Devatā देवता

Dasyat

Ṛṣi ऋषि

Bhikṣu Āṅgirasa

Chandas छन्दस्

Triṣṭubh, Jagatī

1. Ṛk 1

   न वा उ॑ दे॒वाः क्षुध॒मिद्व॒धं द॑दुरु॒ताशि॑त॒मुप॑ गच्छंति मृ॒त्यवः॑ ।
   उ॒तो र॒यिः पृ॑ण॒तो नोप॑ दस्यत्यु॒तापृ॑णन्मर्डि॒तारं॒ न विं॑दते ॥

   न वा उ देवाः क्षुधम् इद् वधं ददुर् उताशितम् उप गच्छन्ति मृत्यवः |
   उतो रयिः पृणतो नोप दस्यत्य् उतापृणन् मर्डितारं न विन्दते ||

   ná vā́ u devā́ḥ kṣúdhamídvadhám dadurutā́śitamúpa gacchanti mṛtyávaḥ ǀ
   utó rayíḥ pṛṇató nópa dasyatyutā́pṛṇanmarḍitā́ram ná vindate ǁ

   na vā u devāḥ kṣudham id vadhaṃ dadur utāśitam upa gacchanti mṛtyavaḥ |
   uto rayiḥ pṛṇato nopa dasyaty utāpṛṇan marḍitāraṃ na vindate ||

   न । वै । ऊं॒ इति॑ । दे॒वाः । क्षुध॑म् । इत् । व॒धम् । द॒दुः॒ । उ॒त । आशि॑तम् । उप॑ । ग॒च्छ॒न्ति॒ । मृ॒त्यवः॑ ।
   उ॒तो इति॑ । र॒यिः । पृ॒ण॒तः । न । उप॑ । द॒स्य॒ति॒ । उ॒त । अपृ॑णन् । म॒र्डि॒तार॑म् । न । वि॒न्द॒ते॒ ॥

   न । वै । ऊं इति । देवाः । क्षुधम् । इत् । वधम् । ददुः । उत । आशितम् । उप । गच्छन्ति । मृत्यवः ।
   उतो इति । रयिः । पृणतः । न । उप । दस्यति । उत । अपृणन् । मर्डितारम् । न । विन्दते ॥

   ná ǀ vái ǀ ūṃ íti ǀ devā́ḥ ǀ kṣúdham ǀ ít ǀ vadhám ǀ daduḥ ǀ utá ǀ ā́śitam ǀ úpa ǀ gacchanti ǀ mṛtyávaḥ ǀ
   utó íti ǀ rayíḥ ǀ pṛṇatáḥ ǀ ná ǀ úpa ǀ dasyati ǀ utá ǀ ápṛṇan ǀ marḍitā́ram ǀ ná ǀ vindate ǁ

   na ǀ vai ǀ ūṃ iti ǀ devāḥ ǀ kṣudham ǀ it ǀ vadham ǀ daduḥ ǀ uta ǀ āśitam ǀ upa ǀ gacchanti ǀ mṛtyavaḥ ǀ
   uto iti ǀ rayiḥ ǀ pṛṇataḥ ǀ na ǀ upa ǀ dasyati ǀ uta ǀ apṛṇan ǀ marḍitāram ǀ na ǀ vindate ǁ

   10.117.1 Aṣṭaka 8.6.22.1Anuvāka 10.10.39Interpretations

2. Ṛk 2

   य आ॒ध्राय॑ चकमा॒नाय॑ पि॒त्वोऽन्न॑वा॒न्त्सन्र॑फि॒तायो॑पज॒ग्मुषे॑ ।
   स्थि॒रं मनः॑ कृणु॒ते सेव॑ते पु॒रोतो चि॒त्स म॑र्डि॒तारं॒ न विं॑दते ॥

   य आध्राय चकमानाय पित्वो ऽन्नवान् सन् रफितायोपजग्मुषे |
   स्थिरम् मनः कृणुते सेवते पुरोतो चित् स मर्डितारं न विन्दते ||

   yá ādhrā́ya cakamānā́ya pitvó’nnavāntsánraphitā́yopajagmúṣe ǀ
   sthirám mánaḥ kṛṇuté sévate purótó citsá marḍitā́ram ná vindate ǁ

   ya ādhrāya cakamānāya pitvo 'nnavān san raphitāyopajagmuṣe |
   sthiram manaḥ kṛṇute sevate puroto cit sa marḍitāraṃ na vindate ||

