Devatā देवता

Indra

Ṛṣi ऋषि

Mudgala Bhārmyaśva

Chandas छन्दस्

Triṣṭubh, Bṛhatī

1. Ṛk 1

   प्र ते॒ रथं॑ मिथू॒कृत॒मिंद्रो॑ऽवतु धृष्णु॒या ।
   अ॒स्मिन्ना॒जौ पु॑रुहूत श्र॒वाय्ये॑ धनभ॒क्षेषु॑ नोऽव ॥

   प्र ते रथम् मिथूकृतम् इन्द्रो ऽवतु धृष्णुया |
   अस्मिन्न् आजौ पुरुहूत श्रवाय्ये धनभक्षेषु नो ऽव ||

   prá te rátham mithūkṛ́tamíndro’vatu dhṛṣṇuyā́ ǀ
   asmínnājáu puruhūta śravā́yye dhanabhakṣéṣu no’va ǁ

   pra te ratham mithūkṛtam indro 'vatu dhṛṣṇuyā |
   asminn ājau puruhūta śravāyye dhanabhakṣeṣu no 'va ||

   प्र । ते॒ । रथ॑म् । मि॒थु॒ऽकृत॑म् । इन्द्रः॑ । अ॒व॒तु॒ । धृ॒ष्णु॒ऽया ।
   अ॒स्मिन् । आ॒जौ । पु॒रु॒ऽहू॒त॒ । श्र॒वाय्ये॑ । ध॒न॒ऽभ॒क्षेषु॑ । नः॒ । अ॒व॒ ॥

   प्र । ते । रथम् । मिथुऽकृतम् । इन्द्रः । अवतु । धृष्णुऽया ।
   अस्मिन् । आजौ । पुरुऽहूत । श्रवाय्ये । धनऽभक्षेषु । नः । अव ॥

   prá ǀ te ǀ rátham ǀ mithu-kṛ́tam ǀ índraḥ ǀ avatu ǀ dhṛṣṇu-yā́ ǀ
   asmín ǀ ājáu ǀ puru-hūta ǀ śravā́yye ǀ dhana-bhakṣéṣu ǀ naḥ ǀ ava ǁ

   pra ǀ te ǀ ratham ǀ mithu-kṛtam ǀ indraḥ ǀ avatu ǀ dhṛṣṇu-yā ǀ
   asmin ǀ ājau ǀ puru-hūta ǀ śravāyye ǀ dhana-bhakṣeṣu ǀ naḥ ǀ ava ǁ

   10.102.1 Aṣṭaka 8.5.20.1Anuvāka 10.9.25Interpretations

2. Ṛk 2

   उत्स्म॒ वातो॑ वहति॒ वासो॑ऽस्या॒ अधि॑रथं॒ यदज॑यत्स॒हस्रं॑ ।
   र॒थीर॑भून्मुद्ग॒लानी॒ गवि॑ष्टौ॒ भरे॑ कृ॒तं व्य॑चेदिंद्रसे॒ना ॥

   उत् स्म वातो वहति वासो ऽस्या अधिरथं यद् अजयत् सहस्रम् |
   रथीर् अभून् मुद्गलानी गविष्टौ भरे कृतं व्य् अचेद् इन्द्रसेना ||

   útsma vā́to vahati vā́so’syā ádhiratham yádájayatsahásram ǀ
   rathī́rabhūnmudgalā́nī gáviṣṭau bháre kṛtám vyácedindrasenā́ ǁ

   ut sma vāto vahati vāso 'syā adhirathaṃ yad ajayat sahasram |
   rathīr abhūn mudgalānī gaviṣṭau bhare kṛtaṃ vy aced indrasenā ||

   उत् । स्म॒ । वातः॑ । व॒ह॒ति॒ । वासः॑ । अ॒स्याः॒ । अधि॑ऽरथम् । यत् । अज॑यत् । स॒हस्र॑म् ।
   र॒थीः । अ॒भू॒त् । मु॒द्ग॒लानी॑ । गोऽइ॑ष्टौ । भरे॑ । कृ॒तम् । वि । अ॒चे॒त् । इ॒न्द्र॒ऽसे॒ना ॥

