Devatā देवता

Indra

Ṛṣi ऋषि

Gaurivīti Śāktya

Chandas छन्दस्

Triṣṭubh

1. Ṛk 1

   वसू॑नां वा चर्कृष॒ इय॑क्षंधि॒या वा॑ य॒ज्ञैर्वा॒ रोद॑स्योः ।
   अर्वं॑तो वा॒ ये र॑यि॒मंतः॑ सा॒तौ व॒नुं वा॒ ये सु॒श्रुणं॑ सु॒श्रुतो॒ धुः ॥

   वसूनां वा चर्कृष इयक्षन् धिया वा यज्ञैर् वा रोदस्योः |
   अर्वन्तो वा ये रयिमन्तः सातौ वनुं वा ये सुश्रुणं सुश्रुतो धुः ||

   vásūnām vā carkṛṣa íyakṣandhiyā́ vā yajñáirvā ródasyoḥ ǀ
   árvanto vā yé rayimántaḥ sātáu vanúm vā yé suśrúṇam suśrúto dhúḥ ǁ

   vasūnāṃ vā carkṛṣa iyakṣan dhiyā vā yajñair vā rodasyoḥ |
   arvanto vā ye rayimantaḥ sātau vanuṃ vā ye suśruṇaṃ suśruto dhuḥ ||

   वसू॑नाम् । वा॒ । च॒र्कृ॒षे॒ । इय॑क्षन् । धि॒या । वा॒ । य॒ज्ञैः । वा॒ । रोद॑स्योः ।
   अर्व॑न्तः । वा॒ । ये । र॒यि॒ऽमन्तः॑ । सा॒तौ । व॒नुम् । वा॒ । ये । सु॒ऽश्रुण॑म् । सु॒ऽश्रुतः॑ । धुरिति॒ धुः ॥

   वसूनाम् । वा । चर्कृषे । इयक्षन् । धिया । वा । यज्ञैः । वा । रोदस्योः ।
   अर्वन्तः । वा । ये । रयिऽमन्तः । सातौ । वनुम् । वा । ये । सुऽश्रुणम् । सुऽश्रुतः । धुरिति धुः ॥

   vásūnām ǀ vā ǀ carkṛṣe ǀ íyakṣan ǀ dhiyā́ ǀ vā ǀ yajñáiḥ ǀ vā ǀ ródasyoḥ ǀ
   árvantaḥ ǀ vā ǀ yé ǀ rayi-mántaḥ ǀ sātáu ǀ vanúm ǀ vā ǀ yé ǀ su-śrúṇam ǀ su-śrútaḥ ǀ dhúríti dhúḥ ǁ

   vasūnām ǀ vā ǀ carkṛṣe ǀ iyakṣan ǀ dhiyā ǀ vā ǀ yajñaiḥ ǀ vā ǀ rodasyoḥ ǀ
   arvantaḥ ǀ vā ǀ ye ǀ rayi-mantaḥ ǀ sātau ǀ vanum ǀ vā ǀ ye ǀ su-śruṇam ǀ su-śrutaḥ ǀ dhuriti dhuḥ ǁ

   10.74.1 Aṣṭaka 8.3.5.1Anuvāka 10.6.55Interpretations

2. Ṛk 2

   हव॑ एषा॒मसु॑रो नक्षत॒ द्यां श्र॑वस्य॒ता मन॑सा निंसत॒ क्षां ।
   चक्षा॑णा॒ यत्र॑ सुवि॒ताय॑ दे॒वा द्यौर्न वारे॑भिः कृ॒णवं॑त॒ स्वैः ॥

   हव एषाम् असुरो नक्षत द्यां श्रवस्यता मनसा निंसत क्षाम् |
   चक्षाणा यत्र सुविताय देवा द्यौर् न वारेभिः कृणवन्त स्वैः ||

   háva eṣāmásuro nakṣata dyā́m śravasyatā́ mánasā niṃsata kṣā́m ǀ
   cákṣāṇā yátra suvitā́ya devā́ dyáurná vā́rebhiḥ kṛṇávanta sváiḥ ǁ

   hava eṣām asuro nakṣata dyāṃ śravasyatā manasā niṃsata kṣām |
   cakṣāṇā yatra suvitāya devā dyaur na vārebhiḥ kṛṇavanta svaiḥ ||

