नन्दिकेश्वर उवाच । (१।१)

शृणु नारद वक्ष्यामि विष्णोर्व्रतमनुत्तमम् । (१।२)

विभूतिद्वादशी नाम सर्वदेवनमस्कृतम् ॥ (१।३)

कार्त्तिके चैत्रवैशाखे मार्गशीर्षे च फाल्गुने । (२।१)

आषाढे वा दशम्यां तु शुक्लायां लघुभुङ्नरः । (२।२)

कृत्वा सायन्तनीं संध्यां गृह्णीयान्नियमं बुधः ॥ (२।३)

एकादश्यां निराहारः समभ्यर्च्य जनार्दनम् । (३।१)

द्वादश्यां द्विजसंयुक्तः करिष्ये भोजनं विभो ॥ (३।२)

तदविघ्नेन मे यातु सफलं स्याच्च केशव । (४।१)

नमो नारायणायेति वाच्यं च स्वपता निशि ॥ (४।२)

ततः प्रभात उत्थाय कृतस्नानजपः शुचिः । (५।१)

पूजयेत्पुण्डरीकाक्षं शुक्लमाल्यानुलेपनैः ॥ (५।२)

विभूतये नमः पादावशोकाय च जानुनी । (६।१)

नमः शिवायेत्यूरू च विश्वमूर्ते नमः कटिम् ॥ (६।२)

कन्दर्पाय नमो मेढ्रमादित्याय नमः करौ । (७।१)

दामोदरायेत्युदरं वासुदेवाय च स्तनौ ॥ (७।२)

माधवायेत्युरो विष्णोः कण्ठम् उत्कण्ठिने नमः । (८।१)

श्रीधराय मुखं केशान्केशवायेति नारद ॥ (८।२)

पृष्ठं शार्ङ्गधरायेति श्रवणौ वरदाय वै । (९।१)

स्वनाम्ना शङ्खचक्रासिगदाजलजपाणये । (९।२)

शिरः सर्वात्मने ब्रह्मन्नम इत्यभिपूजयेत् ॥ (९।३)

मत्स्यमुत्पलसंयुक्तं हैमं कृत्वा तु शक्तितः । (१०।१)

उदकुम्भसमायुक्तमग्रतः स्थापयेद्बुधः ॥ (१०।२)

गुडपात्रं तिलैर्युक्तं सितवस्त्राभिवेष्टितम् । (११।१)

रात्रौ जागरणं कुर्यादितिहासकथादिना ॥ (११।२)

प्रभातायां तु शर्वर्यां ब्राह्मणाय कुटुम्बिने । (१२।१)

सकाञ्चनोत्पलं देवं सोदकुम्भं निवेदयेत् ॥ (१२।२)

यथा न मुच्यसे देव सदा सर्वविभूतिभिः । (१३।१)

तथा मामुद्धराशेषदुःखसंसारकर्दमात् ॥ (१३।२)

दशावताररूपाणि प्रतिमासं क्रमान्मुने । (१४।१)

दत्तात्रेयं तथा व्यासमुत्पलेन समन्वितम् । (१४।२)

दद्यादेवं समा यावत्पाषण्डानभिवर्जयेत् ॥ (१४।३)

समाप्यैवं यथाशक्त्या द्वादश द्वादशीः पुनः । (१५।१)

संवत्सरान्ते लवणपर्वतेन समन्विताम् ॥ (१५।२)

शय्यां दद्यान्मुनिश्रेष्ठ गुरवे धेनुसंयुताम् ॥ (१६।०)

ग्रामं च शक्तिमान्दद्यात्क्षेत्रं वा भवनान्वितम् । (१७।१)

गुरुं सम्पूज्य विधिवद्वस्त्रालंकारभूषणैः ॥ (१७।२)

अन्यानपि यथाशक्त्या भोजयित्वा द्विजोत्तमान् । (१८।१)

तर्पयेद् वस्त्रगोदानै रत्नौघधनसंचयैः । (१८।२)

अल्पवित्तो यथाशक्त्या स्तोकं स्तोकं समाचरेत् ॥ (१८।३)

यश्चाप्यतीव निःस्वः स्याद्भक्तिमान्माधवं प्रति । (१९।१)

पुष्पार्चनविधानेन स कुर्याद्वत्सरद्वयम् । (१९।२)

अनेन विधिना यस्तु विभूतिद्वादशीव्रतम् । (१९।३)

कुर्यात्पापविनिर्मुक्तः पितॄणां तारयेच्छतम् ॥ (१९।४)

जन्मनां शतसाहस्रं न शोकफलभाग्भवेत् । (२०।१)

न च व्याधिर्भवेत्तस्य न दारिद्र्यं न बन्धनम् । (२०।२)

वैष्णवो वाथ शैवो वा भवेज्जन्मनि जन्मनि ॥ (२०।३)

यावद्युगसहस्राणां शतमष्टोत्तरं भवेत् । (२१।१)

तावत्स्वर्गे वसेद्ब्रह्मन्भूपतिश्च पुनर्भवेत् ॥ (२१।२)