Devatā देवता

Agni

Ṛṣi ऋषि

Vatsaprī Bhālandana

Chandas छन्दस्

Triṣṭubh

1. Ṛk 1

   दि॒वस्परि॑ प्रथ॒मं ज॑ज्ञे अ॒ग्निर॒स्मद्द्वि॒तीयं॒ परि॑ जा॒तवे॑दाः ।
   तृ॒तीय॑म॒प्सु नृ॒मणा॒ अज॑स्र॒मिंधा॑न एनं जरते स्वा॒धीः ॥

   दिवस् परि प्रथमं जज्ञे अग्निर् अस्मद् द्वितीयम् परि जातवेदाः |
   तृतीयम् अप्सु नृमणा अजस्रम् इन्धान एनं जरते स्वाधीः ||

   diváspári prathamám jajñe agnírasmáddvitī́yam pári jātávedāḥ ǀ
   tṛtī́yamapsú nṛmáṇā ájasramíndhāna enam jarate svādhī́ḥ ǁ

   divas pari prathamaṃ jajñe agnir asmad dvitīyam pari jātavedāḥ |
   tṛtīyam apsu nṛmaṇā ajasram indhāna enaṃ jarate svādhīḥ ||

   दि॒वः । परि॑ । प्र॒थ॒मम् । ज॒ज्ञे॒ । अ॒ग्निः । अ॒स्मत् । द्वि॒तीय॑म् । परि॑ । जा॒तऽवे॑दाः ।
   तृ॒तीय॑म् । अ॒प्ऽसु । नृ॒ऽमनाः॑ । अज॑स्रम् । इन्धा॑नः । ए॒न॒म् । ज॒र॒ते॒ । सु॒ऽआ॒धीः ॥

   दिवः । परि । प्रथमम् । जज्ञे । अग्निः । अस्मत् । द्वितीयम् । परि । जातऽवेदाः ।
   तृतीयम् । अप्ऽसु । नृऽमनाः । अजस्रम् । इन्धानः । एनम् । जरते । सुऽआधीः ॥

   diváḥ ǀ pári ǀ prathamám ǀ jajñe ǀ agníḥ ǀ asmát ǀ dvitī́yam ǀ pári ǀ jātá-vedāḥ ǀ
   tṛtī́yam ǀ ap-sú ǀ nṛ-mánāḥ ǀ ájasram ǀ índhānaḥ ǀ enam ǀ jarate ǀ su-ādhī́ḥ ǁ

   divaḥ ǀ pari ǀ prathamam ǀ jajñe ǀ agniḥ ǀ asmat ǀ dvitīyam ǀ pari ǀ jāta-vedāḥ ǀ
   tṛtīyam ǀ ap-su ǀ nṛ-manāḥ ǀ ajasram ǀ indhānaḥ ǀ enam ǀ jarate ǀ su-ādhīḥ ǁ

   10.45.1 Aṣṭaka 7.8.28.1Anuvāka 10.4.23Interpretations

2. Ṛk 2

   वि॒द्मा ते॑ अग्ने त्रे॒धा त्र॒याणि॑ वि॒द्मा ते॒ धाम॒ विभृ॑ता पुरु॒त्रा ।
   वि॒द्मा ते॒ नाम॑ पर॒मं गुहा॒ यद्वि॒द्मा तमुत्सं॒ यत॑ आज॒गंथ॑ ॥

   विद्मा ते अग्ने त्रेधा त्रयाणि विद्मा ते धाम विभृता पुरुत्रा |
   विद्मा ते नाम परमं गुहा यद् विद्मा तम् उत्सं यत आजगन्थ ||

   vidmā́ te agne tredhā́ trayā́ṇi vidmā́ te dhā́ma víbhṛtā purutrā́ ǀ
   vidmā́ te nā́ma paramám gúhā yádvidmā́ támútsam yáta ājagántha ǁ

   vidmā te agne tredhā trayāṇi vidmā te dhāma vibhṛtā purutrā |
   vidmā te nāma paramaṃ guhā yad vidmā tam utsaṃ yata ājagantha ||

   वि॒द्म । ते॒ । अ॒ग्ने॒ । त्रे॒धा । त्र॒याणि॑ । वि॒द्म । ते॒ । धाम॑ । विऽभृ॑ता । पु॒रु॒ऽत्रा ।
   वि॒द्म । ते॒ । नाम॑ । प॒र॒मम् । गुहा॑ । यत् । वि॒द्म । तम् । उत्स॑म् । यतः॑ । आ॒ऽज॒गन्थ॑ ॥

