Devatā देवता

1: Bṛhaspati, Vāc; 2-4, 6, 9: Vāc; 5, 7, 8, 10, 11: Jñānam

Ṛṣi ऋषि

Bṛhaspati Āṅgirasa

Chandas छन्दस्

Triṣṭubh, Jagatī

1. Ṛk 1

   बृह॑स्पते प्रथ॒मं वा॒चो अग्रं॒ यत्प्रैर॑त नाम॒धेयं॒ दधा॑नाः ।
   यदे॑षां॒ श्रेष्ठं॒ यद॑रि॒प्रमासी॑त्प्रे॒णा तदे॑षां॒ निहि॑तं॒ गुहा॒विः ॥

   बृहस्पते प्रथमं वाचो अग्रं यत् प्रैरत नामधेयं दधानाः |
   यद् एषां श्रेष्ठं यद् अरिप्रम् आसीत् प्रेणा तद् एषां निहितं गुहाविः ||

   bṛ́haspate prathamám vācó ágram yátpráirata nāmadhéyam dádhānāḥ ǀ
   yádeṣām śréṣṭham yádariprámā́sītpreṇā́ tádeṣām níhitam gúhāvíḥ ǁ

   bṛhaspate prathamaṃ vāco agraṃ yat prairata nāmadheyaṃ dadhānāḥ |
   yad eṣāṃ śreṣṭhaṃ yad aripram āsīt preṇā tad eṣāṃ nihitaṃ guhāviḥ ||

   बृह॑स्पते । प्र॒थ॒मम् । वा॒चः । अग्र॑म् । यत् । प्र । ऐर॑त । ना॒म॒ऽधेय॑म् । दधा॑नाः ।
   यत् । ए॒षा॒म् । श्रेष्ठ॑म् । यत् । अ॒रि॒प्रम् । आसी॑त् । प्रे॒णा । तत् । ए॒षा॒म् । निऽहि॑तम् । गुहा॑ । आ॒विः ॥

   बृहस्पते । प्रथमम् । वाचः । अग्रम् । यत् । प्र । ऐरत । नामऽधेयम् । दधानाः ।
   यत् । एषाम् । श्रेष्ठम् । यत् । अरिप्रम् । आसीत् । प्रेणा । तत् । एषाम् । निऽहितम् । गुहा । आविः ॥

   bṛ́haspate ǀ prathamám ǀ vācáḥ ǀ ágram ǀ yát ǀ prá ǀ áirata ǀ nāma-dhéyam ǀ dádhānāḥ ǀ
   yát ǀ eṣām ǀ śréṣṭham ǀ yát ǀ ariprám ǀ ā́sīt ǀ preṇā́ ǀ tát ǀ eṣām ǀ ní-hitam ǀ gúhā ǀ āvíḥ ǁ

   bṛhaspate ǀ prathamam ǀ vācaḥ ǀ agram ǀ yat ǀ pra ǀ airata ǀ nāma-dheyam ǀ dadhānāḥ ǀ
   yat ǀ eṣām ǀ śreṣṭham ǀ yat ǀ aripram ǀ āsīt ǀ preṇā ǀ tat ǀ eṣām ǀ ni-hitam ǀ guhā ǀ āviḥ ǁ

   10.71.1 Aṣṭaka 8.2.23.1Anuvāka 10.6.24Interpretations

2. Ṛk 2

   सक्तु॑मिव॒ तित॑उना पु॒नंतो॒ यत्र॒ धीरा॒ मन॑सा॒ वाच॒मक्र॑त ।
   अत्रा॒ सखा॑यः स॒ख्यानि॑ जानते भ॒द्रैषां॑ ल॒क्ष्मीर्निहि॒ताधि॑ वा॒चि ॥