   हवः॑ । ए॒षा॒म् । असु॑रः । न॒क्ष॒त॒ । द्याम् । श्र॒व॒स्य॒ता । मन॑सा । निं॒स॒त॒ । क्षाम् ।
   चक्षा॑णाः । यत्र॑ । सु॒वि॒ताय॑ । दे॒वाः । द्यौः । न । वारे॑भिः । कृ॒णव॑न्त । स्वैः ॥

   हवः । एषाम् । असुरः । नक्षत । द्याम् । श्रवस्यता । मनसा । निंसत । क्षाम् ।
   चक्षाणाः । यत्र । सुविताय । देवाः । द्यौः । न । वारेभिः । कृणवन्त । स्वैः ॥

   hávaḥ ǀ eṣām ǀ ásuraḥ ǀ nakṣata ǀ dyā́m ǀ śravasyatā́ ǀ mánasā ǀ niṃsata ǀ kṣā́m ǀ
   cákṣāṇāḥ ǀ yátra ǀ suvitā́ya ǀ devā́ḥ ǀ dyáuḥ ǀ ná ǀ vā́rebhiḥ ǀ kṛṇávanta ǀ sváiḥ ǁ

   havaḥ ǀ eṣām ǀ asuraḥ ǀ nakṣata ǀ dyām ǀ śravasyatā ǀ manasā ǀ niṃsata ǀ kṣām ǀ
   cakṣāṇāḥ ǀ yatra ǀ suvitāya ǀ devāḥ ǀ dyauḥ ǀ na ǀ vārebhiḥ ǀ kṛṇavanta ǀ svaiḥ ǁ

   10.74.2 Aṣṭaka 8.3.5.2Anuvāka 10.6.56Interpretations

3. Ṛk 3

   इ॒यमे॑षाम॒मृता॑नां॒ गीः स॒र्वता॑ता॒ ये कृ॒पणं॑त॒ रत्नं॑ ।
   धियं॑ च य॒ज्ञं च॒ साधं॑त॒स्ते नो॑ धांतु वस॒व्य१॒॑मसा॑मि ॥

   इयम् एषाम् अमृतानां गीः सर्वताता ये कृपणन्त रत्नम् |
   धियं च यज्ञं च साधन्तस् ते नो धान्तु वसव्यम् असामि ||

   iyámeṣāmamṛ́tānām gī́ḥ sarvátātā yé kṛpáṇanta rátnam ǀ
   dhíyam ca yajñám ca sā́dhantasté no dhāntu vasavyámásāmi ǁ

   iyam eṣām amṛtānāṃ gīḥ sarvatātā ye kṛpaṇanta ratnam |
   dhiyaṃ ca yajñaṃ ca sādhantas te no dhāntu vasavyam asāmi ||

   इ॒यम् । ए॒षा॒म् । अ॒मृता॑नाम् । गीः । स॒र्वऽता॑ता । ये । कृ॒पण॑न्त । रत्न॑म् ।
   धिय॑म् । च॒ । य॒ज्ञम् । च॒ । साध॑न्तः । ते । नः॒ । धा॒न्तु॒ । व॒स॒व्य॑म् । असा॑मि ॥

   इयम् । एषाम् । अमृतानाम् । गीः । सर्वऽताता । ये । कृपणन्त । रत्नम् ।
   धियम् । च । यज्ञम् । च । साधन्तः । ते । नः । धान्तु । वसव्यम् । असामि ॥

   iyám ǀ eṣām ǀ amṛ́tānām ǀ gī́ḥ ǀ sarvá-tātā ǀ yé ǀ kṛpáṇanta ǀ rátnam ǀ
   dhíyam ǀ ca ǀ yajñám ǀ ca ǀ sā́dhantaḥ ǀ té ǀ naḥ ǀ dhāntu ǀ vasavyám ǀ ásāmi ǁ

   iyam ǀ eṣām ǀ amṛtānām ǀ gīḥ ǀ sarva-tātā ǀ ye ǀ kṛpaṇanta ǀ ratnam ǀ
   dhiyam ǀ ca ǀ yajñam ǀ ca ǀ sādhantaḥ ǀ te ǀ naḥ ǀ dhāntu ǀ vasavyam ǀ asāmi ǁ