   विद्म । ते । अग्ने । त्रेधा । त्रयाणि । विद्म । ते । धाम । विऽभृता । पुरुऽत्रा ।
   विद्म । ते । नाम । परमम् । गुहा । यत् । विद्म । तम् । उत्सम् । यतः । आऽजगन्थ ॥

   vidmá ǀ te ǀ agne ǀ tredhā́ ǀ trayā́ṇi ǀ vidmá ǀ te ǀ dhā́ma ǀ ví-bhṛtā ǀ puru-trā́ ǀ
   vidmá ǀ te ǀ nā́ma ǀ paramám ǀ gúhā ǀ yát ǀ vidmá ǀ tám ǀ útsam ǀ yátaḥ ǀ ā-jagántha ǁ

   vidma ǀ te ǀ agne ǀ tredhā ǀ trayāṇi ǀ vidma ǀ te ǀ dhāma ǀ vi-bhṛtā ǀ puru-trā ǀ
   vidma ǀ te ǀ nāma ǀ paramam ǀ guhā ǀ yat ǀ vidma ǀ tam ǀ utsam ǀ yataḥ ǀ ā-jagantha ǁ

   10.45.2 Aṣṭaka 7.8.28.2Anuvāka 10.4.24Interpretations

3. Ṛk 3

   स॒मु॒द्रे त्वा॑ नृ॒मणा॑ अ॒प्स्वं१॒॑तर्नृ॒चक्षा॑ ईधे दि॒वो अ॑ग्न॒ ऊध॑न् ।
   तृ॒तीये॑ त्वा॒ रज॑सि तस्थि॒वांस॑म॒पामु॒पस्थे॑ महि॒षा अ॑वर्धन् ॥

   समुद्रे त्वा नृमणा अप्स्व् अन्तर् नृचक्षा ईधे दिवो अग्न ऊधन् |
   तृतीये त्वा रजसि तस्थिवांसम् अपाम् उपस्थे महिषा अवर्धन् ||

   samudré tvā nṛmáṇā apsvántárnṛcákṣā īdhe divó agna ū́dhan ǀ
   tṛtī́ye tvā rájasi tasthivā́ṃsamapā́mupásthe mahiṣā́ avardhan ǁ

   samudre tvā nṛmaṇā apsv antar nṛcakṣā īdhe divo agna ūdhan |
   tṛtīye tvā rajasi tasthivāṃsam apām upasthe mahiṣā avardhan ||

   स॒मु॒द्रे । त्वा॒ । नृ॒ऽमनाः॑ । अ॒प्ऽसु । अ॒न्तः । नृ॒ऽचक्षाः॑ । ई॒धे॒ । दि॒वः । अ॒ग्ने॒ । ऊध॑न् ।
   तृ॒तीये॑ । त्वा॒ । रज॑सि । त॒स्थि॒ऽवांस॑म् । अ॒पाम् । उ॒पऽस्थे॑ । म॒हि॒षाः । अ॒व॒र्ध॒न् ॥

   समुद्रे । त्वा । नृऽमनाः । अप्ऽसु । अन्तः । नृऽचक्षाः । ईधे । दिवः । अग्ने । ऊधन् ।
   तृतीये । त्वा । रजसि । तस्थिऽवांसम् । अपाम् । उपऽस्थे । महिषाः । अवर्धन् ॥

   samudré ǀ tvā ǀ nṛ-mánāḥ ǀ ap-sú ǀ antáḥ ǀ nṛ-cákṣāḥ ǀ īdhe ǀ diváḥ ǀ agne ǀ ū́dhan ǀ
   tṛtī́ye ǀ tvā ǀ rájasi ǀ tasthi-vā́ṃsam ǀ apā́m ǀ upá-sthe ǀ mahiṣā́ḥ ǀ avardhan ǁ

   samudre ǀ tvā ǀ nṛ-manāḥ ǀ ap-su ǀ antaḥ ǀ nṛ-cakṣāḥ ǀ īdhe ǀ divaḥ ǀ agne ǀ ūdhan ǀ
   tṛtīye ǀ tvā ǀ rajasi ǀ tasthi-vāṃsam ǀ apām ǀ upa-sthe ǀ mahiṣāḥ ǀ avardhan ǁ