   सक्तुम् इव तितौना पुनन्तो यत्र धीरा मनसा वाचम् अक्रत |
   अत्रा सखायः सख्यानि जानते भद्रैषां लक्ष्मीर् निहिताधि वाचि ||

   sáktumiva títa+unā punánto yátra dhī́rā mánasā vā́camákrata ǀ
   átrā sákhāyaḥ sakhyā́ni jānate bhadráiṣām lakṣmī́rníhitā́dhi vācí ǁ

   saktum iva titaunā punanto yatra dhīrā manasā vācam akrata |
   atrā sakhāyaḥ sakhyāni jānate bhadraiṣāṃ lakṣmīr nihitādhi vāci ||

   सक्तु॑म्ऽइव । तित॑ऽउना । पु॒नन्तः॑ । यत्र॑ । धीराः॑ । मन॑सा । वाच॑म् । अक्र॑त ।
   अत्र॑ । सखा॑यः । स॒ख्यानि॑ । जा॒न॒ते॒ । भ॒द्रा । ए॒षा॒म् । ल॒क्ष्मीः । निऽहि॑ता । अधि॑ । वा॒चि ॥

   सक्तुम्ऽइव । तितऽउना । पुनन्तः । यत्र । धीराः । मनसा । वाचम् । अक्रत ।
   अत्र । सखायः । सख्यानि । जानते । भद्रा । एषाम् । लक्ष्मीः । निऽहिता । अधि । वाचि ॥

   sáktum-iva ǀ títa-unā ǀ punántaḥ ǀ yátra ǀ dhī́rāḥ ǀ mánasā ǀ vā́cam ǀ ákrata ǀ
   átra ǀ sákhāyaḥ ǀ sakhyā́ni ǀ jānate ǀ bhadrā́ ǀ eṣām ǀ lakṣmī́ḥ ǀ ní-hitā ǀ ádhi ǀ vācí ǁ

   saktum-iva ǀ tita-unā ǀ punantaḥ ǀ yatra ǀ dhīrāḥ ǀ manasā ǀ vācam ǀ akrata ǀ
   atra ǀ sakhāyaḥ ǀ sakhyāni ǀ jānate ǀ bhadrā ǀ eṣām ǀ lakṣmīḥ ǀ ni-hitā ǀ adhi ǀ vāci ǁ

   10.71.2 Aṣṭaka 8.2.23.2Anuvāka 10.6.25Interpretations

3. Ṛk 3

   य॒ज्ञेन॑ वा॒चः प॑द॒वीय॑मायं॒तामन्व॑विंद॒न्नृषि॑षु॒ प्रवि॑ष्टां ।
   तामा॒भृत्या॒ व्य॑दधुः पुरु॒त्रा तां स॒प्त रे॒भा अ॒भि सं न॑वंते ॥

   यज्ञेन वाचः पदवीयम् आयन् ताम् अन्व् अविन्दन्न् ऋषिषु प्रविष्टाम् |
   ताम् आभृत्या व्य् अदधुः पुरुत्रा तां सप्त रेभा अभि सं नवन्ते ||

   yajñéna vācáḥ padavī́yamāyantā́mánvavindannṛ́ṣiṣu práviṣṭām ǀ
   tā́mābhṛ́tyā vyádadhuḥ purutrā́ tā́m saptá rebhā́ abhí sám navante ǁ

   yajñena vācaḥ padavīyam āyan tām anv avindann ṛṣiṣu praviṣṭām |
   tām ābhṛtyā vy adadhuḥ purutrā tāṃ sapta rebhā abhi saṃ navante ||

   य॒ज्ञेन॑ । वा॒चः । प॒द॒ऽवीय॑म् । आ॒य॒न् । ताम् । अनु॑ । अ॒वि॒न्द॒न् । ऋषि॑षु । प्रऽवि॑ष्टाम् ।
   ताम् । आ॒ऽभृत्य॑ । वि । अ॒द॒धुः॒ । पु॒रु॒ऽत्रा । ताम् । स॒प्त । रे॒भाः । अ॒भि । सम् । न॒व॒न्ते॒ ॥

