सूत उवाच । (१।१)

ऐक्ष्वाकी सुषुवे शूरं ख्यातमद्भुतमीढुषम् । (१।२)

पौरुषाज्जज्ञिरे शूराद्भोजायां पुत्रका दश ॥ (१।३)

वसुदेवो महाबाहुः पूर्वमानकदुन्दुभिः । (२।१)

देवमार्गस्ततो जज्ञे ततो देवश्रवाः पुनः ॥ (२।२)

अनाधृष्टिः शिनिश्चैव नन्दश्चैव ससृञ्जयः । (३।१)

श्यामः शमीकः संयूपः पञ्च चास्य वराङ्गनाः ॥ (३।२)

श्रुतकीर्तिः पृथा चैव श्रुतादेवी श्रुतश्रवाः । (४।१)

राजाधिदेवी च तथा पञ्चैता वीरमातरः ॥ (४।२)

कृतस्य तु श्रुतादेवी सुग्रीवं सुषुवे सुतम् । (५।१)

कैकेय्यां श्रुतकीर्त्यां तु जज्ञे सो ऽनुव्रतो नृपः ॥ (५।२)

श्रुतश्रवसि चैद्यस्य सुनीथः समपद्यत । (६।१)

बहुशो धर्मचारी स संबभूवारिमर्दनः ॥ (६।२)

अथ सख्येन वृद्धेऽसौ कुन्तिभोजे सुतां ददौ । (७।१)

एवं कुन्ती समाख्याता वसुदेवस्वसा पृथा ॥ (७।२)

वसुदेवेन सा दत्ता पाण्डोर्भार्या ह्य् अनिन्दिता । (८।१)

पाण्डोरर्थेन सा जज्ञे देवपुत्रान् महारथान् ॥ (८।२)

धर्माद्युधिष्ठिरो जज्ञे वायोर्जज्ञे वृकादेरः । (९।१)

इन्द्राद्धनंजयश् चैव शक्रतुल्यपराक्रमः ॥ (९।२)

माद्रवत्यां तु जनिताव् अश्विभ्याभिति शुश्रुम । (१०।१)

नकुलः सहदेवश्च रूपशीलगुणान्वितौ ॥ (१०।२)

रोहिणी पौरवी नाम भार्या ह्य् आनकदुन्दुभेः । (११।१)

लेभे ज्येष्ठं सुतं रामं सारणं च सुतं प्रियम् ॥ (११।२)

दुर्दमं दमनं सुभ्रुं पिण्डारकमहाहनू । (१२।१)

चित्राक्ष्यौ द्वे कुमार्यौ तु रोहिण्यां जज्ञिरे तदा ॥ (१२।२)

देवक्यां जज्ञिरे शौरेः सुषेणः कीर्तिमानपि । (१३।१)

उदासी भद्रसेनश्च ऋषिवासस्तथैव च । (१३।२)

षष्ठो भद्रविदेहश्च कंसः सर्वानघातयत् ॥ (१३।३)

प्रथमा या अमावास्या वार्षिकी तु भविष्यति । (१४।१)

तस्यां जज्ञे महाबाहुः पूर्वं कृष्णः प्रजापतिः ॥ (१४।२)

अनुजा त्व् अभवत्कृष्णा सुभद्रा भद्रभाषिणी । (१५।१)

देवक्यां तु महातेजा जज्ञे शूरो महायशाः ॥ (१५।२)

सहदेवस्तु ताम्रायां जज्ञे शौरिः कुलोद्वहः । (१६।१)

उपासङ्गधरं लेभे तनयं देवरक्षिता । (१६।२)

एकां कन्यां च सुभगां कंसस्ताम् अभ्यघातयत् ॥ (१६।३)

विजयं रोचमानं च वर्धमानं तु देवलम् । (१७।१)

एते सर्वे महात्मानो ह्य् उपदेव्यां प्रजज्ञिरे ॥ (१७।२)

अवगाहो महात्मा च वृकदेव्यामजायत । (१८।१)

वृकदेव्यां स्वयं जज्ञे नन्दको नाम नामतः ॥ (१८।२)

सप्तमं देवकीपुत्रं मदनं सुषुवे नृप । (१९।१)

गवेषणं महाभागं संग्रामेष्वपराजितम् ॥ (१९।२)

श्रद्धादेव्या विहारे तु वने हि विचरन्पुरा । (२०।१)

वैश्यायामदधाच्छौरिः पुत्रं कौशिकमग्रजम् ॥ (२०।२)

सुतनू रथराजी च शौरेरास्तां परिग्रहौ । (२१।१)

पुण्ड्रश्च कपिलश्चैव वसुदेवात्मजौ बलौ ॥ (२१।२)

जरा नाम निषादोऽभूत्प्रथमः स धनुर्धरः । (२२।१)

सौभद्रश्च भवश्चैव महासत्त्वौ बभूवतुः ॥ (२२।२)

देवभागसुतश्चापि नाम्नासाव् उद्धवः स्मृतः । (२३।१)

पण्डितं प्रथमं प्राहुर्देवश्रवःसमुद्भवम् ॥ (२३।२)

ऐक्ष्वाक्यलभतापत्यमनाधृष्टेर्यशस्विनी । (२४।१)

निधूतसत्त्वं शत्रुघ्नं श्राद्धस्तस्मादजायत ॥ (२४।२)

करूषायानपत्याय कृष्णस्तुष्टः सुतं ददौ । (२५।१)

सुचन्द्रं तु महाभागं वीर्यवन्तं महाबलम् ॥ (२५।२)

जाम्बवत्याः सुताव् एतौ द्वौ च सत्कृतलक्षणौ । (२६।१)

चारुदेष्णश्च साम्बश्च वीर्यवन्तौ महाबलौ ॥ (२६।२)

तन्तिपालश्च तन्तिश्च नन्दनस्य सुताव् उभौ । (२७।१)

शमीकपुत्राश् चत्वारो विक्रान्ताः सुमहाबलाः । (२७।२)

विराजश्च धनुश्चैव श्यामश्च सृञ्जयस्तथा ॥ (२७।३)

अनपत्योऽभवच्छ्यामः शमीकस्तु वनं ययौ । (२८।१)

जुगुप्समानो भोजत्वं राजर्षित्वमवाप्तवान् ॥ (२८।२)

कृष्णस्य जन्माभ्युदयं यः कीर्तयति नित्यशः । (२९।१)

शृणोति मानवो नित्यं सर्वपापैः प्रमुच्यते ॥ (२९।२)