Devatā देवता

1, 3, 5, 7, 9: Agni; 2: Devāḥ, Mitra, Varuṇa; 4, 6: Devāḥ, Varuṇa; 8: Devāḥ

Ṛṣi ऋषि

1, 3, 5, 7, 9: Devās; 2, 4, 6, 8: Agni Saucīka

Chandas छन्दस्

Triṣṭubh

1. Ṛk 1

   म॒हत्तदुल्बं॒ स्थवि॑रं॒ तदा॑सी॒द्येनावि॑ष्टितः प्रवि॒वेशि॑था॒पः ।
   विश्वा॑ अपश्यद्बहु॒धा ते॑ अग्ने॒ जात॑वेदस्त॒न्वो॑ दे॒व एकः॑ ॥

   महत् तद् उल्बं स्थविरं तद् आसीद् येनाविष्टितः प्रविवेशिथापः |
   विश्वा अपश्यद् बहुधा ते अग्ने जातवेदस् तन्वो देव एकः ||

   maháttádúlbam stháviram tádāsīdyénā́viṣṭitaḥ pravivéśithāpáḥ ǀ
   víśvā apaśyadbahudhā́ te agne jā́tavedastanvó devá ékaḥ ǁ

   mahat tad ulbaṃ sthaviraṃ tad āsīd yenāviṣṭitaḥ praviveśithāpaḥ |
   viśvā apaśyad bahudhā te agne jātavedas tanvo deva ekaḥ ||

   म॒हत् । तत् । उल्ब॑म् । स्थवि॑रम् । तत् । आ॒सी॒त् । येन॑ । आऽवि॑ष्टितः । प्र॒ऽवि॒वेशि॑थ । अ॒पः ।
   विश्वाः॑ । अ॒प॒श्य॒त् । ब॒हु॒धा । ते॒ । अ॒ग्ने॒ । जात॑ऽवेदः । त॒न्वः॑ । दे॒वः । एकः॑ ॥

   महत् । तत् । उल्बम् । स्थविरम् । तत् । आसीत् । येन । आऽविष्टितः । प्रऽविवेशिथ । अपः ।
   विश्वाः । अपश्यत् । बहुधा । ते । अग्ने । जातऽवेदः । तन्वः । देवः । एकः ॥

   mahát ǀ tát ǀ úlbam ǀ stháviram ǀ tát ǀ āsīt ǀ yéna ǀ ā́-viṣṭitaḥ ǀ pra-vivéśitha ǀ apáḥ ǀ
   víśvāḥ ǀ apaśyat ǀ bahudhā́ ǀ te ǀ agne ǀ jā́ta-vedaḥ ǀ tanváḥ ǀ deváḥ ǀ ékaḥ ǁ

   mahat ǀ tat ǀ ulbam ǀ sthaviram ǀ tat ǀ āsīt ǀ yena ǀ ā-viṣṭitaḥ ǀ pra-viveśitha ǀ apaḥ ǀ
   viśvāḥ ǀ apaśyat ǀ bahudhā ǀ te ǀ agne ǀ jāta-vedaḥ ǀ tanvaḥ ǀ devaḥ ǀ ekaḥ ǁ

   10.51.1 Aṣṭaka 8.1.10.1Anuvāka 10.4.82Interpretations

2. Ṛk 2

   को मा॑ ददर्श कत॒मः स दे॒वो यो मे॑ त॒न्वो॑ बहु॒धा प॒र्यप॑श्यत् ।
   क्वाह॑ मित्रावरुणा क्षियंत्य॒ग्नेर्विश्वाः॑ स॒मिधो॑ देव॒यानीः॑ ॥

   को मा ददर्श कतमः स देवो यो मे तन्वो बहुधा पर्यपश्यत् |
   क्वाह मित्रावरुणा क्षियन्त्य् अग्नेर् विश्वाः समिधो देवयानीः ||

   kó mā dadarśa katamáḥ sá devó yó me tanvó bahudhā́ paryápaśyat ǀ
   kvā́ha mitrāvaruṇā kṣiyantyagnérvíśvāḥ samídho devayā́nīḥ ǁ

   ko mā dadarśa katamaḥ sa devo yo me tanvo bahudhā paryapaśyat |
   kvāha mitrāvaruṇā kṣiyanty agner viśvāḥ samidho devayānīḥ ||

