मनुरुवाच । (१।१)

भगवञ्श्रोतुमिच्छामि पितॄणां वंशमुत्तमम् । (१।२)

रवेश्च श्राद्धदेवत्वं सोमस्य च विशेषतः ॥ (१।३)

मत्स्य उवाच । (२।१)

हन्त ते कथयिष्यामि पितॄणां वंशमुत्तमम् । (२।२)

स्वर्गे पितृगणाः सप्त त्रयस्तेषाममूर्तयः ॥ (२।३)

मूर्तिमन्तो ऽथ चत्वारः सर्वेषाम् अमितौजसः । (३।१)

अमूर्तयः पितृगणा वैराजस्य प्रजापतेः ॥ (३।२)

जयन्ति यान्देवगणा वैराजा इति विश्रुताः । (४।१)

ये चैते योगविभ्रष्टाः प्राप्य लोकान्सनातनान् ॥ (४।२)

पुनर्ब्रह्मदिनान्ते तु जायन्ते ब्रह्मवादिनः । (५।१)

सम्प्राप्य तां स्मृतिं भूयो योगं सांख्यमनुत्तमम् ॥ (५।२)

सिद्धिं प्रयान्ति योगेन पुनरावृत्तिदुर्लभाम् । (६।१)

योगिनामेव देयानि तस्माच्छ्राद्धानि दातृभिः ॥ (६।२)

एतेषां मानसी कन्या पत्नी हिमवतो मता । (७।१)

मैनाकस्तस्य दायादः क्रौञ्चस्तस्याग्रजो ऽभवत् । (७।२)

क्रौञ्चद्वीपः स्मृतो येन चतुर्थो घृतसंवृतः ॥ (७।३)

मेना च सुषुवे तिस्रः कन्या योगवतीस्ततः । (८।१)

उमैकपर्णापर्णा च तीव्रव्रतपरायणाः ॥ (८।२)

रुद्रस्यैका सितस्यैका जैगीषव्यस्य चापरा । (९।१)

दत्ता हिमवता बालाः सर्वा लोके तपोऽधिकाः ॥ (९।२)

ऋषय ऊचुः । (१०।१)

कस्माद्दाक्षायणी पूर्वं ददाहात्मानमात्मना । (१०।२)

हिमवद्दुहिता तद्वत्कथं जाता महीतले ॥ (१०।३)

संहरन्ती किमुक्तासौ सुता वा ब्रह्मसूनुना । (११।१)

दक्षेण लोकजननी सूत विस्तरतो वद ॥ (११।२)

सूत उवाच । (१२।१)

दक्षस्य यज्ञे वितते प्रभूतवरदक्षिणे । (१२।२)

समाहूतेषु देवेषु प्रोवाच पितरं सती ॥ (१२।३)

किमर्थं तात भर्ता मे यज्ञेऽस्मिन्नाभिमन्त्रितः । (१३।१)

अयोग्य इति तामाह दक्षो यज्ञेषु शूलभृत् ॥ (१३।२)

उपसंहारकृद्रुद्रस्तेनामङ्गलभागयम् । (१४।१)

चुकोपाथ सती देहं त्यक्ष्यामीति त्वदुद्भवम् ॥ (१४।२)

दशानां त्वं च भविता पितॄणामेकपुत्रकः । (१५।१)

क्षत्रियत्वेऽश्वमेधे च रुद्रात्त्वं नाशमेष्यसि ॥ (१५।२)

इत्युक्त्वा योगमास्थाय स्वदेहोद्भवतेजसा । (१६।१)

निर्दहन्ती तदात्मानं सदेवासुरकिंनरैः ॥ (१६।२)

किं किमेतदिति प्रोक्ता गन्धर्वगणगुह्यकैः । (१७।१)

उपगम्याब्रवीद्दक्षः प्रणिपत्याथ दुःखितः ॥ (१७।२)

त्वमस्य जगतो माता जगत्सौभाग्यदेवता । (१८।१)

दुहितृत्वं गता देवि ममानुग्रहकाम्यया ॥ (१८।२)

न त्वया रहितं किंचिद्ब्रह्माण्डे सचराचरम् । (१९।१)

प्रसादं कुरु धर्मज्ञे न मां त्यक्तुमिहार्हसि ॥ (१९।२)

प्राह देवी यदारब्धं तत्कार्यं मे न संशयः । (२०।१)

किंत्ववश्यं त्वया मर्त्ये हतयज्ञेन शूलिना ॥ (२०।२)