   यः । आ॒ध्राय॑ । च॒क॒मा॒नाय॑ । पि॒त्वः । अन्न॑ऽवान् । सन् । र॒फि॒ताय॑ । उ॒प॒ऽज॒ग्मुषे॑ ।
   स्थि॒रम् । मनः॑ । कृ॒णु॒ते । सेव॑ते । पु॒रा । उ॒तो इति॑ । चि॒त् । सः । म॒र्डि॒तार॑म् । न । वि॒न्द॒ते॒ ॥

   यः । आध्राय । चकमानाय । पित्वः । अन्नऽवान् । सन् । रफिताय । उपऽजग्मुषे ।
   स्थिरम् । मनः । कृणुते । सेवते । पुरा । उतो इति । चित् । सः । मर्डितारम् । न । विन्दते ॥

   yáḥ ǀ ādhrā́ya ǀ cakamānā́ya ǀ pitváḥ ǀ ánna-vān ǀ sán ǀ raphitā́ya ǀ upa-jagmúṣe ǀ
   sthirám ǀ mánaḥ ǀ kṛṇuté ǀ sévate ǀ purā́ ǀ utó íti ǀ cit ǀ sáḥ ǀ marḍitā́ram ǀ ná ǀ vindate ǁ

   yaḥ ǀ ādhrāya ǀ cakamānāya ǀ pitvaḥ ǀ anna-vān ǀ san ǀ raphitāya ǀ upa-jagmuṣe ǀ
   sthiram ǀ manaḥ ǀ kṛṇute ǀ sevate ǀ purā ǀ uto iti ǀ cit ǀ saḥ ǀ marḍitāram ǀ na ǀ vindate ǁ

   10.117.2 Aṣṭaka 8.6.22.2Anuvāka 10.10.40Interpretations

3. Ṛk 3

   स इद्भो॒जो यो गृ॒हवे॒ ददा॒त्यन्न॑कामाय॒ चर॑ते कृ॒शाय॑ ।
   अर॑मस्मै भवति॒ याम॑हूता उ॒ताप॒रीषु॑ कृणुते॒ सखा॑यं ॥

   स इद् भोजो यो गृहवे ददात्य् अन्नकामाय चरते कृशाय |
   अरम् अस्मै भवति यामहूता उतापरीषु कृणुते सखायम् ||

   sá ídbhojó yó gṛháve dádātyánnakāmāya cárate kṛśā́ya ǀ
   áramasmai bhavati yā́mahūtā utā́parī́ṣu kṛṇute sákhāyam ǁ

   sa id bhojo yo gṛhave dadāty annakāmāya carate kṛśāya |
   aram asmai bhavati yāmahūtā utāparīṣu kṛṇute sakhāyam ||

   सः । इत् । भो॒जः । यः । गृ॒हवे॑ । ददा॑ति । अन्न॑ऽकामाय । चर॑ते । कृ॒शाय॑ ।
   अर॑म् । अ॒स्मै॒ । भ॒व॒ति॒ । याम॑ऽहूतौ । उ॒त । अ॒प॒रीषु॑ । कृ॒णु॒ते॒ । सखा॑यम् ॥

   सः । इत् । भोजः । यः । गृहवे । ददाति । अन्नऽकामाय । चरते । कृशाय ।
   अरम् । अस्मै । भवति । यामऽहूतौ । उत । अपरीषु । कृणुते । सखायम् ॥

   sáḥ ǀ ít ǀ bhojáḥ ǀ yáḥ ǀ gṛháve ǀ dádāti ǀ ánna-kāmāya ǀ cárate ǀ kṛśā́ya ǀ
   áram ǀ asmai ǀ bhavati ǀ yā́ma-hūtau ǀ utá ǀ aparī́ṣu ǀ kṛṇute ǀ sákhāyam ǁ

   saḥ ǀ it ǀ bhojaḥ ǀ yaḥ ǀ gṛhave ǀ dadāti ǀ anna-kāmāya ǀ carate ǀ kṛśāya ǀ
   aram ǀ asmai ǀ bhavati ǀ yāma-hūtau ǀ uta ǀ aparīṣu ǀ kṛṇute ǀ sakhāyam ǁ