   कः । मा॒ । द॒द॒र्श॒ । क॒त॒मः । सः । दे॒वः । यः । मे॒ । त॒न्वः॑ । ब॒हु॒धा । प॒रि॒ऽअप॑श्यत् ।
   क्व॑ । अह॑ । मि॒त्रा॒व॒रु॒णा॒ । क्षि॒य॒न्ति॒ । अ॒ग्नेः । विश्वाः॑ । स॒म्ऽइधः॑ । दे॒व॒ऽयानीः॑ ॥

   कः । मा । ददर्श । कतमः । सः । देवः । यः । मे । तन्वः । बहुधा । परिऽअपश्यत् ।
   क्व । अह । मित्रावरुणा । क्षियन्ति । अग्नेः । विश्वाः । सम्ऽइधः । देवऽयानीः ॥

   káḥ ǀ mā ǀ dadarśa ǀ katamáḥ ǀ sáḥ ǀ deváḥ ǀ yáḥ ǀ me ǀ tanváḥ ǀ bahudhā́ ǀ pari-ápaśyat ǀ
   kvá ǀ áha ǀ mitrāvaruṇā ǀ kṣiyanti ǀ agnéḥ ǀ víśvāḥ ǀ sam-ídhaḥ ǀ deva-yā́nīḥ ǁ

   kaḥ ǀ mā ǀ dadarśa ǀ katamaḥ ǀ saḥ ǀ devaḥ ǀ yaḥ ǀ me ǀ tanvaḥ ǀ bahudhā ǀ pari-apaśyat ǀ
   kva ǀ aha ǀ mitrāvaruṇā ǀ kṣiyanti ǀ agneḥ ǀ viśvāḥ ǀ sam-idhaḥ ǀ deva-yānīḥ ǁ

   10.51.2 Aṣṭaka 8.1.10.2Anuvāka 10.4.83Interpretations

3. Ṛk 3

   ऐच्छा॑म त्वा बहु॒धा जा॑तवेदः॒ प्रवि॑ष्टमग्ने अ॒प्स्वोष॑धीषु ।
   तं त्वा॑ य॒मो अ॑चिकेच्चित्रभानो दशांतरु॒ष्याद॑ति॒रोच॑मानं ॥

   ऐच्छाम त्वा बहुधा जातवेदः प्रविष्टम् अग्ने अप्स्व् ओषधीषु |
   तं त्वा यमो अचिकेच् चित्रभानो दशान्तरुष्याद् अतिरोचमानम् ||

   áicchāma tvā bahudhā́ jātavedaḥ práviṣṭamagne apsvóṣadhīṣu ǀ
   tám tvā yamó acikeccitrabhāno daśāntaruṣyā́datirócamānam ǁ

   aicchāma tvā bahudhā jātavedaḥ praviṣṭam agne apsv oṣadhīṣu |
   taṃ tvā yamo acikec citrabhāno daśāntaruṣyād atirocamānam ||

   ऐच्छा॑म । त्वा॒ । ब॒हु॒धा । जा॒त॒ऽवे॒दः॒ । प्रऽवि॑ष्टम् । अ॒ग्ने॒ । अ॒प्ऽसु । ओष॑धीषु ।
   तम् । त्वा॒ । य॒मः । अ॒चि॒के॒त् । चि॒त्र॒भा॒नो॒ इति॑ चित्रऽभानो । द॒श॒ऽअ॒न्त॒रु॒ष्यात् । अ॒ति॒ऽरोच॑मानम् ॥

   ऐच्छाम । त्वा । बहुधा । जातऽवेदः । प्रऽविष्टम् । अग्ने । अप्ऽसु । ओषधीषु ।
   तम् । त्वा । यमः । अचिकेत् । चित्रभानो इति चित्रऽभानो । दशऽअन्तरुष्यात् । अतिऽरोचमानम् ॥

   áicchāma ǀ tvā ǀ bahudhā́ ǀ jāta-vedaḥ ǀ prá-viṣṭam ǀ agne ǀ ap-sú ǀ óṣadhīṣu ǀ
   tám ǀ tvā ǀ yamáḥ ǀ aciket ǀ citrabhāno íti citra-bhāno ǀ daśa-antaruṣyā́t ǀ ati-rócamānam ǁ

   aicchāma ǀ tvā ǀ bahudhā ǀ jāta-vedaḥ ǀ pra-viṣṭam ǀ agne ǀ ap-su ǀ oṣadhīṣu ǀ
   tam ǀ tvā ǀ yamaḥ ǀ aciket ǀ citrabhāno iti citra-bhāno ǀ daśa-antaruṣyāt ǀ ati-rocamānam ǁ