प्रसादे लोकसृष्ट्यर्थं तपः कार्यं ममान्तिके । (२१।१)

प्रजापतिस्त्वं भविता दशानामङ्गजोऽप्यलम् ॥ (२१।२)

मदंशेनाङ्गना षष्टिर्भविष्यन्त्यङ्गजास्तव । (२२।१)

मत्संनिधौ तपः कुर्वन्प्राप्स्यसे योगमुत्तमम् ॥ (२२।२)

एवमुक्तोऽब्रवीद्दक्षः केषु केषु मयानघे । (२३।१)

तीर्थेषु च त्वं द्रष्टव्या स्तोतव्या कैश्च नामभिः ॥ (२३।२)

देव्युवाच । (२४।१)

सर्वदा सर्वभूतेषु द्रष्टव्या सर्वतो भुवि । (२४।२)

सर्वलोकेषु यत्किंचिद्रहितं न मया विना ॥ (२४।३)

तथापि येषु स्थानेषु द्रष्टव्या सिद्धिमीप्सुभिः । (२५।१)

स्मर्तव्या भूतिकामैर् वा तानि वक्ष्यामि तत्त्वतः ॥ (२५।२)

वाराणस्यां विशालाक्षी नैमिषे लिङ्गधारिणी । (२६।१)

प्रयागे ललिता देवी कामाक्षी गन्धमादने । (२६।२)

मानसे कुमुदा नाम विश्वकाया तथाम्बरे ॥ (२६।३)

गोमन्ते गोमती नाम मन्दरे कामचारिणी । (२७।१)

मदोत्कटा चैत्ररथे जयन्ती हस्तिनापुरे ॥ (२७।२)

कान्यकुब्जे तथा गौरी रम्भा मलयपर्वते । (२८।१)

एकाम्भके कीर्तिमती विश्वां विश्वेश्वरे विदुः ॥ (२८।२)

पुष्करे पुरुहूतेति केदारे मार्गदायिनी । (२९।१)

नन्दा हिमवतः पृष्ठे गोकर्णे भद्रकर्णिका ॥ (२९।२)

स्थानेश्वरे भवानी तु बिल्वले बिल्वपत्त्रिका । (३०।१)

श्रीशैले माधवी नाम भद्रा भद्रेश्वरे तथा ॥ (३०।२)

जया वराहशैले तु कामला कमलालये । (३१।१)

रुद्रकोट्यां च रुद्राणी काली कालञ्जरे गिरौ ॥ (३१।२)

महालिङ्गे तु कपिला मर्कोटे मुकुटेश्वरी । (३२।१)

शालग्रामे महादेवी शिवलिङ्गे जलप्रिया ॥ (३२।२)

मायापुर्यां कुमारी तु संताने ललिता तथा । (३३।१)

उत्पलाक्षी सहस्राक्षे कमलाक्षे महोत्पला ॥ (३३।२)

गङ्गायां मङ्गला नाम विमिला पुरुषोत्तमे । (३४।१)

विपाशायाम् अमोघाक्षी पाटला पुण्ड्रवर्धने ॥ (३४।२)

नारायणी सुपार्श्वे तु विकूटे भद्रसुन्दरी । (३५।१)

विपुले विपुला नाम कल्याणी मलयाचले ॥ (३५।२)

कोटवी कोटितीर्थे तु सुगन्धा माधवे वने । (३६।१)

गोदाश्रमे त्रिसंध्या तु गङ्गाद्वारे रतिप्रिया ॥ (३६।२)

शिवकुण्डे शिवानन्दा नन्दिनी देविकातटे । (३७।१)

रुक्मिणी द्वारवत्यां तु राधा वृन्दावने वने ॥ (३७।२)

देवकी मथुरायां तु पाताले परमेश्वरी । (३८।१)

चित्रकूटे तथा सीता विन्ध्ये विन्ध्याधिवासिनी ॥ (३८।२)

सह्याद्राव् एकवीरा तु हरिश्चन्द्रे तु चन्द्रिका । (३९।१)

रमणा रामतीर्थे तु यमुनायां मृगावती ॥ (३९।२)

करवीरे महालक्ष्मीरुमा देवी विनायके । (४०।१)

अरोगा वैद्यनाथे तु महाकाले महेश्वरी ॥ (४०।२)

अभयेत्युष्णतीर्थेषु चामृता विन्ध्यकन्दरे । (४१।१)

माण्डव्ये माण्डवी नाम स्वाहा माहेश्वरे पुरे ॥ (४१।२)

