सूत उवाच । (१।१)

मघवा तु निहन्तुं तानसुरानमरेश्वरः । (१।२)

लोकपाला ययुः सर्वे गणपालाश्च सर्वशः ॥ (१।३)

ईश्वरा मोदिताः सर्व उत्पेतुश्चाम्बरे तदा । (२।१)

खगतास्तु विरेजुस्ते पक्षवन्त इवाचलाः ॥ (२।२)

प्रययुस्तत्पुरं हन्तुं शरीरमिव व्याधयः । (३।१)

शङ्खाडम्बरनिर्घोषैः पणवान्पटहानपि । (३।२)

नादयन्तः पुरो देवा दृष्टास्त्रिपुरवासिभिः ॥ (३।३)

हरः प्राप्त इतीवोक्त्वा बलिनस्ते महासुराः । (४।१)

आजग्मुः परमं क्षोभम् अत्ययेष्विव सागराः ॥ (४।२)

सुरतूर्यरवं श्रुत्वा दानवा भीमदर्शनाः । (५।१)

निनेदुर्वादयन्तश्च नानावाद्यान्यनेकशः ॥ (५।२)

भूयोदीरितवीर्यास्ते परस्परकृतागसः । (६।१)

पूर्वदेवाश्च देवाश्च सूदयन्तः परस्परम् ॥ (६।२)

आक्रोशेऽपि समप्रख्ये तेषां देहनिकृन्तनम् । (७।१)

प्रवृत्तं युद्धमतुलं प्रहारकृतनिःस्वनम् ॥ (७।२)

निष्पतन्त इवादित्याः प्रज्वलन्त इवाग्नयः । (८।१)

शंसन्त इव नागेन्द्रा भ्रमन्त एव पक्षिणः । (८।२)

गिरीन्द्रा इव कम्पन्तो गर्जन्त इव तोयदाः ॥ (८।३)

जृम्भन्त इव शार्दूलाः गर्जन्त इव तोयदाः । (९।१)

प्रवृद्धोर्मितरंगौघाः क्षुभ्यन्त इव सागराः ॥ (९।२)

प्रमथाश्च महाशूरा दानवाश्च महाबलाः । (१०।१)

युयुधुर्निश्चला भूत्वा वज्रा इव महाचलैः ॥ (१०।२)

कार्मुकाणां विकृष्टानां बभूवुर्दारुणा रवाः । (११।१)

कालानुगानां मेघानां यथा वियति वायुना ॥ (११।२)

आहुश्च युद्धे मा भैषीः क्व यास्यसि मृतो ह्यसि । (१२।१)

प्रहराशु स्थितोऽस्म्यत्र एहि दर्शय पौरुषम् ॥ (१२।२)

गृहाण छिन्द्धि भिन्द्धीति खाद मारय दारय । (१३।१)

इत्यन्योन्यम् अनूच्चार्य प्रययुर्यमसादनम् ॥ (१३।२)

खड्गापवर्जिताः केचित्केचिच्छिन्नाः परश्वधैः । (१४।१)

केचिन्मुद्गरचूर्णाश्च केचिद्बाहुभिराहताः ॥ (१४।२)

पट्टिशैः सूदिताः केचित्केचिच्छूलविदारिताः । (१५।१)

दानवाः शरपुष्पाभाः सवना इव पर्वताः । (१५।२)

निपतन्त्यर्णवजले भीमनक्रतिमिङ्गिले ॥ (१५।३)

व्यसुभिः सुनिबद्धाङ्गैः पतमानैः सुरेतरैः । (१६।१)

संबभूवार्णवे शब्दः सजलाम्बुदनिस्वनः ॥ (१६।२)

तेन शब्देन मकरा नक्रास्तिमितिमिङ्गिलाः । (१७।१)

मत्ता लोहितगन्धेन क्षोभयन्तो महार्णवम् ॥ (१७।२)

परस्परेण कलहं कुर्वाणा भीममूर्तयः । (१८।१)

भ्रमन्ते भक्षयन्तश्च दानवानां च लोहितम् ॥ (१८।२)

सरथान् सायुधान् साश्वान् सवस्त्राभरणावृतान् । (१९।१)

जग्रसुस्तिमयो दैत्यान्द्रावयन्तो जलेचरान् ॥ (१९।२)

मृधं यथासुराणां च प्रमथानां प्रवर्तते । (२०।१)

अम्बरेऽम्भसि च तथा युद्धं चक्रुर्जलेचराः ॥ (२०।२)

यथा भ्रमन्ति प्रमथाः सदैत्यास्तथा भ्रमन्ते तिमयः सनक्राः । (२१।१)

यथैव छिन्दन्ति परस्परं तु तथैव क्रन्दन्ति विभिन्नदेहाः ॥ (२१।२)