   10.51.3 Aṣṭaka 8.1.10.3Anuvāka 10.4.84Interpretations

4. Ṛk 4

   हो॒त्राद॒हं व॑रुण॒ बिभ्य॑दायं॒ नेदे॒व मा॑ यु॒नज॒न्नत्र॑ दे॒वाः ।
   तस्य॑ मे त॒न्वो॑ बहु॒धा निवि॑ष्टा ए॒तमर्थं॒ न चि॑केता॒हम॒ग्निः ॥

   होत्राद् अहं वरुण बिभ्यद् आयं नेद् एव मा युनजन्न् अत्र देवाः |
   तस्य मे तन्वो बहुधा निविष्टा एतम् अर्थं न चिकेताहम् अग्निः ||

   hotrā́dahám varuṇa bíbhyadāyam nédevá mā yunájannátra devā́ḥ ǀ
   tásya me tanvó bahudhā́ níviṣṭā etámártham ná ciketāhámagníḥ ǁ

   hotrād ahaṃ varuṇa bibhyad āyaṃ ned eva mā yunajann atra devāḥ |
   tasya me tanvo bahudhā niviṣṭā etam arthaṃ na ciketāham agniḥ ||

   हो॒त्रात् । अ॒हम् । व॒रु॒ण॒ । बिभ्य॑त् । आ॒य॒म् । न । इत् । ए॒व । मा॒ । यु॒नज॑न् । अत्र॑ । दे॒वाः ।
   तस्य॑ । मे॒ । त॒न्वः॑ । ब॒हु॒धा । निऽवि॑ष्टाः । ए॒तम् । अर्थ॑म् । न । चि॒के॒त॒ । अ॒हम् । अ॒ग्निः ॥

   होत्रात् । अहम् । वरुण । बिभ्यत् । आयम् । न । इत् । एव । मा । युनजन् । अत्र । देवाः ।
   तस्य । मे । तन्वः । बहुधा । निऽविष्टाः । एतम् । अर्थम् । न । चिकेत । अहम् । अग्निः ॥

   hotrā́t ǀ ahám ǀ varuṇa ǀ bíbhyat ǀ āyam ǀ ná ǀ ít ǀ evá ǀ mā ǀ yunájan ǀ átra ǀ devā́ḥ ǀ
   tásya ǀ me ǀ tanváḥ ǀ bahudhā́ ǀ ní-viṣṭāḥ ǀ etám ǀ ártham ǀ ná ǀ ciketa ǀ ahám ǀ agníḥ ǁ

   hotrāt ǀ aham ǀ varuṇa ǀ bibhyat ǀ āyam ǀ na ǀ it ǀ eva ǀ mā ǀ yunajan ǀ atra ǀ devāḥ ǀ
   tasya ǀ me ǀ tanvaḥ ǀ bahudhā ǀ ni-viṣṭāḥ ǀ etam ǀ artham ǀ na ǀ ciketa ǀ aham ǀ agniḥ ǁ

   10.51.4 Aṣṭaka 8.1.10.4Anuvāka 10.4.85Interpretations

5. Ṛk 5

   एहि॒ मनु॑र्देव॒युर्य॒ज्ञका॑मोऽरं॒कृत्या॒ तम॑सि क्षेष्यग्ने ।
   सु॒गान्प॒थः कृ॑णुहि देव॒याना॒न्वह॑ ह॒व्यानि॑ सुमन॒स्यमा॑नः ॥

   एहि मनुर् देवयुर् यज्ञकामो ऽरङ्कृत्या तमसि क्षेष्य् अग्ने |
   सुगान् पथः कृणुहि देवयानान् वह हव्यानि सुमनस्यमानः ||

   éhi mánurdevayúryajñákāmo’raṃkṛ́tyā támasi kṣeṣyagne ǀ
   sugā́npatháḥ kṛṇuhi devayā́nānváha havyā́ni sumanasyámānaḥ ǁ

   ehi manur devayur yajñakāmo 'raṅkṛtyā tamasi kṣeṣy agne |
   sugān pathaḥ kṛṇuhi devayānān vaha havyāni sumanasyamānaḥ ||

   आ । इ॒हि॒ । मनुः॑ । दे॒व॒ऽयुः । य॒ज्ञऽका॑मः । अ॒र॒म्ऽकृत्य॑ । तम॑सि । क्षे॒षि॒ । अ॒ग्ने॒ ।
   सु॒ऽगान् । प॒थः । कृ॒णु॒हि॒ । दे॒व॒ऽयाना॑न् । वह॑ । ह॒व्यानि॑ । सु॒ऽम॒न॒स्यमा॑नः ॥