   10.117.3 Aṣṭaka 8.6.22.3Anuvāka 10.10.41Interpretations

4. Ṛk 4

   न स सखा॒ यो न ददा॑ति॒ सख्ये॑ सचा॒भुवे॒ सच॑मानाय पि॒त्वः ।
   अपा॑स्मा॒त्प्रेया॒न्न तदोको॑ अस्ति पृ॒णंत॑म॒न्यमर॑णं चिदिच्छेत् ॥

   न स सखा यो न ददाति सख्ये सचाभुवे सचमानाय पित्वः |
   अपास्मात् प्रेयान् न तद् ओको अस्ति पृणन्तम् अन्यम् अरणं चिद् इच्छेत् ||

   ná sá sákhā yó ná dádāti sákhye sacābhúve sácamānāya pitváḥ ǀ
   ápāsmātpréyānná tádóko asti pṛṇántamanyámáraṇam cidicchet ǁ

   na sa sakhā yo na dadāti sakhye sacābhuve sacamānāya pitvaḥ |
   apāsmāt preyān na tad oko asti pṛṇantam anyam araṇaṃ cid icchet ||

   न । सः । सखा॑ । यः । न । ददा॑ति । सख्ये॑ । स॒चा॒ऽभुवे॑ । सच॑मानाय । पि॒त्वः ।
   अप॑ । अ॒स्मा॒त् । प्र । इ॒या॒त् । न । तत् । ओकः॑ । अ॒स्ति॒ । पृ॒णन्त॑म् । अ॒न्यम् । अर॑णम् । चि॒त् । इ॒च्छे॒त् ॥

   न । सः । सखा । यः । न । ददाति । सख्ये । सचाऽभुवे । सचमानाय । पित्वः ।
   अप । अस्मात् । प्र । इयात् । न । तत् । ओकः । अस्ति । पृणन्तम् । अन्यम् । अरणम् । चित् । इच्छेत् ॥

   ná ǀ sáḥ ǀ sákhā ǀ yáḥ ǀ ná ǀ dádāti ǀ sákhye ǀ sacā-bhúve ǀ sácamānāya ǀ pitváḥ ǀ
   ápa ǀ asmāt ǀ prá ǀ iyāt ǀ ná ǀ tát ǀ ókaḥ ǀ asti ǀ pṛṇántam ǀ anyám ǀ áraṇam ǀ cit ǀ icchet ǁ

   na ǀ saḥ ǀ sakhā ǀ yaḥ ǀ na ǀ dadāti ǀ sakhye ǀ sacā-bhuve ǀ sacamānāya ǀ pitvaḥ ǀ
   apa ǀ asmāt ǀ pra ǀ iyāt ǀ na ǀ tat ǀ okaḥ ǀ asti ǀ pṛṇantam ǀ anyam ǀ araṇam ǀ cit ǀ icchet ǁ

   10.117.4 Aṣṭaka 8.6.22.4Anuvāka 10.10.42Interpretations

5. Ṛk 5

   पृ॒णी॒यादिन्नाध॑मानाय॒ तव्यां॒द्राघी॑यांस॒मनु॑ पश्येत॒ पंथां॑ ।
   ओ हि वर्तं॑ते॒ रथ्ये॑व च॒क्रान्यम॑न्य॒मुप॑ तिष्ठंत॒ रायः॑ ॥

   पृणीयाद् इन् नाधमानाय तव्यान् द्राघीयांसम् अनु पश्येत पन्थाम् |
   ओ हि वर्तन्ते रथ्येव चक्रान्यम्-अन्यम् उप तिष्ठन्त रायः ||

   pṛṇīyā́dínnā́dhamānāya távyāndrā́ghīyāṃsamánu paśyeta pánthām ǀ
   ó hí vártante ráthyeva cakrā́nyámanyamúpa tiṣṭhanta rā́yaḥ ǁ

   pṛṇīyād in nādhamānāya tavyān drāghīyāṃsam anu paśyeta panthām |
   o hi vartante rathyeva cakrānyam-anyam upa tiṣṭhanta rāyaḥ ||

   पृ॒णी॒यात् । इत् । नाध॑मानाय । तव्या॑न् । द्राघी॑यांसम् । अनु॑ । प॒श्ये॒त॒ । पन्था॑म् ।
   ओ इति॑ । हि । वर्त॑न्ते । रथ्या॑ऽइव । च॒क्रा । अ॒न्यम्ऽअ॑न्यम् । उप॑ । ति॒ष्ठ॒न्त॒ । रायः॑ ॥

