सूत उवाच । (१।१)

एवं श्रुत्वा मनुः प्राह पुनरेव जनार्दनम् । (१।२)

पूर्वेषां चरितं ब्रूहि मनूनां मधुसूदन ॥ (१।३)

मत्स्य उवाच । (२।१)

मन्वन्तराणि राजेन्द्र मनूनां चरितं च यत् । (२।२)

प्रमाणं चैव कालस्य तां सृष्टिं च समासतः ॥ (२।३)

एकचित्तः प्रशान्तात्मा शृणु मार्तण्डनन्दन । (३।१)

यामा नाम पुरा देवा आसन् स्वायम्भुवान्तरे ॥ (३।२)

सप्तैव ऋषयः पूर्वे ये मरीच्यादयः स्मृताः । (४।१)

आग्नीध्रश्चाग्निबाहुश्च सहः सवन एव च ॥ (४।२)

ज्योतिष्मान् द्युतिमान् हव्यो मेधा मेधातिथिर् वसुः । (५।१)

स्वायम्भुवस्यास्य मनोर्दशैते वंशवर्धनाः ॥ (५।२)

प्रतिसर्गमिमे कृत्वा जग्मुर्यत्परमंपदम् । (६।१)

एतत् स्वायम्भुवं प्रोक्तं स्वारोचिषमतः परम् ॥ (६।२)

स्वारोचिषस्य तनयाश् चत्वारो देववर्चसः । (७।१)

नभोनभस्यप्रसृतिभानवः कीर्तिवर्धनाः ॥ (७।२)

दत्तो निश्च्यवनस्तम्बः प्राणः कश्यप एव च । (८।१)

और्वो बृहस्पतिश्चैव सप्तैते ऋषयः स्मृताः ॥ (८।२)

देवाश्च तुषिता नाम स्मृताः स्वारोचिषेऽन्तरे । (९।१)

हस्तीन्द्रः सुकृतो मूर्तिरापो ज्योतिरयः स्मयः ॥ (९।२)

वसिष्ठस्य सुताः सप्त ये प्रजापतयः स्मृताः । (१०।१)

द्वितीयमेतत्कथितं मन्वन्तरमतः परम् ॥ (१०।२)

औत्तमीयं प्रवक्ष्यामि तथा मन्वन्तरं शुभम् । (११।१)

मनुर्नामौत्तमिर्यत्र दश पुत्रानजीजनत् ॥ (११।२)

ईष ऊर्जश्च तर्जश् च शुचिः शुक्रस्तथैव च । (१२।१)

मधुश् च माधवश्चैव नभस्योऽथ नभास्तथा ॥ (१२।२)

सहः कनीयानेतेषामुदारः कीर्तिवर्धनः । (१३।१)

भावनास् तत्र देवाः स्युर् ऊर्जाः सप्तर्षयः स्मृताः ॥ (१३।२)

कौकुरुण्डिश्च दाल्भ्यश्च शङ्गः प्रवहणः शिवः । (१४।१)

सितश्च सस्मितश्चैव सप्तैते योगवर्धनाः ॥ (१४।२)

मन्वन्तरं चतुर्थं तु तामसं नाम विश्रुतम् । (१५।१)

कविः पृथुस् तथैवाग्निर् अकपिः कपिरेव च ॥ (१५।२)

तथैव जल्पधीमानौ मुनयः सप्त तामसे । (१६।१)

साध्या देवगणा यत्र कथितास्तामसे ऽन्तरे ॥ (१६।२)

अकल्मषस् तथा धन्वी तपोमूलस्तपोधनः । (१७।१)

तपोरतिस्तपस्यश्च तपोद्युतिपरंतपौ ॥ (१७।२)

तपोभागी तपोयोगी धर्माचाररताः सदा । (१८।१)

तामसस्य सुताः सर्वे दश वंशविवर्धनाः ॥ (१८।२)

पञ्चमस्य मनोस् तद्वद् रैवतस्यान्तरं शृणु । (१९।१)

देवबाहुः सुबाहुश्च पर्जन्यः सोमपो मुनिः ॥ (१९।२)

हिरण्यरोमा सप्ताश्वः सप्तैते ऋषयः स्मृताः । (२०।१)

देवाश्चाभूतरजसस्तथा प्रकृतयः शुभाः ॥ (२०।२)

