सूत उवाच । (१।१)

अथान्विषन्तो राजानं भ्रातरस् तस्य मानवाः । (१।२)

इक्ष्वाकुप्रमुखा जग्मुस्तदा शरवणान्तिकम् ॥ (१।३)

ततस्ते ददृशुः सर्वे वडबाम् अग्रतः स्थिताम् । (२।१)

रत्नपर्याणकिरणदीप्तकायाम् अनुत्तमाम् ॥ (२।२)

पर्याणप्रत्यभिज्ञानात् सर्वे विस्मयम् आगताः । (३।१)

अयं चन्द्रप्रभो नाम वाजी तस्य महात्मनः ॥ (३।२)

अगमद् वडबारूपम् उत्तमं केन हेतुना । (४।१)

ततस् तु मैत्रावरुणिं पप्रच्छुस्ते पुरोधसम् ॥ (४।२)

किमित्येतदभूच्चित्रं वद योगविदां वर । (५।१)

वसिष्ठश्चाब्रवीत् सर्वं दृष्ट्वा तद्ध्यानचक्षुषा ॥ (५।२)

समयः शम्भुदयिताकृतः शरवणे पुरा । (६।१)

यः पुमान्प्रविशेद् अत्र स नारीत्वमवाप्स्यति ॥ (६।२)

अयमश्वोऽपि नारीत्वम् अगाद्राज्ञा सहैव तु । (७।१)

पुनः पुरुषताम् एति यथासौ धनदोपमः ॥ (७।२)

तथैव यत्नः कर्तव्यश् चाराध्यैव पिनाकिनम् । (८।१)

ततस्ते मानवा जग्मुर्यत्र देवो महेश्वरः ॥ (८।२)

तुष्टुवुर् विविधैः स्तोत्रैः पार्वतीपरमेश्वरौ । (९।१)

ताव् ऊचतुर् अलङ्घ्यो ऽयं समयः किंतु साम्प्रतम् ॥ (९।२)

इक्ष्वाकोरश्वमेधेन यत्फलं स्यात्तदावयोः । (१०।१)

दत्त्वा किम्पुरुषो वीरः स भविष्यत्यसंशयम् ॥ (१०।२)

तथेत्युक्तास्ततस्ते तु जग्मुर् वैवस्वतात्मजाः । (११।१)

इक्ष्वाकोश्चाश्वमेधेन चेलः किम्पुरुषो ऽभवत् ॥ (११।२)

मासमेकं पुमान्वीरः स्त्री च मासमभूत्पुनः । (१२।१)

बुधस्य भवने तिष्ठन्निलो गर्भधरोऽभवत् ॥ (१२।२)

अजीजनत्पुत्रमेकमनेकगुणसंयुतम् । (१३।१)

बुधश्चोत्पाद्य तं पुत्रं स्वर्लोकम् अगमत्ततः ॥ (१३।२)

इलस्य नाम्ना तद्वर्षमिलावृतम् अभूत्तदा । (१४।१)

सोमार्कवंशयोर् आदाव् इलो ऽभून्मनुनन्दनः ॥ (१४।२)

एवं पुरूरवाः पुंसोर् अभवद् वंशवर्धनः । (१५।१)

इक्ष्वाकुर् अर्कवंशस्य तथैवोक्तस्तपोधनाः ॥ (१५।२)

इलः किम्पुरुषत्वे च सुद्युम्न इति चोच्यते । (१६।१)

पुनः पुत्रत्रयमभूत् सुद्युम्नस्यापराजितम् ॥ (१६।२)

उत्कलो वै गहस् तद्वद्धरिताश्वश् च वीर्यवान् । (१७।१)

उत्कलस्योत्कला नाम गयस्य तु गया मता ॥ (१७।२)

हरिताश्वस्य दिक्पूर्वा विश्रुता कुरुभिः सह । (१८।१)

प्रतिष्ठाने ऽभिषिच्याथ स पुरूरवसं सुतम् ॥ (१८।२)

जगामेलावृतं भोक्तुं वर्षं दिव्यफलाशनम् । (१९।१)

इक्ष्वाकुर्ज्येष्ठदायादो मध्यदेशमवाप्तवान् ॥ (१९।२)

