ऋषय ऊचुः । (१।१)

ये पूज्याः स्युर् द्विजातीनामग्नयः सूत सर्वदा । (१।२)

तानिदानीं समाचक्ष्व तद्वंशं चानुपूर्वशः ॥ (१।३)

सूत उवाच । (२।१)

यो ऽसाव् अग्निरभीमानी स्मृतः स्वायम्भुवेऽन्तरे । (२।२)

ब्रह्मणो मानसः पुत्रस्तस्मात्स्वाहा व्यजीजनत् ॥ (२।३)

पावकं पवमानं च शुचिरग्निश्च यः स्मृतः । (३।१)

निर्मथ्यः पवमानो ऽग्निर्वैद्युतः पावकात्मजः ॥ (३।२)

शुचिरग्निः स्मृतः सौरः स्थावराश्चैव ते स्मृताः । (४।१)

पवमानात्मजो ह्य् अग्निर्हव्यवाहः स उच्यते ॥ (४।२)

पावकः सहरक्षस्तु हव्यवाहमुखः शुचिः । (५।१)

देवानां हव्यवाहोऽग्निः प्रथमो ब्रह्मणः सुतः ॥ (५।२)

सहरक्षः सुराणां तु त्रयाणां ते त्रयो ऽग्नयः । (६।१)

एतेषां पुत्रपौत्राश्च चत्वारिंशत्तथैव च ॥ (६।२)

प्रवक्ष्ये नामतस्तान्वै प्रविभागेन तान्पृथक् । (७।१)

पावनो लौकिको ह्य् अग्निः प्रथमो ब्रह्मणश्च यः ॥ (७।२)

ब्रह्मौदनाग्निस् तत्पुत्रो भरतो नाम विश्रुतः । (८।१)

वैश्वानरो हव्यवाहो वहन्हव्यं ममार सः ॥ (८।२)

स मृतोऽथर्वणः पुत्रो मथितः पुष्करोदधिः । (९।१)

यो ऽथर्वा लौकिको ह्य् अग्निर् दक्षिणाग्निः स उच्यते ॥ (९।२)

भृगोः प्रजायताथर्वा ह्य् अङ्गिराथर्वणः स्मृतः । (१०।१)

तस्य ह्य् अलौकिको ह्य् अग्निर्दक्षिणाग्निः स वै स्मृतः ॥ (१०।२)

अथ यः पवमानस्तु निर्मथ्योऽग्निः स उच्यते । (११।१)

स च वै गार्हपत्योऽग्निः प्रथमो ब्रह्मणः स्मृतः ॥ (११।२)

ततः सभ्यावसथ्यौ च संशत्यास् तौ सुतावुभौ । (१२।१)

ततः षोडश नद्यस्तु चकमे हव्यवाहनः । (१२।२)

यः खल्वाहवनीयो ऽग्निरभिमानी द्विजैः स्मृतः ॥ (१२।३)

कावेरीं कृष्णवेणीं च नर्मदां यमुनां तथा । (१३।१)

गोदावरीं वितस्तां च चन्द्रभागामिरावतीम् ॥ (१३।२)

विपाशां कौशिकीं चैव शतद्रुं सरयूं तथा । (१४।१)

सीतां मनस्विनीं चैव ह्रादिनीं पावनां तथा ॥ (१४।२)

तासु षोडशधात्मानं प्रविभज्य पृथक्पृथक् । (१५।१)

तदा तु विहरंस्तासु धिष्ण्येच्छः स बभूव ह ॥ (१५।२)

स्वाभिधानस्थिता धिष्ण्यास्तासूत्पन्नाश्च धिष्णवः । (१६।१)

धिष्ण्येषु जज्ञिरे यस्मात्ततस्ते धिष्णवः स्मृताः ॥ (१६।२)

इत्येते वै नदीपुत्रा धिष्ण्येषु प्रतिपेदिरे । (१७।१)

तेषां विहरणीया ये उपस्थेयाश्च ताञ्शृणु । (१७।२)

विभुः प्रवाहणोऽग्नीध्रस् तत्रस्था धिष्णवोऽपरे ॥ (१७।३)

विहरति यथास्थानं पुण्याहे समुपक्रमे । (१८।१)

अनिर्देश्यानिवार्याणामग्नीनां शृणुत क्रमम् ॥ (१८।२)

वासवोऽग्निः कृशानुर्यो द्वितीयोत्तरवेदिकः । (१९।१)

सम्राडग्निसुतो ह्यष्टावुपतिष्ठन्ति तान्द्विजाः ॥ (१९।२)

पर्जन्यः पवमानस्तु द्वितीयः सो ऽनुदृश्यते । (२०।१)

पावकोष्णः समूह्यस्तु वोत्तरे सोऽग्निरुच्यते ॥ (२०।२)

हव्यसूदो ह्य् असंमृज्यः शामित्रः स विभाव्यते । (२१।१)

शतधामा सुधाज्योती रौद्रैश्वर्यः स उच्यते ॥ (२१।२)

ब्रह्मज्योतिर् वसुधामा ब्रह्मस्थानीय उच्यते । (२२।१)

अजैकपादुपस्थेयः स वै शालामुखो यतः ॥ (२२।२)

निर्देश्यो ह्यहिर्बुध्न्यो बहिरन्ते तु दक्षिणौ । (२३।१)

पुत्रा ह्येते तु सर्वस्य उपस्थेया द्विजैः स्मृताः ॥ (२३।२)