   आ । इहि । मनुः । देवऽयुः । यज्ञऽकामः । अरम्ऽकृत्य । तमसि । क्षेषि । अग्ने ।
   सुऽगान् । पथः । कृणुहि । देवऽयानान् । वह । हव्यानि । सुऽमनस्यमानः ॥

   ā́ ǀ ihi ǀ mánuḥ ǀ deva-yúḥ ǀ yajñá-kāmaḥ ǀ aram-kṛ́tya ǀ támasi ǀ kṣeṣi ǀ agne ǀ
   su-gā́n ǀ patháḥ ǀ kṛṇuhi ǀ deva-yā́nān ǀ váha ǀ havyā́ni ǀ su-manasyámānaḥ ǁ

   ā ǀ ihi ǀ manuḥ ǀ deva-yuḥ ǀ yajña-kāmaḥ ǀ aram-kṛtya ǀ tamasi ǀ kṣeṣi ǀ agne ǀ
   su-gān ǀ pathaḥ ǀ kṛṇuhi ǀ deva-yānān ǀ vaha ǀ havyāni ǀ su-manasyamānaḥ ǁ

   10.51.5 Aṣṭaka 8.1.10.5Anuvāka 10.4.86Interpretations

6. Ṛk 6

   अ॒ग्नेः पूर्वे॒ भ्रात॑रो॒ अर्थ॑मे॒तं र॒थीवाध्वा॑न॒मन्वाव॑रीवुः ।
   तस्मा॑द्भि॒या व॑रुण दू॒रमा॑यं गौ॒रो न क्षे॒प्नोर॑विजे॒ ज्यायाः॑ ॥

   अग्नेः पूर्वे भ्रातरो अर्थम् एतं रथीवाध्वानम् अन्व् आवरीवुः |
   तस्माद् भिया वरुण दूरम् आयं गौरो न क्षेप्नोर् अविजे ज्यायाः ||

   agnéḥ pū́rve bhrā́taro árthametám rathī́vā́dhvānamánvā́varīvuḥ ǀ
   tásmādbhiyā́ varuṇa dūrámāyam gauró ná kṣepnóravije jyā́yāḥ ǁ

   agneḥ pūrve bhrātaro artham etaṃ rathīvādhvānam anv āvarīvuḥ |
   tasmād bhiyā varuṇa dūram āyaṃ gauro na kṣepnor avije jyāyāḥ ||

   अ॒ग्नेः । पूर्वे॑ । भ्रात॑रः । अर्थ॑म् । ए॒तम् । र॒थीऽइ॑व । अध्वा॑नम् । अनु॑ । आ । अ॒व॒री॒वु॒रिति॑ ।
   तस्मा॑त् । भि॒या । व॒रु॒ण॒ । दू॒रम् । आ॒य॒म् । गौ॒रः । न । क्षे॒प्नोः । अ॒वि॒जे॒ । ज्यायाः॑ ॥

   अग्नेः । पूर्वे । भ्रातरः । अर्थम् । एतम् । रथीऽइव । अध्वानम् । अनु । आ । अवरीवुरिति ।
   तस्मात् । भिया । वरुण । दूरम् । आयम् । गौरः । न । क्षेप्नोः । अविजे । ज्यायाः ॥

   agnéḥ ǀ pū́rve ǀ bhrā́taraḥ ǀ ártham ǀ etám ǀ rathī́-iva ǀ ádhvānam ǀ ánu ǀ ā́ ǀ avarīvuríti ǀ
   tásmāt ǀ bhiyā́ ǀ varuṇa ǀ dūrám ǀ āyam ǀ gauráḥ ǀ ná ǀ kṣepnóḥ ǀ avije ǀ jyā́yāḥ ǁ

   agneḥ ǀ pūrve ǀ bhrātaraḥ ǀ artham ǀ etam ǀ rathī-iva ǀ adhvānam ǀ anu ǀ ā ǀ avarīvuriti ǀ
   tasmāt ǀ bhiyā ǀ varuṇa ǀ dūram ǀ āyam ǀ gauraḥ ǀ na ǀ kṣepnoḥ ǀ avije ǀ jyāyāḥ ǁ

