नन्दिकेश्वर उवाच । (१।१)

फलत्यागस्य माहात्म्यं यद्भवेच्छृणु नारद । (१।२)

यदक्षयं परं लोके सर्वकामफलप्रदम् ॥ (१।३)

मार्गशीर्षे शुभे मासि तृतीयायां मुने व्रतम् । (२।१)

द्वादश्यामथवाष्टम्यां चतुर्दश्यामथापि वा । (२।२)

आरभेच्छुक्लपक्षस्य कृत्वा ब्राह्मणवाचनम् ॥ (२।३)

अन्येष्वपि हि मासेषु पुण्येषु मुनिसत्तम । (३।१)

सदक्षिणं पायसेन भोजयेच्छक्तितो द्विजान् ॥ (३।२)

अष्टादशानां धान्यानामन्यच्च फलमूलकम् । (४।१)

वर्जयेदब्दमेकं तु ऋते औषधकारणम् । (४।२)

सवृषं काञ्चनं रुद्रं धर्मराजं च कारयेत् ॥ (४।३)

कूष्माण्डं मातुलिङ्गं च वार्ताकं पनसं तथा । (५।१)

आम्रातकं कपित्थानि कलिङ्गमथ वालुकम् ॥ (५।२)

श्रीफलाश्वत्थबदरं जम्बीरं कदलीफलम् । (६।१)

काश्मरं दाडिमं शक्त्या कालधौतानि षोडश ॥ (६।२)

मूलकामलकं जम्बूतिन्तिडीकरमर्दकम् । (७।१)

कङ्कोलैलाकतुण्डीरकरीरकुटजं शमी ॥ (७।२)

औदुम्बरं नारिकेलं द्राक्षाथ बृहतीद्वयम् । (८।१)

रौप्याणि कारयेच्छक्त्या फलानीमानि षोडश ॥ (८।२)

ताम्रं तालफलं कुर्यादगस्तिफलमेव च । (९।१)

पिण्डारकाश्मर्यफलं तथा सूरणकन्दकम् ॥ (९।२)

रक्तालुकाकन्दकं च कनकाह्वं च चिर्भिटम् । (१०।१)

चित्रवल्लीफलं तद्वत्कूटशाल्मलिजं फलम् ॥ (१०।२)

आम्रनिष्पावमधुकवटमुद्गपटोलकम् । (११।१)

ताम्राणि षोडशैतानि कारयेच्छक्तितो नरः ॥ (११।२)

उदकुम्भद्वयं कुर्याद्धान्योपरि सवस्त्रकम् । (१२।१)

ततश्च कारयेच्छय्यां यथोपरि सुवाससी ॥ (१२।२)

भक्ष्यपात्रत्रयोपेतं यमरुद्रवृषान्वितम् । (१३।१)

धेन्वा सहैव शान्ताय विप्रायाथ कुटुम्बिने । (१३।२)

सपत्नीकाय सम्पूज्य पुण्येऽह्नि विनिवेदयेत् ॥ (१३।३)

यथा फलेषु सर्वेषु वसन्त्यमरकोटयः । (१४।१)

तथा सर्वफलत्यागव्रताद्भक्तिः शिवेऽस्तु मे ॥ (१४।२)

यथा शिवश्च धर्मश्च सदानन्तफलप्रदौ । (१५।१)

तद्युक्तफलदानेन तौ स्यातां मे वरप्रदौ ॥ (१५।२)

यथा फलान्यनन्तानि शिवभक्तेषु सर्वदा । (१६।१)

तथानन्तफलावाप्तिरस्तु जन्मनि जन्मनि ॥ (१६।२)

यथा भेदं न पश्यामि शिवविष्ण्वर्कपद्मजान् । (१७।१)

तथा ममास्तु विश्वात्मा शंकरः शंकरः सदा ॥ (१७।२)

इति दत्त्वा च तत्सर्वमलंकृत्य च भूषणैः । (१८।१)

शक्तिश्चेच्छयनं दद्यात्सर्वोपस्करसंयुतम् ॥ (१८।२)

अशक्तस्तु फलान्येव यथोक्तानि विधानतः । (१९।१)

तथोदकुम्भसंयुक्तौ शिवधर्मौ च काञ्चनौ ॥ (१९।२)

विप्राय दत्त्वा भुञ्जीत वाग्यतस्तैलवर्जितम् । (२०।१)

अन्यान्यपि यथाशक्त्या भोजयेच्छक्तितो द्विजान् ॥ (२०।२)

एतद्भागवतानां तु सौरवैष्णवयोगिनाम् । (२१।१)

शुभं सर्वफलत्यागव्रतं वेदविदो विदुः ॥ (२१।२)

नारीभिश्च यथाशक्त्या कर्तव्यं द्विजपुंगव । (२२।१)

एतस्मान्नापरं किंचिदिह लोके परत्र च । (२२।२)

व्रतमस्ति मुनिश्रेष्ठ यदनन्तफलप्रदम् ॥ (२२।३)

सौवर्णरौप्यताम्रेषु यावन्तः परमाणवः । (२३।१)

भवन्ति चूर्ण्यमानेषु फलेषु मुनिसत्तम । (२३।२)

तावद्युगसहस्राणि रुद्रलोके महीयते ॥ (२३।३)

एतत्समस्तकलुषापहरं जनानामाजीवनाय मनुजेषु च सर्वदा स्यात् । (२४।१)

जन्मान्तरेष्वपि न पुत्रवियोगदुःखमाप्नोति धाम च पुरंदरलोकजुष्टम् ॥ (२४।२)

यो वा शृणोति पुरुषो ऽल्पधनः पठेद्वा देवालयेषु भवनेषु च धार्मिकाणाम् । (२५।१)

पापैर्वियुक्तवपुरत्र पुरं मुरारेरानन्दकृत्पदमुपैति मुनीन्द्र सोऽपि ॥ (२५।२)