   उत् । स्म । वातः । वहति । वासः । अस्याः । अधिऽरथम् । यत् । अजयत् । सहस्रम् ।
   रथीः । अभूत् । मुद्गलानी । गोऽइष्टौ । भरे । कृतम् । वि । अचेत् । इन्द्रऽसेना ॥

   út ǀ sma ǀ vā́taḥ ǀ vahati ǀ vā́saḥ ǀ asyāḥ ǀ ádhi-ratham ǀ yát ǀ ájayat ǀ sahásram ǀ
   rathī́ḥ ǀ abhūt ǀ mudgalā́nī ǀ gó-iṣṭau ǀ bháre ǀ kṛtám ǀ ví ǀ acet ǀ indra-senā́ ǁ

   ut ǀ sma ǀ vātaḥ ǀ vahati ǀ vāsaḥ ǀ asyāḥ ǀ adhi-ratham ǀ yat ǀ ajayat ǀ sahasram ǀ
   rathīḥ ǀ abhūt ǀ mudgalānī ǀ go-iṣṭau ǀ bhare ǀ kṛtam ǀ vi ǀ acet ǀ indra-senā ǁ

   10.102.2 Aṣṭaka 8.5.20.2Anuvāka 10.9.26Interpretations

3. Ṛk 3

   अं॒तर्य॑च्छ॒ जिघां॑सतो॒ वज्र॑मिंद्राभि॒दास॑तः ।
   दास॑स्य वा मघव॒न्नार्य॑स्य वा सनु॒तर्य॑वया व॒धं ॥

   अन्तर् यच्छ जिघांसतो वज्रम् इन्द्राभिदासतः |
   दासस्य वा मघवन्न् आर्यस्य वा सनुतर् यवया वधम् ||

   antáryaccha jíghāṃsato vájramindrābhidā́sataḥ ǀ
   dā́sasya vā maghavannā́ryasya vā sanutáryavayā vadhám ǁ

   antar yaccha jighāṃsato vajram indrābhidāsataḥ |
   dāsasya vā maghavann āryasya vā sanutar yavayā vadham ||

   अ॒न्तः । य॒च्छ॒ । जिघां॑सतः । वज्र॑म् । इ॒न्द्र॒ । अ॒भि॒ऽदास॑तः ।
   दास॑स्य । वा॒ । म॒घ॒ऽव॒न् । आर्य॑स्य । वा॒ । स॒नु॒तः । य॒व॒य॒ । व॒धम् ॥

   अन्तः । यच्छ । जिघांसतः । वज्रम् । इन्द्र । अभिऽदासतः ।
   दासस्य । वा । मघऽवन् । आर्यस्य । वा । सनुतः । यवय । वधम् ॥

   antáḥ ǀ yaccha ǀ jíghāṃsataḥ ǀ vájram ǀ indra ǀ abhi-dā́sataḥ ǀ
   dā́sasya ǀ vā ǀ magha-van ǀ ā́ryasya ǀ vā ǀ sanutáḥ ǀ yavaya ǀ vadhám ǁ

   antaḥ ǀ yaccha ǀ jighāṃsataḥ ǀ vajram ǀ indra ǀ abhi-dāsataḥ ǀ
   dāsasya ǀ vā ǀ magha-van ǀ āryasya ǀ vā ǀ sanutaḥ ǀ yavaya ǀ vadham ǁ

   10.102.3 Aṣṭaka 8.5.20.3Anuvāka 10.9.27Interpretations

4. Ṛk 4

   उ॒द्नो ह्र॒दम॑पिब॒ज्जर्हृ॑षाणः॒ कूटं॑ स्म तृं॒हद॒भिमा॑तिमेति ।
   प्र मु॒ष्कभा॑रः॒ श्रव॑ इ॒च्छमा॑नोऽजि॒रं बा॒हू अ॑भर॒त्सिषा॑सन् ॥

