सूत उवाच । (१।१)

अजमीढस्य नीलिन्यां नीलः समभवन्नृपः । (१।२)

नीलस्य तपसोग्रेण सुशान्तिरुदपद्यत ॥ (१।३)

पुरुजानुः सुशान्तेस्तु पृथुस्तु पुरुजानुतः । (२।१)

भद्राश्वः पृथुदायादो भद्राश्वतनयाञ्छृणु ॥ (२।२)

मुद्गलश्च जयश्चैव राजा बृहदिषुस्तथा । (३।१)

जवीनरश्च विक्रान्तः कपिलश्चैव पञ्चमः ॥ (३।२)

पञ्चानां चैव पञ्चालानेताञ्जनपदान्विदुः । (४।१)

पञ्चालरक्षिणो ह्य् एते देशानामिति नः श्रुतम् ॥ (४।२)

मुद्गलस्यापि मौद्गल्याः क्षत्रोपेता द्विजातयः । (५।१)

एते ह्य् अङ्गिरसः पक्षं संश्रिताः काण्वमुद्गलाः ॥ (५।२)

मुद्गलस्य सुतो जज्ञे ब्रह्मिष्ठः सुमहायशाः । (६।१)

इन्द्रसेनः सुतस्तस्य विन्ध्याश्वस्तस्य चात्मजः ॥ (६।२)

विन्ध्याश्वान्मिथुनं जज्ञे मेनकायामिति श्रुतिः । (७।१)

दिवोदासश्च राजर्षिरहल्या च यशस्विनी ॥ (७।२)

शरद्वतस्तु दायादमहल्या सम्प्रसूयत । (८।१)

शतानन्दमृषिश्रेष्ठं तस्यापि सुमहातपाः ॥ (८।२)

सुतः सत्यधृतिर्नाम धनुर्वेदस्य पारगः । (९।१)

आसीत्सत्यधृतेः शुक्रममोघं धार्मिकस्य तु ॥ (९।२)

स्कन्नं रेतः सत्यधृतेर्दृष्ट्वा चाप्सरसं जले । (१०।१)

मिथुनं तत्र संभृतं तस्मिन्सरसि संभृतम् ॥ (१०।२)

ततः सरसि तस्मिंस्तु क्रममाणं महीपतिः । (११।१)

दृष्ट्वा जग्राह कृपया शंतनुर्मृगयां गतः ॥ (११।२)

एते शरद्वतः पुत्रा आख्याता गौतमा वराः । (१२।१)

अत ऊर्ध्वं प्रवक्ष्यामि दिवोदासस्य वै प्रजाः ॥ (१२।२)

दिवोदासस्य दायादो धर्मिष्ठो मित्रयुर्नृपः । (१३।१)

मैत्रायणावरः सो ऽथ मैत्रेयस्तु ततः स्मृतः ॥ (१३।२)

एते वंश्या यतेः पक्षाः क्षत्रोपेतास्तु भार्गवाः । (१४।१)

राजा चैद्यवरो नाम मैत्रेयस्य सुतः स्मृतः ॥ (१४।२)

अथ चैद्यवराद्विद्वान्सुदासस्तस्य चात्मजः । (१५।१)

अजमीढः पुनर्जातः क्षीणे वंशे तु सोमकः ॥ (१५।२)

सोमकस्य सुतो जन्तुर्हते तस्मिञ्छतं बभौ । (१६।१)

पुत्राणामजमीढस्य सोमकस्य महात्मनः ॥ (१६।२)

महिषी त्व् अजमीढस्य धूमिनी पुत्रवर्धिनी । (१७।१)

पुत्राभावे तपस्तेपे शतं वर्षाणि दुश्चरम् ॥ (१७।२)

हुत्वाग्निं विधिवत् सम्यक्पवित्रीकृतभोजना । (१८।१)

अग्निहोत्रक्रमेणैव सा सुष्वाप महाव्रता ॥ (१८।२)

तस्यां वै धूमवर्णायामजमीढः समीयिवान् । (१९।१)

