सूत उवाच । (१।१)

विभ्राजा नाम चान्ये तु दिवि सन्ति सुवर्चसः । (१।२)

लोका बर्हिषदो यत्र पितरः सन्ति सुव्रताः ॥ (१।३)

यत्र बर्हिणयुक्तानि विमानानि सहस्रशः । (२।१)

संकल्प्या बर्हिषो यत्र तिष्ठन्ति फलदायिनः ॥ (२।२)

यत्राभ्युदयशालासु मोदन्ते श्राद्धदायिनः । (३।१)

यांश् च देवासुरगणा गन्धर्वाप्सरसां गणाः ॥ (३।२)

यक्षरक्षोगणाश्चैव यजन्ति दिवि देवताः । (४।१)

पुलस्त्यपुत्राः शतशस्तपोयोगसमन्विताः ॥ (४।२)

महात्मानो महाभागा भक्तानामभयप्रदाः । (५।१)

एतेषां पीवरी कन्या मानसी दिवि विश्रुता ॥ (५।२)

योगिनी योगमाता च तपश्चक्रे सुदारुणम् । (६।१)

प्रसन्नो भगवांस्तस्या वरं वव्रे तु सा हरेः ॥ (६।२)

योगवन्तं सुरूपं च भर्तारं विजितेन्द्रियम् । (७।१)

देहि देव प्रसन्नस्त्वं पतिं मे वदतां वरम् ॥ (७।२)

उवाच देवो भविता व्यासपुत्रो यदा शुकः । (८।१)

भविता तस्य भार्या त्वं योगाचार्यस्य सुव्रते ॥ (८।२)

भविष्यति च ते कन्या कृत्वी नाम च योगिनी । (९।१)

पाञ्चालाधिपतेर्देया मानुषस्य त्वया तदा ॥ (९।२)

जननी ब्रह्मदत्तस्य योगसिद्धा च गौः स्मृता । (१०।१)

कृष्णो गौरः प्रभुः शम्भुर् भविष्यन्ति च ते सुताः ॥ (१०।२)

महात्मानो महाभागा गमिष्यन्ति परं पदम् । (११।१)

तानुत्पाद्य पुनर् योगात् सवरा मोक्षमेष्यसि ॥ (११।२)

सुमूर्तिमन्तः पितरो वसिष्ठस्य सुताः स्मृताः । (१२।१)

नाम्ना तु मानसाः सर्वे सर्वे ते धर्ममूर्तयः ॥ (१२।२)

ज्योतिर्भासिषु लोकेषु ये वसन्ति दिवः परम् । (१३।१)

विराजमानाः क्रीडन्ति यत्र ते श्राद्धदायिनः ॥ (१३।२)

सर्वकामसमृद्धेषु विमानेष्वपि पादजाः । (१४।१)

किं पुनः श्राद्धदा विप्रा भक्तिमन्तः क्रियान्विताः ॥ (१४।२)

गौर् नाम कन्या येषां तु मानसी दिवि राजते । (१५।१)

शुक्रस्य दयिता पत्नी साध्यानां कीर्तिवर्धिनी ॥ (१५।२)

मरीचिगर्भा नाम्ना तु लोका मार्तण्डमण्डले । (१६।१)

पितरो यत्र तिष्ठन्ति हविष्मन्तो ऽङ्गिरःसुताः ॥ (१६।२)

तीर्थश्राद्धप्रदा यान्ति ये च क्षत्रियसत्तमाः । (१७।१)

राज्ञां तु पितरस्ते वै स्वर्गमोक्षफलप्रदाः ॥ (१७।२)

एतेषां मानसी कन्या यशोदा लोकविश्रुता । (१८।१)

पत्नी ह्य् अंशुमतः श्रेष्ठा स्नुषा पञ्चजनस्य च ॥ (१८।२)

जनन्यथ दिलीपस्य भगीरथपितामही । (१९।१)

लोकाः कामदुघा नाम कामभोगफलप्रदाः ॥ (१९।२)

सुस्वधा नाम पितरो यत्र तिष्ठन्ति सुव्रताः । (२०।१)

आज्यपा नाम लोकेषु कर्दमस्य प्रजापतेः ॥ (२०।२)

पुलहाङ्गजदायादा वैश्यास्तान्भावयन्ति च । (२१।१)

यत्र श्राद्धकृतः सर्वे पश्यन्ति युगपद्गताः ॥ (२१।२)

अपि जन्मायुतैर्दृष्टाननुभूतान्सहस्रशः ॥ (२२।२)

एतेषां मानसी कन्या विरजा नाम विश्रुता । (२३।१)

