कश्यपस्य प्रवक्ष्यामि पत्नीभ्यः पुत्रपौत्रकान् । (१।१)

अदितिर्दितिर्दनुश्चैव अरिष्टा सुरसा तथा ॥ (१।२)

सुरभिर् विनता तद्वत्ताम्रा क्रोधवशा इरा । (२।१)

कद्रूर्विश्वा मुनिस् तद्वत् तासां पुत्रान् निबोधत ॥ (२।२)

तुषिता नाम ये देवाश्चाक्षुषस्यान्तरे मनोः । (३।१)

वैवस्वतेऽन्तरे चैते आदित्या द्वादश स्मृताः ॥ (३।२)

इन्द्रो धाता भगस् त्वष्टा मित्रोऽथ वरुणो यमः । (४।१)

विवस्वान्सविता पूषा अंशुमान् विष्णुर् एव च ॥ (४।२)

एते सहस्रकिरणा आदित्या द्वादश स्मृताः । (५।१)

मारीचात्कश्यपादाप पुत्रानदितिरुत्तमान् ॥ (५।२)

भृशाश्वस्य ऋषेः पुत्रा देवप्रहरणाः स्मृताः । (६।१)

एते देवगणा विप्राः प्रतिमन्वन्तरेषु च ॥ (६।२)

उत्पद्यन्ते प्रलीयन्ते कल्पे कल्पे तथैव च । (७।१)

दितिः पुत्रद्वयं लेभे कश्यपाद् इति नः श्रुतम् ॥ (७।२)

हिरण्यकशिपुं चैव हिरण्याक्षं तथैव च । (८।१)

हिरण्यकशिपोस्तद्वज्जातं पुत्रचतुष्टयम् ॥ (८।२)

प्रह्लादश् चानुह्लादश्च संह्लादो ह्लाद एव च । (९।१)

प्रह्लादपुत्र आयुष्मान् शिबिर् बाष्कल एव च ॥ (९।२)

विरोचनश् चतुर्थश्च स बलिं पुत्रमाप्तवान् । (१०।१)

बलेः पुत्रशतं त्व् आसीद् बाणज्येष्ठं ततो द्विजाः ॥ (१०।२)

धृतराष्ट्रस् तथा सूर्यश्चन्द्रश्चन्द्रांशुतापनः । (११।१)

निकुम्भनाभो गुर्वक्षः कुक्षिभीमो विभीषणः ॥ (११।२)

एवमाद्यास् तु बहवो बाणज्येष्ठा गुणाधिकाः । (१२।१)

बाणः सहस्रबाहुश् च सर्वास्त्रगणसंयुतः ॥ (१२।२)

तपसा तोषितो यस्य पुरे वसति शूलभृत् । (१३।१)

महाकालत्वम् अगमत्साम्यं यश्च पिनाकिनः ॥ (१३।२)

हिरण्याक्षस्य पुत्रो ऽभूद् उलूकः शकुनिस्तथा । (१४।१)

भूतसंतापनश् चैव महानाभस्तथैव च ॥ (१४।२)

एतेभ्यः पुत्रपौत्राणां कोटयः सप्तसप्ततिः । (१५।१)

महाबला महाकाया नानारूपा महौजसः ॥ (१५।२)

दनुः पुत्रशतं लेभे कश्यपाद् बलदर्पितम् । (१६।१)

विप्रचित्तिः प्रधानोऽभूद्येषां मध्ये महाबलः ॥ (१६।२)

द्विमूर्धा शकुनिश्चैव तथा शङ्कुशिरोधरः । (१७।१)

अयोमुखः शम्बरश् च कपिशो नामतस्तथा ॥ (१७।२)

मारीचिर् मेघवांश्चैव इरा गर्भशिरास् तथा । (१८।१)

विद्रावणश्च केतुश्च केतुवीर्यः शतह्रदः ॥ (१८।२)

इन्द्रजित् सप्तजिच्चैव वज्रनाभस्तथैव च । (१९।१)

एकचक्रो महाबाहुर् वज्राक्षस् तारकस् तथा ॥ (१९।२)

असिलोमा पुलोमा च बिन्दुर्बाणो महासुरः । (२०।१)

स्वर्भानुर्वृषपर्वा च एवमाद्या दनोः सुताः ॥ (२०।२)

स्वर्भानोस्तु प्रभा कन्या शची चैव पुलोमजा । (२१।१)

उपदानवी मयस्यासीत् तथा मन्दोदरी कुहूः ॥ (२१।२)

शर्मिष्ठा सुन्दरी चैव चन्द्रा च वृषपर्वणः । (२२।१)

पुलोमा कालका चैव वैश्वानरसुते हि ते ॥ (२२।२)

बह्वपत्ये महासत्त्वे मारीचस्य परिग्रहे । (२३।१)

तयोः षष्टिसहस्राणि दानवानामभूत्पुरा ॥ (२३।२)