अरुणस् तत्त्वदर्शी च वित्तवान्हव्यपः कपिः । (२१।१)

युक्तो निरुत्सुकः सत्त्वो निर्मोहो ऽथ प्रकाशकः ॥ (२१।२)

धर्मवीर्यबलोपेता दशैते रैवतात्मजाः । (२२।१)

भृगुः सुधामा विरजाः सहिष्णुर्नाद एव च ॥ (२२।२)

विवस्वानतिनामा च षष्ठे सप्तर्षयोऽपरे । (२३।१)

चाक्षुषस्यान्तरे देवा लेखा नाम परिश्रुताः ॥ (२३।२)

ऋभवोऽथ ऋभाद्याश् च वारिमूला दिवौकसः । (२४।१)

चाक्षुषस्यान्तरे प्रोक्ता देवानां पञ्च योनयः ॥ (२४।२)

रुरुप्रभृतयस्तद्वच्चाक्षुषस्य सुता दश । (२५।१)

प्रोक्ताः स्वायम्भुवे वंशे ये मया पूर्वमेव तु ॥ (२५।२)

अन्तरं चाक्षुषं चैतन्मया ते परिकीर्तितम् । (२६।१)

सप्तमं तत्प्रवक्ष्यामि यद्वैवस्वतमुच्यते ॥ (२६।२)

अत्रिश् चैव वसिष्ठश्च कश्यपो गौतमस्तथा । (२७।१)

भरद्वाजस्तथा योगी विश्वामित्रः प्रतापवान् ॥ (२७।२)

जमदग्निश्च सप्तैते साम्प्रतं ये महर्षयः । (२८।१)

कृत्वा धर्मव्यवस्थानं प्रयान्ति परमं पदम् ॥ (२८।२)

साध्या विश्वे च रुद्राश्च मरुतो वसवोऽश्विनौ । (२९।१)

आदित्याश्च सुरास्तद्वत्सप्त देवगणाः स्मृताः ॥ (२९।२)

इक्ष्वाकुप्रमुखाश्चास्य दश पुत्राः स्मृता भुवि । (३०।१)

मन्वन्तरेषु सर्वेषु सप्त सप्त महर्षयः ॥ (३०।२)

कृत्वा धर्मव्यवस्थानं प्रयान्ति परमं पदम् । (३१।१)

सावर्ण्यस्य प्रवक्ष्यामि मनोर्भावि तथान्तरम् ॥ (३१।२)

अश्वत्थामा शरद्वांश्च कौशिको गालवस्तथा । (३२।१)

शतानन्दः काश्यपश्च रामश्च ऋषयः स्मृताः ॥ (३२।२)

धृतिर् वरीयान् यवसः सुवर्णो वष्टिरेव च । (३३।१)

चरिष्णुर् ईड्यः सुमतिर् वसुः शुक्रश्च वीर्यवान् ॥ (३३।२)

भविष्या दश सावर्णेर् मनोः पुत्राः प्रकीर्तिताः । (३४।१)

रौच्यादयस्तथान्ये ऽपि मनवः संप्रकीर्तिताः ॥ (३४।२)

रुचेः प्रजापतेः पुत्रो रौच्यो नाम भविष्यति । (३५।१)

मनुर् भूतिसुतस् तद्वद् भौत्यो नाम भविष्यति ॥ (३५।२)

ततस्तु मेरुसावर्णिर् ब्रह्मसूनुर् मनुः स्मृतः । (३६।१)

ऋतश्च ऋतधामा च विष्वक्सेनो मनुस् तथा ॥ (३६।२)

अतीतानागताश्चैते मनवः परिकीर्तिताः । (३७।१)

षडूनं युगसाहस्रम् एभिर् व्याप्तं नराधिप ॥ (३७।२)

स्वे स्वेऽन्तरे सर्वमिदमुत्पाद्य सचराचरम् । (३८।१)

कल्पक्षये विनिर्वृत्ते मुच्यन्ते ब्रह्मणा सहा ॥ (३८।२)

एते युगसहस्रान्ते विनश्यन्ति पुनः पुनः । (३९।१)

ब्रह्माद्या विष्णुसायुज्यं याता यास्यन्ति वै द्विजाः ॥ (३९।२)