   10.74.3 Aṣṭaka 8.3.5.3Anuvāka 10.6.57Interpretations

4. Ṛk 4

   आ तत्त॑ इंद्रा॒यवः॑ पनंता॒भि य ऊ॒र्वं गोमं॑तं॒ तितृ॑त्सान् ।
   स॒कृ॒त्स्वं१॒॑ ये पु॑रुपु॒त्रां म॒हीं स॒हस्र॑धारां बृह॒तीं दुदु॑क्षन् ॥

   आ तत् त इन्द्रायवः पनन्ताभि य ऊर्वं गोमन्तं तितृत्सान् |
   सकृत्स्वं ये पुरुपुत्राम् महीं सहस्रधाराम् बृहतीं दुदुक्षन् ||

   ā́ tátta indrāyávaḥ panantābhí yá ūrvám gómantam títṛtsān ǀ
   sakṛtsvám yé puruputrā́m mahī́m sahásradhārām bṛhatī́m dúdukṣan ǁ

   ā tat ta indrāyavaḥ panantābhi ya ūrvaṃ gomantaṃ titṛtsān |
   sakṛtsvaṃ ye puruputrām mahīṃ sahasradhārām bṛhatīṃ dudukṣan ||

   आ । तत् । ते॒ । इ॒न्द्र॒ । आ॒यवः॑ । प॒न॒न्त॒ । अ॒भि । ये । ऊ॒र्वम् । गोऽम॑न्तम् । तितृ॑त्सान् ।
   स॒कृ॒त्ऽस्व॑म् । ये । पु॒रु॒ऽपु॒त्राम् । म॒हीम् । स॒हस्र॑ऽधाराम् । बृ॒ह॒तीम् । दुधु॑क्षन् ॥

   आ । तत् । ते । इन्द्र । आयवः । पनन्त । अभि । ये । ऊर्वम् । गोऽमन्तम् । तितृत्सान् ।
   सकृत्ऽस्वम् । ये । पुरुऽपुत्राम् । महीम् । सहस्रऽधाराम् । बृहतीम् । दुधुक्षन् ॥

   ā́ ǀ tát ǀ te ǀ indra ǀ āyávaḥ ǀ pananta ǀ abhí ǀ yé ǀ ūrvám ǀ gó-mantam ǀ títṛtsān ǀ
   sakṛt-svám ǀ yé ǀ puru-putrā́m ǀ mahī́m ǀ sahásra-dhārām ǀ bṛhatī́m ǀ dúdhukṣan ǁ

   ā ǀ tat ǀ te ǀ indra ǀ āyavaḥ ǀ pananta ǀ abhi ǀ ye ǀ ūrvam ǀ go-mantam ǀ titṛtsān ǀ
   sakṛt-svam ǀ ye ǀ puru-putrām ǀ mahīm ǀ sahasra-dhārām ǀ bṛhatīm ǀ dudhukṣan ǁ

   10.74.4 Aṣṭaka 8.3.5.4Anuvāka 10.6.58Interpretations

5. Ṛk 5

   शची॑व॒ इंद्र॒मव॑से कृणुध्व॒मना॑नतं द॒मयं॑तं पृत॒न्यून् ।
   ऋ॒भु॒क्षणं॑ म॒घवा॑नं सुवृ॒क्तिं भर्ता॒ यो वज्रं॒ नर्यं॑ पुरु॒क्षुः ॥

   शचीव इन्द्रम् अवसे कृणुध्वम् अनानतं दमयन्तम् पृतन्यून् |
   ऋभुक्षणम् मघवानं सुवृक्तिम् भर्ता यो वज्रं नर्यम् पुरुक्षुः ||

   śácīva índramávase kṛṇudhvamánānatam damáyantam pṛtanyū́n ǀ
   ṛbhukṣáṇam maghávānam suvṛktím bhártā yó vájram náryam purukṣúḥ ǁ

   śacīva indram avase kṛṇudhvam anānataṃ damayantam pṛtanyūn |
   ṛbhukṣaṇam maghavānaṃ suvṛktim bhartā yo vajraṃ naryam purukṣuḥ ||

   शची॑ऽवः । इन्द्र॑म् । अव॑से । कृ॒णु॒ध्व॒म् । अना॑नतम् । द॒मय॑न्तम् । पृ॒त॒न्यून् ।
   ऋ॒भु॒क्षण॑म् । म॒घऽवा॑नम् । सु॒ऽवृ॒क्तिम् । भर्ता॑ । यः । वज्र॑म् । नर्य॑म् । पु॒रु॒ऽक्षुः ॥

