ऋषय ऊचुः । (१।१)

इदानीं प्राह यद्विष्णुः पृष्टः परममुत्तमम् । (१।२)

तदिदानीं समाचक्ष्व धर्माधर्मस्य विस्तरम् ॥ (१।३)

सूत उवाच । (२।१)

एवमेकार्णवे तस्मिन्मत्स्यरूपी जनार्दनः । (२।२)

विस्तारमादिसर्गस्य प्रतिसर्गस्य चाखिलम् ॥ (२।३)

कथयामास विश्वात्मा मनवे सूर्यसूनवे । (३।१)

कर्मयोगं च सांख्यं च यथावद्विस्तरान्वितम् ॥ (३।२)

ऋषय ऊचुः । (४।१)

श्रोतुमिच्छामहे सूत कर्मयोगस्य लक्षणम् । (४।२)

यस्मादविदितं लोके न किंचित्तव सुव्रत ॥ (४।३)

सूत उवाच । (५।१)

कर्मयोगं च वक्ष्यामि यथा विष्णुविभाषितम् । (५।२)

ज्ञानयोगसहस्राद्धि कर्मयोगः प्रशस्यते ॥ (५।३)

कर्मयोगोद्भवं ज्ञानं तस्मात्तत्परमं पदम् । (६।१)

कर्मज्ञानोद्भवं ब्रह्म न च ज्ञानमकर्मणः ॥ (६।२)

तस्मात्कर्मणि युक्तात्मा तत्त्वमाप्नोति शाश्वतम् । (७।१)

वेदोऽखिलो धर्ममूलमाचारश्चैव तद्विदाम् ॥ (७।२)

अष्टावात्मगुणास् तस्मिन्प्रधानत्वेन संस्थिताः । (८।१)

दया सर्वेषु भूतेषु क्षान्ती रक्षातुरस्य तु ॥ (८।२)

अनसूया तथा लोके शौचमन्तर्बहिर्द्विजाः । (९।१)

अनायासेषु कार्येषु माङ्गल्याचारसेवनम् ॥ (९।२)

न च द्रव्येषु कार्पण्यम् आर्तेषूपार्जितेषु च । (१०।१)

तथास्पृहा परद्रव्ये परस्त्रीषु च सर्वदा ॥ (१०।२)

अष्टावात्मगुणाः प्रोक्ताः पुराणस्य तु कोविदैः । (११।१)

अयमेव क्रियायोगो ज्ञानयोगस्य साधकः ॥ (११।२)

कर्मयोगं विना ज्ञानं कस्यचिन् नेह दृश्यते । (१२।१)

श्रुतिस्मृत्युदितं धर्ममुपतिष्ठेत्प्रयत्नतः ॥ (१२।२)

देवतानां पितॄणां च मनुष्याणां च सर्वदा । (१३।१)

कुर्यादहरहर्यज्ञैर्भूतर्षिगणतर्पणम् ॥ (१३।२)

स्वाध्यायैरर्चयेच्चर्षीन् होमैर्विद्वान्यथाविधि । (१४।१)

पितॄञ्छ्राद्धैर् अन्नदानैर्भूतानि बलिकर्मभिः ॥ (१४।२)

पञ्चैते विहिता यज्ञाः पञ्चसूनापनुत्तये । (१५।१)

कण्डनी पेषणी चुल्ली जलकुम्भी प्रमार्जनी ॥ (१५।२)

पञ्च सूना गृहस्थस्य तेन स्वर्गं न गच्छति । (१६।१)

तत्पापनाशनायामी पञ्च यज्ञाः प्रकीर्तिताः ॥ (१६।२)

द्वाविंशतिस्तथाष्टौ च ये संस्काराः प्रकीर्तिताः । (१७।१)

तद्युक्तोऽपि न मोक्षाय यस्त्वात्मगुणवर्जितः ॥ (१७।२)

तस्मादात्मगुणोपेतः श्रुतिकर्म समाचरेत् । (१८।१)

गोब्राह्मणानां वित्तेन सर्वदा भद्रमाचरेत् ॥ (१८।२)

गोभूहिरण्यवासोभिर् गन्धमाल्योदकेन च । (१९।१)

पूजयेद्ब्रह्मविष्ण्वर्करुद्रवस्वात्मकं शिवम् ॥ (१९।२)

व्रतोपवासैर् विधिवच्छ्रद्धया च विमत्सरः । (२०।१)

यो ऽसाव् अतीन्द्रियः शान्तः सूक्ष्मोऽव्यक्तः सनातनः । (२०।२)

वासुदेवो जगन्मूर्तिस्तस्य सम्भूतयो ह्य् अमी ॥ (२०।३)

ब्रह्मा विष्णुश्च भगवान्मार्तण्डो वृषवाहनः । (२१।१)

अष्टौ च वसवस्तद्वदेकादश गणाधिपाः । (२१।२)

लोकपालाधिपाश्चैव पितरो मातरस्तथा ॥ (२१।३)

इमा विभूतयः प्रोक्ताश्चराचरसमन्विताः । (२२।१)

ब्रह्माद्याश् चतुरो मूलमव्यक्ताधिपतिः स्मृतः ॥ (२२।२)

ॐ ॐ ब्रह्मणा चाथ सूर्येण विष्णुनाथ शिवेन वा । (२३।१)

अभेदात्पूजितेन स्यात्पूजितं सचराचरम् ॥ (२३।२)

ब्रह्मादीनां परं धाम त्रयाणामपि संस्थितिः । (२४।१)

वेदमूर्ताव् अतः पूषा पूजनीयः प्रयत्नतः ॥ (२४।२)

तस्मादग्निद्विजमुखान्कृत्वा सम्पूजयेदिमान् । (२५।१)

दानैर्व्रतोपवासैश्च जपहोमादिना नरः ॥ (२५।२)

इति क्रियायोगपरायणस्य वेदान्तशास्त्रस्मृतिवत्सलस्य । (२६।१)

विकर्मभीतस्य सदा न किंचित् प्राप्तव्यमस्तीह परे च लोके ॥ (२६।२)