ऋक्षं सा जनयामास धूमवर्णं शताग्रजम् ॥ (१९।२)

ऋक्षात्संवरणो जज्ञे कुरुः संवरणतः । (२०।१)

यः प्रयागमतिक्रम्य कुरुक्षेत्रमकल्पयत् ॥ (२०।२)

कृष्यतस्तु महाराजो वर्षाणि सुबहून्यथ । (२१।१)

कृष्यमाणस्ततः शक्रो भयात्तस्मै वरं ददौ ॥ (२१।२)

पुण्यं च रमणीयं च कुरुक्षेत्रं तु तत्स्मृतम् । (२२।१)

तस्यान्ववायः सुमहान्यस्य नाम्ना तु कौरवाः ॥ (२२।२)

कुरोस्तु दयिताः पुत्राः सुधन्वा जह्नुरेव च । (२३।१)

परीक्षिच्च महातेजाः प्रजनश्चारिमर्दनः ॥ (२३।२)

सुधन्वनस्तु दायादः पुत्रो मतिमतां वरः । (२४।१)

च्यवनस्तस्य पुत्रस्तु राजा धर्मार्थतत्त्ववित् ॥ (२४।२)

च्यवनस्य कृमिः पुत्र ऋक्षाज्जज्ञे महातपाः । (२५।१)

कृमेः पुत्रो महावीर्यः ख्यातस्त्विन्द्रसमो विभुः ॥ (२५।२)

चैद्योपरिचरो वीरो वसुर्नामान्तरिक्षगः । (२६।१)

चैद्योपरिचराज्जज्ञे गिरिका सप्त वै सुतान् ॥ (२६।२)

महारथो मगधराड्विश्रुतो यो बृहद्रथः । (२७।१)

प्रत्यश्रवाः कुशश्चैव चतुर्थो हरिवाहनः ॥ (२७।२)

पञ्चमश्च यजुश्चैव मत्स्यः काली च सप्तमी । (२८।१)

बृहद्रथस्य दायादः कुशाग्रो नाम विश्रुतः ॥ (२८।२)

कुशाग्रस्यात्मजश्चैव वृषभो नाम वीर्यवान् । (२९।१)

वृषभस्य तु दायादः पुण्यवान्नाम पार्थिवः ॥ (२९।२)

पुण्यः पुण्यवतश्चैव राजा सत्यधृतिस्ततः । (३०।१)

दायादस्तस्य धनुषस्तस्मात्सर्वश्च जज्ञिवान् ॥ (३०।२)

सर्वस्य सम्भवः पुत्रस्तस्माद्राजा बृहद्रथः । (३१।१)

द्वे तस्य शकले जाते जरया संधितश् च सः ॥ (३१।२)

जरया संधितो यस्माज्जरासंधस्ततः स्मृतः । (३२।१)

जेता सर्वस्य क्षत्रस्य जरासंधो महाबलः ॥ (३२।२)

जरासंधस्य पुत्रस्तु सहदेवः प्रतापवान् । (३३।१)

सहदेवात्मजः श्रीमान् सोमवित् स महातपाः ॥ (३३।२)

श्रुतश्रवास्तु सोमादेर्मागधाः परिकीर्तिताः । (३४।१)

जह्नुस्त्वजनयत्पुत्रं सुरथं नाम भूमिपम् ॥ (३४।२)

सुरथस्य तु दायादो वीरो राजा विदूरथः । (३५।१)

विदूरथसुतश्चापि सार्वभौम इति स्मृतः ॥ (३५।२)

सार्वभौमाज्जयत्सेनो रुचिरस्तस्य चात्मजः । (३६।१)

रुचिरात्तु ततो भौमस् त्वरितायुस्ततो ऽभवत् ॥ (३६।२)

अक्रोधनस् त्व् आयुसुतस् तस्माद्देवातिथिः स्मृतः । (३७।१)

देवातिथेस्तु दायादो दक्ष एव बभूव ह ॥ (३७।२)

भीमसेनस्ततो दक्षाद्दिलीपस् तस्य चात्मजः । (३८।१)

