चन्द्रादित्योपरागे तु यत्स्नानमभिधीयते । (१।१)

तदहं श्रोतुमिच्छामि द्रव्यमन्त्रविधानवित् ॥ (१।२)

मत्स्य उवाच । (२।१)

यस्य राशिं समासाद्य भवेद्ग्रहणसम्प्लवः । (२।२)

तस्य स्नानं प्रवक्ष्यामि मन्त्रौषधविधानतः ॥ (२।३)

चन्द्रोपरागं सम्प्राप्य कृत्वा ब्राह्मणवाचनम् । (३।१)

सम्पूज्य चतुरो विप्राञ्शुक्लमाल्यानुलेपनैः ॥ (३।२)

पूर्वमेवोपरागस्य समासाद्यौषधादिकम् । (४।१)

स्थापयेच् चतुरः कुम्भानव्रणान्सागरानिति ॥ (४।२)

गजाश्वरथ्यावल्मीकसंगमाद्ध्रदगोकुलात् । (५।१)

राजद्वारप्रदेशाच्च मृदमानीय चाक्षिपेत् ॥ (५।२)

पञ्चगव्यं च कुम्भेषु शुद्धमुक्ताफलानि च । (६।१)

रोचनां पद्मशङ्खौ च पञ्चरत्नसमन्वितम् ॥ (६।२)

स्फटिकं चन्दनं श्वेतं तीर्थवारि ससर्षपम् । (७।१)

राजदन्तं सकुमुदं तथैवोशीरगुग्गुलम् । (७।२)

एतत्सर्वं विनिक्षिप्य कुम्भेष्वावाहयेत्सुरान् ॥ (७।३)

सर्वे समुद्राः सरितस्तीर्थानि जलदा नदाः । (८।१)

आयान्तु यजमानस्य दुरितक्षयकारकाः ॥ (८।२)

योऽसौ वज्रधरो देव आदित्यानां प्रभुर्मतः । (९।१)

सहस्रनयनश्चेन्द्रो ग्रहपीडां व्यपोहतु ॥ (९।२)

मुखं यः सर्वदेवानां सप्तार्चिरमितद्युतिः । (१०।१)

चन्द्रोपरागसम्भूतामग्निः पीडां व्यपोहतु ॥ (१०।२)

यः कर्मसाक्षी भूतानां धर्मो महिषवाहनः । (११।१)

यमश्चन्द्रोपरागोत्थां मम पीडां व्यपोहतु ॥ (११।२)

स रक्षोगणाधिपः साक्षात्प्रलयानलसंनिभः । (१२।१)

खड्गव्यग्रो ऽतिभीमश्च रक्षःपीडां व्यपोहतु ॥ (१२।२)

नागपाशधरो देवः साक्षान्मकरवाहनः । (१३।१)

स जलाधिपतिश् चन्द्रग्रहपीडां व्यपोहतु ॥ (१३।२)

प्राणरूपेण यो लोकान्पाति कृष्णमृगप्रियः । (१४।१)

वायुश्चन्द्रोपरागोत्थां पीडामत्र व्यपोहतु ॥ (१४।२)

योऽसौ निधिपतिर्देवः खड्गशूलगदाधरः । (१५।१)

चन्द्रोपरागकलुषं धनदो मे व्यपोहतु ॥ (१५।२)

योऽसाविन्दुधरो देवः पिनाकी वृषवाहनः । (१६।१)

चन्द्रोपरागजां पीडां विनाशयतु शंकरः ॥ (१६।२)

त्रैलोक्ये यानि भूतानि स्थावराणि चराणि च । (१७।१)

ब्रह्मविष्ण्वर्कयुक्तानि तानि पापं दहन्तु वै ॥ (१७।२)

एवमामन्त्र्य तैः कुम्भैरभिषिक्तो गुणान्वितैः । (१८।१)

ऋग्यजुःसाममन्त्रैश्च शुक्लमाल्यानुलेपनैः । (१८।२)

पूजयेद्वस्त्रगोदानैर्ब्राह्मणानिष्टदेवताः ॥ (१८।३)

एतानेव ततो मन्त्रान्विलिखेत् करकान्वितान् । (१९।१)

वस्त्रपट्टेऽथवा पद्मे पञ्चरत्नसमन्वितान् ॥ (१९।२)

यजमानस्य शिरसि निदध्युस्ते द्विजोत्तमाः । (२०।१)

ततोऽतिवाहयेद्वेलामुपरागानुगामिनीम् ॥ (२०।२)

प्राङ्मुखः पूजयित्वा तु नमस्यन्निष्टदेवताम् । (२१।१)

चन्द्रग्रहे विनिर्वृत्ते कृतगोदानमङ्गलः । (२१।२)

कृतस्नानाय तं पट्टं ब्राह्मणाय निवेदयेत् ॥ (२१।३)

अनेन विधिना यस्तु ग्रहस्नानं समाचरेत् । (२२।१)

न तस्य ग्रहपीडा स्यान्न च बन्धुजनक्षयः ॥ (२२।२)

परमां सिद्धिमाप्नोति पुनरावृत्तिदुर्लभाम् । (२३।१)

सूर्यग्रहे सूर्यनाम सदा मन्त्रेषु कीर्तयेत् ॥ (२३।२)

अधिकाः पद्मरागाः स्युः कपिलां च सुशोभनाम् । (२४।१)

प्रयच्छेच्च निशां पत्ये चन्द्रसूर्योपरागयोः ॥ (२४।२)

य इदं शृणुयान्नित्यं श्रावयेद्वापि मानवः । (२५।१)

सर्वपापविनिर्मुक्तः शक्रलोके महीयते ॥ (२५।२)