   शचीऽवः । इन्द्रम् । अवसे । कृणुध्वम् । अनानतम् । दमयन्तम् । पृतन्यून् ।
   ऋभुक्षणम् । मघऽवानम् । सुऽवृक्तिम् । भर्ता । यः । वज्रम् । नर्यम् । पुरुऽक्षुः ॥

   śácī-vaḥ ǀ índram ǀ ávase ǀ kṛṇudhvam ǀ ánānatam ǀ damáyantam ǀ pṛtanyū́n ǀ
   ṛbhukṣáṇam ǀ maghá-vānam ǀ su-vṛktím ǀ bhártā ǀ yáḥ ǀ vájram ǀ náryam ǀ puru-kṣúḥ ǁ

   śacī-vaḥ ǀ indram ǀ avase ǀ kṛṇudhvam ǀ anānatam ǀ damayantam ǀ pṛtanyūn ǀ
   ṛbhukṣaṇam ǀ magha-vānam ǀ su-vṛktim ǀ bhartā ǀ yaḥ ǀ vajram ǀ naryam ǀ puru-kṣuḥ ǁ

   10.74.5 Aṣṭaka 8.3.5.5Anuvāka 10.6.59Interpretations

6. Ṛk 6

   यद्वा॒वान॑ पुरु॒तमं॑ पुरा॒षाळा वृ॑त्र॒हेंद्रो॒ नामा॑न्यप्राः ।
   अचे॑ति प्रा॒सह॒स्पति॒स्तुवि॑ष्मा॒न्यदी॑मु॒श्मसि॒ कर्त॑वे॒ कर॒त्तत् ॥

   यद् वावान पुरुतमम् पुराषाऌ आ वृत्रहेन्द्रो नामान्य् अप्राः |
   अचेति प्रासहस् पतिस् तुविष्मान् यद् ईम् उश्मसि कर्तवे करत् तत् ||

   yádvāvā́na purutámam purāṣā́ḷā́ vṛtrahéndro nā́mānyaprāḥ ǀ
   áceti prāsáhaspátistúviṣmānyádīmuśmási kártave kárattát ǁ

   yad vāvāna purutamam purāṣāḷ ā vṛtrahendro nāmāny aprāḥ |
   aceti prāsahas patis tuviṣmān yad īm uśmasi kartave karat tat ||

   यत् । व॒वान॑ । पु॒रु॒ऽतम॑म् । पु॒रा॒षाट् । आ । वृ॒त्र॒ऽहा । इन्द्रः॑ । नामा॑नि । अ॒प्राः॒ ।
   अचे॑ति । प्र॒ऽसहः॑ । पतिः॑ । तुवि॑ष्मान् । यत् । ई॒म् । उ॒श्मसि॑ । कर्त॑वे । कर॑त् । तत् ॥

   यत् । ववान । पुरुऽतमम् । पुराषाट् । आ । वृत्रऽहा । इन्द्रः । नामानि । अप्राः ।
   अचेति । प्रऽसहः । पतिः । तुविष्मान् । यत् । ईम् । उश्मसि । कर्तवे । करत् । तत् ॥

   yát ǀ vavā́na ǀ puru-támam ǀ purāṣā́ṭ ǀ ā́ ǀ vṛtra-hā́ ǀ índraḥ ǀ nā́māni ǀ aprāḥ ǀ
   áceti ǀ pra-sáhaḥ ǀ pátiḥ ǀ túviṣmān ǀ yát ǀ īm ǀ uśmási ǀ kártave ǀ kárat ǀ tát ǁ

   yat ǀ vavāna ǀ puru-tamam ǀ purāṣāṭ ǀ ā ǀ vṛtra-hā ǀ indraḥ ǀ nāmāni ǀ aprāḥ ǀ
   aceti ǀ pra-sahaḥ ǀ patiḥ ǀ tuviṣmān ǀ yat ǀ īm ǀ uśmasi ǀ kartave ǀ karat ǀ tat ǁ

   10.74.6 Aṣṭaka 8.3.5.6Anuvāka 10.6.60Interpretations

Text, recitation and interpretations from the Ṛgveda database of theveda.org.in.