   यज्ञेन । वाचः । पदऽवीयम् । आयन् । ताम् । अनु । अविन्दन् । ऋषिषु । प्रऽविष्टाम् ।
   ताम् । आऽभृत्य । वि । अदधुः । पुरुऽत्रा । ताम् । सप्त । रेभाः । अभि । सम् । नवन्ते ॥

   yajñéna ǀ vācáḥ ǀ pada-vī́yam ǀ āyan ǀ tā́m ǀ ánu ǀ avindan ǀ ṛ́ṣiṣu ǀ prá-viṣṭām ǀ
   tā́m ǀ ā-bhṛ́tya ǀ ví ǀ adadhuḥ ǀ puru-trā́ ǀ tā́m ǀ saptá ǀ rebhā́ḥ ǀ abhí ǀ sám ǀ navante ǁ

   yajñena ǀ vācaḥ ǀ pada-vīyam ǀ āyan ǀ tām ǀ anu ǀ avindan ǀ ṛṣiṣu ǀ pra-viṣṭām ǀ
   tām ǀ ā-bhṛtya ǀ vi ǀ adadhuḥ ǀ puru-trā ǀ tām ǀ sapta ǀ rebhāḥ ǀ abhi ǀ sam ǀ navante ǁ

   10.71.3 Aṣṭaka 8.2.23.3Anuvāka 10.6.26Interpretations

4. Ṛk 4

   उ॒त त्वः॒ पश्य॒न्न द॑दर्श॒ वाच॑मु॒त त्वः॑ शृ॒ण्वन्न शृ॑णोत्येनां ।
   उ॒तो त्व॑स्मै त॒न्वं१॒॑ वि स॑स्रे जा॒येव॒ पत्य॑ उश॒ती सु॒वासाः॑ ॥

   उत त्वः पश्यन् न ददर्श वाचम् उत त्वः शृण्वन् न शृणोत्य् एनाम् |
   उतो त्वस्मै तन्वं वि सस्रे जायेव पत्य उशती सुवासाः ||

   utá tvaḥ páśyanná dadarśa vā́camutá tvaḥ śṛṇvánná śṛṇotyenām ǀ
   utó tvasmai tanvám ví sasre jāyéva pátya uśatī́ suvā́sāḥ ǁ

   uta tvaḥ paśyan na dadarśa vācam uta tvaḥ śṛṇvan na śṛṇoty enām |
   uto tvasmai tanvaṃ vi sasre jāyeva patya uśatī suvāsāḥ ||

   उ॒त । त्वः॒ । पश्य॑न् । न । द॒द॒र्श॒ । वाच॑म् । उ॒त । त्वः॒ । शृ॒ण्वन् । न । शृ॒णो॒ति॒ । ए॒ना॒म् ।
   उ॒तो इति॑ । त्व॒स्मै॒ । त॒न्व॑म् । वि । स॒स्रे॒ । जा॒याऽइ॑व । पत्ये॑ । उ॒श॒ती । सु॒ऽवासाः॑ ॥

   उत । त्वः । पश्यन् । न । ददर्श । वाचम् । उत । त्वः । शृण्वन् । न । शृणोति । एनाम् ।
   उतो इति । त्वस्मै । तन्वम् । वि । सस्रे । जायाऽइव । पत्ये । उशती । सुऽवासाः ॥

   utá ǀ tvaḥ ǀ páśyan ǀ ná ǀ dadarśa ǀ vā́cam ǀ utá ǀ tvaḥ ǀ śṛṇván ǀ ná ǀ śṛṇoti ǀ enām ǀ
   utó íti ǀ tvasmai ǀ tanvám ǀ ví ǀ sasre ǀ jāyā́-iva ǀ pátye ǀ uśatī́ ǀ su-vā́sāḥ ǁ

   uta ǀ tvaḥ ǀ paśyan ǀ na ǀ dadarśa ǀ vācam ǀ uta ǀ tvaḥ ǀ śṛṇvan ǀ na ǀ śṛṇoti ǀ enām ǀ
   uto iti ǀ tvasmai ǀ tanvam ǀ vi ǀ sasre ǀ jāyā-iva ǀ patye ǀ uśatī ǀ su-vāsāḥ ǁ