व्रणाननैर् अङ्गरसं स्रवद्भिः सुरासुरैर्नक्रतिमिङ्गिलैश्च । (२२।१)

कृतो मुहूर्तेन समुद्रदेशः सरक्ततोयः समुदीर्णतोयः ॥ (२२।२)

पूर्वं महाम्भोधरपर्वताभं द्वारं महान्तं त्रिपुरस्य शक्रः । (२३।१)

निपीड्य तस्थौ महता बलेन युक्तोऽमराणां महता बलेन ॥ (२३।२)

तथोत्तरं सोऽन्तरजो हरस्य बालार्कजाम्बूनदतुल्यवर्णः । (२४।१)

स्कन्दः पुरद्वारमथारुरोह वृद्धोऽस्तशृङ्गं प्रपतन्निवार्कः ॥ (२४।२)

यमश्च वित्ताधिपतिश्च देवो दण्डान्वितः पाशवरायुधश्च । (२५।१)

देवारिणस्तस्य पुरस्य द्वारं ताभ्यां तु तत्पश्चिमतो निरुद्धम् ॥ (२५।२)

दक्षारिरुद्रस्तपनायुताभः स भास्वता देवरथेन देवः । (२६।१)

तद्दक्षिणद्वारमरेः पुरस्य रुद्ध्वावतस्थौ भगवांस्त्रिनेत्रः ॥ (२६।२)

तुङ्गानि वेश्मानि सगोपुराणि स्वर्णानि कैलासशशिप्रभाणि । (२७।१)

प्रह्लादरूपाः प्रमथावरुद्धा ज्योतींषि मेघा इव चाश्मवर्षाः ॥ (२७।२)

उत्पात्य चोत्पाट्य गृहाणि तेषां सशैलमालासमवेदिकानि । (२८।१)

प्रक्षिप्य प्रक्षिप्य समुद्रमध्ये कालाम्बुदाभाः प्रमथा विनेदुः ॥ (२८।२)

रक्तानि चाशेषवनैर्युतानि साशोकखण्डानि सकोकिलानि । (२९।१)

गृहाणि हे नाथ पितः सुतेति भ्रातेति कान्तेति प्रियेति चापि । (२९।२)

उत्पाट्यमानेषु गृहेषु नार्यस् त्वनार्यशब्दान्विविधान्प्रचक्रुः ॥ (२९।३)

कलत्रपुत्रक्षयप्राणनाशे तस्मिन्पुरे युद्धमतिप्रवृत्ते । (३०।१)

महासुराः सागरतुल्यवेगा गणेश्वराः कोपवृताः प्रतीयुः ॥ (३०।२)

परश्वधैस्तत्र शिलोपलैश्च त्रिशूलवज्रोत्तमकम्पनैश्च । (३१।१)

शरीरसद्मक्षपणं सुघोरं युद्धं प्रवृत्तं दृढवैरबद्धम् ॥ (३१।२)

अन्योन्यमुद्दिश्य विमर्दतां च प्रधावतां चैव विनिघ्नतां च । (३२।१)

शब्दो बभूवामरदानवानां युगान्तकालेष्विव सागराणाम् ॥ (३२।२)

व्रणैरजस्रं क्षतजं वमन्तः कोपोपरक्ता बहुधा नदन्तः । (३३।१)

गणेश्वरास्तेऽसुरपुंगवाश्च युध्यन्ति शब्दं च महदुद्गिरन्तः ॥ (३३।२)

मार्गाः पुरे लोहितकर्दमालाः स्वर्णेष्टकास्फाटिकभिन्नचित्राः । (३४।१)

कृता मुहूर्तेन सुखेन गन्तुं छिन्नोत्तमाङ्गाङ्घ्रिकराः करालाः ॥ (३४।२)

कोपावृताक्षः स तु तारकाख्यः संख्ये सवृक्षः सगिरिर् निलीनः । (३५।१)

तस्मिन्क्षणे द्वारवरं रिरक्षो रुद्धं भवेनाद्भुतविक्रमेण ॥ (३५।२)

स तत्र प्राकारागतांश्च भूताञ्छातन् महानद्भुतवीर्यसत्त्वः । (३६।१)

चचार चाप्तेन्द्रियगर्वदृप्तः पुराद्विनिष्क्रम्य ररास घोरम् ॥ (३६।२)

ततः स दैत्योत्तमपर्वताभो यथाञ्जसा नाग इवाभिमत्तः । (३७।१)

निवारितो रुद्ररथं जिघृक्षुर्यथार्णवः सर्पति चातिवेलः ॥ (३७।२)

शेषः सुधन्वा गिरिशश्च देवश्चतुर्मुखो यः स त्रिलोचनश्च । (३८।१)

ते तारकाख्याभिगता गताजौ क्षोभं यथा वायुवशात्समुद्राः ॥ (३८।२)

