Devatā देवता

Sindhu

Ṛṣi ऋषि

Sindhukṣit Praiyamedha

Chandas छन्दस्

Jagatī

1. Ṛk 1

   प्र सु व॑ आपो महि॒मान॑मुत्त॒मं का॒रुर्वो॑चाति॒ सद॑ने वि॒वस्व॑तः ।
   प्र स॒प्तस॑प्त त्रे॒धा हि च॑क्र॒मुः प्र सृत्व॑रीणा॒मति॒ सिंधु॒रोज॑सा ॥

   प्र सु व आपो महिमानम् उत्तमं कारुर् वोचाति सदने विवस्वतः |
   प्र सप्त-सप्त त्रेधा हि चक्रमुः प्र सृत्वरीणाम् अति सिन्धुर् ओजसा ||

   prá sú va āpo mahimā́namuttamám kārúrvocāti sádane vivásvataḥ ǀ
   prá saptásapta tredhā́ hí cakramúḥ prá sṛ́tvarīṇāmáti síndhurójasā ǁ

   pra su va āpo mahimānam uttamaṃ kārur vocāti sadane vivasvataḥ |
   pra sapta-sapta tredhā hi cakramuḥ pra sṛtvarīṇām ati sindhur ojasā ||

   प्र । सु । वः॒ । आ॒पः॒ । म॒हि॒मान॑म् । उ॒त्ऽत॒मम् । का॒रुः । वो॒चा॒ति॒ । सद॑ने । वि॒वस्व॑तः ।
   प्र । स॒प्तऽस॑प्त । त्रे॒धा । हि । च॒क्र॒मुः । प्र । सृत्व॑रीणाम् । अति॑ । सिन्धुः॑ । ओज॑सा ॥

   प्र । सु । वः । आपः । महिमानम् । उत्ऽतमम् । कारुः । वोचाति । सदने । विवस्वतः ।
   प्र । सप्तऽसप्त । त्रेधा । हि । चक्रमुः । प्र । सृत्वरीणाम् । अति । सिन्धुः । ओजसा ॥

   prá ǀ sú ǀ vaḥ ǀ āpaḥ ǀ mahimā́nam ǀ ut-tamám ǀ kārúḥ ǀ vocāti ǀ sádane ǀ vivásvataḥ ǀ
   prá ǀ saptá-sapta ǀ tredhā́ ǀ hí ǀ cakramúḥ ǀ prá ǀ sṛ́tvarīṇām ǀ áti ǀ síndhuḥ ǀ ójasā ǁ

   pra ǀ su ǀ vaḥ ǀ āpaḥ ǀ mahimānam ǀ ut-tamam ǀ kāruḥ ǀ vocāti ǀ sadane ǀ vivasvataḥ ǀ
   pra ǀ sapta-sapta ǀ tredhā ǀ hi ǀ cakramuḥ ǀ pra ǀ sṛtvarīṇām ǀ ati ǀ sindhuḥ ǀ ojasā ǁ

   10.75.1 Aṣṭaka 8.3.6.1Anuvāka 10.6.61Interpretations

2. Ṛk 2

   प्र ते॑ऽरद॒द्वरु॑णो॒ यात॑वे प॒थः सिंधो॒ यद्वाजाँ॑ अ॒भ्यद्र॑व॒स्त्वं ।
   भूम्या॒ अधि॑ प्र॒वता॑ यासि॒ सानु॑ना॒ यदे॑षा॒मग्रं॒ जग॑तामिर॒ज्यसि॑ ॥

   प्र ते ऽरदद् वरुणो यातवे पथः सिन्धो यद् वाजां अभ्य् अद्रवस् त्वम् |
   भूम्या अधि प्रवता यासि सानुना यद् एषाम् अग्रं जगताम् इरज्यसि ||

   prá te’radadváruṇo yā́tave patháḥ síndho yádvā́jām̐ abhyádravastvám ǀ
   bhū́myā ádhi pravátā yāsi sā́nunā yádeṣāmágram jágatāmirajyási ǁ

   pra te 'radad varuṇo yātave pathaḥ sindho yad vājāṃ abhy adravas tvam |
   bhūmyā adhi pravatā yāsi sānunā yad eṣām agraṃ jagatām irajyasi ||