   10.71.4 Aṣṭaka 8.2.23.4Anuvāka 10.6.27Interpretations

5. Ṛk 5

   उ॒त त्वं॑ स॒ख्ये स्थि॒रपी॑तमाहु॒र्नैनं॑ हिन्वं॒त्यपि॒ वाजि॑नेषु ।
   अधे॑न्वा चरति मा॒ययै॒ष वाचं॑ शुश्रु॒वाँ अ॑फ॒लाम॑पु॒ष्पां ॥

   उत त्वं सख्ये स्थिरपीतम् आहुर् नैनं हिन्वन्त्य् अपि वाजिनेषु |
   अधेन्वा चरति माययैष वाचं शुश्रुवां अफलाम् अपुष्पाम् ||

   utá tvam sakhyé sthirápītamāhurnáinam hinvantyápi vā́jineṣu ǀ
   ádhenvā carati māyáyaiṣá vā́cam śuśruvā́m̐ aphalā́mapuṣpā́m ǁ

   uta tvaṃ sakhye sthirapītam āhur nainaṃ hinvanty api vājineṣu |
   adhenvā carati māyayaiṣa vācaṃ śuśruvāṃ aphalām apuṣpām ||

   उ॒त । त्व॒म् । स॒ख्ये । स्थि॒रऽपी॑तम् । आ॒हुः॒ । न । ए॒न॒म् । हि॒न्व॒न्ति॒ । अपि॑ । वाजि॑नेषु ।
   अधे॑न्वा । च॒र॒ति॒ । मा॒यया॑ । ए॒षः । वाच॑म् । शु॒श्रु॒ऽवान् । अ॒फ॒लाम् । अ॒पु॒ष्पाम् ॥

   उत । त्वम् । सख्ये । स्थिरऽपीतम् । आहुः । न । एनम् । हिन्वन्ति । अपि । वाजिनेषु ।
   अधेन्वा । चरति । मायया । एषः । वाचम् । शुश्रुऽवान् । अफलाम् । अपुष्पाम् ॥

   utá ǀ tvam ǀ sakhyé ǀ sthirá-pītam ǀ āhuḥ ǀ ná ǀ enam ǀ hinvanti ǀ ápi ǀ vā́jineṣu ǀ
   ádhenvā ǀ carati ǀ māyáyā ǀ eṣáḥ ǀ vā́cam ǀ śuśru-vā́n ǀ aphalā́m ǀ apuṣpā́m ǁ

   uta ǀ tvam ǀ sakhye ǀ sthira-pītam ǀ āhuḥ ǀ na ǀ enam ǀ hinvanti ǀ api ǀ vājineṣu ǀ
   adhenvā ǀ carati ǀ māyayā ǀ eṣaḥ ǀ vācam ǀ śuśru-vān ǀ aphalām ǀ apuṣpām ǁ

   10.71.5 Aṣṭaka 8.2.23.5Anuvāka 10.6.28Interpretations

6. Ṛk 6

   यस्ति॒त्याज॑ सचि॒विदं॒ सखा॑यं॒ न तस्य॑ वा॒च्यपि॑ भा॒गो अ॑स्ति ।
   यदीं॑ शृ॒णोत्यल॑कं शृणोति न॒हि प्र॒वेद॑ सुकृ॒तस्य॒ पंथां॑ ॥

   यस् तित्याज सचिविदं सखायं न तस्य वाच्य् अपि भागो अस्ति |
   यद् ईं शृणोत्य् अलकं शृणोति नहि प्रवेद सुकृतस्य पन्थाम् ||

   yástityā́ja sacivídam sákhāyam ná tásya vācyápi bhāgó asti ǀ
   yádīm śṛṇótyálakam śṛṇoti nahí pravéda sukṛtásya pánthām ǁ

   yas tityāja sacividaṃ sakhāyaṃ na tasya vācy api bhāgo asti |
   yad īṃ śṛṇoty alakaṃ śṛṇoti nahi praveda sukṛtasya panthām ||