या पत्नी नहुषस्यासीद् ययातेर्जननी तथा ॥ (२३।२)

एकाष्टकाभवत् पश्चाद्ब्रह्मलोके गता सती । (२४।१)

त्रय एते गणाः प्रोक्ताश्चतुर्थं तु वदाम्यतः ॥ (२४।२)

लोकास्तु मानसा नाम ब्रह्माण्डोपरि संस्थिताः । (२५।१)

येषां तु मानसी कन्या नर्मदा नाम विश्रुता ॥ (२५।२)

सोमपा नाम पितरो यत्र तिष्ठन्ति शाश्वताः । (२६।१)

धर्ममूर्तिधराः सर्वे परतो ब्रह्मणः स्मृताः ॥ (२६।२)

उत्पन्नाः स्वधया ते तु ब्रह्मत्वं प्राप्य योगिनः । (२७।१)

कृत्वा सृष्ट्यादिकं सर्वं मानसे साम्प्रतं स्थिताः ॥ (२७।२)

नर्मदा नाम तेषां तु कन्या तोयवहा सरित् । (२८।१)

भूतानि या पावयति दक्षिणापथगामिनी ॥ (२८।२)

तेभ्यः सर्वे तु मनवः प्रजाः सर्गेषु निर्मिताः । (२९।१)

ज्ञात्वा श्राद्धानि कुर्वन्ति धर्माभावेऽपि सर्वदा ॥ (२९।२)

तेभ्य एव पुनः प्राप्तुं प्रसादाद्योगसंततिम् । (३०।१)

पितॄणामादिसर्गे तु श्राद्धमेव विनिर्मितम् ॥ (३०।२)

सर्वेषां राजतं पात्रमथवा रजतान्वितम् । (३१।१)

दत्तं स्वधा पुरोधाय पितॄन् प्रीणाति सर्वदा ॥ (३१।२)

अग्नीषोमयमानां तु कार्यमाप्यायनं बुधः । (३२।१)

अग्न्यभावेऽपि विप्रस्य प्राणाव् अपि जलेऽथवा ॥ (३२।२)

अजाकर्णे ऽश्वकर्णे वा गोष्ठे वा सलिलान्तिके । (३३।१)

पितॄणाम् अम्बरं स्थानं दक्षिणा दिक्प्रशस्यते ॥ (३३।२)

प्राचीनावीतमुदकं तिलाः सव्याङ्गमेव च । (३४।१)

दर्भा मांसं च पाठीनं गोक्षीरं मधुरा रसाः ॥ (३४।२)

खड्गलोहामिषमधुकुशश्यामाकशालयः । (३५।१)

यवनीवारमुद्गेक्षुशुक्लपुष्पघृतानि च ॥ (३५।२)

वल्लभानि प्रशस्तानि पितॄणामिह सर्वदा । (३६।१)

द्वेष्याणि सम्प्रवक्ष्यामि श्राद्धे वर्ज्यानि यानि तु ॥ (३६।२)

मसूरशणनिष्पावराजमाषकुसुम्भिकाः । (३७।१)

पद्मबिल्वार्कधत्तूरपारिभद्राटरूषकाः ॥ (३७।२)

न देयाः पितृकार्येषु पयश्चाजाविकं तथा । (३८।१)

कोद्रवोदारचणकाः कपित्थं मधुकातसी ॥ (३८।२)

एतान्यपि न देयानि पितृभ्यः प्रियमिच्छता । (३९।१)

पितॄन् प्रीणाति यो भक्त्या ते पुनः प्रीणयन्ति तम् ॥ (३९।२)

यच्छन्ति पितरः पुष्टिं स्वर्गारोग्यं प्रजाफलम् । (४०।१)

देवकार्यादपि पुनः पितृकार्यं विशिष्यते ॥ (४०।२)

देवतानां च पितरः पूर्वमाप्यायनं स्मृतम् । (४१।१)

शीघ्रप्रसादास्त्वक्रोधा निःशस्त्राः स्थिरसौहृदाः ॥ (४१।२)

शान्तात्मानः शौचपराः सततं प्रियवादिनः । (४२।१)

भक्तानुरक्ताः सुखदाः पितरः पूर्वदेवताः ॥ (४२।२)

हविष्मतामाधिपत्ये श्राद्धदेवः स्मृतो रविः । (४३।१)

एतद्वः सर्वमाख्यातं पितृवंशानुकीर्तनम् । (४३।२)

पुण्यं पवित्रम् आयुष्यं कीर्तनीयं सदा नृभिः ॥ (४३।३)