   10.45.3 Aṣṭaka 7.8.28.3Anuvāka 10.4.25Interpretations

4. Ṛk 4

   अक्रं॑दद॒ग्निः स्त॒नय॑न्निव॒ द्यौः क्षामा॒ रेरि॑हद्वी॒रुधः॑ समं॒जन् ।
   स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्यं॒तः ॥

   अक्रन्दद् अग्नि स्तनयन्न् इव द्यौः क्षामा रेरिहद् वीरुधः समञ्जन् |
   सद्यो जज्ञानो वि हीम् इद्धो अख्यद् आ रोदसी भानुना भात्य् अन्तः ||

   ákrandadagníḥ stanáyanniva dyáuḥ kṣā́mā rérihadvīrúdhaḥ samañján ǀ
   sadyó jajñānó ví hī́middhó ákhyadā́ ródasī bhānúnā bhātyantáḥ ǁ

   akrandad agni stanayann iva dyauḥ kṣāmā rerihad vīrudhaḥ samañjan |
   sadyo jajñāno vi hīm iddho akhyad ā rodasī bhānunā bhāty antaḥ ||

   अक्र॑न्दत् । अ॒ग्निः । स्त॒नय॑न्ऽइव । द्यौः । क्षाम॑ । रेरि॑हत् । वी॒रुधः॑ । स॒म्ऽअ॒ञ्जन् ।
   स॒द्यः । ज॒ज्ञा॒नः । वि । हि । ई॒म् । इ॒द्धः । अख्य॑त् । आ । रोद॑सी॒ इति॑ । भा॒नुना॑ । भा॒ति॒ । अ॒न्तरिति॑ ॥

   अक्रन्दत् । अग्निः । स्तनयन्ऽइव । द्यौः । क्षाम । रेरिहत् । वीरुधः । सम्ऽअञ्जन् ।
   सद्यः । जज्ञानः । वि । हि । ईम् । इद्धः । अख्यत् । आ । रोदसी इति । भानुना । भाति । अन्तरिति ॥

   ákrandat ǀ agníḥ ǀ stanáyan-iva ǀ dyáuḥ ǀ kṣā́ma ǀ rérihat ǀ vīrúdhaḥ ǀ sam-añján ǀ
   sadyáḥ ǀ jajñānáḥ ǀ ví ǀ hí ǀ īm ǀ iddháḥ ǀ ákhyat ǀ ā́ ǀ ródasī íti ǀ bhānúnā ǀ bhāti ǀ antáríti ǁ

   akrandat ǀ agniḥ ǀ stanayan-iva ǀ dyauḥ ǀ kṣāma ǀ rerihat ǀ vīrudhaḥ ǀ sam-añjan ǀ
   sadyaḥ ǀ jajñānaḥ ǀ vi ǀ hi ǀ īm ǀ iddhaḥ ǀ akhyat ǀ ā ǀ rodasī iti ǀ bhānunā ǀ bhāti ǀ antariti ǁ

   10.45.4 Aṣṭaka 7.8.28.4Anuvāka 10.4.26Interpretations

5. Ṛk 5

   श्री॒णामु॑दा॒रो ध॒रुणो॑ रयी॒णां म॑नी॒षाणां॒ प्रार्प॑णः॒ सोम॑गोपाः ।
   वसुः॑ सू॒नुः सह॑सो अ॒प्सु राजा॒ वि भा॒त्यग्र॑ उ॒षसा॑मिधा॒नः ॥

   श्रीणाम् उदारो धरुणो रयीणाम् मनीषाणाम् प्रार्पणः सोमगोपाः |
   वसुः सूनुः सहसो अप्सु राजा वि भात्य् अग्र उषसाम् इधानः ||

   śrīṇā́mudāró dharúṇo rayīṇā́m manīṣā́ṇām prā́rpaṇaḥ sómagopāḥ ǀ
   vásuḥ sūnúḥ sáhaso apsú rā́jā ví bhātyágra uṣásāmidhānáḥ ǁ

   śrīṇām udāro dharuṇo rayīṇām manīṣāṇām prārpaṇaḥ somagopāḥ |
   vasuḥ sūnuḥ sahaso apsu rājā vi bhāty agra uṣasām idhānaḥ ||

