नन्दिकेश्वर उवाच । (१।१)

भ्रातृभिः सहितः सर्वैर्द्रौपद्या सह भार्यया । (१।२)

ब्राह्मणेभ्यो नमस्कृत्य गुरून्देवानतर्पयत् ॥ (१।३)

वासुदेवोऽपि तत्रैव क्षणेनाभ्यागतस्तदा । (२।१)

पाण्डवैः सहितैः सर्वैः पूज्यमानस्तु माधवः ॥ (२।२)

कृष्णेन सहितैः सर्वैः पुनरेव महात्मभिः । (३।१)

अभिषिक्तः स्वराज्ये च धर्मपुत्रो युधिष्ठिरः ॥ (३।२)

एतस्मिन्नन्तरे चैव मार्कण्डेयो महामुनिः । (४।१)

ततः स्वस्तीति चोक्त्वा तु क्षणादाश्रममागमत् ॥ (४।२)

युधिष्ठिरोऽपि धर्मात्मा भ्रातृभिः सहितोऽवसत् । (५।१)

महादानं ततो दत्त्वा धर्मपुत्रो महामनाः ॥ (५।२)

यस्त्विदं कल्य उत्थाय माहात्म्यं पठते नरः । (६।१)

प्रयागं स्मरते नित्यं स याति परमं पदम् । (६।२)

मुच्यते सर्वपापेभ्यो रुद्रलोकं स गच्छति ॥ (६।३)

वासुदेव उवाच । (७।१)

मम वाक्यं च कर्तव्यं महाराज ब्रवीम्यहम् । (७।२)

नित्यं जपस्व जुह्वस्व प्रयागे विगतज्वरः ॥ (७।३)

प्रयागं स्मर वै नित्यं सहास्माभिर्युधिष्ठिर । (८।१)

स्वयं प्राप्स्यसि राजेन्द्र स्वर्गलोकं न संशयः ॥ (८।२)

प्रयागमनुगच्छेद्वा वसते वापि यो नरः । (९।१)

सर्वपापविशुद्धात्मा रुद्रलोकं स गच्छति ॥ (९।२)

प्रतिग्रहादुपावृत्तः संतुष्टो नियतः शुचिः । (१०।१)

अहंकारनिवृत्तश्च स तीर्थफलमश्नुते ॥ (१०।२)

अकोपनश्च सत्यश्च सत्यवादी दृढव्रतः । (११।१)

आत्मोपमश्च भूतेषु स तीर्थफलमश्नुते ॥ (११।२)

ऋषिभिः क्रतवः प्रोक्ता देवैश्चापि यथाक्रमम् । (१२।१)

न हि शक्या दरिद्रेण यज्ञाः प्राप्तुं महीपते ॥ (१२।२)

बहूपकरणा यज्ञा नानासम्भारविस्तराः । (१३।१)

प्राप्यन्ते पार्थिवैरेतैः समृद्धैर्वै नरैः क्वचित् ॥ (१३।२)

यो दरिद्रैरपि विधिः शक्यः प्राप्तुं नरेश्वर । (१४।१)

तुल्यो यज्ञफलैः पुण्यैस्तन्निबोध युधिष्ठिर ॥ (१४।२)

ऋषीणां परमं गुह्यमिदं भरतसत्तम । (१५।१)

तीर्थानुगमनं पुण्यं यज्ञेभ्योऽपि विशिष्यते ॥ (१५।२)

दश तीर्थसहस्राणि तिस्रः कोट्यस्तथापगाः । (१६।१)

माघमासे गमिष्यन्ति गङ्गायां भरतर्षभ ॥ (१६।२)

स्वस्थो भव महाराज भुङ्क्ष्व राज्यमकण्टकम् । (१७।१)

पुनर्द्रक्ष्यसि राजेन्द्र यजमानो विशेषतः ॥ (१७।२)

नन्दिकेश्वर उवाच । (१८।१)

इत्युक्त्वा स महाभागो मार्कण्डेयो महातपाः । (१८।२)

युधिष्ठिरस्य नृपतेस्तत्रैवान्तरधीयत ॥ (१८।३)

ततस्तत्र समाप्लाव्य गात्राणि सगणो नृपः । (१९।१)

यथोक्तेनाथ विधिना परां निर्वृतिमागमत् ॥ (१९।२)

तथा त्वमपि देवर्षे प्रयागाभिमुखो भव । (२०।१)

अभिषेकं तु कृत्वाद्य कृतकृत्यो भविष्यसि ॥ (२०।२)

सूत उवाच । (२१।१)

एवमुक्त्वाथ नन्दीशस्तत्रैवान्तरधीयत । (२१।२)

नारदोऽपि जगामाशु प्रयागाभिमुखस्तथा ॥ (२१।३)

तत्र स्नात्वा च जप्त्वा च विधिदृष्टेन कर्मणा । (२२।१)

दानं दत्त्वा द्विजाग्र्येभ्यो गतः स्वभवनं तदा ॥ (२२।२)