   यः । ति॒त्याज॑ । स॒चि॒ऽविद॑म् । सखा॑यम् । न । तस्य॑ । वा॒चि । अपि॑ । भा॒गः । अ॒स्ति॒ ।
   यत् । ई॒म् । शृ॒णोति॑ । अल॑कम् । शृ॒णो॒ति॒ । न॒हि । प्र॒ऽवेद॑ । सु॒ऽकृ॒तस्य॑ । पन्था॑म् ॥

   यः । तित्याज । सचिऽविदम् । सखायम् । न । तस्य । वाचि । अपि । भागः । अस्ति ।
   यत् । ईम् । शृणोति । अलकम् । शृणोति । नहि । प्रऽवेद । सुऽकृतस्य । पन्थाम् ॥

   yáḥ ǀ tityā́ja ǀ saci-vídam ǀ sákhāyam ǀ ná ǀ tásya ǀ vācí ǀ ápi ǀ bhāgáḥ ǀ asti ǀ
   yát ǀ īm ǀ śṛṇóti ǀ álakam ǀ śṛṇoti ǀ nahí ǀ pra-véda ǀ su-kṛtásya ǀ pánthām ǁ

   yaḥ ǀ tityāja ǀ saci-vidam ǀ sakhāyam ǀ na ǀ tasya ǀ vāci ǀ api ǀ bhāgaḥ ǀ asti ǀ
   yat ǀ īm ǀ śṛṇoti ǀ alakam ǀ śṛṇoti ǀ nahi ǀ pra-veda ǀ su-kṛtasya ǀ panthām ǁ

   10.71.6 Aṣṭaka 8.2.24.1Anuvāka 10.6.29Interpretations

7. Ṛk 7

   अ॒क्ष॒ण्वंतः॒ कर्ण॑वंतः॒ सखा॑यो मनोज॒वेष्वस॑मा बभूवुः ।
   आ॒द॒घ्नास॑ उपक॒क्षास॑ उ त्वे ह्र॒दा इ॑व॒ स्नात्वा॑ उ त्वे ददृश्रे ॥

   अक्षण्वन्तः कर्णवन्तः सखायो मनोजवेष्व् असमा बभूवुः |
   आदघ्नास उपकक्षास उ त्वे ह्रदा इव स्नात्वा उ त्वे ददृश्रे ||

   akṣaṇvántaḥ kárṇavantaḥ sákhāyo manojavéṣvásamā babhūvuḥ ǀ
   ādaghnā́sa upakakṣā́sa u tve hradā́ iva snā́tvā u tve dadṛśre ǁ

   akṣaṇvantaḥ karṇavantaḥ sakhāyo manojaveṣv asamā babhūvuḥ |
   ādaghnāsa upakakṣāsa u tve hradā iva snātvā u tve dadṛśre ||

   अ॒क्ष॒ण्ऽवन्तः॑ । कर्ण॑ऽवन्तः । सखा॑यः । म॒नः॒ऽज॒वेषु॑ । अस॑माः । ब॒भू॒वुः॒ ।
   आ॒द॒घ्नासः॑ । उ॒प॒ऽक॒क्षासः॑ । ऊं॒ इति॑ । त्वे॒ । ह्र॒दाःऽइ॑व । स्नात्वाः॑ । ऊं॒ इति॑ । त्वे॒ । द॒दृ॒श्रे॒ ॥

   अक्षण्ऽवन्तः । कर्णऽवन्तः । सखायः । मनःऽजवेषु । असमाः । बभूवुः ।
   आदघ्नासः । उपऽकक्षासः । ऊं इति । त्वे । ह्रदाःऽइव । स्नात्वाः । ऊं इति । त्वे । ददृश्रे ॥

   akṣaṇ-vántaḥ ǀ kárṇa-vantaḥ ǀ sákhāyaḥ ǀ manaḥ-javéṣu ǀ ásamāḥ ǀ babhūvuḥ ǀ
   ādaghnā́saḥ ǀ upa-kakṣā́saḥ ǀ ūṃ íti ǀ tve ǀ hradā́ḥ-iva ǀ snā́tvāḥ ǀ ūṃ íti ǀ tve ǀ dadṛśre ǁ

   akṣaṇ-vantaḥ ǀ karṇa-vantaḥ ǀ sakhāyaḥ ǀ manaḥ-javeṣu ǀ asamāḥ ǀ babhūvuḥ ǀ
   ādaghnāsaḥ ǀ upa-kakṣāsaḥ ǀ ūṃ iti ǀ tve ǀ hradāḥ-iva ǀ snātvāḥ ǀ ūṃ iti ǀ tve ǀ dadṛśre ǁ

