सूत उवाच । (१।१)

इति चिन्तायुतो दैत्यो दिव्योपायप्रभावजम् । (१।२)

चकार त्रिपुरं दुर्गं मनःसंचारचारितम् ॥ (१।३)

प्राकारोऽनेन मार्गेण इह वामुत्र गोपुरम् । (२।१)

इह चाट्टालकद्वारमिह चाट्टालगोपुरम् ॥ (२।२)

राजमार्ग इतश्चापि विपुलो भवतामिति । (३।१)

रथ्योपरथ्याः सत्त्रिका इह चत्वर एव च ॥ (३।२)

इदमन्तःपुरस्थानं रुद्रायतनमत्र च । (४।१)

सवटानि तडागानि ह्यत्र वाप्यः सरांसि च ॥ (४।२)

आरामाश्च सभाश्चात्र उद्यानान्यत्र वा तथा । (५।१)

उपनिर्गमो दानवानां भवत्यत्र मनोहरः ॥ (५।२)

इत्येवं मानसं तत्राकल्पयत्पुरकल्पवित् । (६।१)

मयेन तत्पुरं सृष्टं त्रिपुरं त्विति नः श्रुतम् ॥ (६।२)

कार्ष्णायसमयं यत्तु मयेन विहितं पुरम् । (७।१)

तारकाख्योऽधिपस्तत्र कृतस्थानाधिपोऽवसत् ॥ (७।२)

यत्तु पूर्णेन्दुसंकाशं राजतं निर्मितं पुरम् । (८।१)

विद्युन्माली प्रभुस्तत्र विद्युन्माली त्विवाम्बुदः ॥ (८।२)

सुवर्णाधिकृतं यच्च मयेन विहितं पुरम् । (९।१)

स्वयमेव मयस्तत्र गतस्तदधिपः प्रभुः ॥ (९।२)

तारकस्य पुरं तत्र शतयोजनमन्तरम् । (१०।१)

विद्युन्मालिपुरं चापि शतयोजनकेऽन्तरे ॥ (१०।२)

मेरुपर्वतसंकाशं मयस्यापि पुरं महत् । (११।१)

पुष्यसंयोगमात्रेण कालेन स मयः पुरा ॥ (११।२)

कृतवांस्त्रिपुरं दैत्यस्त्रिनेत्रः पुष्पकं यथा । (१२।१)

येन येन मयो याति प्रकुर्वाणः पुरं पुरात् ॥ (१२।२)

प्रशस्तास्तत्र तत्रैव वारुण्यामालयाः स्वयम् । (१३।१)

रुक्मरूप्यायसानां च शतशोऽथ सहस्रशः ॥ (१३।२)

रत्नाचितानि शोभन्ते पुराण्यमरविद्विषाम् । (१४।१)

प्रासादशतजुष्टानि कूटागारोत्कटानि च ॥ (१४।२)

सर्वेषां कामगानि स्युः सर्वलोकातिगानि च । (१५।१)

सोद्यानवापीकूपानि सपद्मसरवन्ति च ॥ (१५।२)

अशोकवनभूतानि कोकिलारुतवन्ति च । (१६।१)

चित्रशालाविशालानि चतुःशालोत्तमानि च ॥ (१६।२)

सप्ताष्टदशभौमानि सत्कृतानि मयेन च । (१७।१)

बहुध्वजपताकानि स्रग्दामालंकृतानि च ॥ (१७।२)

किङ्किणीजालशब्दानि गन्धवन्ति महान्ति च । (१८।१)

सुसंयुक्तोपलिप्तानि पुष्पनैवेद्यवन्ति च ॥ (१८।२)

यज्ञधूमान्धकाराणि सम्पूर्णकलशानि च । (१९।१)

गगनावरणाभानि हंसपङ्क्तिनिभानि च ॥ (१९।२)

पङ्क्तीकृतानि राजन्ते गृहाणि त्रिपुरे पुरे । (२०।१)

मुक्ताकलापैर्लम्बद्भिर् हसन्तीव शशिश्रियम् ॥ (२०।२)

मल्लिकाजातिपुष्पाद्यैर् गन्धधूपाधिवासितैः । (२१।१)

पञ्चेन्द्रियसुखैर् नित्यं समैः सत्पुरुषैरिव ॥ (२१।२)

हेमराजतलोहाद्यमणिरत्नाञ्जनाङ्किताः । (२२।१)

प्राकारास्त्रिपुरे तस्मिन्गिरिप्राकारसंनिभाः ॥ (२२।२)

एकैकस्मिन्पुरे तस्मिन्गोपुराणां शतं शतम् । (२३।१)

सपताकाध्वजवतां दृश्यन्ते गिरिशृङ्गवत् ॥ (२३।२)

नूपुरारावरम्याणि त्रिपुरे तत्पुराण्यपि । (२४।१)

स्वर्गातिरिक्तश्रीकाणि तत्र कन्यापुराणि च ॥ (२४।२)

आरामैश्च विहारैश्च तडागवटचत्वरैः । (२५।१)

सरोभिश्च सरिद्भिश्च वनैश्चोपवनैरपि ॥ (२५।२)

दिव्यभोगोपभोगानि नानारत्नयुतानि च । (२६।१)

पुष्पोत्करैश्च सुभगास्त्रिपुरस्योपनिर्गमाः । (२६।२)

परिखाशतगम्भीराः कृता मायानिवारणैः ॥ (२६।३)

निशम्य तद्दुर्गविधानमुत्तमं कृतं मयेनाद्भुतवीर्यकर्मणा । (२७।१)

दितेः सुता दैवतराजवैरिणः सहस्रशः प्रापुरनन्तविक्रमाः ॥ (२७।२)

तदासुरैर्दर्पितवैरिमर्दनैर् जनार्दनैः शैलकरीन्द्रसंनिभैः । (२८।१)

बभूव पूर्णं त्रिपुरं तथा पुरा यथाम्बरं भूरिजलैर् जलप्रदैः ॥ (२८।२)