवमादीनि वाक्यानि वदन्तं पूजयेद्गुरुम् ॥ (३४।२)

शक्तितः कपिलां दद्यात्प्रणम्य च विसर्जयेत् । (३५।१)

चरुं च पुत्रसहिता प्रणम्य रविशंकरौ ॥ (३५।२)

हुतशेषं तदाश्नीयादादित्याय नमोऽस्त्विति । (३६।१)

इदमेवाद्भुतोद्वेगदुःस्वप्नेषु प्रशस्यते ॥ (३६।२)

कर्तुर्जन्मदिनर्क्षं च त्यक्त्वा सम्पूजयेत्सदा । (३७।१)

शान्त्यर्थं शुक्लसप्तम्यामेतत्कुर्वन्न सीदति ॥ (३७।२)

सदानेन विधानेन दीर्घायुरभवन्नरः । (३८।१)

संवत्सराणामयुतं शशास पृथिवीमिमाम् ॥ (३८।२)

पुण्यं पवित्रमायुष्यं सप्तमीस्नपनं रविः । (३९।१)

कथयित्वा द्विजश्रेष्ठ तत्रैवान्तरधीयत ॥ (३९।२)

एतत्सर्वं समाख्यातं सप्तमीस्नानमुत्तमम् । (४०।१)

सर्वदुष्टोपशमनं बालानां परमं हितम् ॥ (४०।२)

आरोग्यं भास्करादिच्छेद्धनमिच्छेद्धुताशनात् । (४१।१)

ईश्वराज्ज्ञानम् अन्विच्छेन्मोक्षम् इच्छेज्जनार्दनात् ॥ (४१।२)

एतन्महापातकनाशनं स्यात्परं हितं बालविवर्धनं च । (४२।१)

शृणोति यश्चैनम् अनन्यचेतास् तस्यापि सिद्धिं मुनयो वदन्ति ॥ (४२।२)