   10.71.7 Aṣṭaka 8.2.24.2Anuvāka 10.6.30Interpretations

8. Ṛk 8

   हृ॒दा त॒ष्टेषु॒ मन॑सो ज॒वेषु॒ यद्ब्रा॑ह्म॒णाः सं॒यजं॑ते॒ सखा॑यः ।
   अत्राह॑ त्वं॒ वि ज॑हुर्वे॒द्याभि॒रोह॑ब्रह्माणो॒ वि च॑रंत्यु त्वे ॥

   हृदा तष्टेषु मनसो जवेषु यद् ब्राह्मणाः संयजन्ते सखायः |
   अत्राह त्वं वि जहुर् वेद्याभिर् ओहब्रह्माणो वि चरन्त्य् उ त्वे ||

   hṛdā́ taṣṭéṣu mánaso javéṣu yádbrāhmaṇā́ḥ saṃyájante sákhāyaḥ ǀ
   átrā́ha tvam ví jahurvedyā́bhiróhabrahmāṇo ví carantyu tve ǁ

   hṛdā taṣṭeṣu manaso javeṣu yad brāhmaṇāḥ saṃyajante sakhāyaḥ |
   atrāha tvaṃ vi jahur vedyābhir ohabrahmāṇo vi caranty u tve ||

   हृ॒दा । त॒ष्टेषु॑ । मन॑सः । ज॒वेषु॑ । यत् । ब्रा॒ह्म॒णाः । स॒म्ऽयज॑न्ते । सखा॑यः ।
   अत्र॑ । अह॑ । त्व॒म् । वि । ज॒हुः॒ । वे॒द्याभिः॑ । ओह॑ऽब्रह्माणः । वि । च॒र॒न्ति॒ । ऊं॒ इति॑ । त्वे॒ ॥

   हृदा । तष्टेषु । मनसः । जवेषु । यत् । ब्राह्मणाः । सम्ऽयजन्ते । सखायः ।
   अत्र । अह । त्वम् । वि । जहुः । वेद्याभिः । ओहऽब्रह्माणः । वि । चरन्ति । ऊं इति । त्वे ॥

   hṛdā́ ǀ taṣṭéṣu ǀ mánasaḥ ǀ javéṣu ǀ yát ǀ brāhmaṇā́ḥ ǀ sam-yájante ǀ sákhāyaḥ ǀ
   átra ǀ áha ǀ tvam ǀ ví ǀ jahuḥ ǀ vedyā́bhiḥ ǀ óha-brahmāṇaḥ ǀ ví ǀ caranti ǀ ūṃ íti ǀ tve ǁ

   hṛdā ǀ taṣṭeṣu ǀ manasaḥ ǀ javeṣu ǀ yat ǀ brāhmaṇāḥ ǀ sam-yajante ǀ sakhāyaḥ ǀ
   atra ǀ aha ǀ tvam ǀ vi ǀ jahuḥ ǀ vedyābhiḥ ǀ oha-brahmāṇaḥ ǀ vi ǀ caranti ǀ ūṃ iti ǀ tve ǁ

   10.71.8 Aṣṭaka 8.2.24.3Anuvāka 10.6.31Interpretations

9. Ṛk 9

   इ॒मे ये नार्वाङ्न प॒रश्चरं॑ति॒ न ब्रा॑ह्म॒णासो॒ न सु॒तेक॑रासः ।
   त ए॒ते वाच॑मभि॒पद्य॑ पा॒पया॑ सि॒रीस्तंत्रं॑ तन्वते॒ अप्र॑जज्ञयः ॥