पौलोमान्कालकेयांश्च मारीचो ऽजनयत्पुरा । (२४।१)

अवध्या ये ऽमराणां वै हिरण्यपुरवासिनः ॥ (२४।२)

चतुर्मुखाल्लब्धवरास्ते हता विजयेन तु । (२५।१)

विप्रचित्तिः सैंहिकेयान् सिंहिकायाम् अजीजनत् ॥ (२५।२)

हिरण्यकशिपोर्ये वै भागिनेयास् त्रयोदश । (२६।१)

व्यंसः कल्पश्च राजेन्द्र नलो वातापिरेव च ॥ (२६।२)

इल्वलो नमुचिश्चैव श्वसृपश् चाजनस् तथा । (२७।१)

नरकः कालनाभश्च सरमाणस् तथैव च ॥ (२७।२)

कालवीयेश् च विख्यातो दनुवंशविवर्धनाः । (२८।१)

संह्रादस्य तु दैत्यस्य निवातकवचाः स्मृताः ॥ (२८।२)

अवध्याः सर्वदेवानां गन्धर्वोरगरक्षसाम् । (२९।१)

ये हता भर्गम् आश्रित्य त्व् अर्जुनेन रणाजिरे ॥ (२९।२)

षट्कन्या जनयामास ताम्रा मारीचबीजतः । (३०।१)

शुकी श्येनी च भासी च सुग्रीवी गृध्रिका शुचिः ॥ (३०।२)

शुकी शुकानुलूकांश्च जनयामास धर्मतः । (३१।१)

श्येनी श्येनांस्तथा भासी कुररानप्यजीजनत् ॥ (३१।२)

गृध्री गृध्रान्कपोतांश्च पारावतविहंगमान् । (३२।१)

हंससारसक्रौञ्चांश् च प्लवाञ्छुचिरजीजनत् ॥ (३२।२)

अजाश्वमेषोष्ट्रखरान् सुग्रीवी चाप्यजीजनत् । (३३।१)

एष ताम्रान्वयः प्रोक्तो विनतायां निबोधत ॥ (३३।२)

गरुडः पततां नाथो ऽरुणश्च पतत्रिणाम् । (३४।१)

सौदामनी तथा कन्या येयं नभसि विश्रुता ॥ (३४।२)

सम्पातिश् च जटायुश्च अरुणस्य सुताव् उभौ । (३५।१)

सम्पातिपुत्रो बभ्रुश्च शीघ्रगश्चापि विश्रुतः ॥ (३५।२)

जटायुषः कर्णिकारः शतगामी च विश्रुतौ । (३६।१)

सारसो रज्जुवालश्च भेरुण्डश्चापि तत्सुताः ॥ (३६।२)

तेषामनन्तमभवत्पक्षिणां पुत्रपौत्रकम् । (३७।१)

सुरसायाः सहस्रं तु सर्पाणाम् अभवत्पुरा ॥ (३७।२)

सहस्रशिरसां कद्रूः सहस्रं चापि सुव्रत । (३८।१)

प्रधानास्तेषु विख्याताः षड्विंशतिर् अरिंदम ॥ (३८।२)

शेषवासुकिकर्कोटशङ्खैरावतकम्बलाः । (३९।१)

धनंजयमहानीलपद्माश्वतरतक्षकाः ॥ (३९।२)

एलापत्त्रमहापद्मधृतराष्ट्रबलाहकाः । (४०।१)

शङ्खपालमहाशङ्खपुष्पदंष्ट्रशुभाननाः ॥ (४०।२)

शङ्कुरोमा च बहुलो वामनः पाणिनस्तथा । (४१।१)

कपिलो दुर्मुखश्चापि पतञ्जलिरिति स्मृताः ॥ (४१।२)

एषामनन्तमभवत्सर्वेषां पुत्रपौत्रकम् । (४२।१)

प्रायशो यत्पुरा दग्धं जनमेजयमन्दिरे ॥ (४२।२)

रक्षोगणं क्रोधवशा स्वनामानम् अजीजनत् । (४३।१)

दंष्ट्रिणां नियुतं तेषां भीमसेनादगात्क्षयम् ॥ (४३।२)

रुद्राणां च गणं तद्वद् गोमहिष्यो वराङ्गनाः । (४४।१)

सुरभिर्जनयामास कश्यपात्संयतव्रता ॥ (४४।२)

मुनिर्मुनीनां च गणं गणमप्सरसां तथा । (४५।१)

तथा किंनरगन्धर्वान् अरिष्टाजनयद् बहून् ॥ (४५।२)

तृणवृक्षलतागुल्ममिरा सर्वम् अजीजनत् । (४६।१)

विश्वा तु यक्षरक्षांसि जनयामास कोटिशः ॥ (४६।२)

तत एकोनपञ्चाशन्मरुतः कश्यपाद्दितिः । (४७।१)

जनयामास धर्मज्ञान्सर्वानमरवल्लभान् ॥ (४७।२)