मत्स्य उवाच । (१।१)

श्रुतस्ते दैत्यसैन्यस्य विस्तारो रविनन्दन । (१।२)

सुराणामपि सैन्यस्य विस्तारं वैष्णवं शृणु ॥ (१।३)

आदित्या वसवो रुद्रा अश्विनौ च महाबलौ । (२।१)

सबलाः सानुगाश्चैव संनह्यन्त यथाक्रमम् ॥ (२।२)

पुरुहूतस्तु पुरतो लोकपालः सहस्रदृक् । (३।१)

ग्रामणीः सर्वदेवानामारुरोह सुरद्विपम् ॥ (३।२)

मध्ये चास्य रथः सर्वपक्षिप्रवरहंसः । (४।१)

सुचारुचक्रचरणो हेमवज्रपरिष्कृतः ॥ (४।२)

देवगन्धर्वयक्षौघैर् अनुयातः सहस्रशः । (५।१)

दीप्तिमद्भिः सदस्यैश्च ब्रह्मर्षिभिरभिष्टुतः ॥ (५।२)

वज्रविस्फूर्जितोद्भूतैर् विद्युदिन्द्रायुधोदितैः । (६।१)

युक्तो बलाहकगणैः पर्वतैरिव कामगैः ॥ (६।२)

यमारूढः स भगवान्पर्येति सकलं जगत् । (७।१)

हविर्धानेषु गायन्ति विप्रा मखमुखे स्थिताः ॥ (७।२)

स्वर्गे शक्रानुयातेषु देवतूर्यनिनादिषु । (८।१)

सुन्दर्यः परिनृत्यन्ति शतशोऽप्सरसां गणाः ॥ (८।२)

केतुना नागराजेन राजमानो यथा रविः । (९।१)

युक्तो हयसहस्रेण मनोमारुतरंहसा ॥ (९।२)

स स्यन्दनवरो भाति गुप्तो मातलिना तदा । (१०।१)

कृत्स्नः परिवृतो मेरुर्भास्करस्येव तेजसा ॥ (१०।२)

यमस्तु दण्डमुद्यम्य कालयुक्तश्च मुद्गरम् । (११।१)

तस्थौ सुरगणानीके दैत्यान्नादेन भीषयन् ॥ (११।२)

चतुर्भिः सागरैर्युक्तो लेलिहानैश्च पन्नगैः । (१२।१)

शङ्खमुक्ताङ्गदधरो बिभ्रत्तोयमयं वपुः ॥ (१२।२)

कालपाशान्समाविध्यन् हयैः शशिकरोपमैः । (१३।१)

वाय्वीरितैर् जलाकारैः कुर्वंल्लीलाः सहस्रशः ॥ (१३।२)

पाण्डुरोद्धूतवसनः प्रवालरुचिराङ्गदः । (१४।१)

मणिश्यामोत्तमवपुर्हरिभारार्पितो वरः ॥ (१४।२)

वरुणः पाशधृङ् मध्ये देवानीकस्य तस्थिवान् । (१५।१)

युद्धवेलामभिलषन्भिन्नवेल इवार्णवः ॥ (१५।२)

यक्षराक्षससैन्येन गुह्यकानां गणैरपि । (१६।१)

युक्तश्च शङ्खपद्माभ्यां निधीनामधिपः प्रभुः ॥ (१६।२)

राजराजेश्वरः श्रीमान्गदापाणिरदृश्यत । (१७।१)

विमानयोधी धनदो विमाने पुष्पके स्थितः ॥ (१७।२)

स राजराजः शुशुभे युद्धार्थी नरवाहनः । (१८।१)

उक्षाणमास्थितः संख्ये साक्षादिव शिवः स्वयम् ॥ (१८।२)

पूर्वपक्षः सहस्राक्षः पितृराजस्तु दक्षिणः । (१९।१)

वरुणः पश्चिमं पक्षमुत्तरं नरवाहनः ॥ (१९।२)

चतुर्षु युक्ताश्चत्वारो लोकपाला महाबलाः । (२०।१)

स्वासु दिक्षु स्वरक्षन्त तस्य देवबलस्य ते ॥ (२०।२)

सूर्यः सप्ताश्वयुक्तेन रथेनामितगामिना । (२१।१)

श्रिया जाज्वल्यमानेन दीप्यमानैश्च रश्मिभिः ॥ (२१।२)

उदयास्तगचक्रेण मेरुपर्वतगामिना । (२२।१)

त्रिदिवद्वारचक्रेण तपता लोकमव्ययम् ॥ (२२।२)

सहस्ररश्मियुक्तेन भ्राजमानेन तेजसा । (२३।१)

चचार मध्ये लोकानां द्वादशात्मा दिनेश्वरः ॥ (२३।२)

सोमः श्वेतहये भाति स्यन्दने शीतरश्मिवान् । (२४।१)

हिमवत्तोयपूर्णाभिर्भाभिराह्लादयञ्जगत् ॥ (२४।२)

तमृक्षपूगानुगतं शिशिरांशुं द्विजेश्वरम् । (२५।१)

शशच्छायाङ्किततनुं नैशस्य तमसः क्षयम् ॥ (२५।२)

ज्योतिषामीश्वरं व्योम्नि रसानां रसदं प्रभुम् । (२६।१)

ओषधीनां सहस्राणां निधानममृतस्य च ॥ (२६।२)