   उद्नो ह्रदम् अपिबज् जर्हृषाणः कूटं स्म तृंहद् अभिमातिम् एति |
   प्र मुष्कभारः श्रव इच्छमानो ऽजिरम् बाहू अभरत् सिषासन् ||

   udnó hradámapibajjárhṛṣāṇaḥ kū́ṭam sma tṛṃhádabhímātimeti ǀ
   prá muṣkábhāraḥ śráva icchámāno’jirám bāhū́ abharatsíṣāsan ǁ

   udno hradam apibaj jarhṛṣāṇaḥ kūṭaṃ sma tṛṃhad abhimātim eti |
   pra muṣkabhāraḥ śrava icchamāno 'jiram bāhū abharat siṣāsan ||

   उ॒द्नः । ह्र॒दम् । अ॒पि॒ब॒त् । जर्हृ॑षाणः । कूट॑म् । स्म॒ । तृं॒हत् । अ॒भिऽमा॑तिम् । ए॒ति॒ ।
   प्र । मु॒ष्कऽभा॑रः । श्रवः॑ । इ॒च्छमा॑नः । अ॒जि॒रम् । बा॒हू इति॑ । अ॒भ॒र॒त् । सिसा॑सन् ॥

   उद्नः । ह्रदम् । अपिबत् । जर्हृषाणः । कूटम् । स्म । तृंहत् । अभिऽमातिम् । एति ।
   प्र । मुष्कऽभारः । श्रवः । इच्छमानः । अजिरम् । बाहू इति । अभरत् । सिसासन् ॥

   udnáḥ ǀ hradám ǀ apibat ǀ járhṛṣāṇaḥ ǀ kū́ṭam ǀ sma ǀ tṛṃhát ǀ abhí-mātim ǀ eti ǀ
   prá ǀ muṣká-bhāraḥ ǀ śrávaḥ ǀ icchámānaḥ ǀ ajirám ǀ bāhū́ íti ǀ abharat ǀ sísāsan ǁ

   udnaḥ ǀ hradam ǀ apibat ǀ jarhṛṣāṇaḥ ǀ kūṭam ǀ sma ǀ tṛṃhat ǀ abhi-mātim ǀ eti ǀ
   pra ǀ muṣka-bhāraḥ ǀ śravaḥ ǀ icchamānaḥ ǀ ajiram ǀ bāhū iti ǀ abharat ǀ sisāsan ǁ

   10.102.4 Aṣṭaka 8.5.20.4Anuvāka 10.9.28Interpretations

5. Ṛk 5

   न्य॑क्रंदयन्नुप॒यंत॑ एन॒ममे॑हयन्वृष॒भं मध्य॑ आ॒जेः ।
   तेन॒ सूभ॑र्वं श॒तव॑त्स॒हस्रं॒ गवां॒ मुद्ग॑लः प्र॒धने॑ जिगाय ॥

   न्य् अक्रन्दयन्न् उपयन्त एनम् अमेहयन् वृषभम् मध्य आजेः |
   तेन सूभर्वं शतवत् सहस्रं गवाम् मुद्गलः प्रधने जिगाय ||

   nyákrandayannupayánta enamámehayanvṛṣabhám mádhya ājéḥ ǀ
   téna sū́bharvam śatávatsahásram gávām múdgalaḥ pradháne jigāya ǁ

   ny akrandayann upayanta enam amehayan vṛṣabham madhya ājeḥ |
   tena sūbharvaṃ śatavat sahasraṃ gavām mudgalaḥ pradhane jigāya ||

   नि । अ॒क्र॒न्द॒य॒न् । उ॒प॒ऽयन्तः॑ । ए॒न॒म् । अमे॑हयन् । वृ॒ष॒भम् । मध्ये॑ । आ॒जेः ।
   तेन॑ । सूभ॑र्वम् । श॒तऽव॑त् । स॒हस्र॑म् । गवा॑म् । मुद्ग॑लः । प्र॒ऽधने॑ । जि॒गा॒य॒ ॥