   पृणीयात् । इत् । नाधमानाय । तव्यान् । द्राघीयांसम् । अनु । पश्येत । पन्थाम् ।
   ओ इति । हि । वर्तन्ते । रथ्याऽइव । चक्रा । अन्यम्ऽअन्यम् । उप । तिष्ठन्त । रायः ॥

   pṛṇīyā́t ǀ ít ǀ nā́dhamānāya ǀ távyān ǀ drā́ghīyāṃsam ǀ ánu ǀ paśyeta ǀ pánthām ǀ
   ó íti ǀ hí ǀ vártante ǀ ráthyā-iva ǀ cakrā́ ǀ anyám-anyam ǀ úpa ǀ tiṣṭhanta ǀ rā́yaḥ ǁ

   pṛṇīyāt ǀ it ǀ nādhamānāya ǀ tavyān ǀ drāghīyāṃsam ǀ anu ǀ paśyeta ǀ panthām ǀ
   o iti ǀ hi ǀ vartante ǀ rathyā-iva ǀ cakrā ǀ anyam-anyam ǀ upa ǀ tiṣṭhanta ǀ rāyaḥ ǁ

   10.117.5 Aṣṭaka 8.6.22.5Anuvāka 10.10.43Interpretations

6. Ṛk 6

   मोघ॒मन्नं॑ विंदते॒ अप्र॑चेताः स॒त्यं ब्र॑वीमि व॒ध इत्स तस्य॑ ।
   नार्य॒मणं॒ पुष्य॑ति॒ नो सखा॑यं॒ केव॑लाघो भवति केवला॒दी ॥

   मोघम् अन्नं विन्दते अप्रचेताः सत्यम् ब्रवीमि वध इत् स तस्य |
   नार्यमणम् पुष्यति नो सखायं केवलाघो भवति केवलादी ||

   móghamánnam vindate ápracetāḥ satyám bravīmi vadhá ítsá tásya ǀ
   nā́ryamáṇam púṣyati nó sákhāyam kévalāgho bhavati kevalādī́ ǁ

   mogham annaṃ vindate apracetāḥ satyam bravīmi vadha it sa tasya |
   nāryamaṇam puṣyati no sakhāyaṃ kevalāgho bhavati kevalādī ||

   मोघ॑म् । अन्न॑म् । वि॒न्द॒ते॒ । अप्र॑ऽचेताः । स॒त्यम् । ब्र॒वी॒मि॒ । व॒धः । इत् । सः । तस्य॑ ।
   न । अ॒र्य॒मण॑म् । पुष्य॑ति । नो इति॑ । सखा॑यम् । केव॑लऽअघः । भ॒व॒ति॒ । के॒व॒ल॒ऽआ॒दी ॥

   मोघम् । अन्नम् । विन्दते । अप्रऽचेताः । सत्यम् । ब्रवीमि । वधः । इत् । सः । तस्य ।
   न । अर्यमणम् । पुष्यति । नो इति । सखायम् । केवलऽअघः । भवति । केवलऽआदी ॥

   mógham ǀ ánnam ǀ vindate ǀ ápra-cetāḥ ǀ satyám ǀ bravīmi ǀ vadháḥ ǀ ít ǀ sáḥ ǀ tásya ǀ
   ná ǀ aryamáṇam ǀ púṣyati ǀ nó íti ǀ sákhāyam ǀ kévala-aghaḥ ǀ bhavati ǀ kevala-ādī́ ǁ

   mogham ǀ annam ǀ vindate ǀ apra-cetāḥ ǀ satyam ǀ bravīmi ǀ vadhaḥ ǀ it ǀ saḥ ǀ tasya ǀ
   na ǀ aryamaṇam ǀ puṣyati ǀ no iti ǀ sakhāyam ǀ kevala-aghaḥ ǀ bhavati ǀ kevala-ādī ǁ

   10.117.6 Aṣṭaka 8.6.23.1Anuvāka 10.10.44Interpretations

7. Ṛk 7

   कृ॒षन्नित्फाल॒ आशि॑तं कृणोति॒ यन्नध्वा॑न॒मप॑ वृंक्ते च॒रित्रैः॑ ।
   वद॑न्ब्र॒ह्माव॑दतो॒ वनी॑यान्पृ॒णन्ना॒पिरपृ॑णंतम॒भि ष्या॑त् ॥