छागलाण्डे प्रचण्डा तु चण्डिका मकरन्दके । (४२।१)

सोमेश्वरे वरारोहा प्रभासे पुष्करावती ॥ (४२।२)

देवमाता सरस्वत्यां पारावारतटे मता । (४३।१)

महालये महाभागा पयोष्ण्यां पिङ्गलेश्वरी ॥ (४३।२)

सिंहिका कृतशौचे तु कार्त्तिकेये यशस्करी । (४४।१)

उत्पलावर्तके लोला सुभद्रा शोणसंगमे ॥ (४४।२)

माता सिद्धपुरे लक्ष्मीरङ्गना भरताश्रमे । (४५।१)

जालंधरे विश्वमुखी तारा किष्किन्धपर्वते ॥ (४५।२)

देवदारुवने पुष्टिर्मेधा काश्मीरमण्डले । (४६।१)

भीमा देवी हिमाद्रौ तु पुष्टिर्विश्वेश्वरे तथा ॥ (४६।२)

कपालमोचने शुद्धिर्माता कायावरोहणे । (४७।१)

शङ्खोद्धारे ध्वनिर्नाम धृतिः पिण्डारके तथा ॥ (४७।२)

काला तु चन्द्रभागायामच्छोदे शिवकारिणी । (४८।१)

वेणायाममृता नाम बदर्यामुर्वशी तथा ॥ (४८।२)

ओषधी चोत्तरकुरौ कुशद्वीपे कुशोदका । (४९।१)

मन्मथा हेमकूटे तु मुकुटे सत्यवादिनी ॥ (४९।२)

अश्वत्थे वन्दनीया तु निधिर्वैश्रवणालये । (५०।१)

गायत्री वेदवदने पार्वती शिवसंनिधौ ॥ (५०।२)

देवलोके तथेन्द्राणी ब्रह्मास्येषु सरस्वती । (५१।१)

सूर्यबिम्बे प्रभा नाम मातॄणां वैष्णवी मता ॥ (५१।२)

अरुन्धती सतीनां तु रामासु च तिलोत्तमा । (५२।१)

चित्ते ब्रह्मकला नाम शक्तिः सर्वशरीरिणाम् ॥ (५२।२)

एतदुद्देशतः प्रोक्तं नामाष्टशतमुत्तमम् । (५३।१)

अष्टोत्तरं च तीर्थानां शतमेतदुदाहृतम् ॥ (५३।२)

यः स्मरेच्छृणुयाद् वापि सर्वपापैः प्रमुच्यते । (५४।१)

एषु तीर्थेषु यः कृत्वा स्नानं पश्यति मां नरः ॥ (५४।२)

सर्वपापविनिर्मुक्तः कल्पं शिवपुरे वसेत् । (५५।१)

यस्तु मत्परमं कालं करोत्येतेषु मानवः ॥ (५५।२)

स भित्त्वा ब्रह्मसदनं पदमभ्येति शांकरम् । (५६।१)

नाम्नामष्टशतं यस्तु श्रावयेच्छिवसंनिधौ ॥ (५६।२)

तृतीयायामथाष्टम्यां बहुपुत्रो भवेन्नरः । (५७।१)

गोदाने श्राद्धदाने वा अहन्य् अहनि वा बुधः ॥ (५७।२)

देवार्चनविधौ विद्वान् पठन् ब्रह्माधिगच्छति । (५८।१)

एवं वदन्ती सा तत्र ददाहात्मानम् आत्मना ॥ (५८।२)

स्वायम्भुवोऽपि कालेन दक्षः प्राचेतसोऽभवत् । (५९।१)

पार्वती साभवद्देवी शिवदेहार्धधारिणी ॥ (५९।२)

मेनागर्भसमुत्पन्ना भुक्तमुक्तिफलप्रदा । (६०।१)

अरुन्धती जपन्त्येतत्प्राप योगमनुत्तमम् ॥ (६०।२)

पुरूरवाश्च राजर्षिलोके व्यजेयताम् अगात् । (६१।१)

ययातिः पुत्रलाभं च धनलाभं च भार्गवः ॥ (६१।२)

तथान्ये देवदैत्याश्च ब्राह्मणाः क्षत्रियास्तथा । (६२।१)

वैश्याः शूद्राश्च बहवः सिद्धिमीयुर्यथेप्सिताम् ॥ (६२।२)

यत्रैतल्लिखितं तिष्ठेत्पूज्यते देवसंनिधौ । (६३।१)

न तत्र शोको दौर्गत्यं कदाचिदपि जायते ॥ (६३।२)