   नि । अक्रन्दयन् । उपऽयन्तः । एनम् । अमेहयन् । वृषभम् । मध्ये । आजेः ।
   तेन । सूभर्वम् । शतऽवत् । सहस्रम् । गवाम् । मुद्गलः । प्रऽधने । जिगाय ॥

   ní ǀ akrandayan ǀ upa-yántaḥ ǀ enam ǀ ámehayan ǀ vṛṣabhám ǀ mádhye ǀ ājéḥ ǀ
   téna ǀ sū́bharvam ǀ śatá-vat ǀ sahásram ǀ gávām ǀ múdgalaḥ ǀ pra-dháne ǀ jigāya ǁ

   ni ǀ akrandayan ǀ upa-yantaḥ ǀ enam ǀ amehayan ǀ vṛṣabham ǀ madhye ǀ ājeḥ ǀ
   tena ǀ sūbharvam ǀ śata-vat ǀ sahasram ǀ gavām ǀ mudgalaḥ ǀ pra-dhane ǀ jigāya ǁ

   10.102.5 Aṣṭaka 8.5.20.5Anuvāka 10.9.29Interpretations

6. Ṛk 6

   क॒कर्द॑वे वृष॒भो यु॒क्त आ॑सी॒दवा॑वची॒त्सार॑थिरस्य के॒शी ।
   दुधे॑र्यु॒क्तस्य॒ द्रव॑तः स॒हान॑स ऋ॒च्छंति॑ ष्मा नि॒ष्पदो॑ मुद्ग॒लानीं॑ ॥

   ककर्दवे वृषभो युक्त आसीद् अवावचीत् सारथिर् अस्य केशी |
   दुधेर् युक्तस्य द्रवतः सहानस ऋच्छन्ति ष्मा निष्पदो मुद्गलानीम् ||

   kakárdave vṛṣabhó yuktá āsīdávāvacītsā́rathirasya keśī́ ǀ
   dúdheryuktásya drávataḥ sahā́nasa ṛcchánti ṣmā niṣpádo mudgalā́nīm ǁ

   kakardave vṛṣabho yukta āsīd avāvacīt sārathir asya keśī |
   dudher yuktasya dravataḥ sahānasa ṛcchanti ṣmā niṣpado mudgalānīm ||

   क॒कर्द॑वे । वृ॒ष॒भः । यु॒क्तः । आ॒सी॒त् । अवा॑वचीत् । सार॑थिः । अ॒स्य॒ । के॒शी ।
   दुधेः॑ । यु॒क्तस्य॑ । द्रव॑तः । स॒ह । अन॑सा । ऋ॒च्छन्ति॑ । स्म॒ । निः॒ऽपदः॑ । मु॒द्ग॒लानी॑म् ॥

   ककर्दवे । वृषभः । युक्तः । आसीत् । अवावचीत् । सारथिः । अस्य । केशी ।
   दुधेः । युक्तस्य । द्रवतः । सह । अनसा । ऋच्छन्ति । स्म । निःऽपदः । मुद्गलानीम् ॥

   kakárdave ǀ vṛṣabháḥ ǀ yuktáḥ ǀ āsīt ǀ ávāvacīt ǀ sā́rathiḥ ǀ asya ǀ keśī́ ǀ
   dúdheḥ ǀ yuktásya ǀ drávataḥ ǀ sahá ǀ ánasā ǀ ṛcchánti ǀ sma ǀ niḥ-pádaḥ ǀ mudgalā́nīm ǁ

   kakardave ǀ vṛṣabhaḥ ǀ yuktaḥ ǀ āsīt ǀ avāvacīt ǀ sārathiḥ ǀ asya ǀ keśī ǀ
   dudheḥ ǀ yuktasya ǀ dravataḥ ǀ saha ǀ anasā ǀ ṛcchanti ǀ sma ǀ niḥ-padaḥ ǀ mudgalānīm ǁ

   10.102.6 Aṣṭaka 8.5.20.6Anuvāka 10.9.30Interpretations

7. Ṛk 7

   उ॒त प्र॒धिमुद॑हन्नस्य वि॒द्वानुपा॑युन॒ग्वंस॑ग॒मत्र॒ शिक्ष॑न् ।
   इंद्र॒ उदा॑व॒त्पति॒मघ्न्या॑ना॒मरं॑हत॒ पद्या॑भिः क॒कुद्मा॑न् ॥