   10.51.6 Aṣṭaka 8.1.11.1Anuvāka 10.4.87Interpretations

7. Ṛk 7

   कु॒र्मस्त॒ आयु॑र॒जरं॒ यद॑ग्ने॒ यथा॑ यु॒क्तो जा॑तवेदो॒ न रिष्याः॑ ।
   अथा॑ वहासि सुमन॒स्यमा॑नो भा॒गं दे॒वेभ्यो॑ ह॒विषः॑ सुजात ॥

   कुर्मस् त आयुर् अजरं यद् अग्ने यथा युक्तो जातवेदो न रिष्याः |
   अथा वहासि सुमनस्यमानो भागं देवेभ्यो हविषः सुजात ||

   kurmásta ā́yurajáram yádagne yáthā yuktó jātavedo ná ríṣyāḥ ǀ
   áthā vahāsi sumanasyámāno bhāgám devébhyo havíṣaḥ sujāta ǁ

   kurmas ta āyur ajaraṃ yad agne yathā yukto jātavedo na riṣyāḥ |
   athā vahāsi sumanasyamāno bhāgaṃ devebhyo haviṣaḥ sujāta ||

   कु॒र्मः । ते॒ । आयुः॑ । अ॒जर॑म् । यत् । अ॒ग्ने॒ । यथा॑ । यु॒क्तः । जा॒त॒ऽवे॒दः॒ । न । रिष्याः॑ ।
   अथ॑ । व॒हा॒सि॒ । सु॒ऽम॒न॒स्यमा॑नः । भा॒गम् । दे॒वेभ्यः॑ । ह॒विषः॑ । सु॒ऽजा॒त॒ ॥

   कुर्मः । ते । आयुः । अजरम् । यत् । अग्ने । यथा । युक्तः । जातऽवेदः । न । रिष्याः ।
   अथ । वहासि । सुऽमनस्यमानः । भागम् । देवेभ्यः । हविषः । सुऽजात ॥

   kurmáḥ ǀ te ǀ ā́yuḥ ǀ ajáram ǀ yát ǀ agne ǀ yáthā ǀ yuktáḥ ǀ jāta-vedaḥ ǀ ná ǀ ríṣyāḥ ǀ
   átha ǀ vahāsi ǀ su-manasyámānaḥ ǀ bhāgám ǀ devébhyaḥ ǀ havíṣaḥ ǀ su-jāta ǁ

   kurmaḥ ǀ te ǀ āyuḥ ǀ ajaram ǀ yat ǀ agne ǀ yathā ǀ yuktaḥ ǀ jāta-vedaḥ ǀ na ǀ riṣyāḥ ǀ
   atha ǀ vahāsi ǀ su-manasyamānaḥ ǀ bhāgam ǀ devebhyaḥ ǀ haviṣaḥ ǀ su-jāta ǁ

   10.51.7 Aṣṭaka 8.1.11.2Anuvāka 10.4.88Interpretations

8. Ṛk 8

   प्र॒या॒जान्मे॑ अनुया॒जांश्च॒ केव॑ला॒नूर्ज॑स्वंतं ह॒विषो॑ दत्त भा॒गं ।
   घृ॒तं चा॒पां पुरु॑षं॒ चौष॑धीनाम॒ग्नेश्च॑ दी॒र्घमायु॑रस्तु देवाः ॥

   प्रयाजान् मे अनुयाजांश् च केवलान् ऊर्जस्वन्तं हविषो दत्त भागम् |
   घृतं चापाम् पुरुषं चौषधीनाम् अग्नेश् च दीर्घम् आयुर् अस्तु देवाः ||

   prayājā́nme anuyājā́ṃśca kévalānū́rjasvantam havíṣo datta bhāgám ǀ
   ghṛtám cāpā́m púruṣam cáuṣadhīnāmagnéśca dīrghámā́yurastu devāḥ ǁ

   prayājān me anuyājāṃś ca kevalān ūrjasvantaṃ haviṣo datta bhāgam |
   ghṛtaṃ cāpām puruṣaṃ cauṣadhīnām agneś ca dīrgham āyur astu devāḥ ||

   प्र॒ऽया॒जान् । मे॒ । अ॒नु॒ऽया॒जान् । च॒ । केव॑लान् । ऊर्ज॑स्वन्तम् । ह॒विषः॑ । द॒त्त॒ । भा॒गम् ।
   घृ॒तम् । च॒ । अ॒पाम् । पुरु॑षम् । च॒ । ओष॑धीनाम् । अ॒ग्नेः । च॒ । दी॒र्घम् । आयुः॑ । अ॒स्तु॒ । दे॒वाः॒ ॥