ततो विहरणीयांस्तु वक्ष्याम्यष्टौ तु तान्सुतान् । (२४।१)

हौत्रियस्य सुतो ह्यग्निर्बर्हिषो हव्यवाहनः ॥ (२४।२)

प्रशंस्योऽग्निः प्रचेतास्तु द्वितीयः संसहायकः । (२५।१)

सुतो ह्यग्नेर् विश्ववेदा ब्राह्मणाच्छंसिरुच्यते ॥ (२५।२)

अपां योनिः स्मृतः स्वाम्भः सेतुर्नाम विभाव्यते । (२६।१)

धिष्ण्य आहरणा ह्येते सोमेनेज्यन्त वै द्विजैः ॥ (२६।२)

ततो यः पावको नाम्ना यः सद्भिर्योग उच्यते । (२७।१)

अग्निः सो ऽवभृथो ज्ञेयो वरुणेन सहेज्यते ॥ (२७।२)

हृदयस्य सुतो ह्यग्नेर्जठरेऽसौ नृणां पचन् । (२८।१)

मन्युमाञ्जठरश्चाग्निर्विद्धाग्निः सततं स्मृतः ॥ (२८।२)

परस्परोत्थितो ह्यग्निर्भूतानीह विभुर्दहन् । (२९।१)

अग्नेर्मन्युमतः पुत्रो घोरः संवर्तकः स्मृतः ॥ (२९।२)

पिबन्नपः स वसति समुद्रे वडवामुखे । (३०।१)

समुद्रवासिनः पुत्रः सहरक्षो विभाव्यते ॥ (३०।२)

सहरक्षस्तु वै कामान्गृहे स वसते नृणाम् । (३१।१)

क्रव्यादग्निः सुतस्तस्य पुरुषान्योऽत्ति वै मृतान् ॥ (३१।२)

इत्येते पावकस्याग्नेर्द्विजैः पुत्राः प्रकीर्तिताः । (३२।१)

ततः सुतास्तु सौवीर्याद्गन्धर्वैरसुरैर् हृताः ॥ (३२।२)

मथितो यस्त्वरण्यां तु सोऽग्निराप समिन्धनम् । (३३।१)

आयुर् नाम्ना तु भगवान्पशौ यस्तु प्रणीयते ॥ (३३।२)

आयुषो महिमान्पुत्रो दहनस्तु ततः सुतः । (३४।१)

पाकयज्ञेष्वभीमानी हुतं हव्यं भुनक्ति ॥ (३४।२)

सर्वस्माद्देवलोकाच्च हव्यं कव्यं भुनक्ति यः । (३५।१)

पुत्रोऽस्य सहितो ह्यग्निरद्भुतः स महायशाः ॥ (३५।२)

प्रायश्चित्तेष्वभीमानी हृतं हव्यं भुनक्ति यः । (३६।१)

अद्भुतस्य सुतो वीरो देवांशस्तु महान्स्मृतः ॥ (३६।२)

विविधाग्निस्ततस्तस्य तस्य पुत्रो महाकविः । (३७।१)

विविधाग्निसुतादर्कादग्नयोऽष्टौ सुताः स्मृताः ॥ (३७।२)

काम्यास्विष्टिष्वभीमानी रक्षोहायतिकृच्च यः । (३८।१)

सुरभिर्वसुमान्नादो हर्यश्वश्चैव रुक्मवान् ॥ (३८।२)

प्रवर्ग्यः क्षेमवांश्चैव इत्यष्टौ च प्रकीर्तिताः । (३९।१)

शुच्यग्नेस्तु प्रजा ह्येषा अग्नयश्च चतुर्दश ॥ (३९।२)

इत्येते ह्यग्नयः प्रोक्ताः प्रणीता ये हि चाध्वरे । (४०।१)

समतीते तु सर्गे ये यामैः सह सुरोत्तमैः ॥ (४०।२)

स्वायम्भुवेऽन्तरे पूर्वम् अग्नयस्ते ऽभिमानिनः । (४१।१)

एते विहरणीयेषु चेतनाचेतनेष्विह ॥ (४१।२)

स्थानाभिमानिनोऽग्नीध्राः प्रागासन्हव्यवाहनाः । (४२।१)

काम्यनैमित्तिकाद्यास्ते ये ते कर्मस्ववस्थिताः ॥ (४२।२)

पूर्वे मन्वन्तरेऽतीते शुक्रैर्यामैश्च तैः सह । (४३।१)

एते देवगणैः सार्धं प्रथमस्यान्तरे मनोः ॥ (४३।२)

इत्येता योनयो ह्यक्ताः स्थानाख्या जातवेदसाम् । (४४।१)

स्वारोचिषादिषु ज्ञेयाः सवर्णान्तेषु सप्तसु ॥ (४४।२)

तैरेवं तु प्रसंख्यातं साम्प्रतानागतेष्विह । (४५।१)

मन्वन्तरेषु सर्वेषु लक्षणं जातवेदसाम् ॥ (४५।२)

मन्वन्तरेषु सर्वेषु नानारूपप्रयोजनैः । (४६।१)

वर्तन्ते वर्तमानैश्च यामैर्देवैः सहाग्नयः ॥ (४६।२)

अनागतैः सुरैः सार्धं वत्स्यन्तोऽनागतास्त्वथ । (४७।१)

इत्येष प्रचयोऽग्नीनां मया प्रोक्तो यथाक्रमम् । (४७।२)

विस्तरेणानुपूर्व्या च किमन्यच्छ्रोतुमिच्छथ ॥ (४७।३)