   श्री॒णाम् । उ॒त्ऽआ॒रः । ध॒रुणः॑ । र॒यी॒णाम् । म॒नी॒षाणा॑म् । प्र॒ऽअर्प॑णः । सोम॑ऽगोपाः ।
   वसुः॑ । सू॒नुः । सह॑सः । अ॒प्ऽसु । राजा॑ । वि । भा॒ति॒ । अग्रे॑ । उ॒षसा॑म् । इ॒धा॒नः ॥

   श्रीणाम् । उत्ऽआरः । धरुणः । रयीणाम् । मनीषाणाम् । प्रऽअर्पणः । सोमऽगोपाः ।
   वसुः । सूनुः । सहसः । अप्ऽसु । राजा । वि । भाति । अग्रे । उषसाम् । इधानः ॥

   śrīṇā́m ǀ ut-āráḥ ǀ dharúṇaḥ ǀ rayīṇā́m ǀ manīṣā́ṇām ǀ pra-árpaṇaḥ ǀ sóma-gopāḥ ǀ
   vásuḥ ǀ sūnúḥ ǀ sáhasaḥ ǀ ap-sú ǀ rā́jā ǀ ví ǀ bhāti ǀ ágre ǀ uṣásām ǀ idhānáḥ ǁ

   śrīṇām ǀ ut-āraḥ ǀ dharuṇaḥ ǀ rayīṇām ǀ manīṣāṇām ǀ pra-arpaṇaḥ ǀ soma-gopāḥ ǀ
   vasuḥ ǀ sūnuḥ ǀ sahasaḥ ǀ ap-su ǀ rājā ǀ vi ǀ bhāti ǀ agre ǀ uṣasām ǀ idhānaḥ ǁ

   10.45.5 Aṣṭaka 7.8.28.5Anuvāka 10.4.27Interpretations

6. Ṛk 6

   विश्व॑स्य के॒तुर्भुव॑नस्य॒ गर्भ॒ आ रोद॑सी अपृणा॒ज्जाय॑मानः ।
   वी॒ळुं चि॒दद्रि॑मभिनत्परा॒यंजना॒ यद॒ग्निमय॑जंत॒ पंच॑ ॥

   विश्वस्य केतुर् भुवनस्य गर्भ आ रोदसी अपृणाज् जायमानः |
   वीऌउं चिद् अद्रिम् अभिनत् परायञ् जना यद् अग्निम् अयजन्त पञ्च ||

   víśvasya ketúrbhúvanasya gárbha ā́ ródasī apṛṇājjā́yamānaḥ ǀ
   vīḷúm cidádrimabhinatparāyáñjánā yádagnímáyajanta páñca ǁ

   viśvasya ketur bhuvanasya garbha ā rodasī apṛṇāj jāyamānaḥ |
   vīḷuṃ cid adrim abhinat parāyañ janā yad agnim ayajanta pañca ||

   विश्व॑स्य । के॒तुः । भुव॑नस्य । गर्भः॑ । आ । रोद॑सी॒ इति॑ । अ॒पृ॒णा॒त् । जाय॑मानः ।
   वी॒ळुम् । चि॒त् । अद्रि॑म् । अ॒भि॒न॒त् । प॒रा॒ऽयन् । जनाः॑ । यत् । अ॒ग्निम् । अय॑जन्त । पञ्च॑ ॥

   विश्वस्य । केतुः । भुवनस्य । गर्भः । आ । रोदसी इति । अपृणात् । जायमानः ।
   वीळुम् । चित् । अद्रिम् । अभिनत् । पराऽयन् । जनाः । यत् । अग्निम् । अयजन्त । पञ्च ॥

   víśvasya ǀ ketúḥ ǀ bhúvanasya ǀ gárbhaḥ ǀ ā́ ǀ ródasī íti ǀ apṛṇāt ǀ jā́yamānaḥ ǀ
   vīḷúm ǀ cit ǀ ádrim ǀ abhinat ǀ parā-yán ǀ jánāḥ ǀ yát ǀ agním ǀ áyajanta ǀ páñca ǁ

   viśvasya ǀ ketuḥ ǀ bhuvanasya ǀ garbhaḥ ǀ ā ǀ rodasī iti ǀ apṛṇāt ǀ jāyamānaḥ ǀ
   vīḷum ǀ cit ǀ adrim ǀ abhinat ǀ parā-yan ǀ janāḥ ǀ yat ǀ agnim ǀ ayajanta ǀ pañca ǁ