दिलीपस्य प्रतीपस्तु तस्य पुत्रास् त्रयः स्मृताः ॥ (३८।२)

देवापिः शंतनुश्चैव वाह्लीकश्चैव ते त्रयः । (३९।१)

वाह्लीकस्य तु दायादाः सप्त वाह्लीश्वरा नृपाः । (३९।२)

देवापिस्तु ह्य् अपध्यातः प्रजाभिरभवन्मुनिः ॥ (३९।३)

मुनय ऊचुः । (४०।१)

प्रजाभिस्तु किमर्थं वै ह्य् अपध्यातो जनेश्वरः । (४०।२)

को दोषो राजपुत्रस्य प्रजाभिः समुदाहृतः ॥ (४०।३)

सूत उवाच । (४१।१)

किलासीद्राजपुत्रस्तु कुष्ठी तं नाभ्यपूजयन् । (४१।२)

कार्यं चैव तु देवानां क्षत्रं प्रति द्विजोत्तमाः । (४१।३)

भविष्यं कीर्तयिष्यामि शंतनोस्तु निबोधत ॥ (४१।४)

शंतनुस्त्वभवद्राजा विद्वान्स वै महाभिषक् । (४२।१)

इदं चोदाहरन्त्यत्र श्लोकं प्रति महाभिषक् ॥ (४२।२)

यं यं कराभ्यां स्पृशति जीर्णं रोगिणमेव च । (४३।१)

पुनर्युवा च भवति तस्मात्तं शंतनुं विदुः ॥ (४३।२)

तत्तस्य शंतनुत्वं हि प्रजाभिरिह कीर्त्यते । (४४।१)

ततो ऽवृणुत भार्यार्थं शंतनुर्जाह्नवीं नृप ॥ (४४।२)

तस्यां देवव्रतं नाम कुमारं जनयद्विभुः । (४५।१)

काली विचित्रवीर्यं तु दाशेयी जनयत्सुतम् ॥ (४५।२)

शंतनोर्दयितं पुत्रं शान्तात्मानमकल्मषम् । (४६।१)

कृष्णद्वैपायनो नाम क्षेत्रे वैचित्रविर्यके ॥ (४६।२)

धृतराष्ट्रं च पाण्डुं च विदुरं चाप्यजीजनत् । (४७।१)

धृतराष्ट्रस्तु गान्धार्यां पुत्रानजनयच्छतम् ॥ (४७।२)

तेषां दुर्योधनः श्रेष्ठः सर्वक्षत्रस्य वै प्रभुः । (४८।१)

माद्री कुन्ती तथा चैव पाण्डोर्भार्ये बभूवतुः ॥ (४८।२)

देवदत्ताः सुताः पञ्च पाण्डोरर्थे ऽभिजज्ञिरे । (४९।१)

धर्माद्युधिष्ठिरो जज्ञे मारुताच्च वृकोदरः ॥ (४९।२)

इन्द्राद्धनंजयश्चैव इन्द्रतुल्यपराक्रमः । (५०।१)

नकुलं सहदेवं च माद्र्यश्विभ्यामजीजनत् ॥ (५०।२)

पञ्चैते पाण्डवेभ्यस्तु द्रौपद्यां जज्ञिरे सुताः । (५१।१)

द्रौपद्यजनयच्छ्रेष्ठं प्रतिविन्ध्यं युधिष्ठिरात् ॥ (५१।२)

श्रुतसेनं भीमसेनाच्छ्रुतकीर्तिं धनंजयात् । (५२।१)

चतुर्थं श्रुतकर्माणं सहदेवाद् अजायत ॥ (५२।२)

नकुलाच्च शतानीकं द्रौपदेयाः प्रकीर्तिताः । (५३।१)

तेभ्योऽपरे पाण्डवेयाः षडेवान्ये महारथाः ॥ (५३।२)

हैडम्बो भीमसेनात्तु पुत्रो जज्ञे घटोत्कचः । (५४।१)

काशी बलधराद्भीमाज्जज्ञे वै सर्वगं सुतम् ॥ (५४।२)