शेषो गिरीशः सपितामहेशश् चोत्क्षुभ्यमाणः स रथेऽम्बरस्थः । (३९।१)

बिभेद संधीषु बलाभिपन्नः कूजन्निनादांश्च करोति घोरान् ॥ (३९।२)

एकं तु ऋग्वेदतुरंगमस्य पृष्ठे पदं न्यस्य वृषस्य चैकम् । (४०।१)

तस्थौ भवः सोद्यतबाणचापः पुरस्य तत्सङ्गसमीक्षमाणः ॥ (४०।२)

तदा भवपदन्यासाद्धयस्य वृषभस्य च । (४१।१)

पेतुः स्तनाश्च दन्ताश्च पीडिताभ्यां त्रिशूलिना ॥ (४१।२)

ततःप्रभृति चाश्वानां स्तना दन्ता गवां तथा । (४२।१)

मूढाः समभवंस्तेन चादृश्यत्वमुपागताः ॥ (४२।२)

तारकाख्यस्तु भीमाक्षो रौद्ररक्तान्तरेक्षणः । (४३।१)

रुद्रान्तिके सुसंरुद्धो नन्दिना कुलनन्दिना ॥ (४३।२)

परश्वधेन तीक्ष्णेन स नन्दी दानवेश्वरम् । (४४।१)

तक्षयामास वै तक्षा चन्दनं गन्धदो यथा ॥ (४४।२)

परश्वधहतः शूरः शैलादिः शरभो यथा । (४५।१)

दुद्राव खड्गं निष्कृष्य तारकाख्यो गणेश्वरम् ॥ (४५।२)

यज्ञोपवीतम् आदाय चिछेद च ननाद च । (४६।१)

ततः सिंहरवो घोरः शङ्खशब्दश्च भैरवः । (४६।२)

गणेश्वरैः कृतस्तत्र तारकाख्ये निषूदिते ॥ (४६।३)

प्रमथारसितं श्रुत्वा वादित्रस्वनमेव च । (४७।१)

पार्श्वस्थः सुमहापार्श्वं विद्युन्मालिं मयोऽब्रवीत् ॥ (४७।२)

बहुवदनवतां किमेष शब्दो नदतां श्रूयते भिन्नसागराभः । (४८।१)

वद वचनं तडिन्मालिन् किं किमेतद्गणपाला युयुधुर्ययुर्गजेन्द्राः ॥ (४८।२)

इति मयवचनाङ्कुशार्दितस्तं तडिन्माली रविरिवांशुमाली । (४९।१)

रणशिरसि समागतः सुराणां निजगादेदम् अरिंदमो ऽतिहर्षात् ॥ (४९।२)

यमवरुणमहेन्द्ररुद्रवीर्यस्तव यशसो निधिर्धीर तारकाख्यः । (५०।१)

सकलसमरशीर्षपर्वतेन्द्रो युद्ध्वा यस्तपति हि तारको गणेन्द्रैः ॥ (५०।२)

मृदितम् उपनिशम्य तारकाख्यं रविदीप्तानलभीषणायताक्षम् । (५१।१)

हृषितसकलनेत्रलोमसत्त्वाः प्रमथास्तोयमुचो यथा नदन्ति ॥ (५१।२)

इति सुहृदो वचनं निशम्य तत्त्वं तडिमालेः स मयः सुवर्णमाली । (५२।१)

रणशिरस्य् असिताञ्जनाचलाभो जगदे वाक्यमिदं नवेन्दुमालिम् ॥ (५२।२)

विद्युन्मालिन्न नः कालः साधितुं ह्यवहेलया । (५३।१)

करोमि विक्रमेणैतत्पुरं व्यसनवर्जितम् ॥ (५३।२)

विद्युन्माली ततः क्रुद्धो मयश्च त्रिपुरेश्वरः । (५४।१)

गणाञ्जघ्नुस्तु द्राघिष्ठाः सहितास्तैर्महासुरैः ॥ (५४।२)

येन येन ततो विद्युन्माली याति मयश्च सः । (५५।१)

तेन तेन पुरं शून्यं प्रमथैः प्रहृतैः कृतम् ॥ (५५।२)

अथ यमवरुणमृदङ्गघोषैः पणवडिण्डिमज्यास्वनप्रघोषैः । (५६।१)

सकरतलपुटैश्च सिंहनादैर्भवमभिपूज्य तदा सुरा अवतस्थुः ॥ (५६।२)

सम्पूज्यमानो दितिजैर्महात्मभिः सहस्ररश्मिप्रतिमौजसैर् विभुः । (५७।१)

अभिष्टुतः सत्यरतैस् तपोधनैर् यथास्तशृङ्गाभिगतो दिवाकरः ॥ (५७।२)