   10.45.6 Aṣṭaka 7.8.28.6Anuvāka 10.4.28Interpretations

7. Ṛk 7

   उ॒शिक्पा॑व॒को अ॑र॒तिः सु॑मे॒धा मर्ते॑ष्व॒ग्निर॒मृतो॒ नि धा॑यि ।
   इय॑र्ति धू॒मम॑रु॒षं भरि॑भ्र॒दुच्छु॒क्रेण॑ शो॒चिषा॒ द्यामिन॑क्षन् ॥

   उशिक् पावको अरतिः सुमेधा मर्तेष्व् अग्निर् अमृतो नि धायि |
   इयर्ति धूमम् अरुषम् भरिभ्रद् उच् छुक्रेण शोचिषा द्याम् इनक्षन् ||

   uśíkpāvakó aratíḥ sumedhā́ márteṣvagníramṛ́to ní dhāyi ǀ
   íyarti dhūmámaruṣám bháribhradúcchukréṇa śocíṣā dyā́mínakṣan ǁ

   uśik pāvako aratiḥ sumedhā marteṣv agnir amṛto ni dhāyi |
   iyarti dhūmam aruṣam bharibhrad uc chukreṇa śociṣā dyām inakṣan ||

   उ॒शिक् । पा॒व॒कः । अ॒र॒तिः । सु॒ऽमे॒धाः । मर्ते॑षु । अ॒ग्निः । अ॒मृतः॑ । नि । धा॒यि॒ ।
   इय॑र्ति । धू॒मम् । अ॒रु॒षम् । भरि॑भ्रत् । उत् । शु॒क्रेण॑ । शो॒चिषा॑ । द्याम् । इन॑क्षन् ॥

   उशिक् । पावकः । अरतिः । सुऽमेधाः । मर्तेषु । अग्निः । अमृतः । नि । धायि ।
   इयर्ति । धूमम् । अरुषम् । भरिभ्रत् । उत् । शुक्रेण । शोचिषा । द्याम् । इनक्षन् ॥

   uśík ǀ pāvakáḥ ǀ aratíḥ ǀ su-medhā́ḥ ǀ márteṣu ǀ agníḥ ǀ amṛ́taḥ ǀ ní ǀ dhāyi ǀ
   íyarti ǀ dhūmám ǀ aruṣám ǀ bháribhrat ǀ út ǀ śukréṇa ǀ śocíṣā ǀ dyā́m ǀ ínakṣan ǁ

   uśik ǀ pāvakaḥ ǀ aratiḥ ǀ su-medhāḥ ǀ marteṣu ǀ agniḥ ǀ amṛtaḥ ǀ ni ǀ dhāyi ǀ
   iyarti ǀ dhūmam ǀ aruṣam ǀ bharibhrat ǀ ut ǀ śukreṇa ǀ śociṣā ǀ dyām ǀ inakṣan ǁ

   10.45.7 Aṣṭaka 7.8.29.1Anuvāka 10.4.29Interpretations

8. Ṛk 8

   दृ॒शा॒नो रु॒क्म उ॑र्वि॒या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः ।
   अ॒ग्निर॒मृतो॑ अभव॒द्वयो॑भि॒र्यदे॑नं॒ द्यौर्ज॒नय॑त्सु॒रेताः॑ ॥

   दृशानो रुक्म उर्विया व्य् अद्यौद् दुर्मर्षम् आयुः श्रिये रुचानः |
   अग्निर् अमृतो अभवद् वयोभिर् यद् एनं द्यौर् जनयत् सुरेताः ||

   dṛśānó rukmá urviyā́ vyádyauddurmárṣamā́yuḥ śriyé rucānáḥ ǀ
   agníramṛ́to abhavadváyobhiryádenam dyáurjanáyatsurétāḥ ǁ

   dṛśāno rukma urviyā vy adyaud durmarṣam āyuḥ śriye rucānaḥ |
   agnir amṛto abhavad vayobhir yad enaṃ dyaur janayat suretāḥ ||

