सूत उवाच । (१।१)

लोकाः सोमपथा नाम यत्र मारीचनन्दनाः । (१।२)

वर्तन्ते देव पितरो देवा यान्भावयन्त्यलम् ॥ (१।३)

अग्निष्वात्ता इति ख्याता यज्वानो यत्र संस्थिताः । (२।१)

अच्छोदा नाम तेषां तु मानसी कन्यका नदी ॥ (२।२)

अच्छोदं नाम च सरः पितृभिर्निर्मितं पुरा । (३।१)

अच्छोदा तु तपश्चक्रे दिव्यं वर्षसहस्रकम् ॥ (३।२)

आजग्मुः पितरस्तुष्टाः किल दातुं च तां वरम् । (४।१)

दिव्यरूपधराः सर्वे दिव्यमाल्यानुलेपनाः ॥ (४।२)

सर्वे युवानो बलिनः कुसुमायुधसंनिभाः । (५।१)

तन्मध्येऽमावसुं नाम पितरं वीक्ष्य साङ्गना ॥ (५।२)

वव्रे वरार्थिनी सङ्गं कुसुमायुधपीडिता । (६।१)

योगाद्भ्रष्टा तु सा तेन व्यभिचारेण भामिनी ॥ (६।२)

धरां तु नास्पृशत्पूर्वं पपाताथ भुवस्तले । (७।१)

तिथाव् अमावसुर् यस्याम् इच्छां चक्रे न तां प्रति ॥ (७।२)

धैर्येण तस्य सा लोकैरमावास्येति विश्रुता । (८।१)

पितॄणां वल्लभा तस्मात्तस्यामक्षयकारकम् ॥ (८।२)

अच्छोदाधोमुखी दीना लज्जिता तपसः क्षयात् । (९।१)

सा पितॄन् प्रार्थयामास पुरे चात्मप्रसिद्धये ॥ (९।२)

विलप्यमाना पितृभिर् इदमुक्ता तपस्विनी । (१०।१)

भविष्यमर्थमालोक्य देवकार्यं च ते तदा ॥ (१०।२)

इदम् ऊचुर् महाभागाः प्रसादशुभया गिरा । (११।१)

दिवि दिव्यशरीरेण यत् किंचित् क्रियते बुधैः ॥ (११।२)

तेनैव तत्कर्मफलं भुज्यते वरवर्णिनी । (१२।१)

सद्यः फलन्ति कर्माणि देवत्वे प्रेत्य मानुषे ॥ (१२।२)

तस्मात्त्वं पुत्रि तपसः प्राप्स्यसे प्रेत्य तत्फलम् । (१३।१)

अष्टाविंशे भवित्री त्वं द्वापरे मत्स्ययोनिजा ॥ (१३।२)

व्यतिक्रमात्पितॄणां त्वं कष्टं कुलमवाप्स्यसि । (१४।१)

तस्माद्राज्ञो वसोः कन्या त्वम् अवश्यं भविष्यसि ॥ (१४।२)

कन्या भूत्वा च लोकान्स्वान्पुनराप्स्यसि दुर्लभान् । (१५।१)

पराशरस्य वीर्येण पुत्रमेकमवाप्स्यसि ॥ (१५।२)

द्वीपे तु बदरीप्राये बादरायणमच्युतम् । (१६।१)

स वेदमेकं बहुधा विभजिष्यति ते सुतः ॥ (१६।२)

पौरवस्यात्मजौ द्वौ तु समुद्रांशस्य शंतनोः । (१७।१)

विचित्रवीर्यस्तनयस्तथा चित्राङ्गदो नृपः ॥ (१७।२)

इमाव् उत्पाद्य तनयौ क्षेत्रजावस्य धीमतः । (१८।१)

प्रौष्ठपद्यष्टकारूपा पितृलोके भविष्यसि ॥ (१८।२)

नाम्ना सत्यवती लोके पितृलोके तथाष्टका । (१९।१)

आयुरारोग्यदा नित्यं सर्वकामफलप्रदा ॥ (१९।२)

भविष्यसि परे काले नदीत्वं च गमिष्यसि । (२०।१)

पुण्यतोषा सरिच्छ्रेष्ठा लोके ह्य् अच्छोदनामिका ॥ (२०।२)

इत्युक्त्वा स गणस्तेषां तत्रैवान्तरधीयत । (२१।१)

साप्यवाप च तत्सर्वं फलं यदुदितं पुरा ॥ (२१।२)