Devatā देवता

Indra

Ṛṣi ऋषि

Sudās Paijavana

Chandas छन्दस्

Śakvarī, Mahāpaṅkti, Triṣṭubh

1. Ṛk 1

   प्रो ष्व॑स्मै पुरोर॒थमिंद्रा॑य शू॒षम॑र्चत ।
   अ॒भीके॑ चिदु लोक॒कृत्सं॒गे स॒मत्सु॑ वृत्र॒हास्माकं॑ बोधि चोदि॒ता नभं॑तामन्य॒केषां॑ ज्या॒का अधि॒ धन्व॑सु ॥

   प्रो ष्व् अस्मै पुरोरथम् इन्द्राय शूषम् अर्चत |
   अभीके चिद् उ लोककृत् संगे समत्सु वृत्रहास्माकम् बोधि चोदिता नभन्ताम् अन्यकेषां ज्याका अधि धन्वसु ||

   pró ṣvásmai purorathámíndrāya śūṣámarcata ǀ
   abhī́ke cidu lokakṛ́tsaṃgé samátsu vṛtrahā́smā́kam bodhi coditā́ nábhantāmanyakéṣām jyākā́ ádhi dhánvasu ǁ

   pro ṣv asmai puroratham indrāya śūṣam arcata |
   abhīke cid u lokakṛt saṃge samatsu vṛtrahāsmākam bodhi coditā nabhantām anyakeṣāṃ jyākā adhi dhanvasu ||

   प्रो इति॑ । सु । अ॒स्मै॒ । पु॒रः॒ऽर॒थम् । इन्द्रा॑य । शू॒षम् । अ॒र्च॒त॒ ।
   अ॒भीके॑ । चि॒त् । ऊं॒ इति॑ । लो॒क॒ऽकृत् । स॒म्ऽगे । स॒मत्ऽसु॑ । वृ॒त्र॒ऽहा । अ॒स्माक॑म् । बो॒धि॒ । चो॒दि॒ता । नभ॑न्ताम् । अ॒न्य॒केषा॑म् । ज्या॒काः । अधि॑ । धन्व॑ऽसु ॥

   प्रो इति । सु । अस्मै । पुरःऽरथम् । इन्द्राय । शूषम् । अर्चत ।
   अभीके । चित् । ऊं इति । लोकऽकृत् । सम्ऽगे । समत्ऽसु । वृत्रऽहा । अस्माकम् । बोधि । चोदिता । नभन्ताम् । अन्यकेषाम् । ज्याकाः । अधि । धन्वऽसु ॥

   pró íti ǀ sú ǀ asmai ǀ puraḥ-rathám ǀ índrāya ǀ śūṣám ǀ arcata ǀ
   abhī́ke ǀ cit ǀ ūṃ íti ǀ loka-kṛ́t ǀ sam-gé ǀ samát-su ǀ vṛtra-hā́ ǀ asmā́kam ǀ bodhi ǀ coditā́ ǀ nábhantām ǀ anyakéṣām ǀ jyākā́ḥ ǀ ádhi ǀ dhánva-su ǁ

   pro iti ǀ su ǀ asmai ǀ puraḥ-ratham ǀ indrāya ǀ śūṣam ǀ arcata ǀ
   abhīke ǀ cit ǀ ūṃ iti ǀ loka-kṛt ǀ sam-ge ǀ samat-su ǀ vṛtra-hā ǀ asmākam ǀ bodhi ǀ coditā ǀ nabhantām ǀ anyakeṣām ǀ jyākāḥ ǀ adhi ǀ dhanva-su ǁ

   10.133.1 Aṣṭaka 8.7.21.1Anuvāka 10.11.29Interpretations

2. Ṛk 2

   त्वं सिंधूँ॒रवा॑सृजोऽध॒राचो॒ अह॒न्नहिं॑ ।
   अ॒श॒त्रुरिं॑द्र जज्ञिषे॒ विश्वं॑ पुष्यसि॒ वार्यं॒ तं त्वा॒ परि॑ ष्वजामहे॒ नभं॑तामन्य॒केषां॑ ज्या॒का अधि॒ धन्व॑सु ॥