सुहोत्रं तनयं माद्री सहदेवादसूयत । (५५।१)

करेणुमत्यां चैद्यायां निरमित्रस्तु नाकुलिः ॥ (५५।२)

सुभद्रायां रथी पार्थादभिमन्युरजायत । (५६।१)

यौधेयं देवकी चैव पुत्रं जज्ञे युधिष्ठिरात् ॥ (५६।२)

अभिमन्योः परीक्षित्तु पुत्रः परपुरजयः । (५७।१)

जनमेजयः परीक्षितः पुत्रः परमधार्मिकः ॥ (५७।२)

ब्रह्माणं कल्पयामास स वै वाजसनेयकम् । (५८।१)

स वैशम्पायनेनैव शप्तः किल महर्षिणा ॥ (५८।२)

न स्थास्यतीह दुर्बुद्धे तवैतद्वचनं भुवि । (५९।१)

यावत्स्थास्यसि त्वं लोके तावदेव प्रपत्स्यति ॥ (५९।२)

क्षत्रस्य विजयं ज्ञात्वा ततःप्रभृति सर्वशः । (६०।१)

अभिगम्य स्थिताश्चैव नृपं च जनमेजयम् ॥ (६०।२)

ततःप्रभृति शापेन क्षत्रियस्य तु याजिनः । (६१।१)

उत्सन्ना याजिनो यज्ञे ततःप्रभृति सर्वशः ॥ (६१।२)

क्षत्रस्य याजिनः केचिच्छापात्तस्य महात्मनः । (६२।१)

पौर्णमासेन हविषा इष्ट्वा तस्मिन्प्रजापतिम् । (६२।२)

स वैशम्पायनेनैव प्रविशन्वारितस्ततः ॥ (६२।३)

परीक्षितः सुतोऽसौ वै पौरवो जनमेजयः । (६३।१)

द्विर् अश्वमेधमाहृत्य महावाजसनेयकः ॥ (६३।२)

प्रवर्तयित्वा तं सर्वमृषिं वाजसनेयकम् । (६४।१)

विवादे ब्राह्मणैः सार्धमभिशप्तो वनं ययौ ॥ (६४।२)

जनमेजयाच्छतानीकस्तस्माज्जज्ञे स वीर्यवान् । (६५।१)

जनमेजयः शतानीकं पुत्रं राज्येऽभिषिक्तवान् ॥ (६५।२)

अथाश्वमेधेन ततः शतानीकस्य वीर्यवान् । (६६।१)

जज्ञे ऽधिसोमकृष्णाख्यः साम्प्रतं यो महायशाः ॥ (६६।२)

तस्मिञ्छासति राष्ट्रं तु युष्माभिरिदमाहृतम् । (६७।१)

दुरापं दीर्घसत्त्रं वै त्रीणि वर्षाणि पुष्करे । (६७।२)

वर्षद्वयं कुरुक्षेत्रे दृषद्वत्यां द्विजोत्तमाः ॥ (६७।३)

मुनय ऊचुः । (६८।१)

भविष्यं श्रोतुमिच्छामः प्रजानां लोमहर्षणे । (६८।२)

पुरा किल यदेतद्वै व्यतीतं कीर्तितं त्वया ॥ (६८।३)

येषु वै स्थास्यते क्षत्रमुत्पत्स्यन्ते नृपाश्च ये । (६९।१)

तेषाम् आयुष्प्रमाणं च नामतश्चैव तान्नृपान् ॥ (६९।२)

कृतयुगप्रमाणं च त्रेताद्वापरयोस्तथा । (७०।१)

कलियुगप्रमाणं च युगदोषं युगक्षयम् ॥ (७०।२)

सुखदुःखप्रमाणं च प्रजादोषं युगस्य तु । (७१।१)

एतत्सर्वं प्रसंख्याय पृच्छतां ब्रूहि नः प्रभो ॥ (७१।२)

सूत उवाच । (७२।१)

यथा मे कीर्तितं पूर्वं व्यासेनाक्लिष्टकर्मणा । (७२।२)

भाव्यं कलियुगं चैव तथा मन्वन्तराणि च ॥ (७२।३)

