ऋषय ऊचुः । (१।१)

पादपानां विधिं सूत यथावद्विस्तराद्वद । (१।२)

विधिना केन कर्तव्यं पादपोद्यापनं बुधैः ॥ (१।३)

ये च लोकाः स्मृतास्तेषां तानिदानीं वदस्व नः । (२।१)

यत्फलं लभते प्रेत्य तत्सर्वं वक्तुमर्हसि ॥ (२।२)

सूत उवाच । (३।१)

पादपानां विधिं वक्ष्ये तथैवोद्यानभूमिषु । (३।२)

तडागविधिवत्सर्वमासाद्य जगदीश्वर ॥ (३।३)

ऋत्विङ्मण्डपसम्भारश् चाचार्यश्चैव तद्विधः । (४।१)

पूजयेद्ब्राह्मणांस्तद्वद्धेमवस्त्रानुलेपनैः ॥ (४।२)

सर्वौषध्युदकैः सिक्तान्पिष्टातकविभूषितान् । (५।१)

वृक्षान्माल्यैरलंकृत्य वासोभिरभिवेष्टयेत् ॥ (५।२)

सूच्या सौवर्णया कार्यं सर्वेषां कर्णवेधनम् । (६।१)

अञ्जनं चापि दातव्यं तद्वद्धेमशलाकया ॥ (६।२)

फलानि सप्त चाष्टौ वा कालधौतानि कारयेत् । (७।१)

प्रत्येकं सर्ववृक्षाणां वेद्यां तान्यधिवासयेत् ॥ (७।२)

धूपोऽत्र गुग्गुलः श्रेष्ठस्ताम्रपात्रैरधिष्ठितान् । (८।१)

सप्तधान्यस्थितान्कृत्वा वस्त्रगन्धानुलेपनैः ॥ (८।२)

कुम्भान्सर्वेषु वृक्षेषु स्थापयित्वा नरेश्वर । (९।१)

सहिरण्यान् अशेषांस्तान्कृत्वा बलिनिवेदनम् ॥ (९।२)

यथास्वं लोकपालानामिन्द्रादीनां विशेषतः । (१०।१)

वनस्पतेश्च विद्वद्भिर्होमः कार्यो द्विजातिभिः ॥ (१०।२)

ततः शुक्लाम्बरधरां सौवर्णकृतभूषणाम् । (११।१)

सकांस्यदोहां सौवर्णशृङ्गाभ्याम् अतिशालिनीम् । (११।२)

पयस्विनीं वृक्षमध्यादुत्सृजेद्गामुदङ्मुखीम् ॥ (११।३)

ततोऽभिषेकमन्त्रेण वाद्यमङ्गलगीतकैः । (१२।१)

ऋग्यजुःसाममन्त्रैश्च वारुणैरभितस्तथा । (१२।२)

तैरेव कुम्भैः स्नपनं कुर्याद्ब्राह्मणपुंगवः ॥ (१२।३)

स्नातः शुक्लाम्बरस्तद्वद्यजमानोऽभिपूजयेत् । (१३।१)

गोभिर् विभवतः सर्वानृत्विजस्तान्समाहितः ॥ (१३।२)

हेमसूत्रैः सकटकैर् अङ्गुलीयपवित्रकैः । (१४।१)

वासोभिः शयनीयैश्च तथोपस्करपादुकैः । (१४।२)

क्षीरेण भोजनं दद्याद्यावद्दिनचतुष्टयम् ॥ (१४।३)

होमश्च सर्षपैः कार्यो यवैः कृष्णतिलैस्तथा । (१५।१)

पलाशसमिधः शस्ताश्चतुर्थेऽह्नि तथोत्सवः । (१५।२)

दक्षिणा च पुनस्तद्वद्देया तत्रापि शक्तितः ॥ (१५।३)

यद्यदिष्टतमं किंचित् तत्तद् दद्यादमत्सरी । (१६।१)

आचार्ये द्विगुणं दद्यात्प्रणिपत्य विसर्जयेत् ॥ (१६।२)

अनेन विधिना यस्तु कुर्याद्वृक्षोत्सवं बुधः । (१७।१)

सर्वान्कामानवाप्नोति फलं चानन्त्यमश्नुते ॥ (१७।२)

यश्चैकमपि राजेन्द्र वृक्षं संस्थापयेन्नरः । (१८।१)

सोऽपि स्वर्गे वसेद्राजन्यावदिन्द्रायुतत्रयम् ॥ (१८।२)

भूतान्भव्यांश्च मनुजांस्तारयेद्द्रुमसंमितान् । (१९।१)

परमां सिद्धिमाप्नोति पुनरावृत्तिदुर्लभाम् ॥ (१९।२)

य इदं शृणुयान्नित्यं श्रावयेद्वापि मानवः । (२०।१)

सोऽपि सम्पूजितो देवैर्ब्रह्मलोके महीयते ॥ (२०।२)