   दृ॒शा॒नः । रु॒क्मः । उ॒र्वि॒या । वि । अ॒द्यौ॒त् । दुः॒ऽमर्ष॑म् । आयुः॑ । श्रि॒ये । रु॒चा॒नः ।
   अ॒ग्निः । अ॒मृतः॑ । अ॒भ॒व॒त् । वयः॑ऽभिः । यत् । ए॒न॒म् । द्यौः । ज॒नय॑त् । सु॒ऽरेताः॑ ॥

   दृशानः । रुक्मः । उर्विया । वि । अद्यौत् । दुःऽमर्षम् । आयुः । श्रिये । रुचानः ।
   अग्निः । अमृतः । अभवत् । वयःऽभिः । यत् । एनम् । द्यौः । जनयत् । सुऽरेताः ॥

   dṛśānáḥ ǀ rukmáḥ ǀ urviyā́ ǀ ví ǀ adyaut ǀ duḥ-márṣam ǀ ā́yuḥ ǀ śriyé ǀ rucānáḥ ǀ
   agníḥ ǀ amṛ́taḥ ǀ abhavat ǀ váyaḥ-bhiḥ ǀ yát ǀ enam ǀ dyáuḥ ǀ janáyat ǀ su-rétāḥ ǁ

   dṛśānaḥ ǀ rukmaḥ ǀ urviyā ǀ vi ǀ adyaut ǀ duḥ-marṣam ǀ āyuḥ ǀ śriye ǀ rucānaḥ ǀ
   agniḥ ǀ amṛtaḥ ǀ abhavat ǀ vayaḥ-bhiḥ ǀ yat ǀ enam ǀ dyauḥ ǀ janayat ǀ su-retāḥ ǁ

   10.45.8 Aṣṭaka 7.8.29.2Anuvāka 10.4.30Interpretations

9. Ṛk 9

   यस्ते॑ अ॒द्य कृ॒णव॑द्भद्रशोचेऽपू॒पं दे॑व घृ॒तवं॑तमग्ने ।
   प्र तं न॑य प्रत॒रं वस्यो॒ अच्छा॒भि सु॒म्नं दे॒वभ॑क्तं यविष्ठ ॥

   यस् ते अद्य कृणवद् भद्रशोचे ऽपूपं देव घृतवन्तम् अग्ने |
   प्र तं नय प्रतरं वस्यो अच्छाभि सुम्नं देवभक्तं यविष्ठ ||

   yáste adyá kṛṇávadbhadraśoce’pūpám deva ghṛtávantamagne ǀ
   prá tám naya pratarám vásyo ácchābhí sumnám devábhaktam yaviṣṭha ǁ

   yas te adya kṛṇavad bhadraśoce 'pūpaṃ deva ghṛtavantam agne |
   pra taṃ naya prataraṃ vasyo acchābhi sumnaṃ devabhaktaṃ yaviṣṭha ||

   यः । ते॒ । अ॒द्य । कृ॒णव॑त् । भ॒द्र॒ऽशो॒चे॒ । अ॒पू॒पम् । दे॒व॒ । घृ॒तऽव॑न्तम् । अ॒ग्ने॒ ।
   प्र । तम् । न॒य॒ । प्र॒ऽत॒रम् । वस्यः॑ । अच्छ॑ । अ॒भि । सु॒म्नम् । दे॒वऽभ॑क्तम् । य॒वि॒ष्ठ॒ ॥

   यः । ते । अद्य । कृणवत् । भद्रऽशोचे । अपूपम् । देव । घृतऽवन्तम् । अग्ने ।
   प्र । तम् । नय । प्रऽतरम् । वस्यः । अच्छ । अभि । सुम्नम् । देवऽभक्तम् । यविष्ठ ॥

   yáḥ ǀ te ǀ adyá ǀ kṛṇávat ǀ bhadra-śoce ǀ apūpám ǀ deva ǀ ghṛtá-vantam ǀ agne ǀ
   prá ǀ tám ǀ naya ǀ pra-tarám ǀ vásyaḥ ǀ áccha ǀ abhí ǀ sumnám ǀ devá-bhaktam ǀ yaviṣṭha ǁ

   yaḥ ǀ te ǀ adya ǀ kṛṇavat ǀ bhadra-śoce ǀ apūpam ǀ deva ǀ ghṛta-vantam ǀ agne ǀ
   pra ǀ tam ǀ naya ǀ pra-taram ǀ vasyaḥ ǀ accha ǀ abhi ǀ sumnam ǀ deva-bhaktam ǀ yaviṣṭha ǁ

