ईश्वर उवाच । (१।१)

अथान्यामपि वक्ष्यामि तृतीयां पापनाशिनीम् । (१।२)

रसकल्याणिनीमेतां पुराकल्पविदो विदुः ॥ (१।३)

माघमासे तु सम्प्राप्ते तृतीयां शुक्लपक्षतः । (२।१)

प्रातर्गव्येन पयसा तिलैः स्नानं समाचरेत् ॥ (२।२)

स्नापयेन्मधुना देवीं तथैवेक्षुरसेन च । (३।१)

गन्धोदकेन तु पुनर्लेपयेत्कुङ्कुमेन तु । (३।२)

दक्षिणाङ्गानि सम्पूज्य ततो वामानि पूजयेत् ॥ (३।३)

ललितायै नमो देव्याः पादौ गुल्फौ ततो ऽर्चयेत् । (४।१)

जङ्घां जानुं तथा शान्त्यै तथैवोरुं श्रियै नमः ॥ (४।२)

मदालसायै तु कटिममलायै तथोदरम् । (५।१)

स्तनौ मदनवासिन्यै कुमुदायै च कन्दराम् ॥ (५।२)

भुजं भुजाग्रं माधव्यै कमलायै मुखस्मिते । (६।१)

भूललाटं च रुद्राण्यै शंकरायै तथालकान् ॥ (६।२)

मुकुटं विश्ववासिन्यै शिरः कान्त्यै तथार्चयेत् । (७।१)

मदनायै ललाटं तु मोहनायै पुनर्भ्रुवौ ॥ (७।२)

नेत्रे चन्द्रार्धधारिण्यै तुष्ट्यै च वदनं पुनः । (८।१)

उत्कण्ठिन्यै नमः कण्ठममृतायै नमः स्तनौ ॥ (८।२)

रम्भायै वामकुक्षिं च विशोकायै नमः कटिम् । (९।१)

हृदयं मन्मथाधिष्ण्यै पाटलायै तथोदरम् ॥ (९।२)

कटिं सुरतवासिन्यै तथोरुं चम्पकप्रिये । (१०।१)

जानुजङ्घे नमो गौर्यै गायत्र्यै घुटिके नमः ॥ (१०।२)

धराधरायै पादौ तु विश्वकायै नमः शिरः । (११।१)

नमो भवान्यै कामिन्यै कामदेव्यै जगत्प्रिये ॥ (११।२)

आनन्दायै सुनन्दायै सुभद्रायै नमो नमः । (१२।१)

एवं सम्पूज्य विधिवद्द्विजदाम्पत्यम् अर्चयेत् । (१२।२)

भोजयित्वान्नपानेन मधुरेण विमत्सरः ॥ (१२।३)

जलपूरितं तथा कुम्भं शुक्लाम्बरयुगद्वयम् । (१३।१)

दत्त्वा सुवर्णकमलं गन्धमाल्यैः समर्चयेत् ॥ (१३।२)

प्रीयतामत्र कुमुदा गृह्णीयाल्लवणव्रतम् । (१४।१)

अनेन विधिना देवी मासि मासि सदार्चयेत् ॥ (१४।२)

लवणं वर्जयेन्माघे फाल्गुने च गुडं पुनः । (१५।१)

तैलं राजिं तथा चैत्रे वर्ज्यं च मधु माधवे ॥ (१५।२)

पानकं ज्येष्ठमासे तु आषाढे चाथ जीरकम् । (१६।१)

श्रावणे वर्जयेत्क्षीरं दधि भाद्रपदे तथा ॥ (१६।२)

घृतमाश्वयुजे तद्वदूर्जे वर्ज्यं च माक्षिकम् । (१७।१)

धान्यकं मार्गशीर्षे तु पौषे वर्ज्या च शर्करा ॥ (१७।२)

व्रतान्ते करकं पूर्णमेतेषां मासि मासि च । (१८।१)

दद्याद्द्विकालवेलायां पूर्णपात्रेण संयुतम् ॥ (१८।२)

लड्डुकाञ्छ्वेतवर्णांश्च संयावमथ पूरिकाः । (१९।१)

घारिकान् अप्यपूपांश्च पिष्टापूपांश्च मण्डकान् ॥ (१९।२)

क्षीरं शाकं च दध्यन्नमिण्डर्यो ऽशोकवर्तिकाः । (२०।१)

माघादिक्रमशो दद्यादेतानि करकोपरि ॥ (२०।२)

कुमुदा माधवी गौरी रम्भा भद्रा जया शिवा । (२१।१)

उमा रतिः सती तद्वन्मङ्गला रतिलालसा ॥ (२१।२)

क्रमान्माघादि सर्वत्र प्रीयतामिति कीर्तयेत् । (२२।१)

सर्वत्र पञ्चगव्येन प्राशनं समुदाहृतम् । (२२।२)

उपवासी भवेन्नित्यमशक्ते नक्तमिष्यते ॥ (२२।३)

पुनर्माघे तु सम्प्राप्ते शर्करां करकोपरि । (२३।१)

कृत्वा तु काञ्चनीं गौरीं पञ्चरत्नसमन्विताम् ॥ (२३।२)

हैमीमङ्गुष्ठमात्रां च साक्षसूत्रकमण्डलुम् । (२४।१)

चतुर्भुजामिन्दुयुतां सितनेत्रपटावृताम् ॥ (२४।२)

तद्वद्गोमिथुनं शुक्लं सुवर्णास्यं सिताम्बरम् । (२५।१)

सवस्त्रभाजनं दद्याद्भवानी प्रीयतामिति ॥ (२५।२)

अनेन विधिना यस्तु रसकल्याणिनीव्रतम् । (२६।१)

कुर्यात्स सर्वपापेभ्यस् तत्क्षणादेव मुच्यते ॥ (२६।२)

नवार्बुदसहस्रं तु न दुःखी जायते नरः । (२७।१)

सुवर्णकमलं गौरि मासि मासि ददन्नरः । (२७।२)

अग्निष्टोमसहस्रस्य यत्फलं तदवाप्नुयात् ॥ (२७।३)

नारी वा कुरुते या तु कुमारी वा वरानने । (२८।१)

विधवा या तथा नारी सापि तत्फलमाप्नुयात् । (२८।२)

सौभाग्यारोग्यसम्पन्ना गौरीलोके महीयते ॥ (२८।३)

इति पठति शृणोति श्रावयेद्यः प्रसङ्गात्कलिकलुषविमुक्तः पार्वतीलोकमेति । (२९।१)

मतिमपि च नराणां यो ददाति प्रियार्थं विबुधपतिविमाने नायकः स्यादमोघः ॥ (२९।२)