नारद उवाच । (१।१)

उपवासेष्वशक्तस्य तदेव फलमिच्छतः । (१।२)

अनभ्यासेन रोगाद्वा किमिष्टं व्रतमुत्तमम् ॥ (१।३)

ईश्वर उवाच । (२।१)

उपवासे ऽप्यशक्तानां नक्तं भोजनमिष्यते । (२।२)

यस्मिन्व्रते तदप्यत्र श्रूयतामक्षयं महत् ॥ (२।३)

आदित्यशयनं नाम यथावच्छंकरार्चनम् । (३।१)

येषु नक्षत्रयोगेषु पुराणज्ञाः प्रचक्षते ॥ (३।२)

यदा हस्तेन सप्तम्यामादित्यस्य दिनं भवेत् । (४।१)

सूर्यस्य चाथ संक्रान्तिस्तिथिः सा सार्वकामिकी ॥ (४।२)

उमामहेश्वरस्यार्चामर्चयेत्सूर्यनामभिः । (५।१)

सूर्यार्चां शिवलिङ्गे च प्रकुर्वन् पूजयेद्यतः ॥ (५।२)

उमापते रवेर्वापि न भेदो दृश्यते क्वचित् । (६।१)

यस्मात्तस्मान्मुनिश्रेष्ठ गृहे शम्भुं समर्चयेत् ॥ (६।२)

हस्ते च सूर्याय नमोऽस्तु पादावर्काय चित्रासु च गुल्फदेशम् । (७।१)

स्वातीषु जङ्घे पुरुषोत्तमाय धात्रे विशाखासु च जानुदेशम् ॥ (७।२)

तथानुराधासु नमोऽभिपूज्यमूरुद्वयं चैव सहस्रभानोः । (८।१)

ज्येष्ठास्वनङ्गाय नमोऽस्तु गुह्यमिन्द्राय सोमाय कटी च मूले ॥ (८।२)

पूर्वोत्तराषाढयुगे च नाभिं त्वष्ट्रे नमः सप्ततरंगमाय । (९।१)

तीक्ष्णांशवे च श्रवणे च कुक्षौ पृष्ठं धनिष्ठासु विकर्तनाय ॥ (९।२)

चक्षुःस्थलं ध्वान्तविनाशनाय जलाधिपर्क्षे परिपूजनीयम् । (१०।१)

पूर्वोत्तराभाद्रपदाद्वये च बाहू नमश्चण्डकराय पूज्यौ ॥ (१०।२)

साम्नामधीशाय करद्वयं च संपूजनीयं द्विज रेवतीषु । (११।१)

नखानि पूज्यानि तथाश्विनीषु नमोऽस्तु सप्ताश्वधुरंधराय ॥ (११।२)

कठोरधाम्ने भरणीषु कण्ठं दिवाकरायेत्यभिपूजनीया । (१२।१)

ग्रीवाग्निऋक्षे ऽधरमम्बुजेशे सम्पूजयेन्नारद रोहिणीषु ॥ (१२।२)

मृगोत्तमाङ्गे दशना मुरारेः संपूजनीया हरये नमस्ते । (१३।१)

नमः सवित्रे रसनां शंकरे च नासाभिपूज्या च पुनर्वसौ च ॥ (१३।२)

ललाटमम्भोरुहवल्लभाय पुष्येऽलका वेदशरीरधारिणे । (१४।१)

सार्पेऽथ मौलिं विबुधप्रियाय मघासु कर्णाविति गोगणेशे ॥ (१४।२)

पूर्वासु गोब्राह्मणवन्दनाय नेत्राणि संपूज्यतमानि शम्भोः । (१५।१)

अथोत्तराफल्गुनिभे भ्रुवौ च विश्वेश्वरायेति च पूजनीये ॥ (१५।२)

नमोऽस्तु पाशाङ्कुशशूलपद्मकपालसर्पेन्दुधनुर्धराय । (१६।१)

गजासुरानङ्गपुरान्धकादिविनाशमूलाय नमः शिवाय ॥ (१६।२)

