ईश्वर उवाच । (१।१)

अतः परं प्रवक्ष्यामि गुडपर्वतमुत्तमम् । (१।२)

यत्प्रदानान्नरः स्वर्गमाप्नोति सुरपूजितम् ॥ (१।३)

उत्तमो दशभिर्भारैर्मध्यमः पञ्चभिर्मतः । (२।१)

त्रिभिर्भारैः कनिष्ठः स्यात्तदर्धेनाल्पवित्तवान् ॥ (२।२)

तद्वदामन्त्रणं पूजां हेमवृक्षसुरार्चनम् । (३।१)

विष्कम्भपर्वतांस्तद्वत्सरांसि वनदेवताः ॥ (३।२)

होमजागरणं तद्वल्लोकपालाधिवासनम् । (४।१)

धान्यपर्वतवत् कुर्यादिमं मन्त्रमुदीरयेत् ॥ (४।२)

यथा देवेषु विश्वात्मा प्रवरोऽयं जनार्दनः । (५।१)

सामवेदस्तु वेदानां महादेवस्तु योगिनाम् ॥ (५।२)

प्रणवः सर्वमन्त्राणां नारीणां पार्वती यथा । (६।१)

तथा रसानां प्रवरः सदैवेक्षुरसो मतः ॥ (६।२)

मम तस्मात्परां लक्ष्मीं गुडपर्वत देहि वै । (७।१)

यस्मात्सौभाग्यदायिन्या भ्राता त्वं गुडपर्वत । (७।२)

निवासश्चापि पार्वत्यास्तस्माच्छान्तिं प्रयच्छ मे ॥ (७।३)

अनेन विधिना यस्तु दद्याद्गुडमयं गिरिम् । (८।१)

पूज्यमानः स गन्धर्वैर्गौरीलोके महीयते ॥ (८।२)

ततः कल्पशतान्ते तु सप्तद्वीपाधिपो भवेत् । (९।१)

आयुरारोग्यसम्पन्नः शत्रुभिश्चापराजितः ॥ (९।२)