   प्र । ते॒ । अ॒र॒द॒त् । वरु॑णः । यात॑वे । प॒थः । सिन्धो॒ इति॑ । यत् । वाजा॑न् । अ॒भि । अद्र॑वः । त्वम् ।
   भूम्याः॑ । अधि॑ । प्र॒ऽवता॑ । या॒सि॒ । सानु॑ना । यत् । ए॒षा॒म् । अग्र॑म् । जग॑ताम् । इ॒र॒ज्यसि॑ ॥

   प्र । ते । अरदत् । वरुणः । यातवे । पथः । सिन्धो इति । यत् । वाजान् । अभि । अद्रवः । त्वम् ।
   भूम्याः । अधि । प्रऽवता । यासि । सानुना । यत् । एषाम् । अग्रम् । जगताम् । इरज्यसि ॥

   prá ǀ te ǀ aradat ǀ váruṇaḥ ǀ yā́tave ǀ patháḥ ǀ síndho íti ǀ yát ǀ vā́jān ǀ abhí ǀ ádravaḥ ǀ tvám ǀ
   bhū́myāḥ ǀ ádhi ǀ pra-vátā ǀ yāsi ǀ sā́nunā ǀ yát ǀ eṣām ǀ ágram ǀ jágatām ǀ irajyási ǁ

   pra ǀ te ǀ aradat ǀ varuṇaḥ ǀ yātave ǀ pathaḥ ǀ sindho iti ǀ yat ǀ vājān ǀ abhi ǀ adravaḥ ǀ tvam ǀ
   bhūmyāḥ ǀ adhi ǀ pra-vatā ǀ yāsi ǀ sānunā ǀ yat ǀ eṣām ǀ agram ǀ jagatām ǀ irajyasi ǁ

   10.75.2 Aṣṭaka 8.3.6.2Anuvāka 10.6.62Interpretations

3. Ṛk 3

   दि॒वि स्व॒नो य॑तते॒ भूम्यो॒पर्य॑नं॒तं शुष्म॒मुदि॑यर्ति भा॒नुना॑ ।
   अ॒भ्रादि॑व॒ प्र स्त॑नयंति वृ॒ष्टयः॒ सिंधु॒र्यदेति॑ वृष॒भो न रोरु॑वत् ॥

   दिवि स्वनो यतते भूम्योपर्य् अनन्तं शुष्मम् उद् इयर्ति भानुना |
   अभ्राद् इव प्र स्तनयन्ति वृष्टयः सिन्धुर् यद् एति वृषभो न रोरुवत् ||

   diví svanó yatate bhū́myopáryanantám śúṣmamúdiyarti bhānúnā ǀ
   abhrā́diva prá stanayanti vṛṣṭáyaḥ síndhuryádéti vṛṣabhó ná róruvat ǁ

   divi svano yatate bhūmyopary anantaṃ śuṣmam ud iyarti bhānunā |
   abhrād iva pra stanayanti vṛṣṭayaḥ sindhur yad eti vṛṣabho na roruvat ||

   दि॒वि । स्व॒नः । य॒त॒ते॒ । भूम्या॑ । उ॒परि॑ । अ॒न॒न्तम् । शुष्म॑म् । उत् । इ॒य॒र्ति॒ । भा॒नुना॑ ।
   अ॒भ्रात्ऽइ॑व । प्र । स्त॒न॒य॒न्ति॒ । वृ॒ष्टयः॑ । सिन्धुः॑ । यत् । एति॑ । वृ॒ष॒भः । न । रोरु॑वत् ॥

   दिवि । स्वनः । यतते । भूम्या । उपरि । अनन्तम् । शुष्मम् । उत् । इयर्ति । भानुना ।
   अभ्रात्ऽइव । प्र । स्तनयन्ति । वृष्टयः । सिन्धुः । यत् । एति । वृषभः । न । रोरुवत् ॥

   diví ǀ svanáḥ ǀ yatate ǀ bhū́myā ǀ upári ǀ anantám ǀ śúṣmam ǀ út ǀ iyarti ǀ bhānúnā ǀ
   abhrā́t-iva ǀ prá ǀ stanayanti ǀ vṛṣṭáyaḥ ǀ síndhuḥ ǀ yát ǀ éti ǀ vṛṣabháḥ ǀ ná ǀ róruvat ǁ

   divi ǀ svanaḥ ǀ yatate ǀ bhūmyā ǀ upari ǀ anantam ǀ śuṣmam ǀ ut ǀ iyarti ǀ bhānunā ǀ
   abhrāt-iva ǀ pra ǀ stanayanti ǀ vṛṣṭayaḥ ǀ sindhuḥ ǀ yat ǀ eti ǀ vṛṣabhaḥ ǀ na ǀ roruvat ǁ