   त्वं सिन्धूंर् अवासृजो ऽधराचो अहन्न् अहिम् |
   अशत्रुर् इन्द्र जज्ञिषे विश्वम् पुष्यसि वार्यं तं त्वा परि ष्वजामहे नभन्ताम् अन्यकेषां ज्याका अधि धन्वसु ||

   tvám síndhūm̐rávāsṛjo’dharā́co áhannáhim ǀ
   aśatrúrindra jajñiṣe víśvam puṣyasi vā́ryam tám tvā pári ṣvajāmahe nábhantāmanyakéṣām jyākā́ ádhi dhánvasu ǁ

   tvaṃ sindhūṃr avāsṛjo 'dharāco ahann ahim |
   aśatrur indra jajñiṣe viśvam puṣyasi vāryaṃ taṃ tvā pari ṣvajāmahe nabhantām anyakeṣāṃ jyākā adhi dhanvasu ||

   त्वम् । सिन्धू॑न् । अव॑ । अ॒सृ॒जः॒ । अ॒ध॒राचः॑ । अह॑न् । अहि॑म् ।
   अ॒श॒त्रुः । इ॒न्द्र॒ । ज॒ज्ञि॒षे॒ । विश्व॑म् । पु॒ष्य॒सि॒ । वार्य॑म् । तम् । त्वा॒ । परि॑ । स्व॒जा॒म॒हे॒ । नभ॑न्ताम् । अ॒न्य॒केषा॑म् । ज्या॒काः । अधि॑ । धन्व॑ऽसु ॥

   त्वम् । सिन्धून् । अव । असृजः । अधराचः । अहन् । अहिम् ।
   अशत्रुः । इन्द्र । जज्ञिषे । विश्वम् । पुष्यसि । वार्यम् । तम् । त्वा । परि । स्वजामहे । नभन्ताम् । अन्यकेषाम् । ज्याकाः । अधि । धन्वऽसु ॥

   tvám ǀ síndhūn ǀ áva ǀ asṛjaḥ ǀ adharā́caḥ ǀ áhan ǀ áhim ǀ
   aśatrúḥ ǀ indra ǀ jajñiṣe ǀ víśvam ǀ puṣyasi ǀ vā́ryam ǀ tám ǀ tvā ǀ pári ǀ svajāmahe ǀ nábhantām ǀ anyakéṣām ǀ jyākā́ḥ ǀ ádhi ǀ dhánva-su ǁ

   tvam ǀ sindhūn ǀ ava ǀ asṛjaḥ ǀ adharācaḥ ǀ ahan ǀ ahim ǀ
   aśatruḥ ǀ indra ǀ jajñiṣe ǀ viśvam ǀ puṣyasi ǀ vāryam ǀ tam ǀ tvā ǀ pari ǀ svajāmahe ǀ nabhantām ǀ anyakeṣām ǀ jyākāḥ ǀ adhi ǀ dhanva-su ǁ

   10.133.2 Aṣṭaka 8.7.21.2Anuvāka 10.11.30Interpretations

3. Ṛk 3

   वि षु विश्वा॒ अरा॑तयो॒ऽर्यो न॑शंत नो॒ धियः॑ ।
   अस्ता॑सि॒ शत्र॑वे व॒धं यो न॑ इंद्र॒ जिघां॑सति॒ या ते॑ रा॒तिर्द॒दिर्वसु॒ नभं॑तामन्य॒केषां॑ ज्या॒का अधि॒ धन्व॑सु ॥

   वि षु विश्वा अरातयो ऽर्यो नशन्त नो धियः |
   अस्तासि शत्रवे वधं यो न इन्द्र जिघांसति या ते रातिर् ददिर् वसु नभन्ताम् अन्यकेषां ज्याका अधि धन्वसु ||

   ví ṣú víśvā árātayo’ryó naśanta no dhíyaḥ ǀ
   ástāsi śátrave vadhám yó na indra jíghāṃsati yā́ te rātírdadírvásu nábhantāmanyakéṣām jyākā́ ádhi dhánvasu ǁ

   vi ṣu viśvā arātayo 'ryo naśanta no dhiyaḥ |
   astāsi śatrave vadhaṃ yo na indra jighāṃsati yā te rātir dadir vasu nabhantām anyakeṣāṃ jyākā adhi dhanvasu ||

   वि । सु । विश्वा॑ । अरा॑तयः । अ॒र्यः । न॒श॒न्त॒ । नः॒ । धियः॑ ।
   अस्ता॑ । अ॒सि॒ । शत्र॑वे । व॒धम् । यः । नः॒ । इ॒न्द्र॒ । जिघां॑सति । या । ते॒ । रा॒तिः । द॒दिः । वसु॑ । नभ॑न्ताम् । अ॒न्य॒केषा॑म् । ज्या॒काः । अधि॑ । धन्व॑ऽसु ॥