   कृषन्न् इत् फाल आशितं कृणोति यन्न् अध्वानम् अप वृङ्क्ते चरित्रैः |
   वदन् ब्रह्मावदतो वनीयान् पृणन्न् आपिर् अपृणन्तम् अभि ष्यात् ||

   kṛṣánnítphā́la ā́śitam kṛṇoti yánnádhvānamápa vṛṅkte carítraiḥ ǀ
   vádanbrahmā́vadato vánīyānpṛṇánnāpírápṛṇantamabhí ṣyāt ǁ

   kṛṣann it phāla āśitaṃ kṛṇoti yann adhvānam apa vṛṅkte caritraiḥ |
   vadan brahmāvadato vanīyān pṛṇann āpir apṛṇantam abhi ṣyāt ||

   कृ॒षन् । इत् । फालः॑ । आशि॑तम् । कृ॒णो॒ति॒ । यन् । अध्वा॑नम् । अप॑ । वृ॒ङ्क्ते॒ । च॒रित्रैः॑ ।
   वद॑न् । ब्र॒ह्मा । अव॑दतः । वनी॑यान् । पृ॒णन् । आ॒पिः । अपृ॑णन्तम् । अ॒भि । स्या॒त् ॥

   कृषन् । इत् । फालः । आशितम् । कृणोति । यन् । अध्वानम् । अप । वृङ्क्ते । चरित्रैः ।
   वदन् । ब्रह्मा । अवदतः । वनीयान् । पृणन् । आपिः । अपृणन्तम् । अभि । स्यात् ॥

   kṛṣán ǀ ít ǀ phā́laḥ ǀ ā́śitam ǀ kṛṇoti ǀ yán ǀ ádhvānam ǀ ápa ǀ vṛṅkte ǀ carítraiḥ ǀ
   vádan ǀ brahmā́ ǀ ávadataḥ ǀ vánīyān ǀ pṛṇán ǀ āpíḥ ǀ ápṛṇantam ǀ abhí ǀ syāt ǁ

   kṛṣan ǀ it ǀ phālaḥ ǀ āśitam ǀ kṛṇoti ǀ yan ǀ adhvānam ǀ apa ǀ vṛṅkte ǀ caritraiḥ ǀ
   vadan ǀ brahmā ǀ avadataḥ ǀ vanīyān ǀ pṛṇan ǀ āpiḥ ǀ apṛṇantam ǀ abhi ǀ syāt ǁ

   10.117.7 Aṣṭaka 8.6.23.2Anuvāka 10.10.45Interpretations

8. Ṛk 8

   एक॑पा॒द्भूयो॑ द्वि॒पदो॒ वि च॑क्रमे द्वि॒पात्त्रि॒पाद॑म॒भ्ये॑ति प॒श्चात् ।
   चतु॑ष्पादेति द्वि॒पदा॑मभिस्व॒रे सं॒पश्य॑न्पं॒क्तीरु॑प॒तिष्ठ॑मानः ॥

   एकपाद् भूयो द्विपदो वि चक्रमे द्विपात् त्रिपादम् अभ्य् एति पश्चात् |
   चतुष्पाद् एति द्विपदाम् अभिस्वरे सम्पश्यन् पङ्क्तीर् उपतिष्ठमानः ||

   ékapādbhū́yo dvipádo ví cakrame dvipā́ttripā́damabhyéti paścā́t ǀ
   cátuṣpādeti dvipádāmabhisvaré sampáśyanpaṅktī́rupatíṣṭhamānaḥ ǁ

   ekapād bhūyo dvipado vi cakrame dvipāt tripādam abhy eti paścāt |
   catuṣpād eti dvipadām abhisvare sampaśyan paṅktīr upatiṣṭhamānaḥ ||

   एक॑ऽपात् । भूयः॑ । द्वि॒ऽपदः॑ । वि । च॒क्र॒मे॒ । द्वि॒ऽपात् । त्रि॒ऽपाद॑म् । अ॒भि । ए॒ति॒ । प॒श्चात् ।
   चतुः॑ऽपात् । ए॒ति॒ । द्वि॒ऽपदा॑म् । अ॒भि॒ऽस्व॒रे । स॒म्ऽपश्य॑न् । प॒ङ्क्तीः । उ॒प॒ऽतिष्ठ॑मानः ॥