   10.75.3 Aṣṭaka 8.3.6.3Anuvāka 10.6.63Interpretations

4. Ṛk 4

   अ॒भि त्वा॑ सिंधो॒ शिशु॒मिन्न मा॒तरो॑ वा॒श्रा अ॑र्षंति॒ पय॑सेव धे॒नवः॑ ।
   राजे॑व॒ युध्वा॑ नयसि॒ त्वमित्सिचौ॒ यदा॑सा॒मग्रं॑ प्र॒वता॒मिन॑क्षसि ॥

   अभि त्वा सिन्धो शिशुम् इन् न मातरो वाश्रा अर्षन्ति पयसेव धेनवः |
   राजेव युध्वा नयसि त्वम् इत् सिचौ यद् आसाम् अग्रम् प्रवताम् इनक्षसि ||

   abhí tvā sindho śíśumínná mātáro vāśrā́ arṣanti páyaseva dhenávaḥ ǀ
   rā́jeva yúdhvā nayasi tvámítsícau yádāsāmágram pravátāmínakṣasi ǁ

   abhi tvā sindho śiśum in na mātaro vāśrā arṣanti payaseva dhenavaḥ |
   rājeva yudhvā nayasi tvam it sicau yad āsām agram pravatām inakṣasi ||

   अ॒भि । त्वा॒ । सि॒न्धो॒ इति॑ । शिशु॑म् । इत् । न । मा॒तरः॑ । वा॒श्राः । अ॒र्ष॒न्ति॒ । पय॑साऽइव । धे॒नवः॑ ।
   राजा॑ऽइव । युध्वा॑ । न॒य॒सि॒ । त्वम् । इत् । सिचौ॑ । यत् । आ॒सा॒म् । अग्र॑म् । प्र॒ऽवता॑म् । इन॑क्षसि ॥

   अभि । त्वा । सिन्धो इति । शिशुम् । इत् । न । मातरः । वाश्राः । अर्षन्ति । पयसाऽइव । धेनवः ।
   राजाऽइव । युध्वा । नयसि । त्वम् । इत् । सिचौ । यत् । आसाम् । अग्रम् । प्रऽवताम् । इनक्षसि ॥

   abhí ǀ tvā ǀ sindho íti ǀ śíśum ǀ ít ǀ ná ǀ mātáraḥ ǀ vāśrā́ḥ ǀ arṣanti ǀ páyasā-iva ǀ dhenávaḥ ǀ
   rā́jā-iva ǀ yúdhvā ǀ nayasi ǀ tvám ǀ ít ǀ sícau ǀ yát ǀ āsām ǀ ágram ǀ pra-vátām ǀ ínakṣasi ǁ

   abhi ǀ tvā ǀ sindho iti ǀ śiśum ǀ it ǀ na ǀ mātaraḥ ǀ vāśrāḥ ǀ arṣanti ǀ payasā-iva ǀ dhenavaḥ ǀ
   rājā-iva ǀ yudhvā ǀ nayasi ǀ tvam ǀ it ǀ sicau ǀ yat ǀ āsām ǀ agram ǀ pra-vatām ǀ inakṣasi ǁ

   10.75.4 Aṣṭaka 8.3.6.4Anuvāka 10.6.64Interpretations

5. Ṛk 5

   इ॒मं मे॑ गंगे यमुने सरस्वति॒ शुतु॑द्रि॒ स्तोमं॑ सचता॒ परु॒ष्ण्या ।
   अ॒सि॒क्न्या म॑रुद्वृधे वि॒तस्त॒यार्जी॑कीये शृणु॒ह्या सु॒षोम॑या ॥

   इमम् मे गङ्गे यमुने सरस्वति शुतुद्रि स्तोमं सचता परुष्ण्य् आ |
   असिक्न्या मरुद्वृधे वितस्तयार्जीकीये शृणुह्य् आ सुषोमया ||

   imám me gaṅge yamune sarasvati śútudri stómam sacatā páruṣṇyā́ ǀ
   asiknyā́ marudvṛdhe vitástayā́rjīkīye śṛṇuhyā́ suṣómayā ǁ

   imam me gaṅge yamune sarasvati śutudri stomaṃ sacatā paruṣṇy ā |
   asiknyā marudvṛdhe vitastayārjīkīye śṛṇuhy ā suṣomayā ||

