सूत उवाच । (१।१)

अशीलेषु प्रदुष्टेषु दानवेषु दुरात्मसु । (१।२)

लोकेषूत्साद्यमानेषु तपोधनवनेषु च ॥ (१।३)

सिंहनादे व्योमगानां तेषु भीतेषु जन्तुषु । (२।१)

त्रैलोक्ये भयसंमूढे तमोन्धन्वम् उपागते ॥ (२।२)

आदित्या वसवः साध्याः पितरो मरुतां गणाः । (३।१)

भीताः शरणमाजग्मुर् ब्रह्माणां प्रपितामहम् ॥ (३।२)

ते तं स्वर्णोत्पलासीनं ब्रह्माणं समुपागताः । (४।१)

नेमुरूचुश्च सहिताः पञ्चास्यं चतुराननम् ॥ (४।२)

वरगुप्तास्तवैवेह दानवास्त्रिपुरालयाः । (५।१)

बाधन्तेऽस्मान्यथा प्रेष्याननुशाधि ततो ऽनघ ॥ (५।२)

मेघागमे यथा हंसा मृगाः सिंहभयादिव । (६।१)

दानवानां भयात्तद्वद् भ्रमामो हि पितामह ॥ (६।२)

पुत्राणां नामधेयानि कलत्राणां तथैव च । (७।१)

दानवैर्भ्राम्यमाणानां विस्मृतानि ततो ऽनघ ॥ (७।२)

देववेश्मप्रभङ्गाश्च आश्रमभ्रंशनानि च । (८।१)

दानवैर्लोममोहान्धैः क्रियन्ते च भ्रमन्ति च ॥ (८।२)

यदि न त्रायसे लोकं दानवैर्विद्रुतं द्रुतम् । (९।१)

धर्षणानेन निर्देवं निर्मनुष्याश्रमं जगत् ॥ (९।२)

इत्येवं त्रिदशैरुक्तः पद्मयोनिः पितामहः । (१०।१)

प्रत्याह त्रिदशान् सेन्द्रान् इन्दुतुल्याननः प्रभुः ॥ (१०।२)

भयस्य यो वरो दत्तो मया मतिमतां वराः । (११।१)

तस्यान्त एष सम्प्राप्तो यः पुरोक्तो मया सुराः ॥ (११।२)

तच्च तेषामधिष्ठानं त्रिपुरं त्रिदशर्षभाः । (१२।१)

एकेषुपातमोक्षेण हन्तव्यं नेषुवृष्टिभिः ॥ (१२।२)

भवतां च न पश्यामि कमप्यत्र सुरर्षभाः । (१३।१)

यस्तु चैकप्रहारेण पुरं हन्यात् सदानवम् ॥ (१३।२)

त्रिपुरं नाल्पवीर्येण शक्यं हन्तुं शरेण तु । (१४।१)

एकं मुक्त्वा महादेवं महेशानं प्रजापतिम् ॥ (१४।२)

ते यूयं यदि अन्ये च क्रतुविध्वंसकं हरम् । (१५।१)

याचामः सहिता देवं त्रिपुरं स हनिष्यति ॥ (१५।२)

कृतः पुराणां विष्कम्भो योजमानां शतं शतम् । (१६।१)

यथा चैकप्रहारेण हते वै भवेन तु । (१६।२)

पुष्ययोगेण युक्तानि तानि चैकक्षणेन तु ॥ (१६।३)

ततो देवैश्च सम्प्रोक्तो यास्याम इति दुःखितैः । (१७।१)

पितामहश्च तैः सार्धं भवसंसदमागतः ॥ (१७।२)

तं भवं भूतभव्येशं गिरिशं शूलपाणिनम् । (१८।१)

पश्यन्ति चोमया सार्धं नन्दिना च महात्मना ॥ (१८।२)

अग्निवर्णमजं देवमग्निकुण्डनिभेक्षणम् । (१९।१)

अग्न्यादित्यसहस्राभम् अग्निवर्णविभूषितम् ॥ (१९।२)

चन्द्रावयवलक्ष्माणं चन्द्रसौम्यतराननम् । (२०।१)

आगम्य तमजं देवमथ तं नीललोहितम् । (२०।२)

अस्तुवन्गोपतिं शम्भुं वरदं पार्वतीपतिम् ॥ (२०।३)

देवा ऊचुः । (२१।१)

नमो भवाय शर्वाय रुद्राय वरदाय च । (२१।२)

पशूनां पतये नित्यमुग्राय च कपर्दिने ॥ (२१।३)

महादेवाय भीमाय त्र्यम्बकाय च शान्तये । (२२।१)

ईशानाय भयघ्नाय नमस्त्वन्धकघातिने ॥ (२२।२)

नीलग्रीवाय भीमाय वेधसे वेधसा स्तुते । (२३।१)

कुमारशत्रुनिघ्नाय कुमारजनकाय च ॥ (२३।२)

विलोहिताय धूम्राय वराय क्रथनाय च । (२४।१)

नित्यं नीलशिखण्डाय शूलिने दिव्यशायिने ॥ (२४।२)

उरगाय त्रिनेत्राय हिरण्यवसुरेतसे । (२५।१)

अचिन्त्यायाम्बिकाभर्त्रे सर्वदेवस्तुताय च ॥ (२५।२)

वृषध्वजाय मुण्डाय जटिने ब्रह्मचारिणे । (२६।१)

तप्यमानाय सलिले ब्रह्मण्यायाजिताय च ॥ (२६।२)

विश्वात्मने विश्वसृजे विश्वमावृत्य तिष्ठते । (२७।१)

नमोऽस्तु दिव्यरूपाय प्रभवे दिव्यशम्भवे ॥ (२७।२)

अभिगम्याय काम्याय स्तुत्यायार्च्याय सर्वदा । (२८।१)

भक्तानुकम्पिने नित्यं दिशते यन्मनोगतम् ॥ (२८।२)