नरिष्यन्तस्य पुत्रो ऽभूच्छुचो नाम महाबलः । (२०।१)

नाभागस्याम्बरीषस्तु धृष्टस्य च सुतत्रयम् ॥ (२०।२)

धृतकेतुश्चित्रनाथो रणधृष्टश्च वीर्यवान् । (२१।१)

आनर्तो नाम शर्यातेः सुकन्या चैव दारिका ॥ (२१।२)

आनर्तस्याभवत्पुत्रो रोचमानः प्रतापवान् । (२२।१)

आनर्तो नाभ देशो ऽभून्नगरी च कुशस्थली ॥ (२२।२)

रोचमानस्य पुत्रोऽभूद्रेवो रैवत एव च । (२३।१)

ककुद्मी चापरं नाम ज्येष्ठः पुत्रशतस्य च ॥ (२३।२)

रेवती तस्य सा कन्या भार्या रामस्य विश्रुता । (२४।१)

करूषस्य तु कारूषा बहवः प्रथिता भुवि ॥ (२४।२)

पृषध्रो गोवधाच्छूद्रो गुरुशापादजायत । (२५।१)

इक्ष्वाकुवंशं वक्ष्यामि शृणुध्वमृषिसत्तमाः ॥ (२५।२)

इक्ष्वाकोः पुत्रताम् आप विकुक्षिर् नाम देवराट् । (२६।१)

ज्येष्ठः पुत्रशतस्यासीद्दश पञ्च च तत्सुताः ॥ (२६।२)

मेरोरुत्तरतस्ते तु जाताः पार्थिवसत्तमाः । (२७।१)

चतुर्दशोत्तरं चान्यच्छतमस्य तथाभवत् ॥ (२७।२)

मेरोर्दक्षिणतो ये ये राजानः संप्रकीर्तिताः । (२८।१)

ज्येष्ठः ककुत्स्थो नाम्नाभूत्तत्सुतस्तु सुयोधनः ॥ (२८।२)

तस्य पुत्रः पृथुर्नाम विश्वगश्चपृथोः सुतः । (२९।१)

इन्दुस्तस्य च पुत्रोऽभूद्युवनाश्वस्ततोऽभवत् ॥ (२९।२)

श्रावस्तश्च महातेजा वत्सकस्तत्सुतोऽभवत् । (३०।१)

निर्मिता येन श्रावस्ती गौडदेशे द्विजोत्तमाः ॥ (३०।२)

श्रावस्ताद्बृहदश्वो ऽभूत्कुवलाश्वस् ततोऽभवत् । (३१।१)

धुन्धुमारत्वमगमद्धुन्धुनाम्ना हतः पुरा ॥ (३१।२)

तस्य पुत्रास् त्रयो जाता दृढाश्वो दण्ड एव च । (३२।१)

कपिलाश्वश्च विख्यातो धौन्धुमारिः प्रतापवान् ॥ (३२।२)

दृढाश्वस्य प्रमोदश्च हर्यश्वस्तस्य चात्मजः । (३३।१)

हर्यश्वस्य निकुम्भो ऽभूत् संहताश्वस् ततो ऽभवत् ॥ (३३।२)

अकृताश्वो रणाश्वश्च संहताश्वसुताव् उभौ । (३४।१)

युवनाश्वो रणाश्वस्य मान्धाता च ततो ऽभवत् ॥ (३४।२)

मान्धातुः पुरुकुत्सोऽभूद्धर्मसेनश्च पार्थिवः । (३५।१)

मुचुकुन्दश्च विख्यातः शत्रुजिच्च प्रतापवान् ॥ (३५।२)

पुरुकुत्सस्य पुत्रोऽभूद्वसुदो नर्मदापतिः । (३६।१)

सम्भूतिस्तस्य पुत्रोऽभूत्त्रिधन्वा च ततोऽभवत् ॥ (३६।२)

त्रिधन्वनः सुतो जातस्त्रय्यारुण इति स्मृतः । (३७।१)

तस्मात्सत्यव्रतो नाम तस्मात्सत्यरथः स्मृतः ॥ (३७।२)

तस्य पुत्रो हरिश्चन्द्रो हरिश्चन्द्राच्च रोहितः । (३८।१)