   इ॒मम् । मे॒ । ग॒ङ्गे॒ । य॒मु॒ने॒ । स॒र॒स्व॒ति॒ । शुतु॑द्रि । स्तोम॑म् । स॒च॒त॒ । परु॑ष्णि । आ ।
   अ॒सि॒क्न्या । म॒रु॒त्ऽवृ॒धे॒ । वि॒तस्त॑या । आर्जी॑कीये । शृ॒णु॒हि । आ । सु॒ऽसोम॑या ॥

   इमम् । मे । गङ्गे । यमुने । सरस्वति । शुतुद्रि । स्तोमम् । सचत । परुष्णि । आ ।
   असिक्न्या । मरुत्ऽवृधे । वितस्तया । आर्जीकीये । शृणुहि । आ । सुऽसोमया ॥

   imám ǀ me ǀ gaṅge ǀ yamune ǀ sarasvati ǀ śútudri ǀ stómam ǀ sacata ǀ páruṣṇi ǀ ā́ ǀ
   asiknyā́ ǀ marut-vṛdhe ǀ vitástayā ǀ ā́rjīkīye ǀ śṛṇuhí ǀ ā́ ǀ su-sómayā ǁ

   imam ǀ me ǀ gaṅge ǀ yamune ǀ sarasvati ǀ śutudri ǀ stomam ǀ sacata ǀ paruṣṇi ǀ ā ǀ
   asiknyā ǀ marut-vṛdhe ǀ vitastayā ǀ ārjīkīye ǀ śṛṇuhi ǀ ā ǀ su-somayā ǁ

   10.75.5 Aṣṭaka 8.3.6.5Anuvāka 10.6.65Interpretations

6. Ṛk 6

   तृ॒ष्टाम॑या प्रथ॒मं यात॑वे स॒जूः सु॒सर्त्वा॑ र॒सया॑ श्वे॒त्या त्या ।
   त्वं सिं॑धो॒ कुभ॑या गोम॒तीं क्रुमुं॑ मेह॒त्न्वा स॒रथं॒ याभि॒रीय॑से ॥

   तृष्टामया प्रथमं यातवे सजूः सुसर्त्वा रसया श्वेत्या त्या |
   त्वं सिन्धो कुभया गोमतीं क्रुमुम् मेहत्न्वा सरथं याभिर् ईयसे ||

   tṛṣṭā́mayā prathamám yā́tave sajū́ḥ susártvā rasáyā śvetyā́ tyā́ ǀ
   tvám sindho kúbhayā gomatī́m krúmum mehatnvā́ sarátham yā́bhirī́yase ǁ

   tṛṣṭāmayā prathamaṃ yātave sajūḥ susartvā rasayā śvetyā tyā |
   tvaṃ sindho kubhayā gomatīṃ krumum mehatnvā sarathaṃ yābhir īyase ||

   तृ॒ष्टऽअ॑मया । प्र॒थ॒मम् । यात॑वे । स॒ऽजूः । सु॒ऽसर्त्वा॑ । र॒सया॑ । श्वे॒त्या । त्या ।
   त्वम् । सि॒न्धो॒ इति॑ । कुभ॑या । गो॒ऽम॒तीम् । क्रुमु॑म् । मे॒ह॒त्न्वा । स॒ऽरथ॑म् । याभिः॑ । ईय॑से ॥

   तृष्टऽअमया । प्रथमम् । यातवे । सऽजूः । सुऽसर्त्वा । रसया । श्वेत्या । त्या ।
   त्वम् । सिन्धो इति । कुभया । गोऽमतीम् । क्रुमुम् । मेहत्न्वा । सऽरथम् । याभिः । ईयसे ॥

   tṛṣṭá-amayā ǀ prathamám ǀ yā́tave ǀ sa-jū́ḥ ǀ su-sártvā ǀ rasáyā ǀ śvetyā́ ǀ tyā́ ǀ
   tvám ǀ sindho íti ǀ kúbhayā ǀ go-matī́m ǀ krúmum ǀ mehatnvā́ ǀ sa-rátham ǀ yā́bhiḥ ǀ ī́yase ǁ

   tṛṣṭa-amayā ǀ prathamam ǀ yātave ǀ sa-jūḥ ǀ su-sartvā ǀ rasayā ǀ śvetyā ǀ tyā ǀ
   tvam ǀ sindho iti ǀ kubhayā ǀ go-matīm ǀ krumum ǀ mehatnvā ǀ sa-ratham ǀ yābhiḥ ǀ īyase ǁ

