ईश्वर उवाच । (१।१)

तथैवान्यां प्रवक्ष्यामि तृतीयां पापनाशिनीम् । (१।२)

नाम्ना च लोके विख्याताम् आर्द्रानन्दकरीमिमाम् ॥ (१।३)

यदा शुक्लतृतीयायामाषाढर्क्षं भवेत्क्वचित् । (२।१)

ब्रह्मर्क्षं वा मृगर्क्षं वा हस्तो मूलमथापि वा । (२।२)

दर्भगन्धोदकैः स्नानं तदा सम्यक्समाचरेत् ॥ (२।३)

शुक्लमाल्याम्बरधरः शुक्लगन्धानुलेपनः । (३।१)

भवानीमर्चयेद्भक्त्या शुक्लपुष्पैः सुगन्धिभिः । (३।२)

महादेवेन सहितामुपविष्टां महासने ॥ (३।३)

वासुदेव्यै नमः पादौ शंकराय नमो हरम् । (४।१)

जङ्घे शोकविनाशिन्यै आनन्दाय नमः प्रभो ॥ (४।२)

रम्भायै पूजयेदूरू शिवाय च पिनाकिनः । (५।१)

अदित्यै च कटिं देव्याः शूलिनः शूलपाणये ॥ (५।२)

माधव्यै च तथा नाभिमथ शम्भोर्भवाय च । (६।१)

स्तनावानन्दकारिण्यै शंकरस्येन्दुधारिणे ॥ (६।२)

उत्कण्ठिन्यै नमः कण्ठं नीलकण्ठाय वै हरम् । (७।१)

करावुत्पलधारिण्यै रुद्राय च जगत्पते । (७।२)

बाहू च परिरम्भिण्यै त्रिशूलाय हरस्य च ॥ (७।३)

देव्या मुखं विलासिन्यै वृषेशाय पुनर्विभोः । (८।१)

स्मितं सस्मेरलीलायै विश्ववक्त्राय वै विभो ॥ (८।२)

नेत्रे मदनवासिन्यै विश्वधाम्ने त्रिशूलिनः । (९।१)

भ्रुवौ नृत्यप्रियायै तु ताण्डवेशाय शूलिनः ॥ (९।२)

देव्या ललाटमिन्द्राण्यै हव्यवाहाय वै विभोः । (१०।१)

स्वाहायै मुकुटं देव्या विभोर्गङ्गाधराय वै ॥ (१०।२)

विश्वकायौ विश्वमुखौ विश्वपादकरौ शिवौ । (११।१)

प्रसन्नवदनौ वन्दे पार्वतीपरमेश्वरौ ॥ (११।२)

एवं सम्पूज्य विधिवदग्रतः शिवयोः पुनः । (१२।१)

पद्मोत्पलानि रजसा नानावर्णेन कारयेत् ॥ (१२।२)

शङ्खचक्रे सकटके स्वस्तिकाङ्कुशचामरान् । (१३।१)

यावन्तः पांसवस्तत्र रजसः पतिता भुवि । (१३।२)

तावद्वर्षसहस्राणि शिवलोके महीयते ॥ (१३।३)

चत्वारि घृतपात्राणि सहिरण्यानि शक्तितः । (१४।१)

दत्त्वा द्विजाय करकमुदकान्नसमन्वितम् । (१४।२)

प्रतिपक्षं चतुर्मासं यावदेतन्निवेदयेत् ॥ (१४।३)

ततस्तु चतुरो मासान्पूर्ववत्करकोपरि । (१५।१)

चत्वारि सक्तुपात्राणि तिलपात्राण्यतः परम् ॥ (१५।२)

गन्धोदकं पुष्पवारि चन्दनं कुङ्कुमोदकम् । (१६।१)

अपक्वं दधि दुग्धं च गोशृङ्गोदकमेव च ॥ (१६।२)

पिष्टोदकं तथा वारि कुष्ठचूर्णान्वितं पुनः । (१७।१)

उशीरसलिलं तद्वद् यवचूर्णोदकं पुनः ॥ (१७।२)

तिलोदकं च संप्राश्य स्वपेन्मार्गशिरादिषु । (१८।१)

मासेषु पक्षद्वितयं प्राशनं समुदाहृतम् ॥ (१८।२)

सर्वत्र शुक्लपुष्पाणि प्रशस्तानि सदार्चने । (१९।१)

दानकाले च सर्वत्र मन्त्रमेतमुदीरयेत् ॥ (१९।२)

गौरी मे प्रीयतां नित्यमघनाशाय मङ्गला । (२०।१)

सौभाग्यायास्तु ललिता भवानी सर्वसिद्धये ॥ (२०।२)

संवत्सरान्ते लवणं गुडकुम्भं च सर्जिकाम् । (२१।१)

चन्दनं नेत्रपट्टं च सहिरण्याम्बुजेन तु ॥ (२१।२)

उमामहेश्वरं हैमं तद्वदिक्षुफलैर्युतम् । (२२।१)

सतूलावरणां शय्यां सविश्रामां निवेदयेत् । (२२।२)

सपत्नीकाय विप्राय गौरी मे प्रीयतामिति ॥ (२२।३)

आर्द्रानन्दकरी नाम्ना तृतीयैषा सनातनी । (२३।१)

यामुपोष्य नरो याति शम्भोर्यत्परमं पदम् ॥ (२३।२)

इह लोके सदानन्दमाप्नोति धनसम्पदः । (२४।१)

आयुरारोग्यसम्पत्त्या न कश्चिच्छोकमाप्नुयात् ॥ (२४।२)

नारी वा कुरुते या तु कुमारी विधवा च या । (२५।१)

सापि तत्फलमाप्नोति देव्यनुग्रहलालिता ॥ (२५।२)

प्रतिपक्षमुपोष्यैवं मन्त्रार्चनविधानवित् । (२६।१)

रुद्राणीलोकमभ्येति पुनरावृत्तिदुर्लभम् ॥ (२६।२)

य इदं शृणुयान्नित्यं श्रावयेद्वापि मानवः । (२७।१)

शक्रलोके स गन्धर्वैः पूज्यतेऽपि युगत्रयम् ॥ (२७।२)

आनन्ददां सकलदुःखहरां तृतीयां या स्त्री करोत्यविधवा विधवाथ वापि । (२८।१)

सा स्वे गृहे सुखशतान्यनुभूय भूयो गौरीपदं सदयिता दयिता प्रयाति ॥ (२८।२)