   प्रऽयाजान् । मे । अनुऽयाजान् । च । केवलान् । ऊर्जस्वन्तम् । हविषः । दत्त । भागम् ।
   घृतम् । च । अपाम् । पुरुषम् । च । ओषधीनाम् । अग्नेः । च । दीर्घम् । आयुः । अस्तु । देवाः ॥

   pra-yājā́n ǀ me ǀ anu-yājā́n ǀ ca ǀ kévalān ǀ ū́rjasvantam ǀ havíṣaḥ ǀ datta ǀ bhāgám ǀ
   ghṛtám ǀ ca ǀ apā́m ǀ púruṣam ǀ ca ǀ óṣadhīnām ǀ agnéḥ ǀ ca ǀ dīrghám ǀ ā́yuḥ ǀ astu ǀ devāḥ ǁ

   pra-yājān ǀ me ǀ anu-yājān ǀ ca ǀ kevalān ǀ ūrjasvantam ǀ haviṣaḥ ǀ datta ǀ bhāgam ǀ
   ghṛtam ǀ ca ǀ apām ǀ puruṣam ǀ ca ǀ oṣadhīnām ǀ agneḥ ǀ ca ǀ dīrgham ǀ āyuḥ ǀ astu ǀ devāḥ ǁ

   10.51.8 Aṣṭaka 8.1.11.3Anuvāka 10.4.89Interpretations

9. Ṛk 9

   तव॑ प्रया॒जा अ॑नुया॒जाश्च॒ केव॑ल॒ ऊर्ज॑स्वंतो ह॒विषः॑ संतु भा॒गाः ।
   तवा॑ग्ने य॒ज्ञो॒३॒॑ऽयम॑स्तु॒ सर्व॒स्तुभ्यं॑ नमंतां प्र॒दिश॒श्चत॑स्रः ॥

   तव प्रयाजा अनुयाजाश् च केवल ऊर्जस्वन्तो हविषः सन्तु भागाः |
   तवाग्ने यज्ञो ऽयम् अस्तु सर्वस् तुभ्यं नमन्ताम् प्रदिशश् चतस्रः ||

   táva prayājā́ anuyājā́śca kévala ū́rjasvanto havíṣaḥ santu bhāgā́ḥ ǀ
   távāgne yajñó’yámastu sárvastúbhyam namantām pradíśaścátasraḥ ǁ

   tava prayājā anuyājāś ca kevala ūrjasvanto haviṣaḥ santu bhāgāḥ |
   tavāgne yajño 'yam astu sarvas tubhyaṃ namantām pradiśaś catasraḥ ||

   तव॑ । प्र॒ऽया॒जाः । अ॒नु॒ऽया॒जाः । च॒ । केव॑ले । ऊर्ज॑स्वन्तः । ह॒विषः॑ । स॒न्तु॒ । भा॒गाः ।
   तव॑ । अ॒ग्ने॒ । य॒ज्ञः । अ॒यम् । अ॒स्तु॒ । सर्वः॑ । तुभ्य॑म् । न॒म॒न्ता॒म् । प्र॒ऽदिशः॑ । चत॑स्रः ॥

   तव । प्रऽयाजाः । अनुऽयाजाः । च । केवले । ऊर्जस्वन्तः । हविषः । सन्तु । भागाः ।
   तव । अग्ने । यज्ञः । अयम् । अस्तु । सर्वः । तुभ्यम् । नमन्ताम् । प्रऽदिशः । चतस्रः ॥

   táva ǀ pra-yājā́ḥ ǀ anu-yājā́ḥ ǀ ca ǀ kévale ǀ ū́rjasvantaḥ ǀ havíṣaḥ ǀ santu ǀ bhāgā́ḥ ǀ
   táva ǀ agne ǀ yajñáḥ ǀ ayám ǀ astu ǀ sárvaḥ ǀ túbhyam ǀ namantām ǀ pra-díśaḥ ǀ cátasraḥ ǁ

   tava ǀ pra-yājāḥ ǀ anu-yājāḥ ǀ ca ǀ kevale ǀ ūrjasvantaḥ ǀ haviṣaḥ ǀ santu ǀ bhāgāḥ ǀ
   tava ǀ agne ǀ yajñaḥ ǀ ayam ǀ astu ǀ sarvaḥ ǀ tubhyam ǀ namantām ǀ pra-diśaḥ ǀ catasraḥ ǁ

   10.51.9 Aṣṭaka 8.1.11.4Anuvāka 10.4.90Interpretations

Text, recitation and interpretations from the Ṛgveda database of theveda.org.in.