   10.75.6 Aṣṭaka 8.3.7.1Anuvāka 10.6.66Interpretations

7. Ṛk 7

   ऋजी॒त्येनी॒ रुश॑ती महि॒त्वा परि॒ ज्रयां॑सि भरते॒ रजां॑सि ।
   अद॑ब्धा॒ सिंधु॑र॒पसा॑म॒पस्त॒माश्वा॒ न चि॒त्रा वपु॑षीव दर्श॒ता ॥

   ऋजीत्य् एनी रुशती महित्वा परि ज्रयांसि भरते रजांसि |
   अदब्धा सिन्धुर् अपसाम् अपस्तमाश्वा न चित्रा वपुषीव दर्शता ||

   ṛ́jītyénī rúśatī mahitvā́ pári jráyāṃsi bharate rájāṃsi ǀ
   ádabdhā síndhurapásāmapástamā́śvā ná citrā́ vápuṣīva darśatā́ ǁ

   ṛjīty enī ruśatī mahitvā pari jrayāṃsi bharate rajāṃsi |
   adabdhā sindhur apasām apastamāśvā na citrā vapuṣīva darśatā ||

   ऋजी॑ती । एनी॑ । रुश॑ती । म॒हि॒ऽत्वा । परि॑ । ज्रयां॑सि । भ॒र॒ते॒ । रजां॑सि ।
   अद॑ब्धा । सिन्धुः॑ । अ॒पसा॑म् । अ॒पःऽत॑मा । अश्वा॑ । न । चि॒त्रा । वपु॑षीऽइव । द॒र्श॒ता ॥

   ऋजीती । एनी । रुशती । महिऽत्वा । परि । ज्रयांसि । भरते । रजांसि ।
   अदब्धा । सिन्धुः । अपसाम् । अपःऽतमा । अश्वा । न । चित्रा । वपुषीऽइव । दर्शता ॥

   ṛ́jītī ǀ énī ǀ rúśatī ǀ mahi-tvā́ ǀ pári ǀ jráyāṃsi ǀ bharate ǀ rájāṃsi ǀ
   ádabdhā ǀ síndhuḥ ǀ apásām ǀ apáḥ-tamā ǀ áśvā ǀ ná ǀ citrā́ ǀ vápuṣī-iva ǀ darśatā́ ǁ

   ṛjītī ǀ enī ǀ ruśatī ǀ mahi-tvā ǀ pari ǀ jrayāṃsi ǀ bharate ǀ rajāṃsi ǀ
   adabdhā ǀ sindhuḥ ǀ apasām ǀ apaḥ-tamā ǀ aśvā ǀ na ǀ citrā ǀ vapuṣī-iva ǀ darśatā ǁ

   10.75.7 Aṣṭaka 8.3.7.2Anuvāka 10.6.67Interpretations

8. Ṛk 8

   स्वश्वा॒ सिंधुः॑ सु॒रथा॑ सु॒वासा॑ हिर॒ण्ययी॒ सुकृ॑ता वा॒जिनी॑वती ।
   ऊर्णा॑वती युव॒तिः सी॒लमा॑वत्यु॒ताधि॑ वस्ते सु॒भगा॑ मधु॒वृधं॑ ॥

   स्वश्वा सिन्धुः सुरथा सुवासा हिरण्ययी सुकृता वाजिनीवती |
   ऊर्णावती युवतिः सीलमावत्य् उताधि वस्ते सुभगा मधुवृधम् ||

   sváśvā síndhuḥ suráthā suvā́sā hiraṇyáyī súkṛtā vājínīvatī ǀ
   ū́rṇāvatī yuvatíḥ sīlámāvatyutā́dhi vaste subhágā madhuvṛ́dham ǁ

   svaśvā sindhuḥ surathā suvāsā hiraṇyayī sukṛtā vājinīvatī |
   ūrṇāvatī yuvatiḥ sīlamāvaty utādhi vaste subhagā madhuvṛdham ||

   सु॒ऽअश्वा॑ । सिन्धुः॑ । सु॒ऽरथा॑ । सु॒ऽवासाः॑ । हि॒र॒ण्ययी॑ । सुऽकृ॑ता । वा॒जिनी॑ऽवती ।
   ऊर्णा॑ऽवती । यु॒व॒तिः । सी॒लमा॑ऽवती । उ॒त । अधि॑ । व॒स्ते॒ । सु॒ऽभगा॑ । म॒धु॒ऽवृध॑म् ॥