   एकऽपात् । भूयः । द्विऽपदः । वि । चक्रमे । द्विऽपात् । त्रिऽपादम् । अभि । एति । पश्चात् ।
   चतुःऽपात् । एति । द्विऽपदाम् । अभिऽस्वरे । सम्ऽपश्यन् । पङ्क्तीः । उपऽतिष्ठमानः ॥

   éka-pāt ǀ bhū́yaḥ ǀ dvi-pádaḥ ǀ ví ǀ cakrame ǀ dvi-pā́t ǀ tri-pā́dam ǀ abhí ǀ eti ǀ paścā́t ǀ
   cátuḥ-pāt ǀ eti ǀ dvi-pádām ǀ abhi-svaré ǀ sam-páśyan ǀ paṅktī́ḥ ǀ upa-tíṣṭhamānaḥ ǁ

   eka-pāt ǀ bhūyaḥ ǀ dvi-padaḥ ǀ vi ǀ cakrame ǀ dvi-pāt ǀ tri-pādam ǀ abhi ǀ eti ǀ paścāt ǀ
   catuḥ-pāt ǀ eti ǀ dvi-padām ǀ abhi-svare ǀ sam-paśyan ǀ paṅktīḥ ǀ upa-tiṣṭhamānaḥ ǁ

   10.117.8 Aṣṭaka 8.6.23.3Anuvāka 10.10.46Interpretations

9. Ṛk 9

   स॒मौ चि॒द्धस्तौ॒ न स॒मं वि॑विष्टः सम्मा॒तरा॑ चि॒न्न स॒मं दु॑हाते ।
   य॒मयो॑श्चि॒न्न स॒मा वी॒र्या॑णि ज्ञा॒ती चि॒त्संतौ॒ न स॒मं पृ॑णीतः ॥

   समौ चिद् धस्तौ न समं विविष्टः सम्मातरा चिन् न समं दुहाते |
   यमयोश् चिन् न समा वीर्याणि ज्ञाती चित् सन्तौ न समम् पृणीतः ||

   samáu ciddhástau ná samám viviṣṭaḥ sammātárā cinná samám duhāte ǀ
   yamáyościnná samā́ vīryā́ṇi jñātī́ citsántau ná samám pṛṇītaḥ ǁ

   samau cid dhastau na samaṃ viviṣṭaḥ sammātarā cin na samaṃ duhāte |
   yamayoś cin na samā vīryāṇi jñātī cit santau na samam pṛṇītaḥ ||

   स॒मौ । चि॒त् । हस्तौ॑ । न । स॒मम् । वि॒वि॒ष्टः॒ । स॒म्ऽमा॒तरा॑ । चि॒त् । न । स॒मम् । दु॒हा॒ते॒ इति॑ ।
   य॒मयोः॑ । चि॒त् । न । स॒मा । वी॒र्या॑णि । ज्ञा॒ती इति॑ । चि॒त् । सन्तौ॑ । न । स॒मम् । पृ॒णी॒तः॒ ॥

   समौ । चित् । हस्तौ । न । समम् । विविष्टः । सम्ऽमातरा । चित् । न । समम् । दुहाते इति ।
   यमयोः । चित् । न । समा । वीर्याणि । ज्ञाती इति । चित् । सन्तौ । न । समम् । पृणीतः ॥

   samáu ǀ cit ǀ hástau ǀ ná ǀ samám ǀ viviṣṭaḥ ǀ sam-mātárā ǀ cit ǀ ná ǀ samám ǀ duhāte íti ǀ
   yamáyoḥ ǀ cit ǀ ná ǀ samā́ ǀ vīryā́ṇi ǀ jñātī́ íti ǀ cit ǀ sántau ǀ ná ǀ samám ǀ pṛṇītaḥ ǁ

   samau ǀ cit ǀ hastau ǀ na ǀ samam ǀ viviṣṭaḥ ǀ sam-mātarā ǀ cit ǀ na ǀ samam ǀ duhāte iti ǀ
   yamayoḥ ǀ cit ǀ na ǀ samā ǀ vīryāṇi ǀ jñātī iti ǀ cit ǀ santau ǀ na ǀ samam ǀ pṛṇītaḥ ǁ

   10.117.9 Aṣṭaka 8.6.23.4Anuvāka 10.10.47Interpretations

Text, recitation and interpretations from the Ṛgveda database of theveda.org.in.