   वि । सु । विश्वा । अरातयः । अर्यः । नशन्त । नः । धियः ।
   अस्ता । असि । शत्रवे । वधम् । यः । नः । इन्द्र । जिघांसति । या । ते । रातिः । ददिः । वसु । नभन्ताम् । अन्यकेषाम् । ज्याकाः । अधि । धन्वऽसु ॥

   ví ǀ sú ǀ víśvā ǀ árātayaḥ ǀ aryáḥ ǀ naśanta ǀ naḥ ǀ dhíyaḥ ǀ
   ástā ǀ asi ǀ śátrave ǀ vadhám ǀ yáḥ ǀ naḥ ǀ indra ǀ jíghāṃsati ǀ yā́ ǀ te ǀ rātíḥ ǀ dadíḥ ǀ vásu ǀ nábhantām ǀ anyakéṣām ǀ jyākā́ḥ ǀ ádhi ǀ dhánva-su ǁ

   vi ǀ su ǀ viśvā ǀ arātayaḥ ǀ aryaḥ ǀ naśanta ǀ naḥ ǀ dhiyaḥ ǀ
   astā ǀ asi ǀ śatrave ǀ vadham ǀ yaḥ ǀ naḥ ǀ indra ǀ jighāṃsati ǀ yā ǀ te ǀ rātiḥ ǀ dadiḥ ǀ vasu ǀ nabhantām ǀ anyakeṣām ǀ jyākāḥ ǀ adhi ǀ dhanva-su ǁ

   10.133.3 Aṣṭaka 8.7.21.3Anuvāka 10.11.31Interpretations

4. Ṛk 4

   यो न॑ इंद्रा॒भितो॒ जनो॑ वृका॒युरा॒दिदे॑शति ।
   अ॒ध॒स्प॒दं तमीं॑ कृधि विबा॒धो अ॑सि सास॒हिर्नभं॑तामन्य॒केषां॑ ज्या॒का अधि॒ धन्व॑सु ॥

   यो न इन्द्राभितो जनो वृकायुर् आदिदेशति |
   अधस्पदं तम् ईं कृधि विबाधो असि सासहिर् नभन्ताम् अन्यकेषां ज्याका अधि धन्वसु ||

   yó na indrābhíto jáno vṛkāyúrādídeśati ǀ
   adhaspadám támīm kṛdhi vibādhó asi sāsahírnábhantāmanyakéṣām jyākā́ ádhi dhánvasu ǁ

   yo na indrābhito jano vṛkāyur ādideśati |
   adhaspadaṃ tam īṃ kṛdhi vibādho asi sāsahir nabhantām anyakeṣāṃ jyākā adhi dhanvasu ||

   यः । नः॒ । इ॒न्द्र॒ । अ॒भितः॑ । जनः॑ । वृ॒क॒ऽयुः । आ॒ऽदिदे॑शति ।
   अ॒धः॒ऽप॒दम् । तम् । ई॒म् । कृ॒धि॒ । वि॒ऽबा॒धः । अ॒सि॒ । स॒स॒हिः । नभ॑न्ताम् । अ॒न्य॒केषा॑म् । ज्या॒काः । अधि॑ । धन्व॑ऽसु ॥

   यः । नः । इन्द्र । अभितः । जनः । वृकऽयुः । आऽदिदेशति ।
   अधःऽपदम् । तम् । ईम् । कृधि । विऽबाधः । असि । ससहिः । नभन्ताम् । अन्यकेषाम् । ज्याकाः । अधि । धन्वऽसु ॥

   yáḥ ǀ naḥ ǀ indra ǀ abhítaḥ ǀ jánaḥ ǀ vṛka-yúḥ ǀ ā-dídeśati ǀ
   adhaḥ-padám ǀ tám ǀ īm ǀ kṛdhi ǀ vi-bādháḥ ǀ asi ǀ sasahíḥ ǀ nábhantām ǀ anyakéṣām ǀ jyākā́ḥ ǀ ádhi ǀ dhánva-su ǁ

   yaḥ ǀ naḥ ǀ indra ǀ abhitaḥ ǀ janaḥ ǀ vṛka-yuḥ ǀ ā-dideśati ǀ
   adhaḥ-padam ǀ tam ǀ īm ǀ kṛdhi ǀ vi-bādhaḥ ǀ asi ǀ sasahiḥ ǀ nabhantām ǀ anyakeṣām ǀ jyākāḥ ǀ adhi ǀ dhanva-su ǁ