   सुऽअश्वा । सिन्धुः । सुऽरथा । सुऽवासाः । हिरण्ययी । सुऽकृता । वाजिनीऽवती ।
   ऊर्णाऽवती । युवतिः । सीलमाऽवती । उत । अधि । वस्ते । सुऽभगा । मधुऽवृधम् ॥

   su-áśvā ǀ síndhuḥ ǀ su-ráthā ǀ su-vā́sāḥ ǀ hiraṇyáyī ǀ sú-kṛtā ǀ vājínī-vatī ǀ
   ū́rṇā-vatī ǀ yuvatíḥ ǀ sīlámā-vatī ǀ utá ǀ ádhi ǀ vaste ǀ su-bhágā ǀ madhu-vṛ́dham ǁ

   su-aśvā ǀ sindhuḥ ǀ su-rathā ǀ su-vāsāḥ ǀ hiraṇyayī ǀ su-kṛtā ǀ vājinī-vatī ǀ
   ūrṇā-vatī ǀ yuvatiḥ ǀ sīlamā-vatī ǀ uta ǀ adhi ǀ vaste ǀ su-bhagā ǀ madhu-vṛdham ǁ

   10.75.8 Aṣṭaka 8.3.7.3Anuvāka 10.6.68Interpretations

9. Ṛk 9

   सु॒खं रथं॑ युयुजे॒ सिंधु॑र॒श्विनं॒ तेन॒ वाजं॑ सनिषद॒स्मिन्ना॒जौ ।
   म॒हान्ह्य॑स्य महि॒मा प॑न॒स्यतेऽद॑ब्धस्य॒ स्वय॑शसो विर॒प्शिनः॑ ॥

   सुखं रथं युयुजे सिन्धुर् अश्विनं तेन वाजं सनिषद् अस्मिन्न् आजौ |
   महान् ह्य् अस्य महिमा पनस्यते ऽदब्धस्य स्वयशसो विरप्शिनः ||

   sukhám rátham yuyuje síndhuraśvínam téna vā́jam saniṣadasmínnājáu ǀ
   mahā́nhyásya mahimā́ panasyáté’dabdhasya sváyaśaso virapśínaḥ ǁ

   sukhaṃ rathaṃ yuyuje sindhur aśvinaṃ tena vājaṃ saniṣad asminn ājau |
   mahān hy asya mahimā panasyate 'dabdhasya svayaśaso virapśinaḥ ||

   सु॒ऽखम् । रथ॑म् । यु॒यु॒जे॒ । सिन्धुः॑ । अ॒श्विन॑म् । तेन॑ । वाज॑म् । स॒नि॒ष॒त् । अ॒स्मिन् । आ॒जौ ।
   म॒हान् । हि । अ॒स्य॒ । म॒हि॒मा । प॒न॒स्यते॑ । अद॑ब्धस्य । स्वऽय॑शसः । वि॒ऽर॒प्शिनः॑ ॥

   सुऽखम् । रथम् । युयुजे । सिन्धुः । अश्विनम् । तेन । वाजम् । सनिषत् । अस्मिन् । आजौ ।
   महान् । हि । अस्य । महिमा । पनस्यते । अदब्धस्य । स्वऽयशसः । विऽरप्शिनः ॥

   su-khám ǀ rátham ǀ yuyuje ǀ síndhuḥ ǀ aśvínam ǀ téna ǀ vā́jam ǀ saniṣat ǀ asmín ǀ ājáu ǀ
   mahā́n ǀ hí ǀ asya ǀ mahimā́ ǀ panasyáte ǀ ádabdhasya ǀ svá-yaśasaḥ ǀ vi-rapśínaḥ ǁ

   su-kham ǀ ratham ǀ yuyuje ǀ sindhuḥ ǀ aśvinam ǀ tena ǀ vājam ǀ saniṣat ǀ asmin ǀ ājau ǀ
   mahān ǀ hi ǀ asya ǀ mahimā ǀ panasyate ǀ adabdhasya ǀ sva-yaśasaḥ ǀ vi-rapśinaḥ ǁ

   10.75.9 Aṣṭaka 8.3.7.4Anuvāka 10.6.69Interpretations

Text, recitation and interpretations from the Ṛgveda database of theveda.org.in.