ऋषय ऊचुः । (१।१)

देवानां दानवानां च गन्धर्वोरगरक्षसाम् । (१।२)

उत्पत्तिं विस्तरेणैव सूत ब्रूहि यथातथम् ॥ (१।३)

सूत उवाच । (२।१)

संकल्पाद् दर्शनात्स्पर्शात्पूर्वेषां सृष्टिरुच्यते । (२।२)

दक्षात्प्राचेतसाद् ऊर्ध्वं सृष्टिर् मैथुनसम्भवा ॥ (२।३)

प्रजाः सृजेति व्यादिष्टः पूर्वं दक्षः स्वयम्भुवा । (३।१)

यथा ससर्ज चैवादौ तथैव शृणुत द्विजाः ॥ (३।२)

यदा तु सृजतस्तस्य देवर्षिगणपन्नगान् । (४।१)

न वृद्धिम् अगमल्लोकस्तदा मैथुनयोगतः । (४।२)

दक्षः पुत्रसहस्राणि पाञ्चजन्यामजीजनत् ॥ (४।३)

तांस् तु दृष्ट्वा महाभागः सिसृक्षुर्विविधाः प्रजाः । (५।१)

नारदः प्राह हर्यश्वान्दक्षपुत्रान्समागतान् ॥ (५।२)

भुवः प्रमाणं सर्वत्र ज्ञात्वोर्ध्वम् अध एव च । (६।१)

ततः सृष्टिं विशेषेण कुरुध्वमृषिसत्तमाः ॥ (६।२)

ते तु तद्वचनं श्रुत्वा प्रयाताः सर्वतो दिशम् । (७।१)

अद्यापि न निवर्तन्ते समुद्रादिव सिन्धवः ॥ (७।२)

हर्यश्वेषु प्रनष्टेषु पुनर्दक्षः प्रजापतिः । (८।१)

वैरिण्यामेव पुत्राणां सहस्रमसृजत्प्रभुः ॥ (८।२)

शबला नाम ते विप्राः समेताः सृष्टिहेतवः । (९।१)

नारदोऽनुगतान्प्राह पुनस्तान्पूर्ववत्स तान् ॥ (९।२)

भुवः प्रमाणं सर्वत्र ज्ञात्वा भ्रातॄन् अथो पुनः । (१०।१)

आगत्य चाथ सृष्टिं च करिष्यथ विशेषतः ॥ (१०।२)

ते ऽपि तेनैव मार्गेण जग्मुर्भ्रातृपथा तदा । (११।१)

ततः प्रभृति न भ्रातुः कनीयान्मार्गम् इच्छति । (११।२)

अन्विष्यन्दुःखमाप्नोति तेन तत्परिवर्जयेत् ॥ (११।३)

ततस्तेषु विनष्टेषु षष्टिं कन्याः प्रजापतिः । (१२।१)

वैरिण्यां जनयामास दक्षः प्राचेतसस्तथा ॥ (१२।२)

प्रादात्स दश धर्माय कश्यपाय त्रयोदश । (१३।१)

सप्तविंशतिं सोमाय चतस्रोऽरिष्टनेमये ॥ (१३।२)

द्वे चैव भृगुपुत्राय द्वे कृशाश्वाय धीमते । (१४।१)

द्वे चैवाङ्गिरसे तद्वत्तासां नामानि विस्तरात् ॥ (१४।२)

शृणुध्वं देवमातॄणां प्रजाविस्तारम् आदितः । (१५।१)

मरुत्वती वसुर् यामी लम्बा भानुर् अरुन्धती ॥ (१५।२)

संकल्पा च मुहूर्ता च साध्या विश्वा च भामिनी । (१६।१)

धर्मपत्न्यः समाख्यातास्तासां पुत्रान् निबोधत ॥ (१६।२)

विश्वे देवास्तु विश्वायाः साध्या साध्यानजीजनत् । (१७।१)

मरुत्वत्यां मरुत्वन्तो वसोस् तु वसवस्तथा ॥ (१७।२)

भानोस्तु भानवस्तद्वन्मुहूर्तायां मुहूर्तकाः । (१८।१)

लम्बायां घोषनामानो नागवीथी तु यामिजा ॥ (१८।२)

पृथिवीतलसम्भूतम् अरुन्धत्याम् अजायत । (१९।१)

संकल्पायास्तु संकल्पो वसुसृष्टिं निबोधत ॥ (१९।२)

ज्योतिष्मन्तस्तु ये देवा व्यापकाः सर्वतो दिशम् । (२०।१)

वसवस्ते समाख्यातास्तेषां सर्गं निबोधत ॥ (२०।२)

आपो ध्रुवश्च सोमश्च धरश्चैवानिलोऽनलः । (२१।१)

प्रत्यूषश्च प्रभासश्च वसवोऽष्टौ प्रकीर्तिताः ॥ (२१।२)

आपस्य पुत्राश् चत्वारः शान्तो वै दण्ड एव च । (२२।१)

शाम्बोऽथ मणिवक्त्रश्च यज्ञरक्षाधिकारिणः ॥ (२२।२)

ध्रुवस्य कालः पुत्रस्तु वर्चाः सोमादजायत । (२३।१)

द्रविणो हव्यवाहश्च धरपुत्राव् उभौ स्मृतौ ॥ (२३।२)

कल्याणिन्यां ततः प्राणो रमणः शिशिरोऽपि च । (२४।१)

मनोहरा धरात्पुत्रानवापाथ हरेः सुता ॥ (२४।२)

शिवा मनोजवं पुत्रमविज्ञातगतिं तथा । (२५।१)

अवाप चानलात् पुत्राव् अग्निप्रायगुणौ पुनः ॥ (२५।२)

अग्निपुत्रः कुमारस्तु शरस्तम्बे व्यजायत । (२६।१)

तस्य शाखो विशाखश्च नैगमेयश् च पृष्ठजाः ॥ (२६।२)

अपत्यं कृत्तिकानां तु कार्त्तिकेयस् ततः स्मृतः । (२७।१)

प्रत्यूषस ऋषिः पुत्रो विभुर् नाम्नाथ देवलः । (२७।२)

विश्वकर्मा प्रभासस्य पुत्रः शिल्पी प्रजापतिः ॥ (२७।३)

प्रासादभवनोद्यानप्रतिमाभूषणादिषु । (२८।१)

तडागारामकूपेषु स्मृतः सो ऽमरवर्धकिः ॥ (२८।२)

अजैकपादहिर्बुध्न्यो विरूपाक्षोऽथ रैवतः । (२९।१)

हरश्च बहुरूपश्च त्र्यम्बकश्च सुरेश्वरः ॥ (२९।२)

सावित्रश्च जयन्तश्च पिनाकी चापराजितः । (३०।१)

एते रुद्राः समाख्याता एकादश गणेश्वराः ॥ (३०।२)

एतेषां मानसानां तु त्रिशूलवरधारिणाम् । (३१।१)

कोटयश्चतुरशीतिस् तत्पुत्राश् चाक्षया मताः ॥ (३१।२)

दिक्षु सर्वासु ये रक्षां प्रकुर्वन्ति गणेश्वराः । (३२।१)

पुत्रपौत्रसुताश्चैते सुरभीगर्भसम्भवाः ॥ (३२।२)