जगतः प्रथमं भागं सौम्यं सत्यमयं रथम् । (२७।१)

ददृशुर्दानवाः सोमं हिमप्रहरणं स्थितम् ॥ (२७।२)

यः प्राणः सर्वभूतानां पञ्चधा भिद्यते नृषु । (२८।१)

सप्तधातुगतो लोकांस्त्रीन्दधार चचार च ॥ (२८।२)

यमाहुरग्निकर्तारं सर्वप्रभवमीश्वरम् । (२९।१)

सप्तस्वरगतो यश्च नित्यं गीर्भिरुदीर्यते ॥ (२९।२)

यं वदन्त्युत्तमं भूतं यं वदन्त्यशरीरिणम् । (३०।१)

यमाहुराकाशगमं शीघ्रगं शब्दयोगिनम् ॥ (३०।२)

स वायुः सर्वभूतायुरुद्भूतः स्वेन तेजसा । (३१।१)

ववौ प्रव्यथयन्दैत्यान्प्रतिलोमं सतोयदः ॥ (३१।२)

मरुतो दिव्यगन्धर्वैर्विद्याधरगणैः सह । (३२।१)

चिक्रीडुरसिभिः शुभ्रैर्निर्मुक्तैरिव पन्नगैः ॥ (३२।२)

सृजन्तः सर्पपतयस् तीव्रतोयमयं विषम् । (३३।१)

शरभूता दिवीन्द्राणां चेरुर्व्यात्तानना दिवि ॥ (३३।२)

पर्वतैश्च शिलाशृङ्गैः शतशश्चैव पादपैः । (३४।१)

उपतस्थुः सुरगणाः प्रहर्तुं दानवं बलम् ॥ (३४।२)

यः स देवो हृषीकेशः पद्मनाभस्त्रिविक्रमः । (३५।१)

युगान्तकृष्णवर्त्माभो विश्वस्य जगतः प्रभुः ॥ (३५।२)

सर्वयोनिः स मधुहा हव्यभुक्क्रतुसंस्थितः । (३६।१)

भूम्यापोव्योमभूतात्मा श्यामः शान्तिकरो ऽरिहा ॥ (३६।२)

अरिघ्नममरादीनां चक्रं गृह्य गदाधरः । (३७।१)

अर्कं नागादिवोद्यन्तम् उद्यम्योत्तमतेजसा ॥ (३७।२)

सव्येनालम्ब्य महतीं सर्वासुरविनाशिनीम् । (३८।१)

करेण कालीं वपुषा शत्रुकालप्रदां गदाम् ॥ (३८।२)

अन्यैर्भुजैः प्रदीप्तानि भुजगारिध्वजः प्रभुः । (३९।१)

दधारायुधजातानि शार्ङ्गादीनि महाबलः ॥ (३९।२)

स कश्यपस्यात्मभुवं द्विजं भुजगभोजनम् । (४०।१)

पवनाधिकसंपातं गगनक्षोभणं खगम् ॥ (४०।२)

भुजगेन्द्रेण वदने निविष्टेन विराजितम् । (४१।१)

अमृतारम्भनिर्मुक्तं मन्दराद्रिम् इवोच्छ्रितम् ॥ (४१।२)

देवासुरविमर्देषु बहुशो दृष्टविक्रमम् । (४२।१)

महेन्द्रेणामृतस्यार्थे वज्रेण कृतलक्षणम् ॥ (४२।२)

शिखिनं बलिनं चैव तप्तकुण्डलभूषणम् । (४३।१)

विचित्रपत्रवसनं धातुमन्तमिवाचलम् ॥ (४३।२)

स्फीतक्रोडावलम्बेन शीतांशुसमतेजसा । (४४।१)

भोगिभोगावसक्तेन मणिरत्नेन भास्वता ॥ (४४।२)

पक्षाभ्यां चारुपत्राभ्यामावृत्य दिवि लीलया । (४५।१)

युगान्ते सेन्द्रचापाभ्यां तोयदाभ्यामिवाम्बरम् ॥ (४५।२)

नीललोहितपीताभिः पताकाभिरलंकृतम् । (४६।१)

केतुवेषप्रतिच्छन्नं महाकायनिकेतनम् ॥ (४६।२)

अरुणावरजं श्रीमानारुह्य समरे विभुः । (४७।१)

सुवर्णवर्णवपुषा सुपर्णं खेचरोत्तमम् ॥ (४७।२)

तमन्वयुर्देवगणा मुनयश्च समाहिताः । (४८।१)

गीर्भिः परममन्त्राभिस्तुष्टुवुश्च जनार्दनम् ॥ (४८।२)

तद्वैश्रवणसंश्लिष्टं वैवस्वतपुरःसरम् । (४९।१)

द्विजराजपरिक्षिप्तं देवराजविराजितम् ॥ (४९।२)

चन्द्रप्रभाभिर्विपुलं युद्धाय समवर्तत । (५०।१)

पवनाविद्धनिर्घोषं संप्रदीप्तहुताशनम् ॥ (५०।२)

विष्णोर्जिष्णोश्च भ्राजिष्णोस्तेजसा तमसावृतम् । (५१।१)

बलं बलवदुद्वृत्तं युद्धाय समवर्तत ॥ (५१।२)

स्वस्त्यस्तु देवेभ्य इति बृहस्पतिरभाषत । (५२।१)

स्वस्त्यस्तु दानवानीक उशना वाक्यमाददे ॥ (५२।२)