   10.45.9 Aṣṭaka 7.8.29.3Anuvāka 10.4.31Interpretations

10. Ṛk 10

    आ तं भ॑ज सौश्रव॒सेष्व॑ग्न उ॒क्थौ॑क्थ॒ आ भ॑ज श॒स्यमा॑ने ।
    प्रि॒यः सूर्ये॑ प्रि॒यो अ॒ग्ना भ॑वा॒त्युज्जा॒तेन॑ भि॒नद॒दुज्जनि॑त्वैः ॥

    आ तम् भज सौश्रवसेष्व् अग्न उक्थ-उक्थ आ भज शस्यमाने |
    प्रियः सूर्ये प्रियो अग्ना भवात्य् उज् जातेन भिनदद् उज् जनित्वैः ||

    ā́ tám bhaja sauśravaséṣvagna uktháuktha ā́ bhaja śasyámāne ǀ
    priyáḥ sū́rye priyó agnā́ bhavātyújjāténa bhinádadújjánitvaiḥ ǁ

    ā tam bhaja sauśravaseṣv agna uktha-uktha ā bhaja śasyamāne |
    priyaḥ sūrye priyo agnā bhavāty uj jātena bhinadad uj janitvaiḥ ||

    आ । तम् । भ॒ज॒ । सौ॒श्र॒व॒सेषु॑ । अ॒ग्ने॒ । उ॒क्थेऽउ॑क्थे । आ । भ॒ज॒ । श॒स्यमा॑ने ।
    प्रि॒यः । सूर्ये॑ । प्रि॒यः । अ॒ग्ना । भ॒वा॒ति॒ । उत् । जा॒तेन॑ । भि॒नद॑त् । उत् । जनि॑ऽत्वैः ॥

    आ । तम् । भज । सौश्रवसेषु । अग्ने । उक्थेऽउक्थे । आ । भज । शस्यमाने ।
    प्रियः । सूर्ये । प्रियः । अग्ना । भवाति । उत् । जातेन । भिनदत् । उत् । जनिऽत्वैः ॥

    ā́ ǀ tám ǀ bhaja ǀ sauśravaséṣu ǀ agne ǀ ukthé-ukthe ǀ ā́ ǀ bhaja ǀ śasyámāne ǀ
    priyáḥ ǀ sū́rye ǀ priyáḥ ǀ agnā́ ǀ bhavāti ǀ út ǀ jāténa ǀ bhinádat ǀ út ǀ jáni-tvaiḥ ǁ

    ā ǀ tam ǀ bhaja ǀ sauśravaseṣu ǀ agne ǀ ukthe-ukthe ǀ ā ǀ bhaja ǀ śasyamāne ǀ
    priyaḥ ǀ sūrye ǀ priyaḥ ǀ agnā ǀ bhavāti ǀ ut ǀ jātena ǀ bhinadat ǀ ut ǀ jani-tvaiḥ ǁ

    10.45.10 Aṣṭaka 7.8.29.4Anuvāka 10.4.32Interpretations

11. Ṛk 11

    त्वाम॑ग्ने॒ यज॑माना॒ अनु॒ द्यून्विश्वा॒ वसु॑ दधिरे॒ वार्या॑णि ।
    त्वया॑ स॒ह द्रवि॑णमि॒च्छमा॑ना व्र॒जं गोमं॑तमु॒शिजो॒ वि व॑व्रुः ॥

    त्वाम् अग्ने यजमाना अनु द्यून् विश्वा वसु दधिरे वार्याणि |
    त्वया सह द्रविणम् इच्छमाना व्रजं गोमन्तम् उशिजो वि वव्रुः ||

    tvā́magne yájamānā ánu dyū́nvíśvā vásu dadhire vā́ryāṇi ǀ
    tváyā sahá dráviṇamicchámānā vrajám gómantamuśíjo ví vavruḥ ǁ

    tvām agne yajamānā anu dyūn viśvā vasu dadhire vāryāṇi |
    tvayā saha draviṇam icchamānā vrajaṃ gomantam uśijo vi vavruḥ ||