   10.133.4 Aṣṭaka 8.7.21.4Anuvāka 10.11.32Interpretations

5. Ṛk 5

   यो न॑ इंद्राभि॒दास॑ति॒ सना॑भि॒र्यश्च॒ निष्ट्यः॑ ।
   अव॒ तस्य॒ बलं॑ तिर म॒हीव॒ द्यौरध॒ त्मना॒ नभं॑तामन्य॒केषां॑ ज्या॒का अधि॒ धन्व॑सु ॥

   यो न इन्द्राभिदासति सनाभिर् यश् च निष्ट्यः |
   अव तस्य बलं तिर महीव द्यौर् अध त्मना नभन्ताम् अन्यकेषां ज्याका अधि धन्वसु ||

   yó na indrābhidā́sati sánābhiryáśca níṣṭyaḥ ǀ
   áva tásya bálam tira mahī́va dyáurádha tmánā nábhantāmanyakéṣām jyākā́ ádhi dhánvasu ǁ

   yo na indrābhidāsati sanābhir yaś ca niṣṭyaḥ |
   ava tasya balaṃ tira mahīva dyaur adha tmanā nabhantām anyakeṣāṃ jyākā adhi dhanvasu ||

   यः । नः॒ । इ॒न्द्र॒ । अ॒भि॒ऽदास॑ति । सऽना॑भिः । यः । च॒ । निष्ट्यः॑ ।
   अव॑ । तस्य॑ । बल॑म् । ति॒र॒ । म॒हीऽइ॑व । द्यौः । अध॑ । त्मना॑ । नभ॑न्ताम् । अ॒न्य॒केषा॑म् । ज्या॒काः । अधि॑ । धन्व॑ऽसु ॥

   यः । नः । इन्द्र । अभिऽदासति । सऽनाभिः । यः । च । निष्ट्यः ।
   अव । तस्य । बलम् । तिर । महीऽइव । द्यौः । अध । त्मना । नभन्ताम् । अन्यकेषाम् । ज्याकाः । अधि । धन्वऽसु ॥

   yáḥ ǀ naḥ ǀ indra ǀ abhi-dā́sati ǀ sá-nābhiḥ ǀ yáḥ ǀ ca ǀ níṣṭyaḥ ǀ
   áva ǀ tásya ǀ bálam ǀ tira ǀ mahī́-iva ǀ dyáuḥ ǀ ádha ǀ tmánā ǀ nábhantām ǀ anyakéṣām ǀ jyākā́ḥ ǀ ádhi ǀ dhánva-su ǁ

   yaḥ ǀ naḥ ǀ indra ǀ abhi-dāsati ǀ sa-nābhiḥ ǀ yaḥ ǀ ca ǀ niṣṭyaḥ ǀ
   ava ǀ tasya ǀ balam ǀ tira ǀ mahī-iva ǀ dyauḥ ǀ adha ǀ tmanā ǀ nabhantām ǀ anyakeṣām ǀ jyākāḥ ǀ adhi ǀ dhanva-su ǁ

   10.133.5 Aṣṭaka 8.7.21.5Anuvāka 10.11.33Interpretations

6. Ṛk 6

   व॒यमिं॑द्र त्वा॒यवः॑ सखि॒त्वमा र॑भामहे ।
   ऋ॒तस्य॑ नः प॒था न॒याति॒ विश्वा॑नि दुरि॒ता नभं॑तामन्य॒केषां॑ ज्या॒का अधि॒ धन्व॑सु ॥

   वयम् इन्द्र त्वायवः सखित्वम् आ रभामहे |
   ऋतस्य नः पथा नयाति विश्वानि दुरिता नभन्ताम् अन्यकेषां ज्याका अधि धन्वसु ||

   vayámindra tvāyávaḥ sakhitvámā́ rabhāmahe ǀ
   ṛtásya naḥ pathā́ nayā́ti víśvāni duritā́ nábhantāmanyakéṣām jyākā́ ádhi dhánvasu ǁ

   vayam indra tvāyavaḥ sakhitvam ā rabhāmahe |
   ṛtasya naḥ pathā nayāti viśvāni duritā nabhantām anyakeṣāṃ jyākā adhi dhanvasu ||