इत्यादि चास्त्राणि च पूज्य नित्यं विश्वेश्वरायेति शिवोऽभिपूज्यः । (१७।१)

भोक्तव्यमत्रैवमतैलशाकममांसमक्षारमभुक्तशेषम् ॥ (१७।२)

इत्येवं द्विज नक्तानि कृत्वा दद्यात् पुनर्वसौ । (१८।१)

शालेयतण्डुलप्रस्थमौदुम्बरमये घृतम् ॥ (१८।२)

संस्थाप्य पात्रे विप्राय सहिरण्यं निवेदयेत् । (१९।१)

सप्तमे वस्त्रयुग्मं च पारणे त्वधिकं भवेत् ॥ (१९।२)

चतुर्दशे तु सम्प्राप्ते पारणे नारदाब्दिके । (२०।१)

ब्राह्मणान्भोजयेद्भक्त्या गुडक्षीरघृतादिभिः ॥ (२०।२)

कृत्वा तु काञ्चनं पद्ममष्टपत्त्रं सकर्णिकम् । (२१।१)

शुद्धमष्टाङ्गुलं तच्च पद्मरागदलान्वितम् ॥ (२१।२)

शय्यां विलक्षणां कृत्वा विरुद्धग्रन्थिवर्जिताम् । (२२।१)

सोपधानकविश्रामस्वास्तरव्यजनानि च ॥ (२२।२)

भाजनोपानहछत्त्रचामरासनदर्पणैः । (२३।१)

भूषणैरपि संयुक्तां फलवस्त्रानुलेपनैः ॥ (२३।२)

तस्यां विधाय तत्पद्ममलंकृत्य गुणान्वितम् । (२४।१)

कपिलां वस्त्रसंयुक्तां सुशीलां च पयस्विनीम् ॥ (२४।२)

रौप्यखुरीं हेमशृङ्गीं सवत्सां कांस्यदोहनाम् । (२५।१)

दद्यान्मन्त्रेण पूर्वाह्णे न चैनामभिलङ्घयेत् ॥ (२५।२)

यथैवादित्यशयनमशून्यं तव सर्वदा । (२६।१)

कान्त्या धृत्या श्रिया रत्या तथा मे सन्तु सिद्धयः ॥ (२६।२)

यथा न देवाः श्रेयांसं त्वदन्यमनघं विदुः । (२७।१)

तथा माम् उद्धराशेषदुःखसंसारसागरात् ॥ (२७।२)

ततः प्रदक्षिणीकृत्य प्रणिपत्य विसर्जयेत् । (२८।१)

शय्यागवादि तत्सर्वं द्विजस्य भवनं नयेत् ॥ (२८।२)

नैतद्विशीलाय न दाम्भिकाय कुतर्कदुष्टाय विनिन्दकाय । (२९।१)

प्रकाशनीयं व्रतमिन्दुमौलेर्यश्चापि निन्दामधिकां विधत्ते ॥ (२९।२)

भक्ताय दान्ताय च गुह्यमेतदाख्येयम् आनन्दकरं शिवस्य । (३०।१)

इदं महापातकभिन् नराणाम् अप्यक्षरं वेदविदो वदन्ति ॥ (३०।२)

न बन्धुपुत्रेण धनैर्वियुक्तः पत्नीभिरानन्दकरः सुराणाम् । (३१।१)

नाभ्येति रोगं न च शोकदुःखं या वाथ नारी कुरुतेऽतिभक्त्या ॥ (३१।२)

इदं वसिष्ठेन पुरार्जुनेन कृतं कुबेरेण पुरंदरेण । (३२।१)

यत्कीर्तनेनाप्यखिलानि नाशमायान्ति पापानि न संशयोऽस्ति ॥ (३२।२)

इति पठति शृणोति वा य इत्थं रविशयनं पुरुहूतवल्लभः स्यात् । (३३।१)

अपि नरकगतान्पितॄन् अशेषानपि दिवमानयतीह यः करोति ॥ (३३।२)