   इमे ये नार्वाङ् न परश् चरन्ति न ब्राह्मणासो न सुतेकरासः |
   त एते वाचम् अभिपद्य पापया सिरीस् तन्त्रं तन्वते अप्रजज्ञयः ||

   imé yé nā́rvā́ṅná paráścáranti ná brāhmaṇā́so ná sutékarāsaḥ ǀ
   tá eté vā́camabhipádya pāpáyā sirī́stántram tanvate áprajajñayaḥ ǁ

   ime ye nārvāṅ na paraś caranti na brāhmaṇāso na sutekarāsaḥ |
   ta ete vācam abhipadya pāpayā sirīs tantraṃ tanvate aprajajñayaḥ ||

   इ॒मे । ये । न । अ॒र्वाक् । न । प॒रः । चर॑न्ति । न । ब्रा॒ह्म॒णासः॑ । न । सु॒तेऽक॑रासः ।
   ते । ए॒ते । वाच॑म् । अ॒भि॒ऽपद्य॑ । पा॒पया॑ । सि॒रीः । तन्त्र॑म् । त॒न्व॒ते॒ । अप्र॑ऽजज्ञयः ॥

   इमे । ये । न । अर्वाक् । न । परः । चरन्ति । न । ब्राह्मणासः । न । सुतेऽकरासः ।
   ते । एते । वाचम् । अभिऽपद्य । पापया । सिरीः । तन्त्रम् । तन्वते । अप्रऽजज्ञयः ॥

   imé ǀ yé ǀ ná ǀ arvā́k ǀ ná ǀ paráḥ ǀ cáranti ǀ ná ǀ brāhmaṇā́saḥ ǀ ná ǀ suté-karāsaḥ ǀ
   té ǀ eté ǀ vā́cam ǀ abhi-pádya ǀ pāpáyā ǀ sirī́ḥ ǀ tántram ǀ tanvate ǀ ápra-jajñayaḥ ǁ

   ime ǀ ye ǀ na ǀ arvāk ǀ na ǀ paraḥ ǀ caranti ǀ na ǀ brāhmaṇāsaḥ ǀ na ǀ sute-karāsaḥ ǀ
   te ǀ ete ǀ vācam ǀ abhi-padya ǀ pāpayā ǀ sirīḥ ǀ tantram ǀ tanvate ǀ apra-jajñayaḥ ǁ

   10.71.9 Aṣṭaka 8.2.24.4Anuvāka 10.6.32Interpretations

10. Ṛk 10

    सर्वे॑ नंदंति य॒शसाग॑तेन सभासा॒हेन॒ सख्या॒ सखा॑यः ।
    कि॒ल्बि॒ष॒स्पृत्पि॑तु॒षणि॒र्ह्ये॑षा॒मरं॑ हि॒तो भव॑ति॒ वाजि॑नाय ॥

    सर्वे नन्दन्ति यशसागतेन सभासाहेन सख्या सखायः |
    किल्बिषस्पृत् पितुषणिर् ह्य् एषाम् अरं हितो भवति वाजिनाय ||

    sárve nandanti yaśásā́gatena sabhāsāhéna sákhyā sákhāyaḥ ǀ
    kilbiṣaspṛ́tpituṣáṇirhyéṣāmáram hitó bhávati vā́jināya ǁ

    sarve nandanti yaśasāgatena sabhāsāhena sakhyā sakhāyaḥ |
    kilbiṣaspṛt pituṣaṇir hy eṣām araṃ hito bhavati vājināya ||

    सर्वे॑ । न॒न्द॒न्ति॒ । य॒शसा॑ । आऽग॑तेन । स॒भा॒ऽसा॒हेन॑ । सख्या॑ । सखा॑यः ।
    कि॒ल्बि॒ष॒ऽस्पृत् । पि॒तु॒ऽसनिः॑ । हि । ए॒षा॒म् । अर॑म् । हि॒तः । भव॑ति । वाजि॑नाय ॥