अनागतानि सर्वाणि ब्रुवतो मे निबोधत । (७३।१)

अत ऊर्ध्वं प्रवक्ष्यामि भविष्या ये नृपास्तथा ॥ (७३।२)

ऐडेक्ष्वाक्वन्वये चैव पौरवे चान्वये तथा । (७४।१)

येषु संस्थास्यते तच्च ऐडेक्ष्वाकुकुलं शुभम् । (७४।२)

तान्सर्वान्कीर्तयिष्यामि भविष्ये कथितान्नृपान् ॥ (७४।३)

तेभ्योऽपरेऽपि ये त्व् अन्ये ह्य् उत्पत्स्यन्ते नृपाः पुनः । (७५।१)

क्षत्राः पारशवाः शूद्रास्तथान्ये ये बहिश्चराः ॥ (७५।२)

अन्धाः शकाः पुलिन्दाश्च चूलिका यवनास्तथा । (७६।१)

कैवर्ताभीरशबरा ये चान्ये म्लेच्छसम्भवाः । (७६।२)

पर्यायतः प्रवक्ष्यामि नामतश्चैव तान्नृपान् ॥ (७६।३)

अधिसोमकृष्णश् चैतेषां प्रथमं वर्तते नृपः । (७७।१)

तस्यान्ववाये वक्ष्यामि भविष्ये कथितान्नृपान् ॥ (७७।२)

अधिसोमकृष्णपुत्रस्तु विवक्षुर्भविता नृपः । (७८।१)

गङ्गया तु हृते तस्मिन्नगरे नागसाह्वये ॥ (७८।२)

त्यक्त्वा विवक्षुर्नगरं कौशाम्ब्यां तु निवत्स्यति । (७९।१)

भविष्याष्टौ सुतास्तस्य महाबलपराक्रमाः ॥ (७९।२)

भूरिर्ज्येष्ठः सुतस्तस्य तस्य चित्ररथः स्मृतः । (८०।१)

शुचिद्रवश्चित्ररथाद्वृष्णिमांश्च शुचिद्रवात् ॥ (८०।२)

वृष्णिमतः सुषेणश्च भविष्यति शुचिर्नृपः । (८१।१)

तस्मात्सुषेणाद्भविता सुनीथो नाम पार्थिवः ॥ (८१।२)

नृपात्सुनीथाद्भविता नृचक्षुः सुमहायशाः । (८२।१)

नृचक्षुषस्तु दायादो भविता वै सुखीवलः ॥ (८२।२)

सुखीवलसुतश्चापि भावी राजा परिष्णवः । (८३।१)

परिष्णवसुतश्चापि भविता सुतपा नृपः ॥ (८३।२)

मेधावी तस्य दायादो भविष्यति न संशयः । (८४।१)

मेधाविनः सुतश्चापि भविष्यति पुरंजयः ॥ (८४।२)

उर्वो भाव्यः सुतस्तस्य तिग्मात्मा तस्य चात्मजः । (८५।१)

तिग्माद्बृहद्रथो भाव्यो वसुदामा बृहद्रथात् ॥ (८५।२)

वसुदाम्नः शतानीको भविष्योदयनस्ततः । (८६।१)

भविष्यते चोदयनाद् वीगे राजा वहीनरः ॥ (८६।२)

वहीनरात्मजश्चैव दण्डपाणिर्भविष्यति । (८७।१)

दण्डपाणेर्निरमित्रो निरमित्रात्तु क्षेमकः ॥ (८७।२)

अत्रानुवंशश्लोकोऽयं गीतो विप्रैः पुरातनैः । (८८।१)

ब्रह्मक्षत्रस्य यो योनिर्वंशो देवर्षिसत्कृतः । (८८।२)

क्षेमकं प्राप्य राजानं संस्थास्यति कलौ युगे ॥ (८८।३)

इत्येष पौरवो वंशो यथावदिह कीर्तितः । (८९।१)

धीमतः पाण्डुपुत्रस्य चार्जुनस्य महात्मनः ॥ (८९।२)