   उत प्रधिम् उद् अहन्न् अस्य विद्वान् उपायुनग् वंसगम् अत्र शिक्षन् |
   इन्द्र उद् आवत् पतिम् अघ्न्यानाम् अरंहत पद्याभिः ककुद्मान् ||

   utá pradhímúdahannasya vidvā́núpāyunagváṃsagamátra śíkṣan ǀ
   índra údāvatpátimághnyānāmáraṃhata pádyābhiḥ kakúdmān ǁ

   uta pradhim ud ahann asya vidvān upāyunag vaṃsagam atra śikṣan |
   indra ud āvat patim aghnyānām araṃhata padyābhiḥ kakudmān ||

   उ॒त । प्र॒ऽधिम् । उत् । अ॒ह॒न् । अ॒स्य॒ । वि॒द्वान् । उप॑ । अ॒यु॒न॒क् । वंस॑गम् । अत्र॑ । शिक्ष॑न् ।
   इन्द्रः॑ । उत् । आ॒व॒त् । पति॑म् । अघ्न्या॑नाम् । अरं॑हत । पद्या॑भिः । क॒कुत्ऽमा॑न् ॥

   उत । प्रऽधिम् । उत् । अहन् । अस्य । विद्वान् । उप । अयुनक् । वंसगम् । अत्र । शिक्षन् ।
   इन्द्रः । उत् । आवत् । पतिम् । अघ्न्यानाम् । अरंहत । पद्याभिः । ककुत्ऽमान् ॥

   utá ǀ pra-dhím ǀ út ǀ ahan ǀ asya ǀ vidvā́n ǀ úpa ǀ ayunak ǀ váṃsagam ǀ átra ǀ śíkṣan ǀ
   índraḥ ǀ út ǀ āvat ǀ pátim ǀ ághnyānām ǀ áraṃhata ǀ pádyābhiḥ ǀ kakút-mān ǁ

   uta ǀ pra-dhim ǀ ut ǀ ahan ǀ asya ǀ vidvān ǀ upa ǀ ayunak ǀ vaṃsagam ǀ atra ǀ śikṣan ǀ
   indraḥ ǀ ut ǀ āvat ǀ patim ǀ aghnyānām ǀ araṃhata ǀ padyābhiḥ ǀ kakut-mān ǁ

   10.102.7 Aṣṭaka 8.5.21.1Anuvāka 10.9.31Interpretations

8. Ṛk 8

   शु॒नम॑ष्ट्रा॒व्य॑चरत्कप॒र्दी व॑र॒त्रायां॒ दार्वा॒नह्य॑मानः ।
   नृ॒म्णानि॑ कृ॒ण्वन्ब॒हवे॒ जना॑य॒ गाः प॑स्पशा॒नस्तवि॑षीरधत्त ॥

   शुनम् अष्ट्राव्य् अचरत् कपर्दी वरत्रायां दार्व् आनह्यमानः |
   नृम्णानि कृण्वन् बहवे जनाय गाः पस्पशानस् तविषीर् अधत्त ||

   śunámaṣṭrāvyácaratkapardī́ varatrā́yām dā́rvānáhyamānaḥ ǀ
   nṛmṇā́ni kṛṇvánbaháve jánāya gā́ḥ paspaśānástáviṣīradhatta ǁ

   śunam aṣṭrāvy acarat kapardī varatrāyāṃ dārv ānahyamānaḥ |
   nṛmṇāni kṛṇvan bahave janāya gāḥ paspaśānas taviṣīr adhatta ||

   शु॒नम् । अ॒ष्ट्रा॒ऽवी । अ॒च॒र॒त् । क॒प॒र्दी । व॒र॒त्राया॑म् । दारु॑ । आ॒ऽनह्य॑मानः ।
   नृ॒म्णानि॑ । कृ॒ण्वन् । ब॒हवे॑ । जना॑य । गाः । प॒स्प॒शा॒नः । तवि॑षीः । अ॒ध॒त्त॒ ॥