    सर्वे । नन्दन्ति । यशसा । आऽगतेन । सभाऽसाहेन । सख्या । सखायः ।
    किल्बिषऽस्पृत् । पितुऽसनिः । हि । एषाम् । अरम् । हितः । भवति । वाजिनाय ॥

    sárve ǀ nandanti ǀ yaśásā ǀ ā́-gatena ǀ sabhā-sāhéna ǀ sákhyā ǀ sákhāyaḥ ǀ
    kilbiṣa-spṛ́t ǀ pitu-sániḥ ǀ hí ǀ eṣām ǀ áram ǀ hitáḥ ǀ bhávati ǀ vā́jināya ǁ

    sarve ǀ nandanti ǀ yaśasā ǀ ā-gatena ǀ sabhā-sāhena ǀ sakhyā ǀ sakhāyaḥ ǀ
    kilbiṣa-spṛt ǀ pitu-saniḥ ǀ hi ǀ eṣām ǀ aram ǀ hitaḥ ǀ bhavati ǀ vājināya ǁ

    10.71.10 Aṣṭaka 8.2.24.5Anuvāka 10.6.33Interpretations

11. Ṛk 11

    ऋ॒चां त्वः॒ पोष॑मास्ते पुपु॒ष्वान्गा॑य॒त्रं त्वो॑ गायति॒ शक्व॑रीषु ।
    ब्र॒ह्मा त्वो॒ वद॑ति जातवि॒द्यां य॒ज्ञस्य॒ मात्रां॒ वि मि॑मीत उ त्वः ॥

    ऋचां त्वः पोषम् आस्ते पुपुष्वान् गायत्रं त्वो गायति शक्वरीषु |
    ब्रह्मा त्वो वदति जातविद्यां यज्ञस्य मात्रां वि मिमीत उ त्वः ||

    ṛcā́m tvaḥ póṣamāste pupuṣvā́ngāyatrám tvo gāyati śákvarīṣu ǀ
    brahmā́ tvo vádati jātavidyā́m yajñásya mā́trām ví mimīta u tvaḥ ǁ

    ṛcāṃ tvaḥ poṣam āste pupuṣvān gāyatraṃ tvo gāyati śakvarīṣu |
    brahmā tvo vadati jātavidyāṃ yajñasya mātrāṃ vi mimīta u tvaḥ ||

    ऋ॒चाम् । त्वः॒ । पोष॑म् । आ॒स्ते॒ । पु॒पु॒ष्वान् । गा॒य॒त्रम् । त्वः॒ । गा॒य॒ति॒ । शक्व॑रीषु ।
    ब्र॒ह्मा । त्वः॒ । वद॑ति । जा॒त॒ऽवि॒द्याम् । य॒ज्ञस्य॑ । मात्रा॑म् । वि । मि॒मी॒ते॒ । ऊं॒ इति॑ । त्वः॒ ॥

    ऋचाम् । त्वः । पोषम् । आस्ते । पुपुष्वान् । गायत्रम् । त्वः । गायति । शक्वरीषु ।
    ब्रह्मा । त्वः । वदति । जातऽविद्याम् । यज्ञस्य । मात्राम् । वि । मिमीते । ऊं इति । त्वः ॥

    ṛcā́m ǀ tvaḥ ǀ póṣam ǀ āste ǀ pupuṣvā́n ǀ gāyatrám ǀ tvaḥ ǀ gāyati ǀ śákvarīṣu ǀ
    brahmā́ ǀ tvaḥ ǀ vádati ǀ jāta-vidyā́m ǀ yajñásya ǀ mā́trām ǀ ví ǀ mimīte ǀ ūṃ íti ǀ tvaḥ ǁ

    ṛcām ǀ tvaḥ ǀ poṣam ǀ āste ǀ pupuṣvān ǀ gāyatram ǀ tvaḥ ǀ gāyati ǀ śakvarīṣu ǀ
    brahmā ǀ tvaḥ ǀ vadati ǀ jāta-vidyām ǀ yajñasya ǀ mātrām ǀ vi ǀ mimīte ǀ ūṃ iti ǀ tvaḥ ǁ

    10.71.11 Aṣṭaka 8.2.24.6Anuvāka 10.6.34Interpretations

Text, recitation and interpretations from the Ṛgveda database of theveda.org.in.