    त्वाम् । अ॒ग्ने॒ । यज॑मानाः । अनु॑ । द्यून् । विश्वा॑ । वसु॑ । द॒धि॒रे॒ । वार्या॑णि ।
    त्वया॑ । स॒ह । द्रवि॑णम् । इ॒च्छमा॑नाः । व्र॒जम् । गोऽम॑न्तम् । उ॒शिजः॑ । वि । व॒व्रुः॒ ॥

    त्वाम् । अग्ने । यजमानाः । अनु । द्यून् । विश्वा । वसु । दधिरे । वार्याणि ।
    त्वया । सह । द्रविणम् । इच्छमानाः । व्रजम् । गोऽमन्तम् । उशिजः । वि । वव्रुः ॥

    tvā́m ǀ agne ǀ yájamānāḥ ǀ ánu ǀ dyū́n ǀ víśvā ǀ vásu ǀ dadhire ǀ vā́ryāṇi ǀ
    tváyā ǀ sahá ǀ dráviṇam ǀ icchámānāḥ ǀ vrajám ǀ gó-mantam ǀ uśíjaḥ ǀ ví ǀ vavruḥ ǁ

    tvām ǀ agne ǀ yajamānāḥ ǀ anu ǀ dyūn ǀ viśvā ǀ vasu ǀ dadhire ǀ vāryāṇi ǀ
    tvayā ǀ saha ǀ draviṇam ǀ icchamānāḥ ǀ vrajam ǀ go-mantam ǀ uśijaḥ ǀ vi ǀ vavruḥ ǁ

    10.45.11 Aṣṭaka 7.8.29.5Anuvāka 10.4.33Interpretations

12. Ṛk 12

    अस्ता॑व्य॒ग्निर्न॒रां सु॒शेवो॑ वैश्वान॒र ऋषि॑भिः॒ सोम॑गोपाः ।
    अ॒द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीरं॑ ॥

    अस्ताव्य् अग्निर् नरां सुशेवो वैश्वानर ऋषिभिः सोमगोपाः |
    अद्वेषे द्यावापृथिवी हुवेम देवा धत्त रयिम् अस्मे सुवीरम् ||

    ástāvyagnírnarā́m suśévo vaiśvānará ṛ́ṣibhiḥ sómagopāḥ ǀ
    adveṣé dyā́vāpṛthivī́ huvema dévā dhattá rayímasmé suvī́ram ǁ

    astāvy agnir narāṃ suśevo vaiśvānara ṛṣibhiḥ somagopāḥ |
    adveṣe dyāvāpṛthivī huvema devā dhatta rayim asme suvīram ||

    अस्ता॑वि । अ॒ग्निः । न॒राम् । सु॒ऽशेवः॑ । वै॒श्वा॒न॒रः । ऋषि॑ऽभिः । सोम॑ऽगोपाः ।
    अ॒द्वे॒षे इति॑ । द्यावा॑पृथि॒वी इति॑ । हु॒वे॒म॒ । देवाः॑ । ध॒त्त । र॒यिम् । अ॒स्मे इति॑ । सु॒ऽवीर॑म् ॥

    अस्तावि । अग्निः । नराम् । सुऽशेवः । वैश्वानरः । ऋषिऽभिः । सोमऽगोपाः ।
    अद्वेषे इति । द्यावापृथिवी इति । हुवेम । देवाः । धत्त । रयिम् । अस्मे इति । सुऽवीरम् ॥

    ástāvi ǀ agníḥ ǀ narā́m ǀ su-śévaḥ ǀ vaiśvānaráḥ ǀ ṛ́ṣi-bhiḥ ǀ sóma-gopāḥ ǀ
    adveṣé íti ǀ dyā́vāpṛthivī́ íti ǀ huvema ǀ dévāḥ ǀ dhattá ǀ rayím ǀ asmé íti ǀ su-vī́ram ǁ

    astāvi ǀ agniḥ ǀ narām ǀ su-śevaḥ ǀ vaiśvānaraḥ ǀ ṛṣi-bhiḥ ǀ soma-gopāḥ ǀ
    adveṣe iti ǀ dyāvāpṛthivī iti ǀ huvema ǀ devāḥ ǀ dhatta ǀ rayim ǀ asme iti ǀ su-vīram ǁ

    10.45.12 Aṣṭaka 7.8.29.6Anuvāka 10.4.34Interpretations

Text, recitation and interpretations from the Ṛgveda database of theveda.org.in.