   शुनम् । अष्ट्राऽवी । अचरत् । कपर्दी । वरत्रायाम् । दारु । आऽनह्यमानः ।
   नृम्णानि । कृण्वन् । बहवे । जनाय । गाः । पस्पशानः । तविषीः । अधत्त ॥

   śunám ǀ aṣṭrā-vī́ ǀ acarat ǀ kapardī́ ǀ varatrā́yām ǀ dā́ru ǀ ā-náhyamānaḥ ǀ
   nṛmṇā́ni ǀ kṛṇván ǀ baháve ǀ jánāya ǀ gā́ḥ ǀ paspaśānáḥ ǀ táviṣīḥ ǀ adhatta ǁ

   śunam ǀ aṣṭrā-vī ǀ acarat ǀ kapardī ǀ varatrāyām ǀ dāru ǀ ā-nahyamānaḥ ǀ
   nṛmṇāni ǀ kṛṇvan ǀ bahave ǀ janāya ǀ gāḥ ǀ paspaśānaḥ ǀ taviṣīḥ ǀ adhatta ǁ

   10.102.8 Aṣṭaka 8.5.21.2Anuvāka 10.9.32Interpretations

9. Ṛk 9

   इ॒मं तं प॑श्य वृष॒भस्य॒ युंजं॒ काष्ठा॑या॒ मध्ये॑ द्रुघ॒णं शया॑नं ।
   येन॑ जि॒गाय॑ श॒तव॑त्स॒हस्रं॒ गवां॒ मुद्ग॑लः पृत॒नाज्ये॑षु ॥

   इमं तम् पश्य वृषभस्य युञ्जं काष्ठाया मध्ये द्रुघणं शयानम् |
   येन जिगाय शतवत् सहस्रं गवाम् मुद्गलः पृतनाज्येषु ||

   imám tám paśya vṛṣabhásya yúñjam kā́ṣṭhāyā mádhye drughaṇám śáyānam ǀ
   yéna jigā́ya śatávatsahásram gávām múdgalaḥ pṛtanā́jyeṣu ǁ

   imaṃ tam paśya vṛṣabhasya yuñjaṃ kāṣṭhāyā madhye drughaṇaṃ śayānam |
   yena jigāya śatavat sahasraṃ gavām mudgalaḥ pṛtanājyeṣu ||

   इ॒मम् । तम् । प॒श्य॒ । वृ॒ष॒भस्य॑ । युञ्ज॑म् । काष्ठा॑याः । मध्ये॑ । द्रु॒ऽघ॒नम् । शया॑नम् ।
   येन॑ । जि॒गाय॑ । श॒तऽव॑त् । स॒हस्र॑म् । गवा॑म् । मुद्ग॑लः । पृ॒त॒नाज्ये॑षु ॥

   इमम् । तम् । पश्य । वृषभस्य । युञ्जम् । काष्ठायाः । मध्ये । द्रुऽघनम् । शयानम् ।
   येन । जिगाय । शतऽवत् । सहस्रम् । गवाम् । मुद्गलः । पृतनाज्येषु ॥

   imám ǀ tám ǀ paśya ǀ vṛṣabhásya ǀ yúñjam ǀ kā́ṣṭhāyāḥ ǀ mádhye ǀ dru-ghanám ǀ śáyānam ǀ
   yéna ǀ jigā́ya ǀ śatá-vat ǀ sahásram ǀ gávām ǀ múdgalaḥ ǀ pṛtanā́jyeṣu ǁ

   imam ǀ tam ǀ paśya ǀ vṛṣabhasya ǀ yuñjam ǀ kāṣṭhāyāḥ ǀ madhye ǀ dru-ghanam ǀ śayānam ǀ
   yena ǀ jigāya ǀ śata-vat ǀ sahasram ǀ gavām ǀ mudgalaḥ ǀ pṛtanājyeṣu ǁ