   व॒यम् । इ॒न्द्र॒ । त्वा॒ऽयवः॑ । स॒खि॒ऽत्वम् । आ । र॒भा॒म॒हे॒ ।
   ऋ॒तस्य॑ । नः॒ । प॒था । न॒य॒ । अति॑ । विश्वा॑नि । दुः॒ऽइ॒ता । नभ॑न्ताम् । अ॒न्य॒केषा॑म् । ज्या॒काः । अधि॑ । धन्व॑ऽसु ॥

   वयम् । इन्द्र । त्वाऽयवः । सखिऽत्वम् । आ । रभामहे ।
   ऋतस्य । नः । पथा । नय । अति । विश्वानि । दुःऽइता । नभन्ताम् । अन्यकेषाम् । ज्याकाः । अधि । धन्वऽसु ॥

   vayám ǀ indra ǀ tvā-yávaḥ ǀ sakhi-tvám ǀ ā́ ǀ rabhāmahe ǀ
   ṛtásya ǀ naḥ ǀ pathā́ ǀ naya ǀ áti ǀ víśvāni ǀ duḥ-itā́ ǀ nábhantām ǀ anyakéṣām ǀ jyākā́ḥ ǀ ádhi ǀ dhánva-su ǁ

   vayam ǀ indra ǀ tvā-yavaḥ ǀ sakhi-tvam ǀ ā ǀ rabhāmahe ǀ
   ṛtasya ǀ naḥ ǀ pathā ǀ naya ǀ ati ǀ viśvāni ǀ duḥ-itā ǀ nabhantām ǀ anyakeṣām ǀ jyākāḥ ǀ adhi ǀ dhanva-su ǁ

   10.133.6 Aṣṭaka 8.7.21.6Anuvāka 10.11.34Interpretations

7. Ṛk 7

   अ॒स्मभ्यं॒ सु त्वमिं॑द्र॒ तां शि॑क्ष॒ या दोह॑ते॒ प्रति॒ वरं॑ जरि॒त्रे ।
   अच्छि॑द्रोध्नी पी॒पय॒द्यथा॑ नः स॒हस्र॑धारा॒ पय॑सा म॒ही गौः ॥

   अस्मभ्यं सु त्वम् इन्द्र तां शिक्ष या दोहते प्रति वरं जरित्रे |
   अच्छिद्रोध्नी पीपयद् यथा नः सहस्रधारा पयसा मही गौः ||

   asmábhyam sú tvámindra tā́m śikṣa yā́ dóhate práti váram jaritré ǀ
   ácchidrodhnī pīpáyadyáthā naḥ sahásradhārā páyasā mahī́ gáuḥ ǁ

   asmabhyaṃ su tvam indra tāṃ śikṣa yā dohate prati varaṃ jaritre |
   acchidrodhnī pīpayad yathā naḥ sahasradhārā payasā mahī gauḥ ||

   अ॒स्मभ्य॑म् । सु । त्वम् । इ॒न्द्र॒ । ताम् । शि॒क्ष॒ । या । दोह॑ते । प्रति॑ । वर॑म् । ज॒रि॒त्रे ।
   अच्छि॑द्रऽऊध्नी । पी॒पय॑त् । यथा॑ । नः॒ । स॒हस्र॑ऽधारा । पय॑सा । म॒ही । गौः ॥

   अस्मभ्यम् । सु । त्वम् । इन्द्र । ताम् । शिक्ष । या । दोहते । प्रति । वरम् । जरित्रे ।
   अच्छिद्रऽऊध्नी । पीपयत् । यथा । नः । सहस्रऽधारा । पयसा । मही । गौः ॥

   asmábhyam ǀ sú ǀ tvám ǀ indra ǀ tā́m ǀ śikṣa ǀ yā́ ǀ dóhate ǀ práti ǀ váram ǀ jaritré ǀ
   ácchidra-ūdhnī ǀ pīpáyat ǀ yáthā ǀ naḥ ǀ sahásra-dhārā ǀ páyasā ǀ mahī́ ǀ gáuḥ ǁ

   asmabhyam ǀ su ǀ tvam ǀ indra ǀ tām ǀ śikṣa ǀ yā ǀ dohate ǀ prati ǀ varam ǀ jaritre ǀ
   acchidra-ūdhnī ǀ pīpayat ǀ yathā ǀ naḥ ǀ sahasra-dhārā ǀ payasā ǀ mahī ǀ gauḥ ǁ

   10.133.7 Aṣṭaka 8.7.21.7Anuvāka 10.11.35Interpretations

Text, recitation and interpretations from the Ṛgveda database of theveda.org.in.