रोहिताच्च वृको जातो वृकाद्बाहुरजायत ॥ (३८।२)

सगरस्तस्य पुत्रोऽभूद् राजा परमधार्मिकः । (३९।१)

द्वे भार्ये सगरस्यापि प्रभा भानुमती तथा ॥ (३९।२)

ताभ्यामाराधितः पूर्वमौर्वो ऽग्निः पुत्रकाम्यया । (४०।१)

और्वस्तुष्टस्तयोः प्रादाद्यथेष्टं वरमुत्तमम् ॥ (४०।२)

एका षष्टिसहस्राणि सुतमेकं तथापरा । (४१।१)

गृह्णातु वंशकर्तारं प्रभागृह्णाद् बहूंस्तदा ॥ (४१।२)

एकं भानुमती पुत्रमगृह्णादसमञ्जसम् । (४२।१)

ततः षष्टिसहस्राणि सुषुवे यादवी प्रभा ॥ (४२।२)

खनन्तः पृथिवीं दग्धा विष्णुना ये ऽश्वमार्गणे । (४३।१)

असमञ्जसस्तु तनयो यो ऽंशुमान्नाम विश्रुतः ॥ (४३।२)

तस्य पुत्रो दिलीपस् तु दिलीपात्तु भगीरथः । (४४।१)

येन भागीरथी गङ्गा तपः कृत्वावतारिता ॥ (४४।२)

भगीरथस्य तनयो नाभाग इति विश्रुतः । (४५।१)

नाभागस्याम्बरीषोऽभूत् सिन्धुद्वीपस् ततो ऽभवत् ॥ (४५।२)

तस्यायुतायुः पुत्रो ऽभूद् ऋतुपर्णस्ततोऽभवत् । (४६।१)

तस्य कल्माषपादस्तु सर्वकर्मा ततः स्मृतः ॥ (४६।२)

तस्यानरण्यः पुत्रोऽभून्निघ्नस्तस्य सुतोऽभवत् । (४७।१)

निघ्नपुत्राव् उभौ जाताव् अनमित्ररघू नृपौ ॥ (४७।२)

अनामित्रो वनमगाद् भविता स कृते नृपः । (४८।१)

रघोर् अभूद्दिलीपस्तु दिलीपादजकस्तथा ॥ (४८।२)

दीर्घबाहुरजाज्जातश्चाजपालस्ततो नृपः । (४९।१)

तस्माद्दशरथो जातस्तस्य पुत्रचतुष्टयम् ॥ (४९।२)

नारायणात्मकाः सर्वे रामस्तेष्वग्रजोऽभवत् । (५०।१)

रावणान्तकरस्तद्वद्रघूणां वंशवर्धनः ॥ (५०।२)

वाल्मीकिस्तस्य चरितं चक्रे भार्गवसत्तमः । (५१।१)

तस्य पुत्रौ कुशलवाव् इक्ष्वाकुकुलवर्धनौ ॥ (५१।२)

अतिथिस्तु कुशाज्जज्ञे निषधस्तस्य चात्मजः । (५२।१)

नलस्तु नैषधस्तस्मान्नभास्तस्मादजायत ॥ (५२।२)

नभसः पुण्डरीकोऽभूत्क्षेमधन्वा ततः स्मृतः । (५३।१)

तस्य पुत्रोऽभवद्वीरो देवानीकः प्रतापवान् ॥ (५३।२)

अहीनगुस्तस्य सुतः सहस्राश्वस्ततः परः । (५४।१)

ततश्चन्द्रावलोकस्तु तारापीडस्ततोऽभवत् ॥ (५४।२)

तस्यात्मजश् चन्द्रगिरिर् भानुश् चन्द्रस्ततोऽभवत् । (५५।१)

श्रुतायुर् अभवत्तस्माद् भारते यो निपातितः ॥ (५५।२)

नलौ द्वाव् एव विख्यातौ वंशे कश्यपसम्भवे । (५६।१)

वीरसेनसुतस्तद्वन्नैषधश्च नराधिपः ॥ (५६।२)

एते वैवस्वते वंशे राजानो भूरिदक्षिणाः । (५७।१)

इक्ष्वाकुवंशप्रभवाः प्राधान्येन प्रकीर्तिताः ॥ (५७।२)