   10.102.9 Aṣṭaka 8.5.21.3Anuvāka 10.9.33Interpretations

10. Ṛk 10

    आ॒रे अ॒घा को न्वि१॒॑त्था द॑दर्श॒ यं युं॒जंति॒ तम्वा स्था॑पयंति ।
    नास्मै॒ तृणं॒ नोद॒कमा भ॑रं॒त्युत्त॑रो धु॒रो व॑हति प्र॒देदि॑शत् ॥

    आरे अघा को न्व् इत्था ददर्श यं युञ्जन्ति तम् व् आ स्थापयन्ति |
    नास्मै तृणं नोदकम् आ भरन्त्य् उत्तरो धुरो वहति प्रदेदिशत् ||

    āré aghā́ kó nvítthā́ dadarśa yám yuñjánti támvā́ sthāpayanti ǀ
    nā́smai tṛ́ṇam nódakámā́ bharantyúttaro dhuró vahati pradédiśat ǁ

    āre aghā ko nv itthā dadarśa yaṃ yuñjanti tam v ā sthāpayanti |
    nāsmai tṛṇaṃ nodakam ā bharanty uttaro dhuro vahati pradediśat ||

    आ॒रे । अ॒घा । कः । नु । इ॒त्था । द॒द॒र्श॒ । यम् । यु॒ञ्जन्ति॑ । तम् । ऊं॒ इति॑ । आ । स्था॒प॒य॒न्ति॒ ।
    न । अ॒स्मै॒ । तृण॑म् । न । उ॒द॒कम् । आ । भ॒र॒न्ति॒ । उत्ऽत॑रः । धु॒रः । व॒ह॒ति॒ । प्र॒ऽदेदि॑शत् ॥

    आरे । अघा । कः । नु । इत्था । ददर्श । यम् । युञ्जन्ति । तम् । ऊं इति । आ । स्थापयन्ति ।
    न । अस्मै । तृणम् । न । उदकम् । आ । भरन्ति । उत्ऽतरः । धुरः । वहति । प्रऽदेदिशत् ॥

    āré ǀ aghā́ ǀ káḥ ǀ nú ǀ itthā́ ǀ dadarśa ǀ yám ǀ yuñjánti ǀ tám ǀ ūṃ íti ǀ ā́ ǀ sthāpayanti ǀ
    ná ǀ asmai ǀ tṛ́ṇam ǀ ná ǀ udakám ǀ ā́ ǀ bharanti ǀ út-taraḥ ǀ dhuráḥ ǀ vahati ǀ pra-dédiśat ǁ

    āre ǀ aghā ǀ kaḥ ǀ nu ǀ itthā ǀ dadarśa ǀ yam ǀ yuñjanti ǀ tam ǀ ūṃ iti ǀ ā ǀ sthāpayanti ǀ
    na ǀ asmai ǀ tṛṇam ǀ na ǀ udakam ǀ ā ǀ bharanti ǀ ut-taraḥ ǀ dhuraḥ ǀ vahati ǀ pra-dediśat ǁ

    10.102.10 Aṣṭaka 8.5.21.4Anuvāka 10.9.34Interpretations

11. Ṛk 11

    प॒रि॒वृ॒क्तेव॑ पति॒विद्य॑मान॒ट् पीप्या॑ना॒ कूच॑क्रेणेव सिं॒चन् ।
    ए॒षै॒ष्या॑ चिद्र॒थ्या॑ जयेम सुमं॒गलं॒ सिन॑वदस्तु सा॒तं ॥

    परिवृक्तेव पतिविद्यम् आनट् पीप्याना कूचक्रेणेव सिञ्चन् |
    एषैष्या चिद् रथ्या जयेम सुमङ्गलं सिनवद् अस्तु सातम् ||

    parivṛktéva pativídyamānaṭ pī́pyānā kū́cakreṇeva siñcán ǀ
    eṣaiṣyā́ cidrathyā́ jayema sumaṅgálam sínavadastu sātám ǁ

    parivṛkteva patividyam ānaṭ pīpyānā kūcakreṇeva siñcan |
    eṣaiṣyā cid rathyā jayema sumaṅgalaṃ sinavad astu sātam ||

    प॒रि॒वृ॒क्ताऽइ॑व । प॒ति॒ऽविद्य॑म् । आ॒न॒ट् । पीप्या॑ना । कूच॑क्रेणऽइव । सि॒ञ्चन् ।
    ए॒ष॒ऽए॒ष्या॑ । चि॒त् । र॒थ्या॑ । ज॒ये॒म॒ । सु॒ऽम॒ङ्गल॑म् । सिन॑ऽवत् । अ॒स्तु॒ । सा॒तम् ॥

    परिवृक्ताऽइव । पतिऽविद्यम् । आनट् । पीप्याना । कूचक्रेणऽइव । सिञ्चन् ।
    एषऽएष्या । चित् । रथ्या । जयेम । सुऽमङ्गलम् । सिनऽवत् । अस्तु । सातम् ॥

    parivṛktā́-iva ǀ pati-vídyam ǀ ānaṭ ǀ pī́pyānā ǀ kū́cakreṇa-iva ǀ siñcán ǀ
    eṣa-eṣyā́ ǀ cit ǀ rathyā́ ǀ jayema ǀ su-maṅgálam ǀ sína-vat ǀ astu ǀ sātám ǁ

    parivṛktā-iva ǀ pati-vidyam ǀ ānaṭ ǀ pīpyānā ǀ kūcakreṇa-iva ǀ siñcan ǀ
    eṣa-eṣyā ǀ cit ǀ rathyā ǀ jayema ǀ su-maṅgalam ǀ sina-vat ǀ astu ǀ sātam ǁ

    10.102.11 Aṣṭaka 8.5.21.5Anuvāka 10.9.35Interpretations

12. Ṛk 12

    त्वं विश्व॑स्य॒ जग॑त॒श्चक्षु॑रिंद्रासि॒ चक्षु॑षः ।
    वृषा॒ यदा॒जिं वृष॑णा॒ सिषा॑ससि चो॒दय॒न्वध्रि॑णा यु॒जा ॥

    त्वं विश्वस्य जगतश् चक्षुर् इन्द्रासि चक्षुषः |
    वृषा यद् आजिं वृषणा सिषाससि चोदयन् वध्रिणा युजा ||

    tvám víśvasya jágataścákṣurindrāsi cákṣuṣaḥ ǀ
    vṛ́ṣā yádājím vṛ́ṣaṇā síṣāsasi codáyanvádhriṇā yujā́ ǁ

    tvaṃ viśvasya jagataś cakṣur indrāsi cakṣuṣaḥ |
    vṛṣā yad ājiṃ vṛṣaṇā siṣāsasi codayan vadhriṇā yujā ||

    त्वम् । विश्व॑स्य । जग॑तः । चक्षुः॑ । इ॒न्द्र॒ । अ॒सि॒ । चक्षु॑षः ।
    वृषा॑ । यत् । आ॒जिम् । वृष॑णा । सिसा॑ससि । चो॒दय॑न् । वध्रि॑णा । यु॒जा ॥

    त्वम् । विश्वस्य । जगतः । चक्षुः । इन्द्र । असि । चक्षुषः ।
    वृषा । यत् । आजिम् । वृषणा । सिसाससि । चोदयन् । वध्रिणा । युजा ॥

    tvám ǀ víśvasya ǀ jágataḥ ǀ cákṣuḥ ǀ indra ǀ asi ǀ cákṣuṣaḥ ǀ
    vṛ́ṣā ǀ yát ǀ ājím ǀ vṛ́ṣaṇā ǀ sísāsasi ǀ codáyan ǀ vádhriṇā ǀ yujā́ ǁ

    tvam ǀ viśvasya ǀ jagataḥ ǀ cakṣuḥ ǀ indra ǀ asi ǀ cakṣuṣaḥ ǀ
    vṛṣā ǀ yat ǀ ājim ǀ vṛṣaṇā ǀ sisāsasi ǀ codayan ǀ vadhriṇā ǀ yujā ǁ

    10.102.12 Aṣṭaka 8.5.21.6Anuvāka 10.9.36Interpretations

Text, recitation and interpretations from the Ṛgveda database of theveda.org.in.